လင်ႁိူၼ်းၵူၼ်းၼပ်ႉႁူဝ်ပၢၵ်ႇ၊ ဝတ်ႉမုၼ်ၸဝ်ႈၼပ်ႉႁူဝ်သိပ်း မိူင်းၵဵင်းတုင်၊ ၺႃးၽေးသၽႃဝ မၢၵ်ႇႁဵပ်းတူၵ်း သႂ်ႇ လုၵွႆတင်းၼမ်တင်းလၢႆ။ ၼႂ်းဢိူင်ႇၵၢတ်ႇထၢႆႈၺႃးၼမ်လိူဝ်ပိူၼ်ႈ။

ဝၼ်းထိ 03/02/13 (မိူဝ်ႈဝႃး) တင်ႈတႄႇဝၢႆးဝၼ်းယၢမ်း 4 မူင်း ဢိင်ၼိူဝ်ၾူၼ်လူမ်းႁႅင်း၊ မၢၵ်ႇႁဵပ်းလုၵ်ႈ ယႂ်ႇလုၵ်ႈလူင် တူၵ်းသႂ်ႇ လင်ၶႃးႁိူၼ်းၵူၼ်းဝၢၼ်ႈ တင်း ဝတ်ႉမုၼ်ၸဝ်ႈ ၼႂ်းၸႄႈဝဵင်းၵဵင်းတုင် လုၵွႆပွင်ႇၵႂႃႇ တင်းၼမ်တင်းလၢႆ။ ႁိူၼ်းၵူၼ်းဝၢၼ်ႈ ပိုၼ်ႉတီႈၸိူဝ်းၺႃးၽေးၼမ်သုတ်း ပဵၼ်ၼႂ်းဢိူင်ႇၵၢတ်ႇထၢႆႈ၊  ၵူၺ်းၵႃႈ လွင်ႈလုသုမ်းဝၢတ်ႇ/တၢႆတႄႉ ဢမ်ႇလႆႈငိၼ်း။

ၵဵဝ်ႇၵပ်းလွင်ႈၼႆႉ ၵူၼ်းၵဵင်းတုင်ၵေႃႉၼိုင်ႈလၢတ်ႈဝႃႈ- မၢၵ်ႇႁဵပ်းလူင်ၼႆႉလုၵ်ႈမၼ်းပဵင်းမွၵ်ႈမၢၵ်ႇၸွၵ်း၊ ဢမ်ႇလိူဝ်သေ လဵၵ်းၽိူၵ်ႇမုင်းလင်ၶႃးႁိူၼ်းယင်းပွင်ႇ၊ ႁိူၼ်းၸိူဝ်းမုင်းလိၼ်ၶေႃၸိူဝ်းၼႆႉ တေၵႂႃႇၵိုတ်းသင်၊ ပဵၼ်ႁူးပွင်ႇလုၵွႆမူတ်း- ဝႃႈၼႆ။

ၼႂ်းဢိူင်ႇၵၢတ်ႇထၢႆႈ ၸိူင်ႉၼင်ႇ ဝၢၼ်ႈၵၢတ်ႇထၢႆႈ၊ ဝၢၼ်ႈၼွင်ႁုမ်း၊ ဝၢၼ်ႈယၢင်းလူင်၊ ဝၢၼ်ႈႁႄႉၸိူဝ်းၼႆႉ။ ၼႂ်းဢိူင်ႇၵၢတ်ႇတဝ်ႇ ၵေႃႈ ဝၢၼ်ႈၵွမ်းၸိူဝ်းၼႆႉ လုယႂ်ႇၵွႆႇၼမ်တႄႉတႄႉ။ ၵူၼ်းၼုမ်ႇၼႂ်းဝဵင်းၵဵင်းတုင်ၵေႃႉ ၼိုင်ႈလၢတ်ႈဝႃႈ- ၼႂ်းဝဵင်းၵဵင်းတုင် တင်းမူတ်း လင်ႁိူၼ်းဢၼ်ပွင်ႇၵွႆ ယွၼ်ႉ မၢၵ်ႇႁဵပ်း မီးမွၵ်ႈ 100 လင်ပၢႆ၊ ဝတ်ႉမုၼ်ၸဝ်ႈမွၵ်ႈ 10 လင်၊ လွင်ႈလုတၢႆတႄႉဢမ်ႇ လႆႈငိၼ်း- ဝႃႈၼႆ။

ၼွၵ်ႈသေၼၼ်ႉ ဝၢၼ်ႈဝဵင်းၸွမ်းလႅၼ်လိၼ်ထႆး မိူၼ်ၼင်ႇဝဵင်းတႃႈၶီႈလဵၵ်း၊ မိူင်းတူၼ်၊ မိူင်းသၢတ်ႇ၊ ပုင်ႇပႃႇၶႅမ် လႄႈသင်။ ၼႂ်းမိူင်းထႆး ၸႄႈတွၼ်ႈၵဵင်းႁၢႆး မိူၼ်ၼင်ႇမႄႈသၢႆ၊ မႄႈၾႃႉလူင် လႄႈသင်၊ ၸႄႈတွၼ်ႈ ၵဵင်းမႆႇ သမ်ႉ ၸႄႈဝဵင်းမိူင်းၾၢင်၊ မႄႈဢၢႆး ၸိူဝ်းၼႆႉၵေႃႈ ၺႃးၾူၼ်မၢၵ်ႇႁဵပ်းတူၵ်းၼင်ႇၵဝ်ႇ၊ ၵူၺ်းၵႃႈ ဢမ်ႇယႂ်ႇပဵင်း တၢင်းၵဵင်းတုင်- ၼႆယဝ်ႉ။

ၵူႈပီပူၼ်ႉမႃး မၢၵ်ႇႁဵပ်းတႄႇတူၵ်းမွၵ်ႈလိူၼ်ဢေႊပရိူဝ်ႊလ်ၸိူဝ်းၼႆႉ၊ ပီၼႆႉတႄႉမႃးၸဝ်ႉလႄႈလၢၵ်ႇလၢႆးဝႆႉ၊ - ၵူၼ်းထဝ်ႈၼႂ်းဝဵင်း တႃႈၶီႈလဵၵ်းၵေႃႉၼိုင်ႈလၢတ်ႈၼင်ႇၼႆ။

ၸွမ်းလႅၼ်လိၼ်ထႆး-တႆးၼႆႉ  ပူၼ်ႉမႃးမိူဝ်ႈပီ 2009 ၵေႃႈ ၾူၼ်မၢၵ်ႇႁဵပ်းၵိုင်ႉၵၢင်ႉ တူၵ်းႁႅင်းသေ ၾူၼ်လူင် လူမ်းလူင်လိုပ်ႈ ၸွမ်းထႅင်ႈလႄႈ ပီၼၼ်ႉ ၶူဝ်းႁႆႈၶူဝ်းသူၼ် မၢၵ်ႇဝၢၵ်ႈတၢင်းၵိၼ် တူၼ်ႈၽၵ်းယိူဝ်ႈၼၢင်းၶဵဝ် ဢိၵ်ႇတင်းႁိူၼ်းယေးၵေႃႈ လုၵွႆတင်းၼမ်။