ၽူႈဢွၼ်ႁူဝ်မိူင်းမၢၼ်ႈ လူင်းလၢႆးမိုဝ်းလိၵ်ႈႁူမ်ႈမၢႆပၢင်လူင် မိူဝ်ႈ 12/02/1047

ယွၼ်ႉမီးလိၵ်ႈႁူမ်ႈမၢႆပၢင်လူင်ပီ 1947 လႄႈၸင်ႇမီးၸိုင်ႈမိူင်းႁူမ်ႈတုမ်မၢၼ်ႈပီ 1948 ၊ ယွၼ်ႉမီး ဝၼ်းမိူင်းတႆး မိူဝ်ႈဝၼ်းတီႈ 7 လိူၼ်ၾႅပ်ႉပိဝ်ႈရီႈ လႄႈၸင်ႇမီးဝၼ်းၸိုင်ႈမိူင်းၽွမ်ႉ ႁူမ်ႈမၢၼ်ႈမိူဝ်ႈ ဝၼ်းတီႈ 12 လိူၼ်ၾႅပ်ႉပိဝ်ႈရီႈ။ ၼႆႉပဵၼ်သၵ်ႉၶိမၢႆ တွင်းတၢင်းၵၢၼ်မိူင်း ဢၼ်ၽူႈဢွၼ်ႁူဝ်ၵူၼ်း မိူင်းတႆးႁဝ်း ၼႂ်းပီႁူဝ်ပၢၵ်ႇၸဵင်ပီတီႈ 20 တမ်းဝၢင်းဝႆႉပၼ်ပုၼ်ႈတႃႇ လုၵ်ႈလၢၼ်ၵူၼ်းမိူင်းတႆးႁဝ်း ယိပ်းၵမ်ၵႄႈလိတ်ႈပၼ်ႁႃၵၢၼ်မိူင်း ၼႂ်းဝၼ်းမိူဝ်းၼႃႈၼႆၼၼ်ႉ ၸိူဝ်းႁဝ်းၸိူဝ်းပဵၼ်လုၵ်ႈလၢၼ်မီး ပုၼ်ႈၽွၼ်းဝႆႉ ၼိူဝ်ႁူဝ်ဝႃႇ မႃးမိူၼ်ၵၼ်ၵူႈၵေႃႉလႄႈ ထုၵ်ႇလီၸုၵ်းမၼ်ႈဝႆႉၼိူဝ်ၼမ်ႉၸႂ်ပၢင်လူင်သေ သိုပ်ႇယၢင်ႈ ၶိုၼ်ႈၼႃႈႁဵတ်းၵၢၼ်ႁႂ်ႈၸိူဝ်ႉၸၢတ်ႈၶိူဝ်းၵူၼ်းၵဝ်ႇ လႆႈမီးလွင်ႈထၢင်ႇႁၢင်ႈၼႄၵၢင် ၸႂ်/လၢတ်ႈ/တႅမ်ႈ/ပိုၼ်ၽႄႈလႄႈယုၵ်ႉ ယွင်ႈ/ပႂ်ႉပႃးၽႃးသႃလိၵ်ႈလၢႆး/ၾိင်ႈငႄႈတူဝ်ၵဝ်ႇ ယႃႇပၼ်ႁႂ်ႈ ၸူမ်ႁၢႆၵႂႃႇၼႂ်းၸၢတ်ႈၸိုင်ႈလုမ်ႈၾႃႉၼၼ်ႉယဝ်ႉ။ ၼႆႉပဵၼ်ၶေႃႈသူးဝၢၼ်းၼႂ်းၸႂ်ၸိူဝ်းႁၵ်ႉၸိူဝ်ႉ ၸၢတ်ႈဝၢၼ်ႈမိူင်းၶဝ်ၼႆၵေႃႈ တၵ်းတေဢမ်ႇၽိတ်း။

