ပၢင်ၵုမ်ၶွပ်ႈပီ ၶွင် RCSS/SSA လွႆတႆးလႅင်း လၢႆးငၢၼ်ႊဝႃႈ ပၼ်ႁႃလူင်ထိၼိုင်ႈၵူၼ်းမိူင်းတႆးတၢင်ႇ လၢတ်ႈမႃး ပဵၼ်ယႃႈမဝ်းၵမ်၊ ၵူၼ်းမိူင်းတႆးၵမ်ႈၼမ် ပွင်ႉၼႄး ၵဝ်ႉငဝ်ႈပၼ်ႁႃယႃႈပဵၼ်ၸုမ်းယိပ်း ၵွင်ႈ၊ ပိူင်လူင်ၸုမ်း ပီႇတုၸိတ်ႉ။

ပူၼ်ႉမႃးမိူဝ်ႈဝၼ်းထိ 16-19/01/13 (ၶၢဝ်းတၢင်း 4 ဝၼ်း) ၶွင်ႊသီႊဢဝ်ၶိုၼ်းၸိုင်ႈတႆး/တပ်ႉသိုၵ်း ၸိုင်ႈတႆး (RCSS/SSA) ၸတ်းပၢင်ၵုမ်ၶွပ်ႈပီ ႁိုဝ် ပၢင်ၵုမ်ႁူဝ်ႁုပ်ႈပီ ပွၵ်ႈထိ 13 တီႈငဝ်ႈၸိုင်ႈလွႆတႆး လႅင်း။ ၼႂ်းတိုဝ်ႉတၢင်းၼႆႉ တွၼ်ႈႁၢႆးငၢၼ်းလွင်ႈ ယႃႈမဝ်းၵမ်ၼၼ်ႉ ၵႅမ်ၸွမ်ႁၢၼ်ပွင်ၶိူဝ်း လၢႆးငၢၼ်း ၼႄ လွင်ႈလႆႈ ဢွၼ်ႁူဝ်လူင်းပိုၼ်ႉတီႈ ႁူပ်ႉထူပ်းၵူၼ်းမိူင်း 17 ၸႄႈဝဵင်း၊ (ႁွင်ႉမွၵ်ႇၵူၼ်းမိူင်းမႃး ႁူပ်ႉထူပ်း 10 ၸႄႈဝဵင်း) ႁူမ်ႈ 27 ၸႄႈဝဵင်း  တင်ႈတႄႇဝၼ်းထိ 25/10/12-15/12/12 (ၶၢဝ်းတၢင်း 52 ဝၼ်း)။ ဢိင်ၼိူဝ် RCSS/SSA မီးၽႅၼ်ၵၢၼ်ၽဵဝ်ႈမူၺ်ႉယႃႈမဝ်းၵမ်သေ ဢၼ်ၵူၼ်းမိူင်းလႆႈတၢင်ႇ လၢတ်ႈဝႆႉၼၼ်ႉ -

ၸဝ်ႈပွင်ၶိူဝ်း ဢဝ်တၢင်ႇလၢတ်ႈၼႄဝႃႈ- ပၼ်ႁႃသူႇသမ်း/ၵိၼ်ယႃႈမဝ်းၵမ်ၼႆႉ မိူဝ်ႈလဵဝ်ပဵၼ်ပၼ်ႁႃ ထိ 1 ၶွင်ၵူၼ်းမိူင်းတႆး။ ၵူၼ်းမိူင်းၵေႃႉၼိုင်ႈလၢတ်ႈဝႃႈ-  ၵၢၼ်မိူင်းတႄႉႁဝ်းဢမ်ႇႁူႉ၊ ဢၼ်ႁဝ်းႁူႉ တႄႉလုၵ်ႈလၢင်းႁဝ်းတိတ်းၸပ်းယႃႈၼၼ်ႉ ၵူၺ်း။ ပေႃးဢမ်ႇၵႄႈလႆႈပၼ်ႁႃယႃႈမဝ်းၵမ်ၵေႃႈ ယႃႇပေပိုၼ်ၽၢဝ်ႇ၊ ယႃႇပေဢုပ်ႇ လွင်ႈၽဵဝ်ႈမူၺ်ႉယႃႇမဝ်းၵမ်ယူႇတိၵ်း တိၵ်း၊ ပေႃးလၢတ်ႈၵေႃႈ တၵ်းလႆႈႁဵတ်းတႄႉတႄႉ။ ထႅင်ႈၵေႃႉၼိုင်ႈ လၢတ်ႈဝႃႈ ၵၢၼ်ပူၵ်းပွင်ၼႆႉထုၵ်ႇလႆႈမႃးၵမ်းလိုၼ်း၊ ၵၢၼ်ၽဵဝ်ႈမူၺ်ႉယႃႈမဝ်းၵမ် ထုၵ်ႇလႆႈမႃးဢွၼ်တၢင်း။ သူၸဝ်ႈၶႂ်ႈပူၵ်းပွင်ပၼ်ပၢႆးပၺ်ၺႃၵႃႈႁိုဝ်ၵေႃႈ ယဝ်ႉ ပေႃးလုၵ်ႈလၢင်း/ ၵူၼ်းၼုမ်ႇ တိတ်းယႃႈယူႇ တေႁဵတ်းႁိုဝ် ပူၵ်းပွင်- ဝႃႈၼႆ။

