ပႃႊတီႊႁူဝ်သိူဝ် (SNLD) ႁူပ်ႉထူပ်းလုၵ်ႈႁဵၼ်း ၸၼ်ႉၸွမ် မိူင်းဢမႄႊရိၵႃႊ ဢၼ်မႃးဢႅဝ်ႇယဵမ်ႈမိူင်းမၢၼ်ႈ တီႈသဵၼ်ႈတၢင်းဢလူင်ႇ ဝဵင်းလူင်တႃႈၵုင်ႈ။ ၸဝ်ႈၶုၼ်ထုၼ်းဢူး လၢတ်ႈၼႄလွင်ႈတူဝ်ထူပ်းၵၢၼ်မိူင်း။

ပႃႊတီႊႁူဝ်သိူဝ်ႁူပ်ႉထူပ်းလုၵ်ႈႁဵၼ်းၸၼ်ႉၸွမ် USA Photo: LKP

ဝၼ်းတီႈ 23/03/2015 (မိူဝ်ႈဝႃး) ယၢမ်း 16:00-17:30 မူင်း၊ ၸဝ်ႈၶုၼ်ထုၼ်းဢူး ပႃႊတီႊႁူဝ်သိူဝ် (SNLD) ႁူပ်ႉထူပ်းလုၵ်ႈႁဵၼ်း ၸၼ်ႉၸွမ် မိူင်းဢမႄႊရိၵႃႊ (Stanford University, California, USA) တီႈသဵၼ်ႈတၢင်းဢလူင်ႇ (My Garden Restaurants) ဝဵင်းလူင်တႃႈၵုင်ႈ။ တီႈပၢင်ႁူပ်ႉထူပ်းၼၼ်ႉ လုၵ်ႈႁဵၼ်းၸၼ်ႉၸွမ် Stanford University 24 ၵေႃႉ တွင်ႈထၢမ်ႁူဝ်ပဝ်ႈပႃႊတီႊႁူဝ်သိူဝ် (SNLD) ၸဝ်ႈၶုၼ်ထုၼ်းဢူး လႄႈ ၽူႈမီးပုၼ်ႈၽွၼ်းၼႂ်းပႃႊတီႊႁူဝ်သိူဝ် ၵဵဝ်ႇၵပ်းၵၢၼ်မိူင်း ၸိုင်ႈမိူင်း ႁုမ်ႈတုမ်မၢၼ်ႈ ဢိၵ်ႇ လွၵ်းၸုၵ်း၊ ယိူင်းမၢႆပႃႊတီႊႁူဝ်သိူဝ်။

ပၢင်ႁူပ်ႉထူပ်းၼၼ်ႉ ၸၢႆးၼုတ်း (ၸၢႆးၺုၼ်ႉလုၼ်ႇ) ၽူႈၼမ်းၼႂ်းၵူႈလွင်ႈလွင်ႈ ပႃႊတီႊႁူဝ်သိူဝ်၊ ၵႅမ်ၽူႈၼမ်းၼႂ်း ၸၢႆးလဵၵ်ႉ၊ ၽူႈတႅမ်ႈလိၵ်ႈ ၶုၼ်ယုင်းၶဵဝ်၊ ၸၢႆးလွႆၶမ်းပၢင်ႇ၊ ၼၢင်းၶမ်းၼွင်ႉ ၽူႈၶၢၼ်ပၢၵ်ႇ ၸုမ်းပႂ်ႉတူၺ်းမႄႈၼမ်ႉမိူင်းတႆး ၶဝ်ၸိူဝ်းၼႆႉၵေႃႈပႃး- ၽူႈၵွၼ်းႁွင်ႈၵၢၼ် ၵပ်းသၢၼ်တိတ်းတေႃႇၼွၵ်ႈမိူင်း လႄႈ ပၢႆးပၺ်ၺႃ ပႃႊတီႊႁူဝ်သိူဝ် ၸၢႆးသၢမ်ၾူၼ်သႅင် လၢတ်ႈ။

SNLD ႁူပ်ႉထူပ်းလုၵ်ႈႁဵၼ်းၸၼ်ႉၸွမ် USA Photo: LKP

တီႈပၢင်ႁူပ်ႉထူပ်းၼၼ်ႉ ႁူဝ်ပဝ်ႈ (SNLD) ၸဝ်ႈၶုၼ်ထုၼ်းဢူး သပ်းလႅင်းၼႄ ၵဵဝ်ႇၵပ်းလွင်ႈတူဝ်ထူပ်း မၼ်းၸဝ်ႈ ၼႂ်းၽဝႃႉၵၢၼ်မိူင်း ဢၼ်မၼ်းၸဝ်ႈလႆႈထူပ်းမႃးၸိူဝ်းၼၼ်ႉ လႄႈ လွင်ႈပၢင်လိူၵ်ႈတင်ႈမိူဝ်ႈပီ 1990 ။

