ၵူၼ်းဝၢၼ်ႈၼွင်မႃႉတႃ ထုၵ်ႇသိုၵ်းမၢၼ်ႈႁွင်ႉ ထဵတ်ႈထၢမ် ပေႃႉထုပ်ႉ ဝၢႆးသိုၵ်းမၢၼ်ႈတၢႆ
ဝၢႆးသိုၵ်းမၢၼ်ႈ ထုၵ်ႇၶႃႈတၢႆ 2 ၵေႃႉ တီႈဝၢၼ်ႈၼွင်မႃႉတႃ
ၼႂ်းၸႄႈဝဵင်းၼမ်ႉၶမ်း ၸိုင်ႈတႆးပွတ်းႁွင်ႇယဝ်ႉ ၽူႈယႂ်ႇၵူၼ်းလူင်ၼႂ်းဝၢၼ်ႈ
ထုၵ်ႇသိုၵ်းမၢၼ်ႈႁွင်ႉၵႂႃႇ ထတ်းထၢမ် ထပ်ႉၵၼ်၊
လွၵ်ႇငိုတ်ႈလၢႆၸိူဝ်ႉလၢႆပိူင်လႄႈ ႁဵတ်းႁႂ်ႈၵူၼ်းဝၢၼ်ႈၵူဝ်ႁႄ
ဢွၼ်ၵၼ်ပၢႆႈဢွၵ်ႇႁိူၼ်းယေးတီႈယူႇ။
ၵူၼ်းဝၢၼ်ႈၼွင်မႃႉတႃ ၸိူဝ်းပၢႆႈၶဝ်ႈပိုင်ႈႁူမ်ႈၼႂ်းမိူင်းၶႄႇ |
မိူဝ်ႈဝၼ်းတီႈ 29/07/2014 ၼႆႉ
ဢိင်ၼိူဝ်သိုၵ်းမၢၼ်ႈ 2 ၵေႃႉ ထုၵ်ႇၶႃႈတၢႆ တီႈလႅၼ်လိၼ် တႆး-ၶႄႇ သေ
ထိုင်မႃးဝၢႆးဝၼ်း သိုၵ်းမၢၼ်ႈထႅမ်ႁႅင်းသိုၵ်းၶဝ်ႈမႃးတီႈၼွင်မႃႉတႃ
ထႅင်ႈငႃးသိုၵ်းၼိုင်ႈသေ ဝႅတ်ႉႁိူၼ်း ၽူႈယႂ်ႇ ၵူၼ်းလူင်ဝၢၼ်ႈယဝ်ႉ
ႁွင်ႉဢဝ်ၵူၼ်းဝၢၼ်ႈၵႂႃႇ တင်းမူတ်း 5 ၵေႃႉ၊ ႁူဝ်ပဝ်ႈ ၸၢႆးလႃႉၸိင်ႇ၊
ၽူႈၼမ်းၼႂ်းဝၢၼ်ႈ ၸၢႆးသၢင်ႇၸူဝ်း၊ ၽူႈမၢႆ ၸၢႆးသၢင်ႇလူႇ၊
ၽူႈယႂ်ႇၵူၼ်းလူင်ဝၢၼ်ႈ ၶိင်းသွႆႈၶမ်းၸၢမ်ႇသႃႇ လႄႈ ၶိင်းသႅင်ႁိူင်း
ၸိူဝ်းၼႆႉ။ သုိုၵ်းမၢၼ်ႈႁွင်ႉၵႂႃႇထၢမ်ၶိုၼ်းဝၼ်းတီႈ 29 ၼၼ်ႉ တေႃႇယၢမ်း 11
မူင်းၶိုင်ႈၵၢင်ၶိုၼ်း ၸင်ႇပွႆႇမႃး ၊ မိူဝ်ႈဝႃးၼႆႉၵေႃႈ 6 မူင်းၵၢင်ၼႂ်
ႁွင်ႉႁႂ်ႈၵႂႃႇထိုင်တီႈ တပ်ႉပၢင်သဝ်းမၢၼ်ႈ တီႈၼွင်မႃႉတႃ၊ ပၼ်လိုဝ်ႈၶၢဝ်း
ၵိၼ်ၶဝ်ႈသေ သိုပ်ႇထတ်းထၢမ်ထႅင်ႈတေႃႇၵၢင်ၶမ်ႈ 12 မူင်းၶိုင်ႈ
ၸင်ႇပွႆႇပၼ်ပွၵ်ႈႁိူၼ်း၊ ၼႂ်ၼႆႉၵေႃႈ ၶိုၼ်းႁွင်ႉ ၵႂႃႇထႅင်ႈ။
သိုၵ်းမၢၼ်ႈလွၵ်ႇငိုတ်ႈဝႃႈ -
ဢၼ်ၶႃႈႁႅမ်သိုၵ်းမၢၼ်ႈတၢႆၼႆႉ ပဵၼ်ၵူၼ်းဝၢၼ်ႈ ဝႃႈၼႆသေ ပေႃႉႁႅမ်ၽူႈယႂ်ႇ
