ၸဝ်ႈၼႃႈတီႈဝႃႉ ပႂ်ႉလၢၼ်ႇ/ၵဵတ်ႉႁူမ်ႈတုမ် လႅၼ်ၶႅၼ်ႈဝႃႉ- မိူင်းလႃး တီႉၺွပ်း ၶႃႈႁၢပ်ႇၵၢၼ်မၢၼ်ႈ ပၢႆးပၺ်ႇၺႃႇလႄႈ ပၢႆးယူႇလီ ၵူၼ်းသိပ်းပၢႆ၊ ၸိူဝ်းလုၵ်ႉမိူင်းယၢင်း ဢၢၼ်းၶဝ်ႈၵႂႃႇၼႂ်း ၼႃႈလိၼ်ဝႃႉ တၢင်းမိူင်းပွၵ်ႉ။

ပူၼ်ႉမႃးမိူဝ်ႈဝၼ်းတီႈ 25/11/2014 မီးၶႃႈႁၢပ်ႇၵၢၼ်ၶုၼ်မၢၼ်ႈ ႁွင်ႈၵၢၼ်ၾၢႆႇပူၵ်းပွင်ၵူႈၸၢဝ်းၶိူဝ်း ပိုၼ်ႉတီႈလႅၼ်လိၼ် (ၼတလ) တီႈမိူင်းယၢင်း (ၸိုင်ႈတႆးပွတ်းဢွၵ်ႇ) ၾၢႆႇပၢႆးပၺ်ႇၺႃႇ၊ ပၢႆးယူႇလီ တင်းမူတ်း 14 ၵေႃႉ၊ လုၵ်ႉမိူင်းယၢင်း ဢွၵ်ႇၶၢဝ်းတၢင်းၵႂႃႇတၢင်း ၼႃႈလိၼ်ၽွင်းငမ်းတူဝ်ၵဝ်ႇဝႃႉ မိူင်းပွၵ်ႉ။ ၸိူဝ်းၶဝ် လႆႈထုၵ်ႇၸုမ်းဝႃႉ တီႉၺွပ်းတီႈလၢၼ်ႇ/ ၵဵတ်ႉႁူမ်ႈတုမ် လႅၼ်ၶႅၼ်ႈဝႃႉ တင်းမိူင်းလႃး၊ ၸဝ်ႈၼႃႈတီႈဝႃႉ ၵူတ်ႇထတ်းထဵတ်ႈထၢမ်သေ ၸႂ်ႉပွၵ်ႈၶိုၼ်းမိူင်းယၢင်း- ၼႆယဝ်ႉ။

ၵူၼ်းမိူင်းၽႅၼ် ၵေႃႉၼိုင်ႈလၢတ်ႈဝႃႈ-ၶႃႈႁၢပ်ႇၵၢၼ်ၶုၼ်မၢၼ်ႈၸိူဝ်းၼႆႉ လုၵ်ႉမိူင်းယၢင်း ဢွၵ်ႇၵႂႃႇမွၵ်ႈယၢမ်း 8 မူင်းၶိုင်ႈၵၢင်ၼႂ်။ ၸိူဝ်းၶဝ်ၼႆႉ ဢမ်ႇယွၼ်းဢၼုၺၢတ်ႈ တီႈၸဝ်ႈၼႃႈတီႈၸုမ်းဝႃႉ။ ၶဝ်လုၵ်ႉတီႈမိူင်းယၢင်း မႃးတၢင်းမိူင်းၽႅၼ်-ႁူဝ်တဝ်း၊ ဢၢင်ႈတေသိုပ်ႇၵႂႃႇတၢင်းမိူင်းပွၵ်ႉ ၼႃႈလိၼ်ၽွင်းငမ်းတူဝ်ၵဝ်ႇဝႃႉ။ ၸိူဝ်းၶဝ်လႆႈထုၵ်ႇ ၸုမ်းသိုၵ်းဝႃႉတီႉၺွပ်းတီႈလၢၼ်ႇႁူမ်ႈတုမ် (ၸူႉပွင်းၵဵတ်ႉ) ဝႃႉတင်းမိူင်းလႃး။ ၸဝ်ႈၼႃႈတီႈၶဝ် ႁွင်ႉဝႆႉထဵတ်ႈထၢမ် တင်ႈတႄႇယၢမ်းပွတ်းၼႂ် ထိုင်ယၢမ်းဝၢႆးဝၼ်း ၸင်ႇပွႆႇၶိုၼ်း၊ ႁႂ်ႈပွၵ်ႈၶိုၼ်းမႃးတၢင်းမိူင်းယၢင်း - ဝႃႈၼႆ။

