ပူၼ်ႉမႃးမိူဝ်ႈဝၼ်းတီႈ 08/09/2014 မွၵ်ႈဝၢႆးဝၼ်းယၢမ်း 1 မူင်း ငႃးသိုၵ်းမၢၼ်ႈငႃးၼိုင်ႈ ပႃႈတႂ်ႈတပ်ႉၸုမ်းလူင် (တပ်ႉမ) 77 ၼမ်ႉတူႈ၊ တပ်ႉ ၶမယ 324 ၵႂႃႇႁႃတီႉၺွပ်းၵူၼ်းသူႇ/ၸႂ်ႉ/ၵိၼ်/သမ်း ယႃႈမဝ်းၵမ် တီႈၼမ်ႉသီလိၼ်း ဢိူင်ႇဝၢၼ်ႈၸၢမ် (မိူင်းမု) ၸႄႈဝဵင်းၼမ်ႉတူႈ ၸိုင်ႈတႆးပွတ်းႁွင်ႇ။ တီႉၺွပ်းလႆႈၵူၼ်း ၵဵဝ်ႇၶွင်ႈယႃႈမဝ်းၵမ် 12 ၵေႃႉ- ၼႆယဝ်ႉ။

ၽွင်းတီႉၺွပ်းတူဝ်ၵူၼ်း 12 ၵေႃႉဝႆႉသေ တေဢဝ်သူင်ႇၵႂႃႇတီႈတပ်ႉၼၼ်ႉ မီးၵူၼ်းၵိၼ်ယႃႈ 2 ၵေႃႉ လႅၼ်ႈပၢႆႈ၊ သိုၵ်းမၢၼ်ႈဢဝ်ၵွင်ႈယိုဝ်းတၢႆၵေႃႉၼိုင်ႈ၊ တႃႇၵေႃႉၼိုင်ႈ ဝၢတ်ႇၸဵပ်းလိူဝ်ႁႅင်းသေ သူင်ႇၵႂႃႇတီႈႁူင်းယႃ ဝၢၼ်ႈၸၢမ်၊ ၵႂႃႇတၢႆတီႈႁူင်းယႃဝၢၼ်ႈၸၢမ် ၸိုဝ်ႈႁွင်ႉဝႃႈ ဢႃးသၢင်း ပဵၼ်ၸၢဝ်းၶိူဝ်းၶႄႇ ယူႇဝၢၼ်ႈၸၢမ်။ ဢၼ်ၵိုတ်း 10 ၵေႃႉၼၼ်ႉ ဢဝ်သူင်ႇၵႂႃႇတီႈၼမ်ႉတူႈယဝ်ႉ- လႆႈႁူႉၼင်ႇၼႆ။

သိုၵ်းမၢၼ်ႈ တပ်ႉၶမယ 324 ၼႆႉ လုၵ်ႉတၢင်းၼမ်ႉတူႈ ပၢင်ႁႆးသေ ၶီႇၵႃးသိုၵ်းလူင် 2 လမ်း မႃးတၢင်း ၼမ်ႉသီလိၼ်၊ ပေႃးမႃးလူင်းၵႃးယဝ်ႉၵေႃႈ ၶဝ်ႈဝႅတ်ႉတီႈၼမ်ႉသီလိၼ်း။ တီႈၼမ်ႉသီလိၼ်းၼႆႉ မီးၸိုဝ်ႈ လိုဝ်းလင်ဝႃႈ ပဵၼ်ၵၢတ်ႇၶၢႆယႃႈ၊ တၢင်းၼွၵ်ႈမၼ်း မီးၵူၼ်းပႂ်ႉယၢမ်းပၼ်၊ ပေႃးပဵၼ်ၵူၼ်းပႅၵ်ႇၼႃႈ ဢမ်ႇႁူႉၸၵ်း ဢမ်ႇပၼ်ၶဝ်ႈ။