မိူင်းထႆးၺႃးၸၢၵ်ႇယွၼ်ႉမိူင်းမၢၼ်ႈ ဢမ်ႇမီးလွင်ႈ ငမ်းယဵၼ် ၼမ်သုတ်း
ထႆးထုၵ်ႇလႆႈႁူႉ လွင်ႈမၢၼ်ႈလိူဝ်တၢင်ႇၶိူဝ်းတၢင်ႇမိူင်း၊ ၵွပ်ႈဢၼ်
မိူင်းမၢၼ်ႈပဵၼ်တႂ်ႈပဵၼ်ၼိူဝ် ယွၼ်ႉဢမ်ႇမီး လွင်ႈငမ်းယဵၼ်ၼႆႉ
တုမ်ႉတိူဝ်ႉမိူင်းထႆးၼမ်လိူဝ် တၢင်ႇမိူင်း၊ ၸဝ်ႈၶိုၼ်းသႂ်လၢတ်ႈ။
ပူၼ်ႉမႃးမိူဝ်ႈဝၼ်းတီႈ 18-19/12/2014 မီးၵၢၼ်ၸတ်း ပၢင်ဢုပ်ႇဢူဝ်းလွင်ႈ ပိုၼ်ႉႁူႉတၢင်းမေႃ (တၢင်းႁူႉၼမ်-တၢင်းႁၼ်ၵႂၢင်ႈ) တႃႇပီ 2014 ၊ ၼႂ်းႁူဝ်ၶေႃႈ “လဵပ်ႈႁဵၼ်းလွင်ႈထႆး-မၢၼ်ႈ ၼႂ်းၶွပ်ႇတူင်ႇဝူင်းဢႃႊသျႅၼ်ႊ” (Thai-Myanmar Studies in ASEAN Community) တီႈတိူၵ်ႈလူင်ဢေးၵႃးထသရူတ်ႉ ၸၼ်ႉၸွမ်ၼရေးသူၼ် ၸႄႈတွၼ်ႈၽိတ်ႉသၼုလူၵ်ႉ ၸိုင်ႈထႆး။
ၼႂ်းပၢင်ပွႆးၼႆႉ ၸဝ်ႈၶိုၼ်းသႂ် ၸႂ်ယဵၼ် လႆႈႁပ်ႉဝွၵ်ႇၸိူၼ်း ၵႂႃႇမွၵ်ႇလၢတ်ႈၶေႃႈၵႂၢမ်း ၼႂ်းႁူဝ်ၶေႃႈ “ပၼ်ႁႃလႄႈတၢင်းဢွၵ်ႇ လွင်ႈၸၢဝ်းၶိူဝ်းၸွမ်းလႅၼ်လိၼ်ထႆး-မၢၼ်ႈ”- ၼႆယဝ်ႉ။
ၸဝ်ႈၶိုၼ်းသႂ် ၸႂ်ယဵၼ် မွၵ်ႇလၢတ်ႈၵႂၢမ်းဝႃႈ- မိူင်းထႆးၼႆႉ ယူႇၸမ်မိူင်းမၢၼ်ႈလိူဝ်ပိူၼ်ႈ၊ ၵွပ်ႈၼၼ် ထႆးထုၵ်ႇလႆႈႁူႉလွင်ႈမၢၼ်ႈလိူဝ်တၢင်ႇၶိူဝ်းလူးၵွၼ်ႇ။ ၵွပ်ႈသင်ၸၢဝ်းၼွၵ်ႈမိူင်း ၾရင်ႇၶဝ်သမ်ႉႁူႉလွင်ႈမၢၼ်ႈလိူဝ်ထႆး၊ ဢၼ်မိူင်းမၢၼ်ႈပဵၼ်တႂ်ႈတႂ်ႈၼိူဝ်ၼိူဝ်ယူႇတၢင်းသဵင်ႈၼႆႉ ဢၼ်လႆႈၺႃးၸၢၵ်ႇပဵၼ်မိူင်းထႆး၊ ဢမ်ႇဝႃႈလွင်ႈၵႃႉၶၢႆၵူၼ်း၊ လွင်ႈႁႅင်းၵၢၼ်ယၢၼ်မိူင်း၊ လွင်ႈယႃႈမဝ်းၵမ်ၸိူဝ်းၼႆႉ မၼ်းပဵၼ်မႃးယွၼ်ႉမိူင်းမၢၼ်ႈ ဢမ်ႇမီးလွင်ႈငမ်းယဵၼ်- ဝႃႈၼႆ။
ဢႃးၸၢၼ် (ဢၸႃရိယ) ၻူလ်းလယၽၢၵ်ႉ ပရီးၶျႃးရတ်ႉ မွၵ်ႇလၢတ်ႈၵႂၢမ်းဝႃႈ- မၢၼ်ႈၼႆႉ ၵႆႉမၢပ်ႇၼႄးတီႈဢိင်းၵလဵတ်ႈဝႃႈ ၸႅၵ်ႇသေၽွင်းငမ်း Divide and Rule ၊ ၵွပ်ႈပိူဝ်ႈဝႃႈ မိူင်းတႆးၼႆႉ ပွႆႇၽွင်းငမ်းႁင်းၵူၺ်း၊ မိူင်းမၢၼ်ႈသမ်ႉ ၽွင်းငမ်းတင်းပိုၵ်း။ လွင်ႈၼႆႉ ၵဝ်ၶႃႈႁဝ်းႁၼ်ထိုင်ဝႃႈ ဢိင်းၵလဵတ်ႈၼႆႉ ၶဝ်ဢမ်ႇၶႂ်ႈလူင်းတိုၼ်းငိုၼ်းၼမ်တီႈမိူင်းတႆး၊ ၵွပ်ႈဢမ်ႇၶႂ်ႈလူင်းတိုၼ်းၼမ်လႄႈ ၸင်ႇပွႆႇၽွင်းငမ်းဝႆႉ- ဝႃႈၼႆ။
ပိူဝ်ႈတႃႇပဵၼ်မႃးပၢင်ပွႆးဢုပ်ႇဢူဝ်း ပိုၼ်ႉႁူႉတၢင်းမေႃပွၵ်ႈၼႆႉ မူလၼိထိ ၶူင်းၵၢၼ်ၾၢႆႇပၢႆးပိုၼ်းလႄႈၾၢႆႇပၢႆးၵူၼ်း၊ မူလၼိထိတူဝ်ႊယူဝ်ႊတႃႊမိူင်းထႆး၊ ၶွမ်ႊပၼီႊတူဝ်ႊယူဝ်ႊတႃႊ မေႃႊတိူဝ်ႊ မိူင်းထႆး၊ ၸၼ်ႉၸွမ်ၼရေးသူၼ် လႄႈ လၢႆလၢႆမူႇၸုမ်း ႁူမ်ႈၵၼ်ၸတ်းပဵၼ်မႃး- ၼႆယဝ်ႉ။
Tags: News, Politic