ပၢင်ပွႆးႁပ်ႉတွၼ်ႈပီမႂ်ႇတႆး 2109 ၼီႈ တီႈဝဵင်းတူၼ်ႈတီး ပိုတ်ႇပၢင်ၵႅဝ်ႈ
ယဝ်ႉတူဝ်ႈလီငၢမ်း၊ မီးၸွမ်ၽွင်းလူင် ၸိုင်ႈတႆး၊ ၽွင်းလူင် ဢိၵ်ႇ
ၽူႈယႂ်ႇၵူၼ်းလူင်ၶဝ်ႈႁူမ်ႈ လၢႆၸဝ်ႈလၢႆၵေႃႉ။
ပၢင်ပွႆးပီမႂ်ႇတႆး ဢၼ်ၸတ်းႁဵတ်း တင်ႈတႄႇဝၼ်းတီႈ 18-24/11/2014 ၼၼ်ႉ
မိူဝ်ႈၼႆႉဝၼ်းတီႈ 18 ယၢမ်းပွတ်းၼႂ် လႆႈပိုတ်ႇပၢင်ပွႆးတီႈ ဝၢင်းဢဝေႇယႃႇ
တီႈဝဵင်းတူၼ်ႈတီး ၸိုင်ႈတႆးပွတ်းၸၢၼ်း ယဝ်ႉတူဝ်ႈၵႂႃႇလီငၢမ်း။ တီႈပၢင်ၵႅဝ်ႈ
ပိုတ်ႇပၢင်ပွႆးၼႆႉ မီးၸွမ်ၽွင်းလူင်ၸိုင်ႈတႆး ၸဝ်ႈဢွင်ႇမျၢတ်ႈ၊
ႁူဝ်ပဝ်ႈၶွမ်ႊမတီႊၵေႃပွင်ပဵၼ်ပၢင်ပွႆး ၸၢႆးထုၼ်းမျၢတ်ႈ၊
ႁူဝ်ပဝ်ႈသၽႃးမိူင်းတႆး ၸၢႆးလူင်းသႅင်၊ ၵႅမ်ႁူဝ်ပဝ်ႈ သြႃႇၸၢႆးၶမ်းမၢတ်ႈ၊
ၽွင်းလူင်ၾၢႆႇပႃႇမႆႉလႄႈ ႁိၼ်ႁႄႈ လုင်းၸၢႆးဢၢႆႈပဝ်း၊ သြႃႇၸၢႆးဢွင်ႇထုၼ်း၊
ၶူးၼၢင်းၶိူဝ်းသႅၼ်၊ ၻွၵ်ႊတိူဝ်ႊၸၢႆးသၢင်ႇၽေႇ
ၸိူဝ်းၼႆႉၶိုၼ်ႈႁွတ်ႈၶဝ်ႈႁူမ်ႈ- ၼႆယဝ်ႉ။
ၼၢင်းႁွမ် ၸုမ်းၶၢဝ်ႇၽူႈတွႆႇႁွၵ်ႈ ၵေႃႉၵႂႃႇၶဝ်ႈႁူမ်ႈပၢင်ၵႅဝ်ႈ
ပိုတ်ႇပၢင်ပွႆး လၢတ်ႈဝႃႈ- တွၼ်ႈမၢႆၼိုင်ႈ ႁူဝ်ပဝ်ႈၵေႃပွင်ပဵၼ်ပၢင်ပွႆး လႄႈ
ၽွင်းလူင်လုင်းၸၢႆးဢၢႆႈပဝ်း၊ ႁူဝ်ပဝ်ႈၽွင်းတႅၼ်းသၽႃး ၸၢႆးလူင်းသႅင်၊
သြႃႇၸၢႆးၶမ်းမၢတ်ႈၸိူဝ်းၼႆႉ ၶိုၼ်ႈၵႅတ်းမႆလၢႆႈ ပိုတ်ႇပၼ်ပၢင်ပွႆး။
ၶပ်းမၢႆတီႈသွင် ၸွမ်ၽွင်းလူင်ၸိုင်ႈတႆး ၶိုၼ်ႈမွၵ်ႇလၢတ်ႈၶေႃႈၵႂၢမ်း၊