ၽူႈၵွၼ်းသိုၵ်းၵေႃႉၼိုင်ႈ လၢႆးငၢၼ်းၼႂ်းပၢင်ၵုမ်ဝႃႈ- ပွတ်းလႃႈသဵဝ်ႈၼႆႉ မီးၶႅၵ်ႇလီပၢင်ၸႃႉၵူႈပိူင်ပိူင် ၵေႃႈ ပေႃးဢမ်ႇပႃး ယႃႈဢမ်ႇယဝ်ႉ၊ ပေႃးဝူၼ်ႉမိူဝ်ႈလႂ်ၶႂ်ႈၼမ်ႉတႃတူၵ်းမိူဝ်ႈၼၼ်ႉ၊ ပေႃႈႁႅမ်လုၵ်ႈ-လုၵ်ႈႁႅမ်ပေႃႈ၊ တေၵႂႃႇတၢင်ႇၼႄပလိၵ်ႈ၊ ပလိၵ်ႈသမ်ႉဢမ်ႇဢဝ်လိူင်ႈ၊ ပလိၵ်ႈသမ်ႉၵိၼ်ငိုၼ်းတီႈ ၵူၼ်းၶၢႆယႃႈ၊ ၵိၼ်ငိုၼ်းတီႈ ၵူၼ်းသူႇသမ်းယႃႈၸိူဝ်းမီးငိုၼ်း။ ၵူၼ်းၶၢႆ မၢင်ၵေႃႉသမ်ႉပဵၼ်ပီႇတုၸိတ်ႉ၊ ပီႇတုၸိတ်ႉ သမ်ႉသိုၵ်းယိပ်းဝႆႉ၊ ႁဝ်းတေၵႂႃႇပိုင်ႈဢိင်သိုၵ်းၵေႃႈဢမ်ႇလႆႈ။ လၢႆးဢၼ်ႁဝ်းၺႃးၵိၼ် ယူႇၼႆႉ မိူၼ်ၵၼ်တင်း ၸုမ်းၼႃႈၽိူၵ်ႇၶဝ် မႃးယိုတ်းမိူင်းၶႄႇမိူဝ်ႈၵူႈပွၵ်ႈ၊ ႁဵတ်းၵႂႃႇႁဵတ်းၶိုၼ်းၶႂ်ႈ ပဵၼ်ၾိင်ႈမၼ်းၵႂႃႇ။ လၢႆပီမႃးၼႆႉ ပေႃးၵႂႃႇႁဵတ်းၵၢၼ် ၵိၼ်ၸၢင်ႈၵၼ် ပိူၼ်ႈဢမ်ႇဢဝ်ငိုၼ်းၸၢႆႇပၼ် ၵၼ်၊ ဢဝ်ယႃႈၸၢႆႇ ပၼ်- ဝႃႈၼႆ။

ၼႂ်းၶၢဝ်းတၢင်း RCSS ႁူပ်ႉၵူၼ်းမိူင်းၼၼ်ႉ သင်ၶၸဝ်ႈပွတ်းၵျွၵ်ႉမႄး တူၼ်ၼိုင်ႈၵေႃႈလၢတ်ႈဝႃႈ- တီႈႁဝ်းၼႆႉ ၵူၼ်းၼုမ်ႇၵေႃႉဢၼ်လွတ်ႈယႃႈမဝ်းၵမ်ၼၼ်ႉ ႁႃယၢပ်ႇယဝ်ႉ၊ ၸဵမ်ပူႇၵၢင်ႉပူႇၵႄႇၵႂႃႇ ၵေႃႈဢမ်ႇလွတ်ႈ၊ လၢတ်ႈၵၼ်ၵေႃႈဢမ်ႇလႆႈ၊ ပေႃးလၢတ်ႈၵေႃႈတေလႆႈထုပ်ႉၵူၺ်းယဝ်ႉ၊ ဢမ်ႇၼၼ် ၵေႃႈ တေလႆႈဢဝ်ၵွင်ႈ ငႃဢဝ်ၵူၺ်းယဝ်ႉ။ ပၢၼ်မိူဝ်ႈလဵဝ်ၼႆႉ ဢဝ်ထမ်းမၸၢၵ်ႈလၢတ်ႈဢမ်ႇလႆႈ ယဝ်ႉ၊ မီးဢႃႇၼႃႇၸၢၵ်ႈ ၵူၺ်းယဝ်ႉ- ဝႃႈၼႆ။

