ဝၼ်းတီႈ 15/08/2014 (မိူဝ်ႈၼႆႉ) ၸုမ်းၶၢဝ်ႇၽူႈတွႆႇႁွၵ်ႈ လႆႈၵႂႃႇႁူပ်ႉထူပ်းတွင်ႈထၢမ် ၼွင်ႉၼႅၼ်း (ၸိုဝ်ႈလဵၼ်ႈ) ၵေႃႉလုၵ်ႉမိူင်းတႆး ၶဝ်ႈႁဵတ်းၵၢၼ်ၼႂ်းမိူင်းထႆးမႃး ၶၢဝ်းတၢင်း 7 ပီ၊ မိူဝ်ႈလဵဝ်ႉႁဵတ်းၵၢၼ်တီႈႁၢၼ်ႉၶဝ်ႈၽၵ်း လၢပ်ႈတူၼ်ႈယၢင်း မူႇ 4 ဝၢၼ်ႈသၼ်ၽီသိူဝ်ႉ ဝဵင်းၵဵင်းမႆႇ (ၼိူဝ်သဵၼ်ႈတၢင်းလူင် သႃလႃးၵၢင် (ၵဵင်းမႆႇ) လႄႈ မႄႈၸူဝ်ႈ)။ ၵွပ်ႈဝႃႈ ၼွင်ႉၼႅၼ်းၼႆႉ ဢိင်ၼိူဝ်တၢင်းႁၢင်ႈလီ တူဝ်ၶိင်းလဝ်းသေ ၵႃႈပူၼ်ႉမႃးမီးၵူၼ်းထႆးမႃးၸၢင်ႈ ထၢႆႇဝႅပ်ႇ ဢွၵ်ႇၼႂ်းသိုဝ်ႇထႆးလၢႆမိူဝ်ႈလၢႆပွၵ်ႈ။ လိုၼ်းသုတ်း ႁဵတ်းႁႂ်ႈပဵၼ်ၶၢဝ်ႇယႂ်ႇ ဢွၵ်ႇၼႂ်းၽိုၼ်ၶၢဝ်ႇထႆး၊ ၼႂ်းႁူင်းပွႆႇ ႁၢင်ႈသဵင် (TV) ထႆးသေ တၢင်းတူင်ႇဝူင်း/ လူၵ်ႈဢွၼ်ႊလၢႆႊ ၾဵတ်ႊၶ်ၿုၵ်ႊ (Facebook) ၸိူဝ်းၼႆႉၵေႃႈ ပိုၼ်ၽႄႈၵၼ်ၼမ်လၢႆ။

ၼွင်ႉၼႅၼ်းၼႆႉ ၸိုဝ်ႈႄတႉ ၸိုဝ်ႈဝႃႈၼွင်ႉၼုတ်း၊ တီႈယူႇၼႂ်းပူင်း ၸႄႈတွၼ်ႈတူၼ်ႈတီး ၸိုင်ႈတႆးပွတ်းၸၢၼ်း၊ မီးႁိူၼ်း တီႈၼႂ်းပူင်းလႄႈဝဵင်းတူၼ်ႈတီးသေ ၵႂႃႇၵႂႃႇမႃးမႃး။ ၼႃႈၵၢၼ်လဵင်ႉတွင်ႉပေႃႈမႄႈ တီႈမိူင်းတႆး ႁဵတ်းၼႃး။ မီးပီႈၼွင်ႉ ႁူမ်ႈတွင်ႉ 3 ၵေႃႉ၊ ယၢမ်းလဵဝ် ယူႇၸွမ်းၵၼ် ႁဵတ်းၵၢၼ်ၸွမ်းၵၼ် တင်းပီႈၼၢင်း ၼၢင်းသႅင်ႁွမ် တီႈၼႂ်းၵဵင်းမႆႇ မိူင်းထႆး။

ၼွင်ႉၼႅၼ်း လၢတ်ႈဝႃႈ- မႃးမိူင်းထႆးလႆႈ 7-8 ပီယဝ်ႉ၊ ႁဵတ်းၵၢၼ်တီႈႁၢၼ်ႉၼႆႉ 5 ပီ၊ ဢွၼ်တၢင်းႁဵတ်းၵၢၼ် ၵူႈလွင်ႈလွင်ႈ။ ၵၢၼ်ၵေႃႇသၢင်ႈ ႁပ်ႉမဝ်ၽွင်ႈ၊ ႁဵတ်းၵၢၼ်ၼႂ်းႁိူၼ်းယေး လဵင်ႉၵူၼ်းထဝ်ႈ။ မႃးႁဵတ်းၵၢၼ်တီႈၼႆႈသေ မီးၵူၼ်းၵႆႉယွၼ်းထၢႆႇၶႅပ်းႁၢင်ႈလႄႈ မီးၵူၼ်းႁူႉၸၵ်းၼမ်မႃး။ မီးပီႈၼွင်ႉထႆးၶဝ် မႃးၵိၼ်ၶဝ်ႈသေမႃးႁၼ်လႄႈ ယွၼ်းႁႂ်ႈ ၵႂႃႇထၢႆႇဝႅပ်ႇပၼ်ၶဝ်၊ ဝၼ်းလိုဝ်ႈၵၢၼ်ၵေႃႈ လႆႈၵႂႃႇထၢႆႇဝႅပ်ႇ (ၵၢၼ်ႁၢင်ႈၶိူင်ႈ)သေ လႆႈၵႃႈၸၢင်ႈဢိတ်းဢွတ်း။ ႁဝ်းတႄႉ ၵေႃႈ ဢမ်ႇမေႃၼင်ႇၵဝ်ႇ၊ ပိူၼ်ႈၸႂ်ယၢဝ်းသေလၢတ်ႈပၼ် သွၼ်ပၼ်။

ၼွၵ်ႈသေၼၼ်ႉ ယူႇတီႈႁူဝ်ပဝ်ႈၵေႃလိၵ်ႈလၢႆးလႄႈၾိင်ႈငႄႈတႆး ၵဵင်းမႆႇ လႆႈတွင်ႈထၢမ်ဝႃႈ သင်ဝႃႈထိုင်ပီမႂ်ႇတႆးမႃး၊ တၢင်းၵေႃလိၵ်ႈလၢႆးလႄႈၾိင်ႈငႄႈတႆး ႁွင်ႉဝွၵ်ႇၸိူၼ်းၵႂႃႇႁွင်ႉၵႂၢမ်းတီႈ ပၢင်ပွႆးပီမႂ်ႇတႆးၼႆ ၸွင်ႇတေၵႂႃႇလႆႈ။ လွင်ႈၼႆႉ ၼွင်ႉၼႅၼ်း တွပ်ႇဝႃႈ ၵႂႃႇလႆႈယူႇၶႃႈ၊ ယိၼ်းလီၼမ်ၼမ်၊ ၵူၺ်းၵႃႈ ပႆႇယၢမ်ႈႁွင်ႉၽဵင်းၵႂၢမ်း- ဝႃႈၼႆ။