လႆႈႁူႉဝႃႈ ၶႃႈႁၢပ်ႇၵၢၼ်ၶုၼ်မၢၼ်ႈၸုမ်းၼႆႉ ဢၢၼ်းၵႂႃႇပိူဝ်ႈတႃႇႁၢင်ႈႁႅၼ်း ပိုတ်ႇႁူင်းႁဵၼ်း၊ ပိုတ်ႇႁွင်ႈယႃ ၸိူဝ်းၼႆႉ တီႈမိူင်းပွၵ်ႉ။ ၵူၺ်းၵႃႈ ၸဝ်ႈၼႃႈတီႈဝႃႉၶဝ် လၢတ်ႈဝႃႈ ဢမ်ႇပွင်ႇၶၢဝ်ႇ၊ ဢမ်ႇမီးၵၢၼ်ၸႅင်ႈလူင်ႈၼႃႈ၊ ဢမ်ႇလႆႈဢၼုၺၢတ်ႈသေ မႃးၸိူင်ႉၼႆ ဢမ်ႇၵိုင်ႇလီပဵၼ်။ ဝၢႆးႁွင်ႉတူဝ်တွင်ႈထၢမ်ယဝ်ႉၵေႃႈ ပွႆႇပွၵ်ႈမိူဝ်းၶိုၼ်း မိူင်းယၢင်း။

ၶဝ်ၸိူဝ်းၼႆႉ ၸိုဝ်ႈမၼ်းတႄႉဝႃႈ မႃးႁဵတ်းၶူးသွၼ်တီႈမိူင်းပွၵ်ႉ။ ၵူၺ်းၵႃႈ လွင်ႈတူၵ်းလူင်းဝူင်ႈၵၢင် လူင်ပွင်ၸိုင်ႈမၢၼ်ႈတင်း ၸုမ်းဝႃႉ ဢမ်ႇၶဝ်ႈၵၼ်လႄႈ ၶဝ်ၵေႃႈဢမ်ႇၸၢင်ႈၶဝ်ႈၵႂႃႇတၢင်းမိူင်းပွၵ်ႉသေ လႆႈမႃးလိုဝ်ႈယူႇသဝ်း တီႈမိူင်းယၢင်း။ ၵမ်ႈၽွင်ႈၵေႃႈ မႃးပိုတ်ႇၵိၼ်ၵျူႊသျိၼ်ႊ၊ ၵမ်ႈၽွင်ႈၵေႃႈ ၸွႆႈႁဵတ်းၶူးသွၼ် ၼႂ်းႁူင်းႁဵၼ်း၊ ၵမ်ႈၽွင်ႈၵေႃႈယူႇလၢႆၵိၼ်လၢႆ ပႂ်ႉၵိၼ်ငိုၼ်းလိူၼ်၊ ၶဝ်ဢမ်ႇမီးၵၢၼ်သင်။ ၵူၺ်းၵႃႈ တၢင်းၼိူဝ်သမ်ႉၸႂ်ႉၶဝ်ၵႂႃႇတၢင်းမိူင်းပွၵ်ႉ တိၵ်းတိၵ်း။ ပေႃးၶဝ်ၵႂႃႇၵေႃႈ ၵွပ်ႈလူင်ပွင်ၸိုင်ႈ တင်းၸုမ်းဝႃႉ ဢမ်ႇမီးလွင်ႈ ၵပ်းသၢၼ်ၵၼ်လႄႈ ဝႃႉၵေႃႈဢမ်ႇႁပ်ႉ၊ ၶဝ်ၵေႃႈႁူပ်ႉထူပ်းတၢင်းယၢပ်ႇၽိုတ်ႇ- ၵူၼ်းမိူင်းၽႅၼ်သိုပ်ႇလၢတ်ႈ။

ၵပ်းၵၢႆႇလွင်ႈၶႃႈႁၢပ်ႇၵၢၼ်ၶုၼ်မၢၼ်ႈၼႆႉ ၾၢႆႇၸုမ်းဝႃႉႁၼ်ဝႃႈ ၶဝ်ၸိူဝ်းၼႆႉ ဢမ်ႇၸႂ်ႈၶႃႈႁၢပ်ႇၵၢၼ်ၶုၼ် ထမ်းမၻႃး၊ ၶဝ်ပဵၼ်သၢႆလပ်ႉၾၢႆႇၶၢဝ်ႇပႃး။ လွင်ႈၼႆႉ တေလႆႈတူၵ်းလူင်းၵၼ်လီလီသေ ၸင်ႇၵွႆႈၶိုင်ပွင် ႁဵတ်းသၢင်ႈ- ၼႆယဝ်ႉ။