တၢင်းပၢင်သၢင်းဝႃႈ ၶၢင်တင်းမၢၼ်ႈ တေဢုပ်ႇၵၼ်ၼႂ်း မိူင်းၶႄႇ၊ ဢမ်ႇၸႂ်ႈၼႂ်းၼႃႈလိၼ်ဝႃႉ။ ၸဝ်ႈယွတ်ႈ သိုၵ်းဝႃႈ ပေႃးဢုပ်ႇၵၼ် ယႃႇႁႂ်ႈဢွၵ်ႇၾၢင်ႁၢင်ႈတွႆႇႁူဝ်ၵၼ်ယဝ်ႉ မႃးဢုပ်ႇလွင်ႈလီၵၼ်။

ဝၢႆးတပ်ႉသိုၵ်းမၢၼ်ႈတင်းသိုၵ်းၶၢင် ပဵၼ်ပၢင်တိုၵ်းၵၼ်ႁၢဝ်ႈႁႅင်းၼႂ်းမိူင်းၶၢင်ႁၢဝ်ႈႁႅင်း၊ သိုၵ်းမၢၼ်ႈယိုတ်းလႆႈ ၵွင်းလွႆသုင် ၸိူဝ်းမုင်းႁူမ်ႇငဝ်းဝႆႉ ငဝ်ႈငုၼ်းလၢႆႇၸႃႇၶွင်ၸုမ်းၶၢင် (KIO/KIA) မႃးၼႆႉ မိူဝ်ႈလဵဝ် လၢႆလၢႆၾၢႆႇဝႃႈ မၢၼ်ႈတင်းၶၢင်တေႁူပ်ႉ ထူပ်းဢုပ်ႇဢူဝ်းၵၼ်၊ ဢွၼ်တၢင်းဝႃႈ တေဢုပ်ႇၵၼ်ၼႂ်းၼႃႈလိၼ်ဝႃႉ။

ၵပ်းၵၢႆႇလွင်ႈၼႆႉ ဝၼ်းထိ 01/02/13 (မိူဝ်ႈဝႃး) ၸဝ်ႈၼႃႈတီႈၶၢင် လႃႇၼင် ၵေႃႈလၢတ်ႈတီႈၸုမ်းသိုဝ်ႇ DVB ဝႃႈ ၵဵဝ်ႇၵပ်း လွင်ႈပိူဝ်ႈတႃႇဢုပ်ႇဢူဝ်းၵၼ်တီႈပၢင်သၢင်းၼႆႉ ယင်းပႆႇမီးၽႅၼ်၊ ႁဝ်းၶႃႈၵေႃႈဢမ်ႇသၢၼ်ၶတ်း ၼမ်ႉၸႂ်/ၸေႇတၼႃႇၶဝ်- ဝႃႈၼႆ။

တေႃႇထိုင်မိူဝ်ႈလဵဝ် တင်းသွင်ၾၢႆႇတေဢုပ်ႇၵၼ်တီႈလႂ်/မိူဝ်ႈလႂ် ပႆႇမီးလွင်ႈပိုတ်ႇၽိူၺ် ပဵၼ်တၢင်းၵၢၼ်။ လိုၼ်းသုတ်း လႅင်ႇၶၢဝ်ႇတၢင်းပၢင်သၢင်းလၢတ်ႈဝႃႈ ၵၢၼ်ႁူပ်ႉထူပ်းဢုပ်ႇဢူဝ်းဝူင်ႈၵၢင်မၢၼ်ႈတင်းၶၢင်ၼႆႉ ဝၼ်းမၼ်းတႄႉဢမ်ႇႁူႉ၊ ဢွင်ႈတီႈ တႄႉတေပဵၼ်တီႈၼႂ်းမိူင်းၶႄႇ- ဝႃႈၼႆ။

တေႃႇထိုင်မိူဝ်ႈလဵဝ် ဢၼ်ပၼ်ႁႅင်းဢီးႁႂ်ႈမီးမႃးၵၢၼ်ဢုပ်ႇဢူဝ်း ပဵၼ်မိူင်းဢမႄႊရိၵၼ်ႊ တင်းမိူင်းၶႄႇ။

