ဝၼ်းတီႈ 07/02/2014 ဝၼ်းၸိူဝ်ႉၸၢတ်ႈၸိုင်ႈတႆး (Shan National Day) ၶွပ်ႈၶူပ်ႇ 67 ပီတဵမ်ၼႆႉ ၵူၼ်းၼုမ်ႇၼႂ်းၸိုင်ႈတႆး လၢႆလၢႆၸႄႈဝဵင်း ႁူမ်ႈၵၼ်ပႆၶိုၼ်ႈလွႆလဵင်း ၼႂ်းၸႄႈဝဵင်းမိူင်းယႆ ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇ။ ယိူင်းဢၢၼ်းၶွင်ၵူၼ်းၼုမ်ႇၼၼ်ႉ ပိူဝ်ႈတႃႇၵၢၼ်ၽိုၵ်းသၢၼ်း လဵၼ်ႈႁႅင်း၊ လဵပ်ႈႁဵၼ်း ၼမ်ႉလိၼ်ႁိၼ်ၽႃ သၽႃဝၾိင်ႈတိုၼ်းပဵၼ် လႄႈ ၸတ်းႁႅၼ်းပၢင်ၵႅဝ်ႈ “ဝၼ်းၸိူဝ်ႉၸၢတ်ႈၸိုင်ႈတႆး” ၼိူဝ်လွႆလဵင်း- ၼႆယဝ်ႉ။

ဢွၼ်ၼႃႈတေပႆႇၶိုၼ်ႈၼႆႉ မီးၵၢၼ်ၸိူၼ်းႁွင်ႉမွၵ်ႇ ၼတ်ႉ/ၽတ်းၵၼ်ဝႆႉဝႃႈ ၵူၼ်းၼုမ်ႇၼႂ်းမူႇၸုမ်းၽႂ်မၼ်း လႄႈသင်၊ သုၼ်ႇတူဝ်လႄႈသင် မႃးၶဝ်ႈႁူမ်ႈၶၢဝ်းတၢင်း ပႆၶိုၼ်ႈလွႆလဵင်းၸွမ်းၵၼ်လႆႈ။ ၶပ်ႉမၢႆၶၢဝ်းတၢင်း ဝၼ်းတီႈ 05/02/14 တၢမ်းၶမ်ႈ ႁႂ်ႈထိုင်တီႈမိူင်းပၢတ်ႇ ၸႄႈဝဵင်းတၢင်ႉယၢၼ်း။ ဝၼ်းတီႈ 06/02/14 ဝႆႈသႃယွၼ်းဢၼုၺၢတ်ႈ တမ်ႈတီႈႁေႃၸဝ်ႈမိူင်း၊ ႁၢင်ႈႁႅၼ်းတူဝ်ႈတၼ်းၵူႈလွင်ႈလွင်ႈ။ ႁူဝ်ၶမ်ႈမႃး တေတႄႇၶိုၼ်ႈႁႂ်ႈႁွတ်ႈတီႈဝၢၼ်ႈၵၢင်လွႆ၊ ၼွၼ်းယင်ႉလိုဝ်ႈ။ ဝၼ်းတီႈ 07/02/14 ၵၢင်ၼႂ်ၸဝ်ႉ သိုပ်ႇၶၢဝ်းတၢင်းၶိုၼ်ႈႁွတ်ႈၽႅဝ်ၼိူဝ်ၸိၵ်းလွႆ- ၼႆယဝ်ႉ။

ၶၵ်ႉတွၼ်ႈၸတ်းပၢင်ၵႅဝ်ႈၼၼ်ႉ 1.လမ်ႁူဝ် (ၵၼ်ႇတေႃး)ဝႆႈသႃၸဝ်ႈဝၢၼ်ႈၸဝ်ႈမိူင်း။ 2.ပူၵ်းတုင်းၸၢတ်ႈတႆး။ 3.လူဢၢၼ်ႇပိုၼ်းဝၼ်းၸိူဝ်ႉၸၢတ်ႈၸိုင်ႈတႆး ႁိုဝ် ဝၼ်းမိူင်းတႆး။ 4.လဵပ်ႈႁဵၼ်းလူယဵမ်ႈလွင်ႈလၢၵ်ႇလၢႆ ၶိုၵ်ႉတွၼ်း လွႆသုင်လူင်ၼႂ်းၸိုင်ႈတႆး။ 5.ၵိၼ်ၶဝ်ႈႁူမ်ႈမူႇ။ 6.ထၢႆႇႁၢင်ႈႁူမ်ႈၵိုၵ်းၵၼ်သေ ဝၢႆးဝၼ်းၶိုၼ်းလူင်းလွႆ။

