ပၢင်ဢုပ်ႇဢူဝ်းလႅၵ်ႈလၢႆႈတၢင်းႁူႉလွင်ႈၽႃႇသႃႇ သႃသၼႃ ၸတ်းတီႈတူၼ်ႈတီး
ပၢင်ၵုမ် ဢုပ်ႇဢူဝ်းလႅၵ်ႈလၢႆႈတၢင်းႁူႉတၢင်းႁၼ်
ၵဵဝ်ႇၵပ်းလွင်ႈယုမ်ႇယမ်ၽႃႇသႃႇ သႃသၼႃ ၵူႈၽႃႇသႃႇ တီႈဝဵင်းတူၼ်ႈတီး။
ပဵၼ်ပွၵ်ႈႁႅၵ်ႈသုတ်း ဢၼ်ၸတ်း ၼႂ်းၸိုင်ႈတႆးလႄႈ ၸိုင်ႈမိူင်းႁူမ်ႈတုမ်မၢၼ်ႈ။
ၵၢတ်ႇၸဝ်ႈၸၢမ်ႇထုၼ်း ဝဵင်းတူၼ်ႈတီး |
ပူၼ်ႉမႃးမိူဝ်ႈဝၼ်းတီႈ 07/09/2014
ၸုမ်းလွင်ႈငမ်းယဵၼ်လႄႈ ၵူႈၽႃႇသႃႇ (ၽႃႇသႃႇၸုင်ႇ)
ၶဝ်ဢွၼ်ႁူဝ်ၸတ်းႁဵတ်းပၢင်ၵုမ် ဢုပ်ႇဢူဝ်းၵဵဝ်ႇၵပ်း
လွင်ႈယုမ်ႇယမ်ၼပ်ႉထိုဝ်ၽႃႇသႃႇ သႃသၼႃ ၵူႈၽႃႇသႃႇ၊ တီႈဝတ်ႉ/ၵျွင်း
ထမ်ႇမႃႇရူင်ႇၶရိတ်ႉယၼ်ႇ သဵင်းၵျူဝ်းသႅပ်ႉ တီႈဝဵင်းတူၼ်ႈတီး။
ပဵၼ်ပၢင်ပွႆးလႅၵ်ႈလၢႆႈတၢင်းႁူႉ တၢင်းႁၼ်ၵၼ်၊
မီးၵူၼ်းလူင်ၽူႈဢွၼ်ႁူဝ်ၾၢႆႇသႃသၼႃၶဝ်၊ မူႇၸုမ်းႁဵတ်းၵၢၼ်ပူၵ်းပွင်
(လွင်ႈႁုၼ်ႈမုၼ်း မႂ်ႇသုင်) ၸိူဝ်းၼႆႉ ၶဝ်ႈႁူမ်ႈမွၵ်ႈ 100 ပၢႆ။ ၵူၺ်းၵႃႈ
ႁွင်ႉဝွၵ်ႇ/ၸိူၼ်းပႃးယူႇၵေႃႈ လူင်ပွင်ၸိုင်ႈမိူင်းတႆး လႄႈ
ၾၢႆႇၽွင်းငမ်းၵူႈႁွင်ႈၵၢၼ်ၶဝ်တႄႉ ဢမ်ႇမႃးၶဝ်ႈႁူမ်ႈ- ၼႆယဝ်ႉ။
ယိူင်းဢၢၼ်း
ဢၼ်လႆႈၸတ်းပၢင်ဢုပ်ႇဢူဝ်းလႅၵ်ႈလၢႆႈၼႆႉ
ၼင်ႇႁိုဝ်ၵူၼ်းၵူႈၸၢဝ်းၶိူဝ်းၼႂ်းမိူင်းမၢၼ်ႈပတ်းပိုၼ်ႉ ၵူႈၽႃႇသႃႇ