ပၼ်ႁႃယႃႈမဝ်းၵမ်ၼႂ်းမိူင်းတႆးမိူဝ်ႈလဵဝ် ၵမ်ႈၼမ်ဢွၼ်ၵၼ်ပွင်ႉၸုမ်းယိပ်းၵွင်ႈၵူႈၸုမ်း၊ ပႃးၸဵမ်တပ်ႉသိုၵ်းမၢၼ်ႈ၊ ပလိၵ်ႈမၢၼ်ႈလႄႈ ၾၢႆႇၽွင်းငမ်း။ ပိူင်လူင်မၼ်း ပဵၼ်ၸုမ်းပီႇတုၸိတ်ႉ- ၼႆယူႇ။

ထဝ်ႈဝၢၼ်ႈထဝ်ႈၼႃးတီႈၼမ်ႉၶမ်းၵေႃႉၼိုင်ႈလၢတ်ႈဝႃႈ- လွင်ႈယႃႈမဝ်းၵမ်ၼႆႉ တၢင်ႇၸႄႈဝဵင်းတႄႉ ႁဝ်းဢမ်ႇႁူႉ၊ တၢင်းႁဝ်း ၼႆႉတႄႉ ပဵၼ်ပီႇတုၸိတ်ႉ၊ ပဵၼ်ၽႂ်ႁဵတ်းၵေႃႈႁူႉၵၼ်တင်းဝၢၼ်ႈတင်းမိူင်း ယဝ်ႉ။ ၸုမ်းပီႇတုၸိတ်ႉၶဝ်ၼႆႉ ၵွပ်ႈၶဝ်လႆႈ ႁဵတ်းထၢင်ႇႁၢင်ႈပူၼ်ႉတီႈလႄႈ ႁဝ်းယင်းထၢင်ႇထိူမ် ယူႇဝႃႈ ၶေးတေမီးပေႃႇလသီႇ လူင်ပွင်ၸိုင်ႈၾၢႆႇလင်ၶဝ်ႁိုဝ်။ ႁဝ်းႁၼ်ထိုင်တႄႉ ၵႃႈၸူဝ်ႈဢၼ်ပီႇ တုၸိတ်ႉမီးယူႇၼႆႉ ယႃႈမဝ်းၵမ်ဢမ်ႇႁၢႆလႆႈ- ဝႃႈၼႆ။

ထဝ်ႈဝၢၼ်ႈထဝ်ႈဢိူင်ႇပွတ်းပၢင်လူင် (ၸိုင်ႈတႆးပွတ်းၸၢၼ်း) ၵေႃႉၼိုင်ႈၵေႃႈလၢတ်ႈဝႃႈ- ပီႇတုၸိတ်ႉ ဢၼ်ဝႃႈၼႆႉ ပဵၼ်သိုၵ်း ၵူၼ်းမိူင်း ဢၼ်မီးၼႃႈတီႈပုၼ်ႈၽွၼ်းၵႅတ်ႇၶႄႁႄႉၵင်ႈပၼ်ၵူၼ်းမိူင်း၊ ၵူၺ်းၵႃႈ လိူဝ်သေၶဝ်ဢမ်ႇၵႅတ်ႇၶႄပၼ်ၵူၼ်း မိူင်းယဝ်ႉ သမ်ႉဢဝ်ယႃႈမႃးပၼ်ၵူၼ်းမိူင်း၊ ဢဝ်ယႃႈ မႃးယႃႉၵူၼ်းမိူင်း- ဝႃႈၼႆ။

ၵူၼ်းပွတ်းမိူင်းပၼ်ႇၵေႃႉၼိုင်ႈလၢတ်ႈၼႄဝႃႈ- ၵူၼ်းမိူင်းပၼ်ႇႁဝ်းၽုၵ်ႇယႃႈၼႆႉ ဢၼ်ၵႂႃႇၵဵပ်းၶွၼ်ႇ မၼ်း ပဵၼ်ၾၢႆႇ ၽဵဝ်ႈမူၺ်ႉယႃႈမဝ်းၵမ်မၢၼ်ႈ၊ ထိုင်ၶၢဝ်းယႃႈမႃးၵေႃႈ ၵႂႃႇတီႇတူၼ်ႈယႃႈ 2-3 ဢေႊၶိူဝ်ႊသေ ထၢႆႇၶႅပ်းႁၢင်ႈဝႆႉ။ လိူဝ်သေၼၼ်ႉ ဢမ်ႇတီႇ၊ ၶဝ်ဝႃႈပေႃးတီႇၵေႃႈၵူဝ်တုမ်ႉတိူဝ်ႉၵူၼ်း မိူင်း။ ၵူၺ်းၵႃႈ ၼင်ႇႁိုဝ်ၶဝ်တေဢမ်ႇတီႇၼၼ်ႉ ၵူၼ်းမိူင်းၵေႃႈယဵတ်ႈ မွၼ်ငိုၼ်းတီႈၶဝ်ၼင်ႇၵဝ်ႇ။ လွင်ႈယႃႈမဝ်းၵမ်ၼႆႉ ၾၢႆႇၼိုင်ႈၽဵဝ်ႈယူႇၵေႃႈ ပေႃးၾၢႆႇၼိုင်ႈသမ်ႉႁဵတ်းယူႇ ၵွပ်ႈၼၼ်မၼ်း ဢမ်ႇႁၢႆလႆႈ - ဝႃႈၼႆ။