ၽူႈဢွၼ်ႁူဝ်မိူင်းမၢၼ်ႈ လူင်းလၢႆးမိုဝ်းလိၵ်ႈႁူမ်ႈမၢႆပၢင်လူင် မိူဝ်ႈ 12/02/1047

66 ပီပူၼ်ႉမႃးၼၼ်ႉ ၽိတ်းႁိုဝ်ထုၵ်ႇၼၼ်ႉ ၵွပ်ႈပဵၼ်ဢတီတ(ပူၼ်ႉမႃး)ယဝ်ႉလႄႈ ႁဝ်းႁဵတ်းသင် ဢမ်ႇလႆႈယဝ်ႉ လိူဝ်သေ ဢဝ်ႁဵတ်းတွၼ်ႈသွၼ်။ တင်ႈဢဝ် 66 ၵႂႃႇၸူး 67 လႄႈသိုပ်ႇၵႂႃႇတေႃႇလုမ်ႈ ၾႃႉလူင် ပေႃးသုတ်းသဵင်ႈလူႉပင်းၼၼ်ႉ ဢၼ်ႁဝ်းႁႃးၸဝ်ႈၶႃႈထုၵ်ႇလီ ဝူၼ်ႉၼိုၵ်ႉတႄႉၼႆႉ ဢဝ်ၼႆႉၵႂႃႇ ႁဝ်းတေၸၢင်ႈ ႁဵတ်းသင်၊ ႁဝ်းတေႁဵတ်းဢီႈသင်လႆႈ၊ တေႁဵတ်းလႆႈမွၵ်ႈႁိုဝ်၊ ဢၼ်ႁဵတ်းလႆႈၼၼ်ႉ တေပဵၼ်ၽွၼ်းလီတႃႇၽႂ်၊ ၵမ်ႈၼမ်တေၸၢင်ႈပဵၼ်ၵၢၼ်မိူင်း၊ ပေႃးၵၢၼ်မိူင်း ထုၵ်ႇမႅၼ်ႈ၊ ၵၢၼ်မိူင်းမၼ်ႈ ၵိုမ်း၊ ၵၢၼ်မိူင်းတဵင်ႈၼိမ်ၸင်ႇ ၸၢင်ႈသိုပ်ႇႁဵတ်းလႆႈၵၢၼ်တၢင်ႇပိူင် ၸိူင်ႉၼင်ႇၵၢၼ်သိုၵ်း၊ ၵၢၼ်မၢၵ်ႈမီး၊ ၵၢၼ်ပၺ်ၺႃ၊ ၵၢၼ်ယူႇလီလႄႈ ၵၢၼ်ၾိင်ႈၵူၼ်း ၸဵမ်ၸိူဝ်းၼႆႉ။
ၼႂ်းဝၼ်းၸိုင်ႈမိူင်းႁူမ်ႈတုမ် ပီ 2013 ၼႆႉ တႆးႁဝ်း၊ ၵူၼ်းမိူင်းတႆးႁဝ်းထုၵ်ႇလီၸုၵ်းၼိူဝ်ပိူၼ်ႉထၢၼ် ၵၢၼ်မိူင်းမၼ်ႈမၼ်ႈ ၵႅၼ်ႇ ၵႅၼ်ႇသေ လီႁူမ်ႈပၢႆးဝူၼ်ႉ၊ ႁူမ်ႈဢွၵ်းႁူဝ်၊ ႁူမ်ႈၼမ်ႉၵတ်ႉၵၼ် ပိူဝ်ႈတႃႇ ဝၢၼ်ႈမိူင်းၸိူဝ်ႉၸၢတ်ႈၸိုင်ႈတႆးႁဝ်း ႁူမ်ႈတင်းၸိုင်ႈမိူင်းႁူမ်ႈတုမ် ပတ်းပိုၼ်ႉၼၼ်ႉယူႇယဝ်ႉ။ ပိုၼ်ႉထၢၼ်ၵၢၼ် မိူင်း ဢၼ်တႆးႁဝ်း၊ ၵူၼ်းမိူင်းတႆးႁဝ်းတေ ၸၢင်ႈဢဝ်ပဵၼ်တီႈၸုၵ်းမၼ်ႈ တႃႇဝၼ်းမိူဝ်းၼႃႈၼၼ်ႉၼႆႉ ထုၵ်ႇလီပဵၼ် ၼမ်ႉၸႂ်ပၢင်လူင် ပွၵ်ႈၵမ်း 1 မိူဝ်ႈ 1947 ၼၼ်ႉ ႁၼ်ထိုင် ၼင်ႇၼႆ။ ၸိူင်ႉၼင်ႇ- 1)ၽွင်းတႅၼ်းမိူင်းတႆးၼႂ်းလူင် ပွင်ၸိုင်ႈမိူင်းႁူမ်ႈတုမ်၊ 2) ၽွင်းတႅၼ်းမိူင်းတႆး ၼႂ်းလူင်ပွင် ၸိုင်ႈမိူင်းတႆး၊ 3) ၽွင်းငမ်းလူၺ်ႈ လၵ်းပိူင်ၻီႊမွၵ်ႊ ၶရေႊသီႊ ၸၼ်ႉလုမ်ႈၾႃႉ၊ 4) ၵၢၼ်မၢၵ်ႈမီးမိူင်းတႆး မီးၼႂ်းၵမ်မိုဝ်း ၵူၼ်းမိူင်းတႆး သီႇၶေႃႈၼႆႉ ၼပ်ႉလႆႈဝႃႈ ပဵၼ်ၼမ်ႉၸႂ်ပၢင်လူင် ပွၵ်ႈၵမ်းၼိုင်ႈမိူဝ်ႈပီ 1947 (Spirit of Panglong 1) ၼႆယူႇ။ မိူဝ်ႈပိုၼ်ႉထၢၼ်ၼႆႉ မၼ်ႈၵိုမ်းတဵင်ႈၼိမ် ယဝ်ႉၼႆ မိူင်းတႆးႁဝ်းတေ လႆႈသိုပ်ႇတိုၵ်း တေႃး ႁႂ်ႈမီးပိူင်ပိုင်းၵူတ်းမၢႆမိူင်းတႆး ဢၼ်ၵူၼ်း မိူင်းတႆး ၶဵၼ်ႇတႅမ်ႈလႄႈ တပ်ႉသိုၵ်းမိူင်းတႆးၶေႃၶေႃ ဢၼ်မီးပႃႈတႂ်ႈလူင်ပွင်ၸိုင်ႈမိူင်းတႆးၼႆၼၼ်ႉထႅင်ႈ။