ႁႂ်ႈမီးလွင်ႈၵတ်းယဵၼ်၊ ႁႂ်ႈမီးလွင်ႈႁၵ်ႉႁွမ်ၵၼ်မႃးလိူဝ်ၵဝ်ႇ၊ ပိူင်လူင်မၼ်း
ယႃႇပေႁႂ်ႈၵိူတ်ႇၶိုၼ်ႈ မႃးပၼ်ႁႃၵၼ် ၵဵဝ်ႇၵပ်းၽႃႇသႃႇ သႃသၼႃ၊
ႁႂ်ႈၵူႈၽႃႇသႃႇၶဝ်ႈၸႂ်ၼိူဝ်ၵၼ်သေ ႁႂ်ႈလႆႈယူႇလူၺ်ႈၸွမ်းၵၼ်ၵႂႃႇ
ၵတ်းၵတ်းယဵၼ်ယဵၼ်- ၼႆယဝ်ႉ။
ပၢင်ဢုပ်ႇဢူဝ်းလႅၵ်ႈလၢႆႈၼႆႉ
ႁွင်ႉဝွၵ်ႇ/ၸိူၼ်းထိုင် ၽူႈၼမ်းၾၢႆႇၽႃႇသႃႇ သႃသၼႃၶဝ်သေ မႃးႁူပ်ႉၵၼ်တင်း
ၵူၼ်းၼုမ်ႇၶဝ်၊ ယူႇတီႈၵူၼ်းထဝ်ႈ ၽူႈၼမ်းၾၢႆႇၽႃႇသႃႇ သႃသၼႃၶဝ်
လႆႈသပ်းလႅင်းၼႄပၼ် လွင်ႈတၢင်းႁူႉ တၢင်းႁၼ် တီႈၵူၼ်းၼုမ်ႇ၊
ဢၼ်လၢတ်ႈၵႂႃႇၸိူဝ်းၼၼ်ႉ ၵူၼ်းၼုမ်ႇၶဝ် ဢမ်ႇၶဝ်ႈၸႂ်တီႈလႂ်လွင်ႈလႂ်ၵေႃႈ
ႁႂ်ႈလႆႈတွင်ႈထၢမ်ၶိုၼ်း- ဢဵၼ်းဢၢၼ်းလွင်ႈၼႆႉသေ ၸတ်းႁဵတ်း- ၼႆယဝ်ႉ။
ပၢင်ဢုပ်ႇဢူဝ်းၼႆႉ
ဢၼ်ယူႇတီႈပုတ်ႉထၽႃႇသႃႇသေၶဝ်ႈႁူမ်ႈ ပဵၼ်ဢူးၼေႇမဵဝ်း။ မၼ်းလၢတ်ႈတီႈ
ၸုမ်းၶၢဝ်ႇၽူႈတွႆႇႁွၵ်ႈဝႃႈ- ပၢင်ႁူပ်ႉထူပ်းဢုပ်ႇဢူဝ်းၵၼ်
ႁႂ်ႈပေႃးမီးလွင်ႈၶဝ်ႈၸႂ်ၵၼ် ၸိူင်ႉၼင်ႇၼႆၼႆႉ ႁဵတ်းဝႆႉထႃႈဢွၼ်တၢင်း
ၸဵမ်မိူဝ်ႈပႆႇပဵၼ်ပၼ်ႁႃၵၼ်ၼႆႉ လီယဝ်ႉ။ သင်ၸိူဝ်ႉဝႃႈ ပဵၼ်ပၼ်ႁႃၵၼ်မႃး
ၸင်ႇၵွႆႈမႃးႁဵတ်းပၢင်ဢုပ်ႇဢူဝ်းၸိုင် မၼ်းဢမ်ႇလီ၊ မၼ်းတေၶဝ်ႈၸႂ်ၵၼ်ယၢပ်ႇ။
တီႈဝဵင်းတူၼ်ႈတီးႁဝ်းၼႆႉ ႁဝ်းၶႃႈတိုၼ်းတေ ဢမ်ႇပၼ်မၼ်းပဵၼ်ပၼ်ႁႃ