ၵဵဝ်ႇၵပ်းလွင်ႈၼႆႉ ၸဝ်ႈယွတ်ႈသိုၵ်း ႁူဝ်ပဝ်ႈၶွင်ႊသီႊဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး (RCSS/SSA) လၢတ်ႈဝႃႈ- ပေႃးဝႃႈ မီးပၢင်ဢုပ်ႇဢူဝ်းလွင်ႈငမ်းယဵၼ်ၸိုင် ဢၼ်ႁဝ်းၶႃႈၶႂ်ႈတၢင်ႇလၢတ်ႈၼၼ်ႉ 1.ယႃႇပေ ပဵၼ်ၾၢင်ႁၢင်ႈထုပ်ႉတွႆႇႁူဝ် ပိူၼ်ႈယဝ်ႉသေ မႃးႁႃဢုပ်ႇလွင်ႈလီၵၼ်။ 2.လွင်ႈငမ်းယဵၼ် ဢၼ်ႁဝ်းႁဵတ်းၵႃႈ ပူၼ်ႉမႃးၼႆႉ မၼ်းဢမ်ႇပႃးၵူၼ်းမိူင်း ၸင်ႇဝႃႈဢမ်ႇမၼ်ႈၵိုမ်းမႃး၊ ၵမ်းၼႆႉ ၼင်ႇႁိုဝ်ၵူၼ်းမိူင်းလႆႈၶဝ်ႈပႃး ၼၼ်ႉ ႁဝ်းထုၵ်ႇလႆႈႁႃတၢင်းပၼ်၊ ပေႃးၵူၼ်းမိူင်းၸွႆႈပၼ် လွင်ႈငမ်းယဵၼ်တေယိုၼ်း ယၢဝ်း/မၼ်ႈၵိုမ်း။ 3.ပေႃးၵိုတ်းယိုဝ်းၼႆ ၵိုတ်းယိုဝ်းၸုမ်းလဵဝ် ဢမ်ႇၼၼ် လၢႆၸုမ်းၵူၺ်းဢမ်ႇ ယဝ်ႉ၊ တၵ်းလႆႈပိုၼ်ၽၢဝ်ႇ ၵိုတ်းယိုဝ်းတင်းမိူင်း။ ပေႃးဢမ်ႇၸႂ်ႈၸိူင်ႉၼၼ် တေပဵၼ်မိူၼ်ၼင်ႇၵိုတ်းယိုဝ်းၵၼ်တင်းတၢင်ႇ မူႇတၢင်ႇၸုမ်း သေၵႂႃႇယိုဝ်း ယၢင်း/ယိုဝ်းၶၢင်၊ ၵိုတ်းယိုဝ်းၵၼ်တင်းၶၢင်ယဝ်ႉ သမ်ႉတေၵႂႃႇယိုဝ်းတၢင်ႇၸုမ်းထႅင်ႈၵူၺ်း၊ လွင်ႈၼႆႉ မၼ်းဢမ်ႇပေႃးသၢင်ႇထုၵ်ႇ- ဝႃႈၼႆ။

မၼ်းၸဝ်ႈသိုပ်ႇလၢတ်ႈၸိမ်ထႅင်ႈဝႃႈ- ပိူဝ်ႈတႃႇ လူင်ပွင်ၸိုင်ႈၼႂ်းမိူင်းလႄႈတၢင်ႇမိူင်းၼၼ်ႉ ႁဝ်းၶႂ်ႈလၢတ်ႈဝႃႈ- ၵူၼ်းမိူင်းႁဝ်း လႆႈၺႃးတၢင်းတုၵ်ႉၶၽေးသိုၵ်းသိူဝ်ယူႇၼႆႉ မၼ်းဢမ်ႇၸႂ်ႈသိုၵ်းမိူင်းၼွၵ်ႈ၊ မၼ်းပဵၼ် သိုၵ်းႁဝ်းၼႂ်းမိူင်းၼင်ႇၵၼ်ယိုဝ်းၵၼ် လႄႈပဵၼ်မႃးၵူၺ်း။ ၵွပ်ႈၼၼ် လွင်ႈၸိူဝ်းၼႆႉ ႁဝ်းၼင်ႇၵၼ် ဝႆႉၸႂ် ၼင်ႇပီႈ ၼင်ႇၼွင်ႉၵၼ်သေၵႄႈလိတ်ႈၵႂႃႇၵေႃႈ ၸၢင်ႈပဵၼ်လႆႈယူႇ- ဝႃႈၼႆ။