တင်ႈတႄႇႁူဝ်လိူၼ်ၼႆႉမႃးတေႃႇယၢမ်းလဵဝ် ႁူဝ်ပဝ်ႈ ပႃႊတီႊႁူဝ်သိူဝ်
SNLDၸဝ်ႈၶုၼ်ထုၼ်းဢူး ဢွၵ်ႇၶၢဝ်းတၢင်း ၼႂ်းၸိုင်ႈတႆး ပွတ်းၸၢၼ်း တူၼ်ႈတီး
မိူင်းၼၢႆး လၢင်းၶိူဝ်း မိူင်းပၼ်ႇ ၵုၼ်ႁဵင် ၼမ်ႉၸၢင် သေ
ႁူပ်ႉထူပ်းပေႃႈမႄႈၵူၼ်း ပိုတ်ႇလုမ်းၽႄပႃႊတီႊ လၢႆလၢႆတီႈ
ထပ်းၵၼ်ၵႂႃႇလၢႆလၢႆဝဵင်း။
|
Photo: Ying Noom Noom |
ၶၢဝ်းတၢင်း ၸဝ်ႈၶုၼ်ထုၼ်းဢူး ဝၼ်းတီႈ 3- 4/4/2015
ပိုတ်ႇလုမ်းတီႈမိူင်းပၼ်ႇ၊ ဝၼ်းတီႈ 5 – 6/4/2015 ၵုၼ်ႁဵင်၊ ၵႃလိ၊
ၽၢင်လၢင်း၊ ဝၼ်းတီႈ 7/4/2015 ၵိင်ႇၸႄႈမိူင်းၸၢင် ၊ ၸႄႈဝဵင်းမိူင်းသူႈ၊
ဝၼ်းတီႈ 8 ၼႆႉသမ်ႉ ဝဵင်းလွႆလႅမ်။ ႁူပ်ႉထူပ်းပေႃႈမႄႈ ၵူၼ်းမိူင်း
သပ်းလႅင်းၼႄ လွၵ်းၸုၵ်းပႃႊတီႊ လႄႈ လၵ်းၼမ်း လၵ်းၵၢၼ် ပႃႊတီႊ
ငဝ်းလၢႆးၵၢၼ်မိူင်း ယၢမ်းလဵဝ်။ ၵႅတ်းမႆလၢႆႈ ပိုတ်ႇလုမ်းၽႄ ယၢမ်းလဵဝ်
လုမ်းၽႄ မီးၵႂႃႇ 51 တီႈယဝ်ႉ ဝႃႈၼႆ။
|
Photo: Ying Noom Noom |
ႁူဝ်ပဝ်ႈလူင် SNLD ၸဝ်ႈၶုၼ်ထုၼ်းဢူး
မွၵ်ႇလၢတ်ႈၶေႃႈၵႂၢမ်းတီႈၵိင်ႇၸႄႈဝဵင်းၵႃႈလိ - “ဢႃႇၼႃႇၵၢတ်ႈမိူဝ်းၼႃႈၼႆႉ
မၼ်းမီးတီႈလုၵ်ႈဢွၼ်ႇၵူၼ်းၼုမ်ႇႁဝ်း။ ပေႃးႁဝ်းဢမ်ႇၽွမ်ႉၵၼ်ၸိုင်
မိူင်းတႆးႁဝ်းတေႁဵတ်းႁိုဝ် ၵတ်းယဵၼ်လႆႈ။ ၵဵဝ်ႇလူၺ်ႈတႃႇတေတွတ်ႈၶႅပ်းၵၢင်ၸႂ်
ၼႂ်းပီ 2015 ၼႆႉ ႁဝ်းတေဢမ်ႇၸႂ်ႉႁႅင်းငိုၼ်း
သေၸႂ်ႉၵူၼ်းဝၢၼ်ႈၵူၼ်းမိူင်းတွတ်ႈၶႅပ်းၵၢင်ၸႂ်၊ ႁဝ်းတေႁဵတ်းၸွမ်းတၢင်း
ဢၼ်ထုၵ်ႇမႅၼ်ႈၸိုဝ်ႈၸႂ်ႈမၼ်းၵူၺ်း၊ ဢဝ်ၵၢင်ၸႂ်ၵူၼ်းမိူင်းလႆႈၸ်ႂၼၼ်ႉၵူၺ်း” -
ဝႃႈၼႆ။
|
Photo: Ying Noom Noom |
လိူဝ်ၼၼ်ႉ ၸဝ်ႈၶုၼ်ထုၼ်းဢူး ယင်းလၢတ်ႈဝႃႈ
ပႃႊတီႊႁူဝ်သိူဝ်တႄႉ တိုၼ်းတေ သိုပ်ႇၶၢဝ်းတၢင်းၵၢၼ်မိူင်း
တႃႇႁႂ်ႈမီးသုၼ်ႇလႆႈၸိူဝ်ႉၸၢတ်ႈၽဵင်ႇပဵင်း ၸိူင်ႉၼင်ႇၶေႃႈၵိၼ်ၵႅၼ်ႇပၢင်လူင်
မီးဝႆႉၼၼ်ႉၵူၺ်း - ဝႃႈၼႆ။
|
Photo: Ying Noom Noom |
ၸဝ်ႈၶုၼ်ထုၼ်းဢူး ၼႆႉ ယုၵ်ႉလိူၵ်ႈပႅတ်ႈ ၶၢဝ်းတၢင်း
ပၢင်ႁူပ်ႉထူပ်း ၸွမ်ၸိုင်ႈတဵင်းၸဵင်ႇ ( ပၢင်ႁူပ်ႉဢုပ်ႇ 48 ၵေႃႉ၊
ႁၢင်ႈႁႅၼ်းတႃႇ ပၢင်ႁူပ်ႉထူပ်း 6 ၾၢႆႇ ၼႂ်းဝၼ်းသုၵ်းၼႆႉ )
ၵဵဝ်ႇၵပ်းၵၢၼ်မိူင်း တီႈၼေႇပျီႇတေႃႇ သေ ဢွၵ်ႇၶၢဝ်းတၢင်း ႁူပ်ႉထူပ်း
ၵူၼ်းမိူင်းၸိုင်ႈတႆး ပွတ်းၸၢၼ်း။
|
Photo: Ying Noom Noom |
ပႃႊတီႊႁူဝ်သိူဝ်ၼႆႉ ပေႉပၢင်လိူၵ်ႈတင်ႈမိူဝ်ႈ 1990 ၊ ပၢင်လိူၵ်ႈတင်ႈ 2010
ၼၼ်ႉ ဢမ်ႇလႆႈၶဝ်ႈၶႅင်ႇသေတႃႉ ၽွင်းတႅၼ်းၼႂ်းပႃႊတီႊသိူဝ်ၽိူၵ်ႇသမ်ႉ
ထွၼ်တူဝ်ဢွၵ်ႇမႃးၶဝ်ႈႁူမ်ႈလႄႈ ယၢမ်းလဵဝ် မီးဢဵၼ်ႁႅင်းၽွင်းတႅၼ်း ၼႂ်းသၽႃး
20 ၵေႃႉပၢႆ။
Tags:
News,
Politic