သိုၵ်းမၢၼ်ႈတဵၵ်းၸႂ်ႉၵူၼ်းဝၢၼ်ႈ သွၵ်ႈႁႃတူဝ်ၵူၼ်း ဢဝ်ၽႃႉဝုၵ်းႁူဝ်မၢၼ်ႈ
သိုၵ်းမၢၼ်ႈတဵင်ၵႂၢမ်းၼၵ်း
ႁႂ်ႈၵူၼ်းလူင်ဝၢၼ်ႈပၢင်ႇၸွႆး ဢွၼ်ႁူဝ် ၵူၼ်းဝၢၼ်ႈ
သွၵ်ႈႁႃတီႉၺွပ်းလုင်းၵေႃးယၢင်း ၵေႃႉဢဝ်ၽႃႉၾၼ်း/ ဝုၵ်းႁူဝ်သိုၵ်းမၢၼ်ႈ
ပၼ်သိုၵ်းမၢၼ်ႈ။
ၵဵဝ်ႇၵပ်းလွင်ႈၼႆႉ
ပူၼ်ႉမႃးမိူဝ်ႈဝၼ်းတီႈ 03/08/2014 ၼၼ်ႉ
ၽူႈၵွၼ်းႁွင်ႈၵၢၼ်ၾၢႆႇႁူမ်ႇလူမ်ႈသိုၵ်း (ၸယၽ) မိူင်းသူႈ၊
ၸၼ်ႉၶုၼ်သိုၵ်းလူင် ၸိုဝ်ႈဢွင်ႇၸီႇဝူၺ်ႇ လႄႈတင်းလုၵ်ႈၼွင်ႉမၼ်း
ဢွင်ႇမဵဝ်းၼၢႆႇ ႁွတ်ႈၽႅဝ်ၵႂႃႇတီႈဝၢၼ်ႈပၢင်ႇၸွႆး ဢၼ်တိတ်းၸပ်းမိူင်းသူႈ၊
တၢင်းဢွၵ်ႇၵႂႃႇၸူး ၵိင်ႇၸႄႈဝဵင်းမိူင်းၸၢင် (ၵႃလိ)။ ၵႂႃႇတီႈႁိူၼ်း
လုင်းၵေႃးယၢင်း သေ လုင်းၵေႃးယၢင်းၵေႃႈ လဵင်ႉပၼ်ယႃႈမႃႉ ၽူႈၵွၼ်း ၸယၽ 2
မဵတ်ႉ၊ ၽိူဝ်ႇၵိၼ်ယဝ်ႉ တဵၵ်းၸႂ်ႉၵႂႃႇသိုဝ်ႉထႅင်ႈ။
လုင်းၵေႃးယၢင်းလၢတ်ႈဝႃႈ- တီႈၶႃႈၼႆႉ မီး
2 မဵတ်ႉၵူၺ်း၊ ပေႃးဝႃႈပူဝ်ႇလူင်ၶႂ်ႈၵိၼ်ထႅင်ႈၵေႃႈ ပၼ်ငိုၼ်းၶႃႈလႄႈ
ၶႃႈတေၵႂႃႇသိုဝ်ႉပၼ်၊ ၶႃႈဢမ်ႇမီးငိုၼ်းယဝ်ႉ ဢမ်ႇၸၢင်ႈႁဵတ်းႁိုဝ်။ ၵူၺ်းၵႃႈ
ၽူႈၵွၼ်း ၸယၽ သမ်ႉၸႂ်ႉသိုဝ်ႉပၼ် တိၵ်းတိၵ်းလႄႈ တႄႇၼၼ်ႉ လႆႈထဵင်မေႃးၵၼ်သေ
ထုၵ်ႇလုင်းၵေႃးယၢင်း လၢၵ်ႈဢဝ်ၽႃႉဝုၵ်းသႂ်ႇပၼ်ႁူဝ် ၽူႈၵွၼ်း ၸယၽ၊
