ၽူႈမီးၸၼ်ႉသိုၵ်းမၢၼ်ႈသွင်ၵေႃႉ ထုၵ်ႇၶႃႈတၢႆ တီႈလႅၼ်လိၼ်တႆး- ၶႄႇ



ၽူႈမီးၸၼ်ႉသိုၵ်းမၢၼ်ႈ 2 ၵေႃႉ ဢၼ်ပၵ်းတီႈ ၼွင်မႃႉတႃ ထုၵ်ႇၶႃႈတၢႆ တီႈလႅၼ်လိၼ်တႆး- ၶႄႇ  ၾၢႆႇႁွင်ႇၼမ်ႉမၢဝ်း ၼႂ်းၸႄႈဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ။



ဝၼ်းတီႈ 29/07/2014 ၼႆႉ ၽူႈမီးၸၼ်ႉသိုၵ်းမၢၼ်ႈ 2 ၵေႃႉ  ဢၼ်မႃးပၵ်းသဝ်းတီႈ ဝၢၼ်ႈၼွင်မႃႉတႃ ၼႂ်းၸႄႈဝဵင်း ၼမ်ႉၶမ်း ၵေႃႉၼိုင်ႈ ပဵၼ်ၽူႈၵွၼ်းတပ်ႉၽႄ ၸၼ်ႉၶုၼ်သိုၵ်း ၸိုဝ်ႈဝိၼ်းတူႇရထုၼ်း၊ ထႅင်ႈၵေႃႉၼိုင်ႈ မွၵ်ႈၸၼ်ႉ ႁူဝ်သိုၵ်း (သွင်မႆ) ၵႂႃႇၸၢႆႇၵၢတ်ႇတီႈဝဵင်းၼမ်ႉၶမ်းသေ ပွၵ်ႈၶိုၼ်း ထုၵ်ႇၶႃႈႁႅမ်တၢႆပွတ်းတၢင်း။

ၽူႈမီးၸၼ်ႉသိုၵ်းမၢၼ်ႈသွင်ၵေႃႉၼႆႉ ၼုင်ႈၶူဝ်းၵူၼ်းဝၢၼ်ႈ ၶီႇလူတ်ႉၶိူင်ႈ၊ တီႈတူဝ်ၽူႈမီးၸၼ်ႉၶုၼ်သိုၵ်း (3 တုမ်ႇ) ၼၼ်ႉ မီးႁွႆးမၢၵ်ႇၵွင်ႈသွင်ႁွႆးလႄႈ ႁွႆးၽႃႉၾၼ်း။ တီႈတူဝ်ၵူၼ်းၸွမ်းမၼ်းၼၼ်ႉ တၢင်းလင်မီးႁွႆးယိုဝ်းလႄႈ မီးႁွႆး ၽႃႉၾၼ်းၼင်ႇၵၼ်။ တူဝ်တၢႆၽူႈမီးၸၼ်ႉၼၼ်ႉ ႁၼ်ႁိမ်းလႅၼ်သူၼ်ၶဝ်ႈၵၢပ်ႇၵူၼ်းဝၢၼ်ႈ၊ တူၵ်းၼႂ်းၾင်ႇမိူင်းၶႄႇ၊ လုၵ်ႈၼွင်ႉမၼ်းၼၼ်ႉ မႃးပိၼ်ႈတၢႆၼႂ်းတူင်ႈၼႃး ၾင်ႇၼႂ်းမိူင်းတႆး၊ ဢမ်ႇႁၢင်ႇၵႆၵၼ်ၵႃႈႁိုဝ်၊ ၵွပ်ႈဝႃႈမၼ်းပဵၼ်လႅၼ် လိၼ်- ၵူၼ်းၼႂ်းပိုၼ်ႉတီႈၵေႃႉၼိုင်ႈလၢတ်ႈ။