ၸၢႆးသႅင်မိူင်း လၢတ်ႈဝႃႈ- မိူဝ်ႈတႄႇမၼ်းဢၢၼ်းဝႆႉ 60 ၵေႃႉၵူၺ်း၊ ၵူၺ်းၵႃႈ ၽိူဝ်ႇမႃးႁူမ်ႈၶွၼ်ႈတုမ်ၵၼ် ပႆၶိုၼ်ႈမီးမွၵ်ႈ 250 ၵေႃႉ၊ ပေႃးဝႃႈထိုင်ၼိူဝ်ၸိၵ်းလွႆယဝ်ႉၵေႃႈ ဢၢၼ်းပူၵ်းတုင်းၸၢတ်ႈ ႁွင်ႉၽဵင်းၵႂၢမ်း ၸိူဝ်ႉၸၢတ်ႈ၊ ၸတ်းၵၢၼ်တူင်ႉၼိုင်။ မီးယိူင်းဢၢၼ်းပႃး 1.ပိူဝ်ႈတႃႇပၢႆးယူႇလီၵူၼ်းၼုမ်ႇ၊ 2.ပေႃးထူပ်းတၢင်း ယၢပ်ႇၽိုတ်ႇမႃး ႁႂ်ႈမေႃၵႄႈလိတ်ႈႁင်းၽႂ်မၼ်း၊ 3.ႁႂ်ႈမေႃတိုၵ်းတေႃးယႃႈမဝ်းၵမ် ၸိူဝ်းၼႆႉ- ဝႃႈၼႆ။

လႆႈႁူႉပႃးဝႃႈ ၵူၼ်းၼုမ်ႇၸိူဝ်းပႆၶိုၼ်ႈ ၼွၵ်ႈသေၵူၼ်းၼႂ်းပိုၼ်ႉတီႈယဝ်ႉ ပဵၼ်ၵူၼ်းၼုမ်ႇ မိူၼ်ၼင်ႇၼႂ်းၸႄႈဝဵင်း ၼွင်ၶဵဝ်၊ သီႇပေႃႉ၊ ၵျွၵ်ႉမႄး၊ လႃႈသဵဝ်ႈ ပႃးၸဵမ်ပၢင်ႇဢူ (မေႇမျဵဝ်ႉ) ၸိူဝ်းၼႆႉ- ၼႆယဝ်ႉ။

မၢႆတွင်း ၵၢၼ်ပႆၶိုၼ်ႈလွႆဝၢင်းတမ်းဝႆႉဝႃႈ ၵူၼ်ႇၼုမ်ႇတႆး ၽူႈလႂ်ၽႂ်ဢမ်ႇဝႃႈ ၸိူဝ်းသူၼ်ၸႂ်မႃးၶဝ်ႈႁူမ်ႈၶိုၼ်ႈ ၸွမ်းလႆႈ။ ႁႂ်ႈပဵၼ်ၵူၼ်းၵေႃႉၵႂၼ်းပေႉတူဝ်ၵဝ်ႇ၊ တႅပ်းတတ်းႁင်းၵူၺ်းလႆႈ၊ ပၢႆးယူႇလီတဵမ်ထူၼ်ႈ။ ၸရိပ်ႈၶၢဝ်းတၢင်း လုၵ်ႉတီႈၸဝ်ႈၵဝ်ႇယူႇ တေႃႇၽႅဝ်မိူင်းပၢတ်ႇ တေလႆႈဢွၵ်ႇႁင်းၵူၺ်း။ တီႈၼွၼ်း လႄႈ လွင်ႈၵိၼ်ယႅမ်ႉၶၢဝ်းတၢင်းၶိုၼ်ႈ/လူင်း တေႁၢင်ႈႁႅၼ်းလဵင်ႉလူ။ ၵူၼ်းၼႂ်းပိုၼ်ႉတီႈၸိူဝ်းမီးတူဝ်ထူပ်းယၢမ်ႈၶိုၼ်ႈ တေဢွၼ်ၼမ်းၶၢဝ်းတၢင်း။ တေႁၢင်ႈႁႅၼ်းမေႃယႃ တႃႇတူၺ်းထိုင်ပၢႆယူႇလီၵႂႃႇၶၢဝ်းတၢင်းၸွမ်း။ ၵူၼ်းၵေႃႉတေၶိုၼ်ႈလွႆၼၼ်ႉ ပွင်ႇၶၢဝ်ႇပၼ်သၢႆမၢႆၸိုဝ်ႈသဵင် လႆႈၵူႈၶၢဝ်း- ၼႆယဝ်ႉ။

လွႆလဵင်းၼႆႉ သုင်တီႈ 1 ၼႂ်းၸိုင်ႈတႆး၊ ယူႇၼႂ်းၸႄႈဝဵင်းမိူင်းယႆ ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇ။ တၢင်းသုင်မၼ်း ၸွမ်းၼင်ႇၼႂ်းပပ်ႉႁဵၼ်းလိၵ်ႈတႆး လၢတ်ႈဝႆႉဝႃႈ 8,777 ထတ်း၊ ၵူၺ်းၵႃႈ ၼႂ်းၽႅၼ်ႇတီႈဢိင်းၵလဵတ်ႈ ႁဵတ်းဝႆႉၽွင်းသိုၵ်းလုမ်ႈၾႃႉ ပွၵ်ႈ 2 လၢတ်ႈဝႆႉဝႃႈသုင် 8,780 ထတ်း။ လွႆသုင်တီႈ 2 ၼႂ်းၸိုင်ႈတႆး ပဵၼ်လွႆပၢင်ၼၢဝ် ၸႄႈဝဵင်းမိူင်းယွင်း ၼႂ်းၼႃႈလိၼ်မိူင်းလႃး ၸိုင်ႈတႆးပွတ်းဢွၵ်ႇ။ လွႆသုင်တီႈ 3 ၼႂ်းၸိုင်ႈတႆး ပဵၼ်လွႆၸၢင်ႉ ၸႄႈဝဵင်းမိူင်းၵိုင် ၸိုင်ႈတႆးပွတ်းၸၢၼ်း၊ တၢင်းသုင် 8,173 ထတ်း။