ၵဝ်ႉငဝ်ႈႁူမ်ႈတုမ်ႁႅင်းၵၢၼ်မိူင်းမၢၼ်ႈ တိုၵ်းသူၼ်း၊ ၵူၼ်းႁဵတ်းၵၢၼ်ၸၼ်ႉတႅမ်ႇမိူင်းမၢၼ်ႈ ထုၵ်ႇလီလႆႈၵႃႈႁႅင်း ၼိုင်ႈဝၼ်း ၸဵတ်းႁဵင်။

ပူၼ်ႉမႃးမိူဝ်ႈဝၼ်းတီႈ 09/02/14 ၶၢဝ်ႇ RFA ဢွၵ်ႇၵႂႃႇဝႃႈ- ၵဝ်ႉငဝ်ႈႁူမ်ႈတုမ်ႁႅင်းၵၢၼ်မိူင်းမၢၼ်ႈ (ဢၼ်ၶွတ်ႇၽွတ်ႈ ဝႆႉၸူဝ်ႈၶၢဝ်း) တိုၵ်းသူၼ်းဝႃႈ- မိူင်းမၢၼ်ႈၼႆႉ ၵႃႈႁႅင်းၵူၼ်းႁဵတ်းၵၢၼ်ၸၼ်ႉတႅမ်ႇၶဝ် ၼိုင်ႈဝၼ်းထုၵ်ႇလီလႆႈ 7,000 ၵျၢတ်ႈ- ၼႆယဝ်ႉ။

ၵဵဝ်ႇၵပ်းလွင်ႈၼႆႉ ၻွၵ်းတိူဝ်ႇၸၢႆးၶၢႆႇမဵဝ်းထုၼ်း ၽူႈပၼ်တၢင်းၶႆႈၸႂ် မွၵ်ႇလၢတ်ႈၶေႃႈၵႂၢမ်းတီႈပၢင်သပ်း ၸႅင်ႈၶၢဝ်ႇ တီႈဝဵင်းၵျွၵ်ႉမျွင်း တိူင်းတႃႈၵုင်ႈဝႃႈ - ၸွမ်းၼင်ႇလႆႈလူင်းလဵပ်ႈႁဵၼ်းတူၺ်း ၼႂ်းၸႄႈတိူင်းလႄႈ ၸႄႈမိူင်း 12 ဢၼ်၊ ႁူမ်ႈတင်းမူတ်း 49 ၸႄႈဝဵင်းၼၼ်ႉ ဢိင်ၼိူဝ်ငဝ်းလၢႆးၵူႈလွင်ႈလွင်ႈသေ ၵူၼ်းႁဵတ်းၵၢၼ်မိူင်းမၢၼ်ႈၼႆႉ ထုၵ်ႇလီလႆႈ ဝူၼ်ႉသွၼ်ႇပၼ် တႃႇငိုၼ်းၶဝ်ႈၶဝ်။ ပိူဝ်ႈတႃႇတတ်းမၵ်း ၶိုၼ်ႈပၼ်ၵႃႈႁႅင်းၵူၼ်းႁဵတ်းၵၢၼ်ၼႆႉ လႆႈၵႂႃႇတီႈၼေႇပျီႇတေႃႇ သေ တိုၵ်းသူၼ်းၽွင်းလူင်ႁွင်ႈၵၢၼ် ၾၢႆႇႁႅင်းၵၢၼ် မိူဝ်ႈဝၼ်းတီႈ 07/02/14 ဝႆႉယဝ်ႉ။

ထႅင်ႈၾၢႆႇၼိုင်ႈၵေႃႈ ၶေႃႈတိုၵ်းသူၼ်းၶွင် ၵဝ်ႉငဝ်ႈႁူမ်ႈတုမ်ႁႅင်းၵၢၼ်မိူင်းမၢၼ်ႈၼႆႉ  လႆႈတၢင်ႇလၢတ်ႈပႃးတီႈ ၸုမ်းႁႅင်း ၵၢၼ်ၵူႈၸိုင်ႈမိူင်း (ILO) ယဝ်ႉ- ဝႃႈၼႆ။

ပိူဝ်ႈတႃႇႁႂ်ႈလူင်ပွင်ၸိုင်ႈတတ်းမၵ်းပၼ် ၵႃႈႁႅင်းၸၼ်ႉတႅမ်ႇၵူၼ်းႁဵတ်းၵၢၼ်မိူင်းမၢၼ်ႈၼႆႉ ပူၼ်ႉမႃးမိူဝ်ႈပီ 2013 မီးၵၢၼ်တၢင်ႇလၢတ်ႈတီႈၽွင်းတႅၼ်းသေ ၼမ်းဢဝ်ဢုပ်ႇလၢတ်ႈၼႂ်းသၽႃးမႃး။ ဢိင်ၼိူဝ်လွင်ႈၼႆႉသေ ၸဝ်ႈၼႃႈတီႈ ႁွင်ႈၵၢၼ်လူင်ၾၢႆႇႁႅင်းၵၢၼ်၊ ၾၢႆႇပၺ်ၺႃ၊ ၾၢႆႇမၢႆမီႈၸိူဝ်းၼႆႉ လႆႈလူင်းၸွပ်ႇထတ်းတူၺ်း ၵၢင်ၸႂ်ၵူၼ်းႁဵတ်းၵၢၼ် လႄႈ ၸဝ်ႈၶွင်ၼႃႈၵၢၼ် ၼႂ်းႁူင်းၸၢၵ်ႈ တီႈဝဵင်းလိူဝ်ႇ တင်းဝဵင်းလူင်တႃႈၵုင်ႈ -ၼႆယဝ်ႉ။