မိူဝ်ႈဝၼ်းတီႈ 20/07/2014 ဢူးဢွင်ႇမိၼ်း ၵႅမ်ႁူဝ်ပဝ်ႈ (2) ၸုမ်းၶိုင်ပွင်လွင်ႈငမ်းယဵၼ် ၸၼ်ႉၸိုင်ႈမိူင်းႁူမ်ႈတုမ် (UPWC) ႄလႈ ပဵၼ်တင်းႁူဝ်ပဝ်ႈသုၼ်ငမ်းယဵၼ်မၢၼ်ႈ (MPC) ၼၼ်ႉ ယူႇတီႈ MPC သေ ဝွၵ်ႇၸိူၼ်းဢဝ်ၽွင်းတႅၼ်း ၸၢဝ်းၶိူဝ်းၵမ်ႈၼမ်၊ ပႃးၸဵမ်ၽွင်းတႅၼ်းပႃႇတီႇသၢင်ႇသီႈ (USDP)ၽွင်ႈ၊ မႃးႁူပ်ႉထူပ်းဢုပ်ႇဢူဝ်းၵၼ်တီႈ ၼေႇပျီႇတေႃႇ သေ ၵိၼ်ၶဝ်ႈႁူမ်ႈမူႇၵၼ်။ ၼႂ်းၼၼ်ႉ ပႃးၶႅၵ်ႇၼွၵ်ႈမိူင်း ဢၼ်လူင်ႉလႅၼ်ႇၾၢႆႇၵေႃႇသၢင်ႈလွင်ႈငမ်းယဵၼ် မိူင်းၾိလိပ်ႊပိၼ်ႊ ၵေႃႈမႃးၶဝ်ႈႁူမ်ႈပႃးၸွမ်း။

ဢူးဢွင်ႇမိၼ်းလၢတ်ႈဝႃႈ- ပေႃးဝႃႈပၢင်ၵုမ်တီႈလၢႆႇၸႃႇယဝ်ႉယဝ်ႉၸိုင် ယုမ်ႇယမ်ဝႃႈၸူဝ်ႈၼႂ်းပီ 2014 ပႆႇသဵင်ႈၼႆႉ တေႁဵတ်းလႆႈၵၢၼ်ၵိုတ်းတိုၵ်းပတ်းပိုၼ်ႉၸိုင်ႈမိူင်း။ ဝၢႆးၼၼ်ႉ ၼႂ်းပီ 2015 ၵေႃႈ တေၸၢင်ႈၸတ်းပၢင်ဢုပ်ႇဢူဝ်း ၵၢၼ်မိူင်းၵၼ်လႆႈ။ ၽွင်းယၢမ်းမိူဝ်ႈလဵဝ်ၼႆႉ ႁူမ်ႈဝႃႈပဵၼ်ပၢင်တိုၵ်းၵၼ်ယူႇသေတႃႉၵေႃႈ ပေႃးတႅၵ်ႈၵၼ်တင်းၵူႈပွၵ်ႈ လႆႈဝႃႈလူတ်းယွမ်းလူင်းၵႂႃႇၼမ်ယဝ်ႉ - ဝႃႈၼႆ။

ၵူႈပွၵ်ႈၼႆႉ ပေႃးႁဵတ်းပၢင်ၵုမ်ႁူဝ်ႁုပ်ႈလိူၼ် ၼိုင်ႈပွၵ်ႈ၊ ပၢင်တိုၵ်း ပတ်းပိုၼ်ႉၸိုင်ႈမိူင်းၼႆႉ ၼိုင်ႈဝူင်ႈၵူၺ်း ပဵၼ်မွၵ်ႈ 400 ပွၵ်ႈၸိူဝ်းၼႆႉ၊ မိူဝ်ႈလဵဝ်ၼႆႉ လႆႈဝႃႈပၢင်တိုၵ်းၶၢင် ၶၢဝ်းတၢင်း 4 လိူၼ် ယင်းတိုၵ်ႉပဵၼ် 200 ပွၵ်ႈၵူၺ်း၊ ပေႃးတႅၵ်ႈ ၵၼ်တင်းၵူႈပွၵ်ႈၸိုင် လႆႈဝႃႈလူတ်းယွမ်းၵႂႃႇတႄႉတႄႉ၊ မိူဝ်ႈလဵဝ် ၵိုတ်းယူႇမွၵ်ႈ 3.5% ၵူၺ်း- ဝႃႈၼႆ။

ပၢင်တိုၵ်းၼႆႉ မၼ်းထုၵ်ႇလႆႈလူတ်းယွမ်းယဝ်ႉ၊ ထုၵ်ႇလႆႈဢဝ်လၢႆးၵၢၼ်မိူင်းၵႄႈလိတ်ႈ။ ၵွပ်ႈၼၼ်လႄႈ ၸုမ်းယိပ်းၵွင်ႈ ၵၢင်ႇၸၢဝ်းၶိူဝ်းၵေႃႈ တိုၼ်းထုၵ်ႇလႆႈမႃးတင်ႈပႃႇတီႇၵၢၼ်မိူင်းသေ ဢုပ်ႇဢူဝ်းၵၢၼ်မိူင်းၵၼ် ၼိူဝ်ၽိူၼ်ၵၢၼ်မိူင်း- ဢူးဢွင်ႇမိၼ်း လၢတ်ႈၵႂႃႇၼင်ႇၼႆ။

