ၵၢင်ၼႂ် ၼႂ်ၼႆႉ သိုၵ်းမၢၼ်ႈပူၼ်ႉပႅၼ်ၼႃႈလိၼ် တပ်ႉသိုၵ်းၸိုင်ႈတႆး RCSS/SSA လႆႈပဵၼ်ပၢင်တိုၵ်း ၵၼ်လၢႆၵမ်း ၼႂ်းဢိူင်ႇမႄႈဢေႃး ၵိင်ႇၸႄႈဝဵင်းႁူဝ်မိူင်း ၸိုင်ႈတႆးပွတ်းၸၢၼ်း၊ ၾၢႆႇသိုၵ်းမၢၼ်ႈဝၢတ်ႇၸဵပ်း လုတၢႆ ။

"သိုၵ်းမၢၼ်ႈ ၶလရ 287 ႁႅင်းၵူၼ်း 105 ၵေႃႉ ၶိုၼ်ႈမႃးတၢင်းလွႆၵိဝ်ႇၶေႃႉဝၢၼ်ႈၵဝ်ႇ၊ တပ်ႉ ၶမယ 514 သမ်ႉ ၶိုၼ်ႈတတ်းၾၢႆႇလင်၊  ဢၼ်လႆႈပဵၼ်ပၢင်တိုၵ်းၵၼ် ပဵၼ် တပ်ႉၶမယ 514 ၊ ယွၼ်ႉၽႃႇၺႃးသိုၵ်းမုတ်း ၶွင်တပ်ႉသိုၵ်းႁဝ်း၊ ဢၼ်ႁူႉတႄႉၵေႃႉၼိုင်ႈ တိုၼ်းတၢႆ ဝၢတ်ႇၸဵပ်းတႄႉ လၢႆလၢႆၵေႃႉ။ ၵွပ်ႈပဵၼ်သိုၵ်းၼႆလႄႈ ၽႂ်ႁၼ်ၽႂ်ဢွၼ်တၢင်းၵေႃႈတၢပ်ႇဢွၼ်တၢင်းၼၼ်ႉယဝ်ႉ။ ၾၢႆႇႁဝ်းၶႃႈတႄႉ ဢမ်ႇပဵၼ်သင်" - ၽူႈၵွၼ်း သိုၵ်း ၼႂ်းပိုၼ်ႉတီႈၸဝ်ႈၼိုင်ႈလၢတ်ႈ။

ဝၼ်းထိ 5 ၵၢင်ၼႂ် 7 05 – 7 40 မူင်း သိုၵ်းမၢၼ်ႈ ၶမယ 514 ႁႅင်းသိုၵ်း ႁႅင်းသိုၵ်း 25 ၵေႃႉ ပူၼ်ႉၶဝ်ႈၼႃႈ လိၼ်တပ်ႉသိုၵ်းၸိုင်ႈ တႆး/ ၶွင်ႊသီႊဢဝ်ၶိုၼ်းၸိုင်ႈတႆး RCSS/SSA လႄႈ သွင်ၾၢႆႇလႆႈပဵၼ်ပၢင်တိုၵ်းၵၼ်။  ယၢမ်းၵၢင်ဝၼ်းတဵင်ႈ တပ်ႉၶမယ 514 ၼင်ႇၵဝ်ႇ လူင်းၵႂႃႇတၢင်းဝၢၼ်ႈမႂ်ႇ ႁူဝ်ႁႃႉ သမ်ႉၽႃႇၺႃး ၸုမ်းသူင်ႇ ၶဝ်ႈၼမ်ႉတၢင်းၵိၼ်ၶွင်တပ်ႉသိုၵ်းၸိုင်ႈတႆးထႅင်ႈလႄႈ လႆႈပဵၼ်ပၢင်တိုၵ်းၵၼ်ထႅင်ႈ တင်ႈတႄႉ ၵၢင်ဝၼ်းတဵင်ႈ 12 မူင်းပၢႆတေႃႇၸမ်ထိုင်ဝၢႆးဝၼ်း 13 မူင်း၊ လွင်ႈဝၢတ်ႇၸဵပ်းလုတၢႆ ပႆႇလႆႈႁူႉၸွမ်း။

"သိုၵ်းမၢၼ်ႈယွၼ်းႁဵတ်းတၢင်း မႄႈဢေႃး-လွႆလၢၼ်း၊ ယွၼ်းလတ်းၼႂ်းပိုၼ်ႉတီႈ၊ ႁဝ်းၶႃႈတူၵ်းလူင်းယူႇ။ ၾၢႆႇႁဝ်းၶႃႈ ယင်းႁႅၼ်း ၶွင်ၵိၼ်ၶွင်ယမ်ႉပႂ်ႉ တွၼ်ႈၶဝ်ႈယူႇ။ ၶဝ်ႈသမ်ႉ ပူၼ်ႉပႅၼ်ၶေႃႈတူၵ်းလူင်းသေ ဢွၵ်ႇၼွၵ်ႈတၢင်း ၽႃႇၺႃးၵူၼ်းႁဝ်းၶႃႈသေ ပဵၼ်ပၢင်တိုၵ်းၵၼ် သၢမ်ပွၵ်ႈဢေႃႈမိူဝ်ႈၼႆႉ၊ ၾၢႆႇသိုၵ်းမၢၼ်ႈ တၢႆၵေႃႉၼိုင်ႈ၊ ဝၢတ်ႇၸဵပ်းလၢႆၵေႃႉတႄႉဢမ်ႇပႆႇႁူႉ။ ၾၢႆႇႁဝ်းၶႃႈ တႄႉလွတ်ႈၽေး" - ၼႆ ၸဝ်ႈႁၢၼ်လၢဝ် သႅင် ၽူႈၶၢၼ်ပၢၵ်ႇ RCSS/SSA လၢတ်ႈ။