ဝုၵ်းသၢႆႉဝုၵ်းၶႂႃ တိူဝ်ႉၵႂႃႇ 3 ႁွႆး၊ လႆႈယဵပ်ႉ 32 ၶဵမ်။ ၽူႈၵွၼ်း ၸယၽ
တင်းလုၵ်ႈၼွင်ႉမၼ်းၵေႃႈ လၢၵ်ႈၵွင်ႈပွတ်း ယိုတ်းႁၢတ်ႇသႂ်ႇ လုင်းၵေႃးယၢင်း 3
ၵမ်း၊ လုင်းၵေႃးယၢင်းၵေႃႈ တိူဝ်ႉဝၢတ်ႇၸဵပ်းသေ လႅၼ်ႈပၢႆႈပူၼ်ႉၵႂႃႇ။ ၽူႈၵွၼ်း
ၸယၽ ဢွင်ႇၸီႇဝူၺ်ႇၼႆႉ ၵႂႃႇၶဝ်ႈႁူင်းယႃတီႈဝဵင်းမိူင်းသူႈသေ သိုပ်ႇသူင်ႇ
ၵႂႃႇတီႈႁူင်းယႃသိုၵ်း ၼမ်ႉၸၢင်- ဝႃႈၼႆ။
ဢိင်ၼိူဝ်လွင်ႈၼႆႉသေ ထိုင်မႃးဝၼ်းတီႈ
04/08/2014 ၾၢႆႇသိုၵ်းမၢၼ်ႈ မႃးတီႉဢဝ်မေးလုင်းၵေႃးယၢင်း ပႃႈၼၢင်းသႅင်ၶမ်း
ၵႂႃႇၵုမ်းၶင်သႂ်ႇၶွၵ်ႈဝႆႉတီႈတပ်ႉပလိၵ်ႈ ဝဵင်းမိူင်းသူႈ
ႁၢၼ်ႉတေႃႇထိုင်မိူဝ်ႈလဵဝ် ပႆႇပွႆႇၶိုၼ်း၊ ႁႂ်ႈဢဝ်တူဝ်လုင်း ၵေႃးယၢင်း
မႃးလႅၵ်ႈဢဝ် ၸင်ႇၵွႆႈပွႆႇပၼ်မေးမၼ်းၶိုၼ်း။ ၵူၺ်းၵႃႈ ႁၢၼ်ႉတေႃႇမိူဝ်ႈလဵဝ်
လုင်းၵေႃးယၢင်း ၵႂႃႇမီးတီႈလႂ်ၵေႃႈ ၽႂ်ပႆႇႁူႉပႆႇႁၼ်- ၼႆယဝ်ႉ။
ဝၢႆးၵိူတ်ႇလိူင်ႈယဝ်ႉ သိုၵ်းမၢၼ်ႈၶဝ်
ၵႂႃႇတဵင်ၵႂၢမ်းၼၵ်း တီႈပူႇၵႄႇဝၢၼ်ႈပၢင်ႇၸွႆး လုင်းၸေႃးလူင် တင်း
ဝၢၼ်ႈၵုၼ်ၼႃးမၢၵ်ႇၶိူဝ်ဝႃႈ - ႁႂ်ႈဢွၼ်ႁူဝ်ၵူၼ်းဝၢၼ်ႈသွၵ်ႈႁႃ
တီႉၺွပ်းပၼ်လုင်းၵေႃးယၢင်းႁႂ်ႈလႆႈ။ ၼွၵ်ႈသေၼၼ်ႉ တဵင်ၵႂၢမ်းၼၵ်းဝႃႈ
ၵႃႈၸူဝ်ႈပႆႇတီႉလႆႈတူဝ်လုင်းၵေႃးယၢင်းၼႆႉ ပူႇၵႄႇဝၢၼ်ႈၶဝ်ၸိူဝ်းၼႆႉ
တေဢမ်ႇလႆႈၵႂႃႇတႂ်ႈမိူဝ်းၼိူဝ်- ဝႃႈၼႆ။
Tags: Human Right, News