ၵူၼ်းဝၢၼ်ႈၵူၼ်းမိူင်း ၼႂ်းဢိူင်ႇဝၢၼ်ႈႁႅင်ႈ ၸႄႈဝဵင်းလၢႆးၶႃႈ ၸိုင်ႈတႆးပွတ်းၸၢၼ်း၊ ၸိူဝ်းလႆႈထူပ်းၺႃး ၸုမ်းပီႇတုၸိတ်ႉၶဝ်တဵၵ်းတဵင် တႅမ်ႈလိၵ်ႈမႃးထိုင် တီႈၸုမ်းၶၢဝ်ႇၽူႈတွႆႇႁွၵ်ႈ၊ လွင်ႈလႆႈထုၵ်ႇၸုမ်း ပီႇတုၸိတ်ႉ ဝၢၼ်ႈပၢင်ႇ တဵၵ်းတဵင်ႁၢဝ်ႈႁႅင်း။

ၼႂ်းလိၵ်ႈဝႃႈ ႁဝ်းၶႃႈၵူၼ်းဝၢၼ်ႈၵူၼ်းမိူင်းၼႆႉ တူၵ်းတၢင်းယၢပ်ႇၽိုတ်ႇလိူဝ်ႁႅင်း။ ၵၢၼ်ၽွင်းငမ်း ၼႂ်းဝၢၼ်ႈ ၼႂ်းဢိူင်ႇ တိုၵ်ႉမိူၼ်ပၵ်းပိူင်ၸဝ်ႈဢမ်းၼၢၸ်ႈ (ဢႃႇၼႃႇ) သိုၵ်းမိူဝ်ႈၵူႈပွၵ်ႈယူႇ။ ပူၼ်ႉမႃးမိူဝ်ႈဝၼ်းတီႈ 12/09/2014 ၸုမ်းပီႇတုၸိတ်ႉ 758 ၶဝ်ႁဵတ်းပၢင်ၵုမ်လူင် တီႈလုမ်းဝၢၼ်ႈပၢင်ႇ ၼႂ်းဢိူင်ႇဝၢၼ်ႈႁႅင်ႈသေ ဝၢႆး ပၢင်ၵုမ်ယဝ်ႉၵေႃႈ ယိုတ်းဢဝ်တီႈလိၼ်ၵူၼ်းဝၢၼ်ႈၵူၼ်းမိူင်းတိၵ်းတိၵ်း။ လိၼ်သူၼ်ႁႆႈၼႃး ၵူၼ်းဝၢၼ်ႈ လႆႈသုမ်းၵႂႃႇ တၢင်းၵႂၢင်ႈဢမ်ႇယွမ်း 20 ဢေႊၵႃႉ။ ၵႂႃႇၶၢတ်ႈလွမ်ႉႁူဝ်ႉဝႆႉသေဝႃႈ ၼႆႉပဵၼ်ၶွင်ပီႇတုၸိတ်ႉ ဝၢၼ်ႈပၢင်ႇ၊ ဢၼ်ႁဵတ်းၵႂႃႇၼႆႉ ဢမ်ႇလၢတ်ႈပွင်ႇထိုင်ၸဝ်ႈမၼ်း။

ၵူၼ်းမိူင်းၸိူဝ်းၺႃးယိုတ်းတီႈလိၼ် 20 ဢေႊၵႃႉၼၼ်ႉ လုင်းၼၼ်ႇတေႃး၊ ပႃႈမၢတ်ႈ၊ လုင်းၵၼ်ႇတီႇ၊ လုင်းၸလေးသေႃး၊ လုင်းဢိင်ႇတႃႇမူး၊ လုင်းၸၢမ်ႇၶိူဝ်း၊ ၸၢႆးတေႃးတုင်း၊ ၸၢႆးၸေႃးတဵင်း၊ ၸၢႆးၶမ်းသႃႇ၊ ၸၢႆးသၢင်ႇဢေႃး ၸိူဝ်းၼႆႉ။

ဝူဝ်းၵႂၢႆးၵူၼ်းဝၢၼ်ႈၵေႃႈ ၼႂ်း 1-2 လိူၼ် (သႅပ်ႊထႅမ်ႊၿိူဝ်ႊ- ဢွၵ်ႇထူဝ်ႊၿိူဝ်ႊ)မႃးၼႆႉ ၶဝ်ယိုဝ်းၵိၼ်ဢမ်ႇယွမ်း 30 တူဝ်၊ ပဵၼ်ဝူဝ်းၵႂၢႆးၶွင် လုင်းသေႃး၊ လုင်းလဵၵ်ႉ၊ ဝူဝ်းၵႂၢႆးၵူၼ်းဝၢၼ်ႈၼမ်ႉႁူဝ်လူင်ၶဝ် ၸိူဝ်းၼႆႉ။ တူဝ်ၵႃႇလိင်ႇထွႆႉယင်းမႃးလၢတ်ႈၼႄ ၼႂ်းပၢင်ၵုမ်လူင်မိူဝ်ႈ 12/09/2014 ၼၼ်ႉဝႃႈ တူဝ်မၼ်းလႆႈၵႂႃႇယိုဝ်းၵိၼ် မႃႉ ၵူၼ်းဝၢၼ်ႈ၊ ၼႆလူးၵွၼ်ႇ။ လိူဝ်ၼၼ်ႉယင်းလၢတ်ႈဝႃႈ- တေလႆႈႁတ်းႁၢၼ် တေလႆႈတႅပ်းတတ်းတႅၵ်ႇလႅင်း။ ပၢင်ၵုမ်မိူဝ်ႈၼၼ်ႉ မီးလုၵ်ႈၸုမ်းၶဝ်ႈႁူမ်ႈ 100 ပၢႆ။