ဢၼ်လီတင်ႈၶေႃႈထၢမ်သေ ႁူမ်ႈၵၼ်ပၼ်ၶေႃႈတွပ်ႇၼႂ်းဝၼ်းမိူင်းႁူမ်ႈတုမ်ပီ 2013 ၼႆႉ 1. ၸၼ်ႉ/ဢမ်းၼၢၸ်ႈမိူင်း ႁူမ်ႈတုမ်တေဝႆႉၸိူင်ႉႁိုဝ် ?၊ 2. ၸၼ်ႉ/ဢႃႇၼႃႇၸႄႈမိူင်း/တိူင်းတေဝႆႉ မွၵ်ႈႁိုဝ် ?၊ 3. ပိူင်ပိုင်းၵူတ်းမၢႆၸႄႈမိူင်း/တိူင်းတေ ၶဵၼ်ႇတႅမ်ႈၸိူင်ႉႁိုဝ် ?၊ 4. တပ်ႉသိုၵ်းႁူမ်ႈလူမ်ႈ ၸႄႈမိူင်း/တိူင်း တေႁႂ်ႈယူႇၼႂ်း ၾၢင်ႁၢင်ႈသႅၼ်းလႂ် ?။

ပိုၼ်ၶမ်း ၽယၵ်ႉဝူင်း