ၽူႈမီးပုၼ်ႈၽွၼ်းၸဝ်ႈၼိုင်ႈလၢတ်ႈဝႃႈ ဢွၼ်ၼႃႈၼၼ်ႉ သိုၵ်းမၢၼ်ႈယွၼ်းလတ်းၼႂ်းၼႃႈလိၼ်၊ ယွၼ်းထႆ ထူၺ်ႇႁဵတ်းတၢင်း မႄႈဢေႃး-ၵွင်းၶႃး-လွႆလၢၼ်း-တႃႈသူပ်းတဵင်း ၵေႃႈပၼ်ႁဵတ်း။ ဢၼ်လႆႈပဵၼ်ပၢင်တိုၵ်း ၼႆႉ ယွၼ်ႉဢမ်ႇပွင်ႇၶၢဝ်ႇသေ ပူၼ်ႉၶဝ်ႈ ၼႂ်းၼႃႈလိၼ် ထုင်ႉလွႆၼၵႃး 6 ၵီႊလူဝ်ႊ (3 လၵ်းပၢႆ) လႄႈ လႆႈပဵၼ်ပၢင်တိုၵ်း၊ သိုၵ်းမၢၼ်ႈဢၢၼ်းတတ်းသဵၼ်ႈတၢင်းသူင်ႇၶဝ်ႈ ၼမ်ႉတၢင်းၵိၼ် တပ်ႉသိုၵ်းၸိုင်ႈတႆးသေ ၶိုင်ႁႂ်ႈ ၶလယ 287 ၶိုၼ်ႈလေႃႇ - ဝႃႈၼႆ။

ထုင်ႉလွႆ ၼၵႃးၼႆႉ သိုၵ်းမၢၼ်ႈဢမ်ႇၶိုၼ်ႈ မီး 10 ပီပၢႆ၊ ဢိင်ၼိူဝ်မီးၶၢဝ်ႇဝႃႈ သိုၵ်းတႆးလူင်းႁဵတ်းသူၼ်ၽုၵ်ႇ သွမ်ႈမၢၵ်ႇၶဝ်ႈတဝ်ႈ ၼမ်ႉ၊ သိုၵ်းမၢၼ်ႈ သမ်ႉၼႄးဝႃႈ သိုၵ်းတႆး ၶႂၢၵ်ႈပၵ်းတပ်ႉၼႆသေ ၶိုၼ်ႈလေႃႇ ၵေႃႈပဵၼ် လႆႈ။ ယွၼ်ႉပေႃႊလသီႊ သိုၵ်းမၢၼ်ႈ လႅပ်ႈမီးဝႆႉဝႃႈ ဝၢႆးၵိုတ်းယိုဝ်းႁဵတ်းငမ်းယဵၼ် တၵ်းတေဢမ်ႇ ပၼ် တပ်ႉသိုၵ်းၸိုင်ႈတႆး ႁဵတ်းတပ်ႉတီႈမႂ်ႇ ပၵ်းယူႇပဵၼ်တၢင်းၵၢၼ် - ဝႃႈၼႆ။

ၸဝ်ႈႁၢၼ်လၢဝ်သႅင် တႄႉလၢတ်ႈဝႃႈ သိုၵ်းမၢၼ်ႈဢမ်ႇႁဵတ်းၸွမ်းၶေႃႈတူၵ်းလူင်း လႄႈ ပဵၼ်ပၢင်တိုၵ်း၊ ၵွပ်ႈၼၼ် ၵိုင်ႇလီဢဝ် လၢႆးၵၢၼ်မိူင်းသေ ၵႄႈလိတ်ႈပၼ်ႁႃၵၢၼ်မိူင်း ၸိူင်ႉၼင်ႇတၢင်းၼမ်တုၵ်းယွၼ်းဝႆႉ - ဝႃႈၼႆ။

တပ်ႉသိုၵ်းၸိုင်ႈတႆး RCSS/SSA ၼႆႉ တႄႉၵိုတ်းယိုဝ်း မိူဝ်ႈ 02/12/2011 - တင်ႈတႄႇၼၼ်ႉမႃး ပဵၼ်ပၢင် တိုၵ်းမီးၵၼ် 30 ပွၵ်ႈပၢႆ ၼႆႉ ၾၢႆႇသိုၵ်းမၢၼ်ႈပူၼ်ႉပႅၼ်ဢွၼ်တၢင်းလွၼ်ႉလွၼ်ႉ။ ၼႂ်းပီ 2013 ၼီႈ တႄႉ ပၢင်တိုၵ်း ထုင်ႉလွႆၼၵႃး ၾၢႆႇၸဵင်ႇၸၢၼ်း ဝၼ်းတူၵ်းႁူဝ်မိူင်း 20 ၵီႊလူဝ်ႊ ၊ ၸဵင်ႇႁွင်ႇဝၼ်းတူၵ်း ဝၢၼ်ႈရၵ်ႉထႆး မႄႈႁွင်ႈသွၼ် မွၵ်ႈ 7 ၵီႊလူဝ်ႊ  ၼႆႉ - ၵမ်းၼႆႉ ပဵၼ်ပွၵ်ႈဢွၼ်တၢင်းသုတ်း။