ၵဵဝ်ႇၵပ်းလွင်ႈၼႆႉ ၽူႈလဵပ်ႈႁဵၼ်းၵေႃႉၼိုင်ႈထတ်းသၢင်ဝႃႈ- ဢၼ်ဢူးဢွင်ႇမိၼ်းလၢတ်ႈၼႆႉ ပွင်ႇဝႃႈၸုမ်း ၸၢဝ်းၶိူဝ်း ယိပ်းၵွင်ႈၵၢင်ႇလုၵ်ႉၽိုၼ်ႉတင်းလၢႆ တေလႆႈဝၢင်းၵွင်ႈသေမႃးတင်ႈပႃႇတီႇ မႃးယူႇၼႂ်းဝူင်းၵၢၼ်မိူင်းၸွမ်းၶွပ်ႇပိူင် ဢၼ်ၶဝ်တမ်းဝၢင်းဝႆႉၼၼ်ႉ။ လွင်ႈၼႆႉ တွၼ်ႈတႃႇၸၢဝ်းၶိူဝ်းတႄႉ တေတူၵ်းထုၵ်ႇ ဢမ်ႇတူၵ်းထုၵ်ႇ ဢမ်ႇၸၢင်ႈဝႃႈ။ ၸွမ်းၼင်ႇလူင်ပွင်ၸိုင်ႈမၢၼ်ႈ ဝၢင်းၽႅၼ်ဝႆႉၼၼ်ႉ တိုၼ်းႁႂ်ႈၸုမ်းယိပ်းၵွင်ႈၵၢင်ႇၸၢဝ်းၶိူဝ်းဝၢင်းၵွင်ႈယဝ်ႉ- ဝႃႈၼႆ။

ဢူးဢွင်ႇမိၼ်းလၢတ်ႈဝႃႈ မိူဝ်ႈလဵဝ်ပၢင်တိုၵ်းလူတ်းယွမ်းၼမ် ၼႆသေတႃႉ ဢွၼ်ၼႃႈမိူဝ်ႈပႆႇၵိုတ်းယိုဝ်းၵၼ်ၼၼ်ႉ တၢင်းမိူင်းတႆး မိူင်းၶၢင်ၸိူဝ်းၼႆႉ ဢမ်ႇပေႃးမီးပၢင်တိုၵ်း။ ၵူၺ်းၵႃႈ ဝၢႆးၵိုတ်းယိုဝ်းၵၼ်မႃး တေႃႇထိုင်မိူဝ်ႈလဵဝ် လႆႈဝႃႈ ပၢင်တိုၵ်းၼမ်လိူဝ်မႃး။ တူဝ်ယၢင်ႇမၼ်း ၼႂ်း 2-3 ဝၼ်းၼႆႉ ပၢင်တိုၵ်းၼႂ်း ၸႄႈဝဵင်းၵေးသီး ႁၢဝ်ႈႁႅင်းမႃးတႄႉတႄႉ။ ၵူၼ်းမိူင်းၼပ်ႉႁူဝ်ပၢၵ်ႇ လႆႈပၢႆႈယၢၼ်ႁိူၼ်းယေးတီႈယူႇ၊ ၾၢႆႇသိုၵ်းမၢၼ်ႈ ဢဝ်ၵွင်ႈလူင်သေ ယိုဝ်းသႂ်ႇတပ်ႉပၢင်သဝ်း တပ်ႉသိုၵ်းၸိုင်ႈတႆး (SSPP/SSA) ။ ၵဵဝ်ႇၵပ်းလွင်ႈပၢင်တိုၵ်းၼႆႉ ၾၢႆႇသိုၵ်းတႆးၵေႃႈဝႃႈ သိုၵ်းမၢၼ်ႈပူၼ်ႉပႅၼ်ၽိုတ်ႉၶဝ်ႈ မႃးၼႂ်းၼႃႈလိၼ်သိုၵ်းတႆး၊ ၾၢႆႇသိုၵ်းမၢၼ်ႈၵေႃႈဝႃႈ သိုၵ်းတႆး SSPP/SSA ၵိတ်ႇၶႂၢင် ငွႆးယိုဝ်းသိုၵ်းမၢၼ်ႈ ၸွမ်းတႃႈ ၸွမ်းတၢင်းလႄႈ ပဵၼ်ပၢင်တိုၵ်းၵၼ်- ၽူႈလဵပ်ႈႁဵၼ်းၵေႃႉၼိုင်ႈလၢတ်ႈၼင်ႇၼႆ။