ၵူၼ်းလူင်ဝၢၼ်ႈ။ လွၵ်ႇငိုတ်ႈဝႃႈ ပေႃးႁွင်ႉလႄႈ ၵေႃႉလႂ်ဢမ်ႇမႃး ႁိုဝ်
မႃးဢမ်ႇၶိုတ်းၶၢဝ်းယၢမ်း ၸွမ်းၼင်ႇ ၽတ်းၼတ်ႉ မၵ်းဝႆႉၶၢဝ်းယၢမ်းၸိုင်
တေဢဝ်ၾႆးၽဝ်ဝၢၼ်ႈပႅတ်ႈ။ လွင်ႈၼႆႉ ႁဵတ်းႁႂ်ႈၵူၼ်းဝၢၼ်ႈၵူဝ်ႁႄ
တူၵ်းၸႂ်လႂ်တိုၼ်ႇသေ ဢွၼ်ၵၼ်ပၢႆႈဢွၵ်ႇႁိူၼ်းယေးဝၢၼ်ႈသူၼ် ၶဝ်ႈၵႂႃႇတၢင်း
မိူင်းၶႄႇတင်းၼမ်။
ၵဵဝ်ႇၵပ်းလွင်ႈၼႆႉ
ၵူၼ်းယူႇၼႂ်းပိုၼ်ႉတီႈၵေႃႉၼိုင်ႈလၢတ်ႈဝႃႈ- ဝၢႆးသိုၵ်းမၢၼ်ႈၶဝ် ထုၵ်ႇၶႃႈတၢႆ 2
ၵေႃႉယဝ်ႉ၊ ၶဝ်မၢပ်ႇၼႄးၵူၼ်းဝၢၼ်ႈဝႃႈ ၵွင်ႈၵေႃႈပဵၼ်ၵွင်ႈၵူၼ်းဝၢၼ်ႈ၊
ၽႃႉဢၼ်ၾၼ်းသိုၵ်းမၢၼ်ႈၼၼ်ႉၵေႃႈ ပဵၼ်ၽႃႉ ၵူၼ်းဝၢၼ်ႈ။ ႁဝ်းၶႃႈတႄႉ
ဢမ်ႇလႆႈႁူႉသင်ၸွမ်း၊ ႁဝ်းၶႃႈႁဵတ်းၵိၼ်သူၼ်ၵိၼ်ၼႃးၵူၺ်းႄလႈ သိုၵ်းမၢၼ်ႈ
သမ်ႉမႃးႁဵတ်းႁၢႆႉ ႁွင်ႉဢဝ်ၽူႈယႂ်ႇၵူၼ်းလူင်ဝၢၼ်ႈ ၵႂႃႇပေႃႉႁႅမ်၊ လွၵ်ႇငိုတ်ႈ
တေၽဝ်ႁိူၼ်းယေးၸိူဝ်းၼႆႉ၊ မိူဝ်ႈၼႆႉၵေႃႈ ယင်းတိုၵ်ႉလွၵ်ႇငိုတ်ႈဝႃႈ
ပေႃးၵူၼ်းဝၢၼ်ႈပၢႆႈဢွၵ်ႇဝၢၼ်ႈ တေဢဝ်ၾႆးၽဝ်ဝၢၼ်ႈပႅတ်ႈၸိူဝ်းၼႆႉ
ႁဵတ်းႁႂ်ႈၵူၼ်းဝၢၼ်ႈ တူၵ်းၸႂ်လႂ်တိုၼ်ႇသေ ဢွၼ်ၵၼ်ပၢႆႈဢွၵ်ႇဝၢၼ်ႈ
ၶၢမ်ႈၵႂႃႇတၢင်းမိူင်းၶႄႇ တိၵ်းတိၵ်းယဝ်ႉ- ဝႃႈၼႆ။
ဢၼ်ၼႄးဝႃႈ
ၵွင်ႈၵေႃႈပဵၼ်ၵွင်ႈၵူၼ်းဝၢၼ်ႈ၊ ၽႃႉၵေႃႈပဵၼ်ၽႃႉၵူၼ်းဝၢၼ်ႈ ဢၼ်ဝႃႈၼၼ်ႉ
ၾၢႆႇသိုၵ်းမၢၼ်ႈ ၶဝ်ဢမ်ႇၼႄလၵ်းထၢၼ် (သၢၵ်ႈသေႇ)သင်။ ႁဝ်းၶႃႈၵူၼ်းဝၢၼ်ႈၼႆႉ
မိူဝ်ႈသိုၵ်းမၢၼ်ႈၶဝ်ႈမႃးယဝ်ႉ ႁဝ်းဝႃႈၶဝ် ပဵၼ်သိုၵ်းလူင်ပွင်ၸိုင်ႈ၊
ယုမ်ႇယမ်ဝႃႈ တေႁဵတ်းႁႂ်ႈၵူၼ်းဝၢၼ်ႈႁႃၵိၼ်ၵႂႃႇငၢႆႈမႃးလူမ်၊
