တပ်ႉသိုၵ်းတဢၢင်း  တူင်ႉၼိုင်ၵၢၼ်ၽဵဝ်ႈမူၺ်ႉ ယႃမဝ်းၵမ် တီႈဝၢၼ်ႈတႃႈၵူတ်ႉ ဢိူင်ႇပၢၼ်းသေး၊ ထုၵ်ႇသိုၵ်းမၢၼ်ႈ ဢဝ်ၵွင်ႈလူင်ယိုဝ်းသႂ်ႇ ပဵၼ်ပၢင်တိုၵ်းၵၼ်။

ဝၼ်းတီႈ 26/01/2015 ၵၢင်ၼႂ်ယၢမ်း 10:30 မူင်း၊ မိူဝ်ႈၽွင်း တပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း (TNLA) လူင်းပိုၼ်ႉတီႈ တူင်ႉၼိုင် ၵၢၼ်ၽဵဝ်ႈမူၺ်ႉယႃမဝ်းၵမ် ယူႇတီႈဝၢၼ်ႈတႃႈၵူတ်ႉ ဢိူင်ႇပၢၼ်းသေး ၸႄႈဝဵင်းၼမ်ႉၶမ်း ၸိုင်ႈတႆးပွတ်းႁွင်ႇၼၼ်ႉ ထုၵ်ႇသိုၵ်းမၢၼ်ႈ ဢဝ်ၵွင်ႈလူင်ယိုဝ်းသႂ်ႇ၊ ႁဵတ်းႁႂ်ႈသွင်ၾၢႆႇ လႆႈပဵၼ်ပၢင်တိုၵ်းၵၼ်-ၼႆယဝ်ႉ။

ဢွၼ်ၼႃႈၼႆႉ မိူဝ်ႈဝၼ်းတီႈ 25/01/2015 ၵၢင်ၶမ်ႈယၢမ်း 7 မူင်းထိုင် 8 မူင်းၵေႃႈ တပ်ႉသိုၵ်းမၢၼ်ႈ တပ်ႉၸုမ်းလူင် (တပ်ႉမ) 88 တင်း တပ်ႉသိုၵ်းတဢၢင်း TNLA  တပ်ႉၸုမ်း 1 ၊ တပ်ႉၵွင် 478 ပဵၼ်ပၢင်တိုၵ်းၵၼ် ၽွင်းမိူဝ်ႈတပ်ႉသိုၵ်းတဢၢင်း ၵႂႃႇၽဵဝ်ႈမူၺ်ႉယႃမဝ်းၵမ် ပွတ်းသူၼ်ယႃႈၸုမ်းပီႇတုၸိတ်ႉ ပၢၼ်းသေး ၸႄႈဝဵင်းၼမ်ႉၶမ်း- ၼႆယဝ်ႉ။

ၵဵဝ်ႇၵပ်းလွင်ႈၼႆႉ ၾၢႆႇပွင်ႇၶၢဝ်ႇ တပ်ႉသိုၵ်းတဢၢင်း လၢတ်ႈဝႃႈ - ၽူႈၵွၼ်းတပ်ႉမ 88 ၵႅမ်ၸွမ်သိုၵ်းတႅတ်ႉထုၼ်းဢူး ယၢမ်ႈလၢတ်ႈတီႈၵူၼ်းမိူင်းၼမ်ႉၶမ်းဝႃႈ တေၽဵဝ်ႈမူၺ်ႉယႃႈမဝ်းၵမ် ႁႂ်ႈထိုင်တီႈထိုင်လႅၼ်။ ၵူၺ်းၵႃႈ ပွတ်းတွၼ်ႈဢၼ်သူၼ်ယႃႈလိူင်ႇၼမ် မိူၼ်ၼင်ႇၼႂ်းဢိူင်ႇပၢၼ်းသေးၼၼ်ႉ ဢမ်ႇႁၼ်ၽဵဝ်ႈမူၺ်ႉသင်။  ယင်းပၢႆၵဵပ်းၵိၼ်ၶွၼ်ႇထႅင်ႈလႄႈ တပ်ႉသိုၵ်းတဢၢင်း ၸင်ႇလႆႈလူင်းၽဵဝ်ႈ ယႃႈ- ဝႃႈ ၼႆ။

ၾၢႆႇပွင်ႇၶၢဝ်ႇတပ်ႉသိုၵ်းတဢၢင်း လၢတ်ႈထႅင်ႈဝႃႈ- ပီၼႆႉ လႆႈငိၼ်းဝႃႈ ပီႇတုၸိတ်ႉ ၼႂ်းဢိူင်ႇပၢၼ်းသေး  ၽုၵ်ႇယႃႈ 1,000 ဢေႊၶိူဝ်ႊ ဢမ်ႇၼမ်ပဵင်းၵူႈပီ ။ ၼႂ်းႁူဝ်ပီၼႆႉမႃးၼႆႉ တပ်ႉသိုၵ်းတဢၢင်း တပ်ႉၸုမ်း 1 ၽဵဝ်ႈယႃႈမဝ်းၵမ် ယူႇၼႂ်းဢိူင်ႇပၢၼ်းသေး၊ ၽဵဝ်ႈသူၼ်ယႃႈလႆႈ  100 ဢေႊၶိူဝ်ႊယဝ်ႉ- ဝႃႈၼႆ။