သိုၵ်းလူင်ပွင်ၸိုင်ႈလႄႈ တပ်ႉသိုၵ်းပူတ်းပွႆႇၸိူဝ်ႉၸၢတ်ႈ တဢၢင်း ပဵၼ်ပၢင်တိုၵ်းၵၼ်ၼႂ်း ၸႄႈ ဝဵင်းၵျွၵ်ႉမႄး၊ သိုၵ်းမၢၼ်ႈတၢႆသွင်မၢတ်ႇသွင်။

ဝၼ်းတီႈ 07/04/2015 တပ်ႉသိုၵ်းလူင်ပွင်ၸိုင်ႈ တပ်ႉမ  (77) ဢဵၼ်ႁႅင်းမွၵ်ႈ 100 လႄႈ တပ်ႉထႅဝ် သိုၵ်းတဢၢင်း တႂ်ႈတပ်ႉၵွင် 987 ဢဵၼ်ႁႅင်းမွၵ်ႈ 20 ပၢႆ လႆႈႁူပ်ႉၺႃးၵၼ်  ၵႄႈၵၢင်ဝၢၼ်ႈပၢင်သၢင်းလႄႈ ဝၢၼ်ႈႁူးၵွၵ်ႇ  ၸႄႈဝဵင်းၵျႂၵ်ႉမႄး ၊  ၸိုင်ႈတႆးပွတ်းႁွင်ႇ သေလႆပဵၼ်ပၢင်တိုၵ်းၵၼ်။

ၸဝ်ႈသိုၵ်းလူင် တႃႉဢၢႆႈၵျေႃႇ ၾၢႆႇပွင်ႇၶၢဝ်ႇ တပ်ႉသိုၵ်းတဢၢင်း လၢတ်ႈဝႃႈ “ပၢင်တိုၵ်းပဵၼ်မိူဝ်ႈ ယၢမ်း ၵၢင်ၼႂ်  6 မူင်း 45 မိၼိတ်ႉ။ ပဵၼ်ပၢင်တိုၵ်းၵၼ်မွၵ်ႈ ၶိုင်ႈၸူဝ်ႈမူင်း။ ၾၢႆႇသိုၵ်းမၢၼ်ႈ  တၢႆ 2 ၸဵပ်း 2။ ၾၢႆႇတပ်ႉသိုၵ်းတဢၢင်း လွတ်ႈၽေး။ ၵွပ်ႈပိူဝ်ႈမၼ်းပဵၼ် ၼႂ်းပိုၼ်ႉတီႈႁဝ်းၶႃႈတူင်ႉၼိုင်” - ဝႃႈၼႆ။

သိုၵ်းလူင်ပွင်ၸိုင်ႈၼႆႉ တႃႇတူင်ႉၼိုင်ၼႂ်းၼႃႈလိၼ် ၸႄႈဝဵင်းၵျွၵ်ႉမႄးၼႆသေ မိူဝ်ႈလိူၼ်ပူၼ်ႉ ယင်းတီႉၺွပ်း ၵူၼ်းဝၢၼ်ႈ 10 ပၢႆ ႁႂ်ႈႁၢပ်ႇၶူဝ်းသူင်ႇတၢင်းပၼ်ၶဝ်- ၵူၼ်းၼႂ်းပိုၼ်ႉတီႈလၢတ်ႈ။

တႃႉဢၢႆႈၵျေႃႇ လၢတ်ႈဝႃႈ “ သိုၵ်းမၢၼ်ႈယင်းတိုၵ်ႉထႅမ်ႁႅင်းသိုၵ်း ၶိုၼ်ႈမႃးယူႇတိၵ်းတိၵ်းတႄႉ တႃႇတေပဵၼ် ပၢင်လူင်းလၢႆးမိုဝ်း ၵိုတ်းယိုဝ်းပိုၼ်ႉတူဝ်ႈမိူင်းၼၼ်ႉ တေဢမ်ႇငၢႆႈငၢႆႈ။ ပေႃးၶႂ်ႈၸဵဝ်းဢုပ်ႇၵၢၼ်မိူင်း လူင်ပွင်ၸိုင်ႈ တၵ်းလႆႈထွၼ်ႁႅင်းသိုၵ်းဢွၵ်ႇ ၼႃႈလိၼ်ၸၢဝ်းၶိူဝ်းဝႆးဝႆး ” -ဝႃႈၼႆ။

ၼႂ်းပီ 2015 ၼီႈၼႆႉၵူၺ်း သိုၵ်းတဢၢင်း လႆႈပဵၼ်ပၢင်တိုၵ်းၵၼ် တင်းသိုၵ်းမၢၼ်ႈဢမ်ႇယွမ်း 80 ၵမ်းပၢႆ။

တပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း(TNLA)ၼႆႉ ပဵၼ် ၽူႈၶဝ်ႈၸုမ်း NCCT ၸုမ်းၼိုင်ႈ၊ တူင်ႉၼိုင် ၼႂ်းၸိုင်ႈတႆးပွတ်းႁွင်ႇ။  ပဵၼ်ၸုမ်းဢၼ်ပႆႇလႆႈလူင်းလၢႆးမိုဝ်း ၵိုတ်းယိုဝ်းတင်းလူင်ပွင်ၸိုင်ႈ။