မီးလွင်ႈႁူမ်ႇလူမ်ႈလိူဝ်ၵဝ်ႇ ယုမ်ႇယမ်ၼင်ႇၼႆ။ ၵူၺ်းၵႃႈ ထိုင်ယၢမ်းလဵဝ်ၼႆႉ
မီးပၼ်ႁႃသင်ၵေႃႈ သမ်ႉၸီႉၼႄးၵူၼ်းဝၢၼ်ႈတိၵ်းတိၵ်း၊ ပေႃးမိူၼ်လၢႆးၼႆႉတႄႉ
ၵူၼ်းဝၢၼ်ႈတေလႆႈပႂ်ႉယၢမ်းပၼ်ၶဝ် 24 ၸူဝ်ႈမူင်းၵူၺ်းယဝ်ႉယူဝ်ႉ။
ႁဝ်းၶႃႈၵူၼ်းဝၢၼ်ႈ ၼႆႉ ပဵၼ်ၵူၼ်းႁဵတ်းႁႆႈႁဵတ်းသူၼ်လႄႈ ၽႃႉ/မိတ်ႈႄလႈသဵမ်
ၸိူဝ်းၼႆႉတႄႉမီးဢိူဝ်ႈ၊ ၵွင်ႈႄတႉတေၵႂႃႇဢဝ် တီႈလႂ်မႃး- ၵူၼ်းၼႂ်းပိုၼ်ႉတီႈ
သိုပ်ႇလၢတ်ႈ။
ၵဵဝ်ႇၵပ်းလွင်ႈၼႆႉ
ၾၢႆႇပႃႇတီႇသိူဝ်ၽိူၵ်ႇ ၵေႃႈလၢတ်ႈဝႃႈ- ဢိင်ၼိူဝ်ၽူႈယႂ်ႇၵူၼ်းလူင်ဝၢၼ်ႈ
ထုၵ်ႇပေႃႉထုပ်ႉ ၸိူဝ်းၼႆႉ ႁဝ်းၶႃႈၵေႃႈလႆႈငိၼ်းၶၢဝ်ႇယူႇ။ ၵွပ်ႈၼၼ်လႄႈ
ပႃႇတီႇႁူဝ်သိူဝ် တင်းသိူဝ်ၽိူၵ်ႇႁဝ်းၶႃႈ ႁူမ်ႈပႃးၵႅမ် ၽူႈၸွႆႈၾၢႆႇၽွင်းငမ်း
ၼႂ်းၸႄႈဝဵင်းၼမ်ႉၶမ်းႁဝ်း တေလူင်းထတ်းၼႂ်းပိုၼ်ႉတီႈ၊
ၼင်ႇႁိုဝ်ပေႃးတေဢမ်ႇမီး လွင်ႈပေႃႉႁႅမ်ၼၼ်ႉ တၢင်ႇထိုင်ပႃႈၼိူဝ်ဝႆႉယဝ်ႉ။
ၾၢႆႇၼိုင်ႈၵေႃႈ ၵႂႃႇပွင်ႇၶၢဝ်ႇတီႈၽူႈၵွၼ်းၸႄႈဝဵင်းၼမ်ႉၶမ်း/
တီႈၽူႈၵွၼ်းတပ်ႉၸုမ်းလူင် (တပ်ႉမ)/ ၽွင်းလူင် ၸၢႆးဢၢႆႈပဝ်း
ဢၼ်မီးယူႇတီႈဝဵင်းတူၼ်ႈတီး၊ ပႃးၸဵမ် ပွင်ႇၶၢဝ်ႇၸူးၵႅမ်ၽွင်းလူင်
လူင်ပွင်ၸိုင်ႈမိူင်းႁူမ်ႈတုမ် ၻွၵ်ႊတိူဝ်ႊၸၢႆးၵျေႃႇဢူင်း
ဢၼ်ႁွတ်ႈဝႆႉယူႇတီႈ ၼေႇပျီႇတေႃႇ ၸိူဝ်းၼႆႉ။
လွင်ႈပၼ်ႁႃၶႃႈႁႅမ်ၵၼ်တၢႆ
ၼႂ်းၸႄႈဝဵင်းၼမ်ႉၶမ်းၼႆႉ ၼႂ်းႁၢင်လိူၼ်ၵျူႊလၢႆႊၼႆႉၵူၺ်း ပဵၼ်သွင်ၵမ်းယဝ်ႉ။
ဢွၼ်ၼႃႈၼႆႉ ပျီႇတုၸိတ်ႉဝၢၼ်ႈပၢင် ဢၼ်ယူႇတႂ်ႈၸုမ်းပျီႇတုၸိတ်ႉပၢၼ်းသေး
ယိုဝ်းၵူၼ်းဝၢၼ်ႈတၢႆ ၵေႃႉၼိုင်ႈ၊ မိူဝ်ႈလဵဝ်ၵေႃႈၶၻီး (ဢမု)
လိူင်ႈၼႆႉပႆႇယဝ်ႉ။
Tags: Human Right, News