ၼွၵ်ႈၼိူဝ်သေ ႁုပ်ႈယိုတ်းတီႈလိၼ်ၵူၼ်းမိူင်း၊ ယိုဝ်းၵိၼ်ဝူဝ်းၵႂၢႆးၵူၼ်းမိူင်းယဝ်ႉ ဢဝ်ၵိၼ်မူ ၵႆႇၵူၼ်းမိူင်း၊ ယိုတ်းဢဝ်ၼွင်ပႃၵူၼ်းမိူင်းသေ ဢဝ်ၵိၼ်ပႃၵႃႈၼင်ႇၸႂ်ၶဝ်။ ယိုဝ်းၵွင်ႈလွၵ်ႇငိုတ်ႈၵူၼ်းမိူင်း၊ ဢမ်ႇပၼ်ၵူၼ်း မိူင်း လႆႈႁဵတ်းၵိၼ်ၵၢၼ်သူၼ် ႁႆႈ ၼႃးလီလီ။ ၵွပ်ႈၼႆ ၵူၼ်းဝၢၼ်ႈၵူၼ်းမိူင်းပွတ်းတွၼ်ႈၼႆႉ မီးသင်ၵေႃႈ ဢမ်ႇလႆႈဝႆႉဝၢင်းၸႂ်၊ ဢမ်ႇၸၢင်ႈဝႆႉတီႈႁိူၼ်းသေ ၵႂႃႇႁဵတ်းၵၢၼ်လွတ်ႈလွတ်ႈလႅဝ်းလႅဝ်း။


မိူဝ်ႈၼႂ်းလိူၼ်ဢွၵ်ႊထူဝ်ႊၿိူဝ်ႊပူၼ်ႉမႃးၼႆႉ မီးၵူၼ်းၼႂ်းဢိူင်ႇဝၢၼ်ႈႁႅင်ႈ 2 ၵေႃႉ ၵႂႃႇႁဵတ်းၵၢၼ်တီႈႁႆႈ၊ ၵွပ်ႈၵၢၼ် ပႆႇယဝ်ႉတူဝ်ႈလႄႈ ထိုင်ၶၢဝ်းလပ်းသိင်ႇၸွမ်ႉႁွမ်ႉၵေႃႈ ပႆႇၸၢင်ႈပွၵ်ႈႁိူၼ်း၊ ၼၼ်ႉၵေႃႈ ထုၵ်ႇၵႃႇလိင်ႇထွႆႉ ယိုဝ်းၵွင်ႈလွၵ်ႇ ႁႂ်ႈပွၵ်ႈမိူဝ်းႁိူၼ်း၊ ၵၢၼ်ဢမ်ႇယဝ်ႉဢမ်ႇတူဝ်ႈၵေႃႈ ၵႃႈလႆႈပိုၼ်ႉပွႆႇပႅတ်ႈသေပွၵ်ႈမိူဝ်းႁိူၼ်း။ ၵွပ်ႈၼႆ ၵၢၼ်သူၼ်ၵၢၼ်ႁႆႈၵေႃႈ ဢမ်ႇပဵၼ်။

လွင်ႈၸိူဝ်းၼႆႉ ႁႂ်ႈၾၢႆႇၵဵဝ်ႇၶွင်ႈ ၾၢႆႇလူင်ပွင်ၸိုင်ႈမိူင်းတႆး လႆႈႁူႉၸွမ်းလွင်ႈၼႆႉသေ ႁႂ်ႈၸွႆႈၵႄႈလိတ်ႈပၼ်။ ယွၼ်ႉပိူဝ်ႈ ၵူၼ်းဝၢၼ်ႈၵူၼ်းမိူင်းႁႃၵိၼ်ၵေႃႈယၢပ်ႇ၊ သမ်ႉၵူဝ်ၽေးၸိူဝ်းၼႆႉၽွင်ႈလႄႈၵူၼ်းၼုမ်ႇၵေႃႈ ပၢႆႈၵႂႃႇ ႁဵတ်းၵၢၼ်ၼွၵ်ႈဝၢၼ်ႈၼွၵ်ႈမိူင်း တီႈတၢင်ႇလႅၼ်တိၵ်းတိၵ်း။