ပွႆးလူင်းပၢင်သွၼ် ႁူင်းႁဵၼ်းၸိူဝ်ႉၸၢတ်ႈ ၵဵင်းတုင် ၵူၼ်းၶဝ်ႈႁူမ်ႈၼမ်
ပၢင်ပွႆးလူင်းပၢင်သွၼ် ႁူင်းႁဵၼ်းၸိူဝ်ႉၸၢတ်ႈ ၵဵင်းတုင်
ၸိုင်ႈတႆးပွတ်းဢွၵ်ႇ၊ ဢၼ်ၸတ်းယဝ်ႉတူဝ်ႈၵႂႃႇ တီႈႁူင်းႁဵၼ်းၸိူဝ်ႉၸၢတ်ႈ
ဝၢၼ်ႈၵုင်း ဢိူင်ႇၵၢတ်ႇၾႃႉ၊ ၽွင်းႁၢင်လိူၼ်မၢတ်ႊၶျ် (2015) ၼႆႉ
မီးၵူၼ်းၶဝ်ႈႁူမ်ႈတင်းၼမ်။
ပူၼ်ႉမႃးမိူဝ်ႈဝၼ်းတီႈ 30-31/03/2015 မီးၵၢၼ်ၸတ်းႁဵတ်း
ပွႆးလူင်းပၢင်သွၼ် ႁူင်းႁဵၼ်းၸိူဝ်ႉၸၢတ်ႈ ၵဵင်းတုင်
တီႈႁူင်းႁဵၼ်းၸိူဝ်ႉၸၢတ်ႈ ဝၢၼ်ႈၵုင်း ဢိူင်ႇၵၢတ်ႇၾႃႉ ၸႄႈဝဵင်းၵဵင်းတုင်
ၸိုင်ႈတႆးပွတ်းဢွၵ်ႇ။ ပၢင်ပွႆးၼႆႉ ဝၼ်းတီႈ 30 ဝၢႆးဝၼ်း 4 မူင်း
လဵင်ႉၶဝ်ႈၽူႈၶဝ်ႈႁူမ်ႈပၢင်ပွႆး။ ႁူဝ်ၶမ်ႈယၢမ်း 5 မူင်းၶိုင်ႈ
တွၼ်ႈသူးလုၵ်ႈႁဵၼ်း ၸိူဝ်း (ဢွင်ႇ)ပူၼ်ႉၸၼ်ႉ။ ဝၢႆးၼၼ်ႉ
ၽူႈယႂ်ႇၵူၼ်းလူင်ၸိူဝ်းၶဝ်ႈႁူမ်ႈပၢင်ပွႆး မွၵ်ႇလၢတ်ႈၶေႃႈၵႂၢမ်း။
ၽူႈမွၵ်ႇလၢတ်ႈၶေႃႈၵႂၢမ်းၼႂ်းပၢင်ပွႆးၼႆႉ မီး 1.ႁူဝ်ပဝ်ႈႁူင်းႁဵၼ်း
လုင်းသြႃႇသႅင်ၶမ်း။ 2.ႁူဝ်ပဝ်ႈၵေႃႈလိၵ်ႈလၢႆး လႄႈၾိင်ႈငႄႈတႆး ၸၢႆးလႃႈ။
3.ၶူးသွၼ်ႁူင်းႁဵၼ်း ၶူးသၼ်ၸၼ် ၸိူဝ်းၼႆႉ။ ၼႂ်းဝၼ်းတီႈ 30 ၼႆႉ
ၽူႈၶဝ်ႈႁူမ်ႈတင်းမူတ်းမီး 400 ၵေႃႉပၢႆ။ ဝၼ်းတီႈ 31/03/2015 ၶၢဝ်းယၢမ်း
ႁူဝ်ၶမ်ႈ 7 မူင်း တေႃႇထိုင်တဵင်ႈၶိုၼ်း 12 မူင်း၊ မီးတၢင်းၵႃႈၼူၵ်ႉတူဝ်း၊
ၵႃႈယိူင်း၊ ပၢင်ႁွင်ႉၽဵင်းၵႂၢမ်းပၢၼ်မႂ်ႇ ၸိူဝ်းၼႆႉ။ ၽူႈၶဝ်ႈႁူမ်ႈမီးမွၵ်ႈ