ဝၢၼ်ႈၼွင်မႃႉတႃၼႆႉ ပဵၼ်ဝၢၼ်ႈတိတ်းၸပ်းလႅၼ်လိၼ် ယူႇၼႂ်းၸႄႈဝဵင်းၼမ်ႉၶမ်း။ ၶၢပ်ႈတူဝ်တၢႆ သိုၵ်းမၢၼ်ႈ သွင်ၵေႃႉၼႆႉ  ႁၼ်မႅၼ်ႈမိူဝ်ႈဝႃး မွၵ်ႈၽွင်းၵၢင်ဝၼ်းတဵင်ႈ၊ ၽူႈမီးပုၼ်ႈၽွၼ်းတင်းသွင်ၸိုင်ႈမိူင်း မၢၼ်ႈ-ၶႄႇ မႃးၵူတ်ႇ ထတ်း။ တူဝ်တၢႆတင်းသွင်ၵေႃႉၼၼ်ႉ သူင်ႇၵႂႃႇႁူင်းယႃဝဵင်းၼမ်ႉၶမ်း မိူဝ်ႈဝႃးၵၢင်ၶမ်ႈ 7 မူင်းသေ ၽႃႇတတ်းတူၺ်း- ၽူႈၸမ်ၸႂ်ၾၢႆႇၽွင်းငမ်း ၸႄႈဝဵင်းၼမ်ႉၶမ်း လၢတ်ႈ။


သိုၵ်းမၢၼ်ႈ 2 ၵေႃႉ ဢၼ်ထုၵ်ႇယိုဝ်းတၢႆၼႆႉ ပဵၼ်တပ်ႉမၢၼ်ႈ ဢၼ်မႃးပၵ်းသဝ်းပုတ်ႈဢဝ်တီႈယူႇ တပ်ႉသိုၵ်းၸိုင်ႈတႆး (RCSS/SSA) ၼႃႈလိၼ်သိုၵ်း 701 ၵူႈပွၵ်ႈ၊ မိူဝ်ႈလဵဝ်ႄတႉ သိုၵ်းတႆးဢမ်ႇမီးယဝ်ႉ၊ သိုၵ်းမၢၼ်ႈႁၢင်ႈသိုၵ်း လေႃႇတိုၵ်း သိုၵ်းတႆးၼႂ်းလိူၼ်မေႊ ပီ 2013 သေ ဝၢႆးႁုပ်ႈယိုတ်းလႆႈယဝ်ႉၵေႃႈ သိုၵ်းမၢၼ်ႈတပ်ႉၸုမ်းလူင် (တပ်ႉမ) 88 တင်း ၸုမ်းပီႇတုၸိတ်ႉၸိူဝ်းၼႆႉ ပုတ်ႈပၵ်းဢဝ်တီႈယူႇမႃး။

ၶၢဝ်ႇဢၼ်ပႆႇယိုၼ်ယၼ် ယင်းလၢတ်ႈဝႃႈ- ဢၼ်ၽူႈမီးၸၼ်ႉသိုၵ်းမၢၼ်ႈ ထုၵ်ႇၶႃႈတၢႆၼႆႉ ယွၼ်ႉပိူဝ်ႈၵဵပ်းၵိၼ်ၶွၼ်ႇ ၵူၼ်းတင်းၶူဝ်းၶွင်လတ်းၶၢမ်ႈၵႂႃႇမႃးၸွမ်းလႅၼ်လိၼ် ဢမ်ႇၽဵင်ႇၵၼ်လႄႈ မီးၽူႈဢမ်ႇႁၢၼ်ႉၸႂ်ၼိူဝ်ၵၼ် ၼႂ်းၶဝ်ၼင်ႇ ၵၼ်ၶႃႈၵၼ်တၢႆ-ဝႃႈၼႆ။ ၽူႈၵွၼ်းတပ်ႉၽႄ ဝိၼ်းတူႇရထုၼ်းၼႆႉၵေႃႈ တိုၵ်ႉၶၢႆႉမႃးယူႇတီႈၼႆႈ မီးမွၵ်ႈၸမ်သွင်လိူၼ် ၵူၺ်း - ၼႆယဝ်ႉ။




 
© 2012 All Rights Reserved | Asean Celebrity | Fonts @ AtFonts | Free Templates