သင်ဝႃႈမူၼ်ႉမႄးလႆႈ ပိူင်ငဝ်ႈပိုင်းမိူင်း 168 ၶေႃႈ ၸိုင်ႈမိူင်းႁူမ်ႈတုမ် တေပဵၼ်ၾႅတ်ႊၻရႄႊလ် ဢၼ်တႄႉ။ ၵၢၼ်မႄးၵႄႈလႆႈမတ်ႉတႃ 436 ပဵၼ်ၵၢၵ်ႇသေႃးလူင် ပိူဝ်ႈတႃႇပိုတ်ႇလႆႈ ပိူင်ငဝ်ႈပိုင်းမိူင်း။

ၽွင်းတႅၼ်းသၽႃးၵူၼ်းမိူင်း ဢူးဝိၼ်းမိၼ်ႉ လၢတ်ႈဝႃႈ- ပိူင်ငဝ်ႈပိုင်းမိူင်း 2008 ၼႆႉ ၼႂ်းမတ်ႉတႃတင်းသဵင်ႈ (500 ပၢႆ)ၼႆႉ ပေႃးဝႃႈမူၼ်ႉမႄးလႆႈ 168 ၶေႃႈၸိုင် တေပဵၼ်ၸိုင်ႈမိူင်းႁူမ်ႈတုမ်ၾႅတ်ႊၻရႄႊလ် ဢၼ်တႄႉမၼ်း။ ၼႂ်းၵႃႈ 168 ၶေႃႈၼႆႉ 3 ပုၼ်ႈ ၼႂ်း 4 ပုၼ်ႈၼၼ်ႉ လၢတ်ႈလူၺ်ႈလွင်ႈၾႅတ်ႊၻရႄႊလ်၊ တႃႇ 80%-90% သမ်ႉပဵၼ်လွင်ႈငမ်းယဵၼ်။ ၵွပ်ႈၼႆ ပေႃးမူၼ်ႉမႄးလႆႈ မၼ်းတေလီ- ဝႃႈၼႆ။

ၼႂ်း 168 ၶေႃႈၼႆႉ ပေႃးမူၼ်ႉမႄးလႆႈၵေႃႈ ပဵၼ်ၸိုင်ႈမိူင်းႁူမ်ႈတုမ်ၸိုၼ်ႈၸၢင်ႇယဝ်ႉ၊ ၸၢဝ်းၶိူဝ်းၵေႃႈ တေလႆႈမီးလွင်ႈၽဵင်ႇပဵင်းယဝ်ႉ- ၽွင်းတႅၼ်းၵူၼ်းမိူင်း ၶဵတ်ႇလိူၵ်ႈတင်ႈ ၼႂ်းဝဵင်းပၵဵင်ႇ တိူင်းဢိရဝၻီႇ လၢတ်ႈ။

ၼႂ်းပိူင်ငဝ်ႈပိုင်းမိူင်း 2008 ဢၼ်ၶႂ်ႈမူၼ်ႉမႄးတင်းသဵင်ႈၼၼ်ႉ မိူၼ်ၼင်ႇမတ်ႉတႃ 436 လႄႈ လွင်ႈသုၼ်ႇလႆႈၽွင်းငမ်းတူဝ်ၵဝ်ႇ၊ သုၼ်ႇလႆႈတႅပ်းတတ်းႁင်းၶေႃ၊ သုၼ်ႇလႆႈလွင်ႈၽဵင်ႇပဵင်း ၸိူဝ်းၼႆႉ။
ၽွင်းတႅၼ်းသၽႃးၵူၼ်းမိူင်း လၢႆးၶႃႈ ၸၢႆးမွင်ႇတိၼ်ႇ လၢတ်ႈဝႃႈ- မၢႆမီႈမတ်ႉတႃ 436 ၼႆႉ ပဵၼ်ၵၢၵ်ႇသေႃးလူင် ပိူဝ်ႈတႃႇပိုတ်ႇလႆႈ ပိူင်ငဝ်ႈပိုင်းမိူင်း၊ ပေႃးမူၼ်ႉမႄးလႆႈမတ်ႉတႃၼႆႉၵေႃႈ ပဵၼ်ၵၢၵ်ႇသေႃးလူင် မူၼ်ႉမႄးလႆႈ မတ်ႉတႃတၢင်ႇဢၼ် ၼႂ်းပိူင်ငဝ်ႈပိုင်းမိူင်း၊ ပေႃးဢမ်ႇမူၼ်ႉမႄးလႆႈမတ်ႉတႃၼႆႉၵေႃႈ တၢင်ႇမတ်ႉတႃၵေႃႈ ဢမ်ႇမူၼ်ႉမႄးလႆႈ- ဝႃႈၼႆ။

ပေႃးမူၼ်ႉမႄးလႆႈ မတ်ႉတႃ 436 ၼႆႉၵေႃႈ တေလူတ်းလႆႈပႃး ၽွင်းတႅၼ်းသိုၵ်း ဢၼ်လုၵ်ႉတီႈသိုၵ်းမႃး။ ၵွပ်ႈၼၼ် ပေႃးဝႃႈမူၼ်ႉမႄးလႆႈ မတ်ႉတႃ 436 ၼႆႉၸိုင် ဝၢၼ်ႈမိူင်းၵေႃႈတေၶိုၼ်ႈယႂ်ႇ တေၵတ်းယဵၼ်၊ တေမီးလွင်ႈငမ်းယဵၼ်။ လွင်ႈဢၼ်ယၢင်ႈၸူးၸိုင်ႈမိူင်း ႁူမ်ႈတုမ်ၸိုၼ်ႈၸၢင်ႇၵေႃႈ တေၵႂႃႇလႆႈ။ ပေႃးဢမ်ႇမူၼ်ႉမႄးလႆႈ မတ်ႉတႃၼႆႉၵေႃႈ တေၵႂႃႇၶိုၼ်းမိူၼ်ပၵ်းၵဝ်ႇပိူင်ၵဝ်ႇၵူၺ်း- ၸၢႆးမွင်ႇတိၼ်ႇလၢတ်ႈ။

ပိူင်ငဝ်ႈပိုင်းမိူင်း 2008 ၼႆႉ တင်းမူတ်းမီးမတ်ႉတႃ 450 ပၢႆ။ ပိူဝ်ႈတႃႇတေမူၼ်ႉမႄးၼၼ်ႉ တိုၵ်ႉဢုပ်ႇၵုမ်ၵၼ် တင်ႈတႄႇဝၼ်းတီႈ 13-25/11/2014 ။ ၼႂ်း 168 ၶေႃႈ။ ၼႂ်းပိူင်ငဝ်ႈပိုင်းမိူင်း 168 ၶေႃႈၼႆႉ ပႃႇတီႇ NLD ဢွၼ်ႁူဝ်ပႃႇတီႇ 40 ပႃႇတီႇသေ ဢုပ်ႇၵုမ်ၵၼ်ၵႂႃႇ- ၼႆယဝ်ႉ။