ၵဵဝ်ႇၵပ်းလွင်ႈၽႃႇသႃႇ သႃသၼႃ ၸိူင်ႉၼင်ႇဢၼ်ၵိူတ်ႇၶိုၼ်ႈ တၢင်ႇတီႈတၢင်ႇလႅၼ်၊
ႁဝ်းတေပၵ်းတႃပႂ်ႉတူၺ်းသေ ၵုမ်းၵႂႃႇလီလီ၊ ယႃႇႁႂ်ႈမၼ်းလႆႈပဵၼ်ၼၼ်ႉ
ႁဝ်းတေယူႇသဝ်းၵႂႃႇႁႂ်ႈမီးသတိ- ဝႃႈၼႆ။
ၵူဝ်ႇလတ်ႉ ၽူႈၼပ်ႉထိုဝ်ၽႃႇသႃႇ
ဢိသလႃးမိၵ်ႉ လၢတ်ႈဝႃႈ- ၵူၼ်းႁဝ်းၼႆႉ သင်ဝႃႈၽႃႇသႃႇ ဢၼ်ၼိုင်ႈလႄႈ ဢၼ်ၼိုင်ႈ
မီးလွင်ႈၶဝ်ႈၸႂ်လူင်ႉလႅင်းၵၼ်လီ၊ ၾၢႆႇၽႃႇသႃႇပုၼ်ႉၵေႃႈ
သပ်းလႅင်းလၢတ်ႈၼႄလွင်ႈၽႃႇသႃႇ မၼ်းတႅတ်ႈတေႃးၸိုင်
ႁဝ်းတေႁူႉလွင်ႈယဵၼ်ႇငႄႈၽႃႇသႃႇၼၼ်ႉ၊ တေဢမ်ႇပဵၼ်လွင်ႈသႄႉသွမ်း လွၵ်းဢူၼ်ႈၵၼ်။
ၼင်ႇႁိုဝ်တေပဵၼ်မႃးၸိူင်ႉၼႆ ႁဝ်းထုၵ်ႇလီၶတ်းၸႂ်ႁူပ်ႉထူပ်းၵၼ်ၵႂႃႇ
တိၵ်းတိၵ်း၊ ဢမ်ႇၸႂ်ႈဝႃႈပွၵ်ႈၼႆႉၵူၺ်း- ဝႃႈၼႆ။
ၵႃႈၵွၼ်ႇပူၼ်ႉမႃး ၵူၼ်း 2-3 ၵေႃႉ
ၶဝ်ႈၸႂ်ၵၼ်သေ ဢုပ်ႇၵၼ်ၵူၺ်း၊ ဢၼ်ၸုမ်းယႂ်ႇၸုမ်းလူင် မႃးဢွၼ် ၸတ်းႁဵတ်း
ပၢင်ဢုပ်ႇဢူဝ်းလႅၵ်ႈလၢႆႈၸိူင်ႉၼႆ ဢမ်ႇတွၼ်ႉမီးမႃးသေပွၵ်ႈ။ ပွၵ်ႈၼႆႉ
ၵူၼ်းၶဝ်ႈႁူမ်ႈၵေႃႈၼမ် ပၢင်မၼ်းၵေႃႈယႂ်ႇ၊ လႆႈတၢင်းမိုတ်ႈၵိုဝ်း
ၸမ်ၸႂ်ၵၼ်ၵႂႃႇၼမ်တႄႉတႄႉ၊ ဢမ်ႇႁိုင်ဢမ်ႇၼၢၼ်းၼႆႉ
ယုမ်ႇယမ်ဝႃႈလွင်ႈငမ်းယဵၼ်တေမီးမႃးယူႇ- ၽူႈၶဝ်ႈႁူမ်ႈလဵပ်ႈႁဵၼ်းၵေႃႉၼိုင်ႈ
လၢတ်ႈ။
Tags: News, Religion