ၽူႈၼမ်းၼႂ်းၵူႈလွင်ႈလွင်ႈ ၸၢႆးၼုတ်း လၢတ်ႈၼႄလုၵ်ႈႁဵၼ်း မိူင်းဝၼ်းတူၵ်းဝႃႈ- “သူၶဝ်တႄႉ မီးတိုဝ်ႉတၢင်း ဢႅဝ်ႇဝၢၼ်ႈလၢဝ်းမိူင်း ႁႃတၢင်းၶိုၼ်ႈယႂ်ႇ၊ လုၵ်ႈႁဵၼ်းမိူင်းႁဝ်းသမ်ႉ တိုၵ်ႉၶတ်းၸႂ် တႃႇမူၼ်ႉမႄးလႅၵ်ႈလၢႆႈ ပၵ်းပိူင်ပၢႆးပၺ်ၺႃ၊ ထုၵ်ႇတီႉၺွပ်းၶင်ၶွၵ်ႈဝႆႉယူႇ။ ယွၼ်ႉၼၼ် ပေႃးသူၶဝ်ပွၵ်ႈမိူဝ်းၶိုၼ်းမိူင်းသူၼႆ တွၼ်ႈတႃႇၸိူဝ်းၶဝ်တေလွတ်ႈပူၼ်ႉ ထိုင်ယိူင်းမၢႆၶဝ်ၼၼ်ႉ ၸွႆႈတူၵ်ႇလၢတ်ႈသူၼ်းဢီးပၼ်ၽွင်ႈ” - ဝႃႈၼႆ။

SNLD ႁူပ်ႉထူပ်းလုၵ်ႈႁဵၼ်းၸၼ်ႉၸွမ် USA Photo: LKP

ၵႅမ်ၽူႈၼမ်းၼႂ်း ၸၢႆးလဵၵ်ႉ လၢတ်ႈၼႄလွင်ႈပၼ်ႁႃၵၢၼ်မိူင်း ယၢမ်းလဵဝ် လႄႈ လွင်ႈပိူင်ငဝ်ႈပိုင်းမိူင်း 2008 ဢိၵ်ႇၶၵ်ႉတွၼ်ႈ ၵၢၼ်ငမ်းယဵၼ်- ၼႆယဝ်ႉ။

ၽူႈတႅမ်ႈလိၵ်ႈ ၶုၼ်ယုင်းၶဵဝ် ၵေႃႈလႆႈမႃးလၢတ်ႈၼႄ လွင်ႈပိုင်းမိူင်းတႆး လႄႈ ပိုၼ်းတႆး။ ၼၢင်းၶမ်းၼွင်ႉ ၽူႈၶၢၼ်ပၢၵ်ႇ ၸုမ်းပႂ်ႉတူၺ်းမႄႈၼမ်ႉမိူင်းတႆး ၵေႃႈသပ်းလႅင်းၼႄလွင်ႈၾၢႆ ဢၼ်တေၵေႃႇသၢင်ႈ ၼႂ်းမိူင်းတႆးဝႃႈ ၽွၼ်းၸႃႉမၼ်း မီးၼမ်လိူဝ်သေၽွၼ်းလီ ၸဵမ်ၸိူဝ်းၼႆႉ။

ပႃႊတီႊႁူဝ်သိူဝ်ႁူပ်ႉထူပ်းလုၵ်ႈႁဵၼ်းၸၼ်ႉၸွမ် USA Photo: LKP

လုၵ်ႈႁဵၼ်း (Master) ၸၼ်ႉၸွမ် Stanford University ၼႆႉ ဝၼ်းတီႈ 23/03/2015 ယၢမ်းၵၢင်ၼႂ် လႆႈႁူပ်ႉ သုၼ်ၵၢင်လွင်ႈငမ်းယဵၼ်မၢၼ်ႈ (MPC) ၊ ဝၼ်းတီႈ 24/03/2015 သိုပ်ႇၶၢဝ်းတၢင်းၵႂႃႇၼေႇပျီႇတေႃႇ၊ သင်လႆႈတိုဝ်ႉတၢင်း တေႁူပ်ႉထူပ်းပႃး ၼၢင်းဢွင်ႇသၢၼ်းၸုၵျီႇ- ၼႆယဝ်ႉ။