လၢတ်ႈဝႃႈ- “ဝၢၼ်ႈမိူင်းဝၼ်းမိူဝ်ႈလဵဝ် ၶိုၼ်ႈသင်ႉၶိုၼ်ႈသုင်
ပိၼ်ႇပႆႇလႅၵ်ႈလၢႆႈ မႃးယဝ်ႉ၊ ၵွပ်ႈၼၼ်လႄႈ
ႁႂ်ႈႁၵ်ႉၾိင်ႈငႄႈၾိင်ႈထုင်းႁိတ်ႈႁွႆးၽႂ်မၼ်းသေ
ႁၵ်ႉသႃပႂ်ႉပႃးမႅတ်ႇပႅင်းၵႂႃႇ”- ၼႆယဝ်ႉ။
ပၢင်ပွႆးပီမႂ်ႇတႆးပီၼႆႉ ပဵၼ်ပၢင်ပွႆးသူင်ႇသင်ႇပီၵဝ်ႇ 2108 ၼီႈ၊
ႁပ်ႉတွၼ်ႈပီမႂ်ႇ 2109 ၼီႈ (ပီလပ်းမဵတ်ႉ-ပီပႄႉ) ပီမႃႉသုတ်းသဵင်ႈ
ယၢင်ႈၶဝ်ႈၸူးပီပႄႉ။ မီးၵၢၼ်လဵၼ်ႈၸဵင် ပၢင်ပွႆးပိတ်ႉမၢၵ်ႇၼင်မူၼ်း၊
ၶေႉၶႅင်ႇႁူင်းၾႆးဝိၼ်/ တၢင်းၵႃႈ/ ၵႃႈၼူၵ်ႉၵႃႈတူဝ်း ၸိူဝ်းၼႆႉ။ ၼွၵ်ႈသေၼၼ်ႉ
တီႈၼႂ်းၸၼ်ႉၸွမ်ဝဵင်းတူၼ်ႈတီးၵေႃႈ မီးပႃးပၢင်ဢုပ်ႇလၢတ်ႈတၢၼ်ႈၶႆႈ
ၵဵဝ်ႇၵပ်းလွင်ႈတႆး၊ လၢတ်ႈ 3 ၽႃသႃ ဢိင်းၵလဵတ်ႈ၊ မၢၼ်ႈ၊ တႆး။
တီႈပၢင်ပွႆးၼႆႉ တင်ႈတႄႇဝၼ်းတီႈ 19-24/11/2014 (ၶၢဝ်းတၢင်း 6 ဝၼ်း)
တေပိုတ်ႇဝႂ်ၸူၵ်ႈ ၽူႈမီးမုၼ်ၵၢမ်ႇလီ လႆႈလူတ်ႉၵႃး TOYOTA VIGO 6 လမ်း၊
ၸႅၵ်ႇပၼ်ၽူႈမီးသုၼ်ႇမုၼ်လီၶဝ် ၼိုင်ႈဝၼ်း ၼိုင်ႈလမ်းၵႂႃႇ- ၼႆယဝ်ႉ။
ပၢင်ပွႆး ဢၼ်ႁဵတ်းတီႈဝဵင်းတူၼ်ႈတီးၵမ်းၼႆႉ ပဵၼ်ပီႈၼွင်ႉတႆး
ၼွၵ်ႈမိူင်းၼႂ်းမိူင်းႁူမ်ႈၵၼ်ၸတ်းႁဵတ်း၊ ပဵၼ်ၵၢၼ်ၸတ်းပၢင်ပွႆးယႂ်ႇလူင်
ပွၵ်ႈၵမ်းသွင်။ ပၢင်ပွႆးပီမႂ်ႇတႆး ယႂ်ႇသုတ်းတီႈၼိုင်ႈ
ၸတ်းယဝ်ႉတူဝ်ႈၵႂႃႇမိူဝ်ႈပီ 2012 တီႈဝဵင်းၵဵင်းတုင်
ၸိုင်ႈတႆးပွတ်းဢွၵ်ႇၶူင်း၊ မိူဝ်ႈပီတႆး 2107 ၼီႈ။
Tags:
Culture,
News