1,000 ၵေႃႉ၊ ၼႂ်းၼႆႉ ပႃးၸဵမ်ၶူးသွၼ်၊ လုၵ်ႈႁဵၼ်း၊ ပေႃႈမႄႈၵူၼ်းမိူင်း၊
ၸုမ်းတူင်ႉၼိုင်တူင်ႇဝူင်းၵူၼ်း၊ ပႃႊတီႊၵၢၼ်မိူင်း ၸိူဝ်းၼႆႉ။
ၶူးသွၼ်ႁူင်းႁဵၼ်း လုင်းသၼ်ၸၼ် လၢတ်ႈဝႃႈ- “လုၵ်ႈႁဵၼ်းပီၼႆႉ မီး 98 ၵေႃႉ၊
ၶူးသွၼ်မီး 7 ၵေႃႉ (ယိင်း 3 ၸၢႆး 4)၊ ၸၼ်ႉလိၵ်ႈမီး 4 ၸၼ်ႉ မိူၼ်ၼင်ႇ
ၸၼ်ႉငဝ်ႈ၊ ၸၼ်ႉဢွၼ်ႇ၊ ၸၼ်ႉၵၢင်လႄႈ ၸၼ်ႉသုင်။ ပီၼႆႉ
တွပ်ႇလိၵ်ႈၵႂႃႇမိူဝ်ႈဝၼ်းတီႈ 17-18/03/2015 ၶၢဝ်းတၢင်း 2 ဝၼ်း- ဝႃႈၼႆ။
လုင်းသၼ်ၸၼ် သိုပ်ႇလၢတ်ႈထႅင်ႈဝႃႈ- “ႁူင်းႁဵၼ်းႁဝ်းၶႃႈၼႆႉ
ၼိုင်ႈပီမီးပၢင်တွပ်ႇလိၵ်ႈ 1 ပွၵ်ႈ။ တေဢိုတ်း 2 လိူၼ်သေၸင်ႇပိုတ်ႇၶိုၼ်း။
ပေႃးထိုင်မႃးဝၼ်းတီႈ 01/06/2015 တေပိုတ်ႇၶိုၼ်းႁူင်းႁဵၼ်းၵႂႃႇ- ဝႃႈၼႆ။
မူႇၸုမ်းဢၼ်ၶဝ်ႈႁူမ်ႈပၢင်ပွႆး မီး 8 ၸုမ်း-
1.ၵေႃလိၵ်ႈလၢႆးလႄႈၾိင်ႈငႄႈတႆး ၵဵင်းတုင်။ 2.ၵေႃၵမ်ၵၢၼ်
ႁူင်းႁဵၼ်းၸိူဝ်ႉၸၢတ်ႈ ၵဵင်းတုင်။ 3.ၸုမ်းၾိင်ႈငႄႈ တႆးၼိူဝ်။
4.ၸုမ်းၾိင်ႈငႄႈတႆးလိုဝ်ႉ။ 5.ၸုမ်းၾိင်ႈငႄႈတႆးလွႆ။ 6.ၸုမ်းမွၵ်ႇၵွၼ်
ၵဵင်းတုင်။ 7.ပႃႊတီႊႁူဝ်သိူဝ် (SNLD) ။ 8.ပႃႊတီႊသိူဝ်ၽိူၵ်ႇ (SNDP) ။
9.သင်ၶၸဝ်ႈ ၼႂ်းၵဵင်းတုင်။ 10.ၽူႈၵွၼ်းဝၢၼ်ႈၵွၼ်းဢိူင်ႇၶဝ် ၸဵမ်ၸိူဝ်းၼႆႉ။
ႁူင်းႁဵၼ်းၸိူဝ်ႉၸၢတ်ႈ ၵဵင်းတုင်ၼႆႉ ၵေႃႇတင်ႈမႃးမိူဝ်ႈဝၼ်းတီႈ 24/03/2014 ။
Tags: Education, News