ၵူၼ်းသီႇသႅင်ႇၵေႃႉၼိုင်ႈလၢတ်ႈဝႃႈ- တီႈသီႇသႅင်ႇၼႆႉ သူၼ်ယႃႈလႄႈတပ်ႉမၢၼ်ႈမီးႁိမ်းၵၼ်ၵူၺ်း၊ ၵူၼ်းၵဵပ်းၶွၼ်ႇမၼ်း ၵေႃႈ ပဵၼ်ပီႇတုၸိတ်ႉပဢူဝ်းလႄႈ တပ်ႉမၢၼ်ႈၼၼ်ႉယဝ်ႉ- ဝႃႈၼႆ။

လၢႆၵေႃႉလၢႆၾၢႆႇႁၼ်ဝႃႈ ၼင်ႇႁိုဝ်ယႃႈမဝ်းၵမ်တေႁၢႆလႆႈၼႆႉ ၵူႈၾၢႆႇၾၢႆႇၸိူဝ်းၵဵဝ်ႇၶွင်ႈ မိူၼ်ၼင်ႇ လူင်ပွင်ၸိုင်ႈ၊ သိုၵ်း၊ ပလိၵ်ႈ၊ ၾၢႆႇၽွင်းငမ်း၊ ၾၢႆႇၸုမ်းယိပ်းၵွင်ႈ၊ ပႃႇတီႇၵၢၼ်မိူင်းၶဝ်၊ မူႇၸုမ်း CSO ၸိူဝ်းၼႆႉ ထုၵ်ႇလႆႈႁူမ်ႈမိုဝ်းၵၼ်။ ၾၢႆႇလဵဝ် ႁဵတ်းဢမ်ႇလႆႈၼႆ တိုၼ်းယွမ်းႁပ်ႉၵူႈၾၢႆႇ- ၼႆယဝ်ႉ။

ၽွင်းလူင်းပိုၼ်ႉတီႈႁူပ်ႉထူပ်းၵူၼ်းမိူင်း၊ မီးၵၢၼ်တွင်ႈထၢမ်ၵၼ်တင်းၵူၼ်းမိူင်းၼၼ်ႉ ၾၢႆႇ RCSS/SSA ၵေႃႈ လၢတ်ႈဝႃႈ- မိူဝ်ႈလဵဝ် ႁဝ်းၶႃႈမႃးလဵပ်ႈႁဵၼ်းၵူၺ်း၊ ပေႃးလဵပ်ႈႁဵၼ်းယဝ်ႉတေႁူမ်ႈ မိုဝ်းၵၼ်ၵူႈၾၢႆႇၾၢႆႇ ပႃးၸဵမ်လူင်ပွင်ၸိုင်ႈ၊ ၾၢႆႇၽဵဝ်ႈ မူၺ်ႉယႃႈမဝ်းၵမ်၊ ပလိၵ်ႈ၊ သိုၵ်း၊ ၸုမ်းသိုဝ်ႇ၊ ပႃႇတီႇၵၢၼ်မိူင်းသေ တေႁဵတ်း သၢင်ႈၼႃႈၵၢၼ်ၽဵဝ်ႈမူၺ်ႉယႃႈမဝ်းၵမ်ၵႂႃႇ၊ ၵွပ်ႈႁဝ်းၶႃႈမီးၶူင်းၵၢၼ် ၽုၵ်ႇတႅၼ်းတူၼ်ႈယႃႈ ဢၼ်တူၵ်းလူင်း ၵၼ်ဝႆႉတီႈပၢင်ၵုမ်တႃႈၶီႈလဵၵ်း။ ၵူၺ်းၵႃႈ ပိူဝ်ႈတႃႇႁဵတ်း သၢင်ႈၵႂႃႇမိူဝ်ႈလဵဝ် တိုၵ်ႉၶွင်ႉၶမ်လိူင်ႈ ႁူမ်ႇလူမ်ႈ၊ ၵွပ်ႈဝႃႈၾၢႆႇတပ်ႉသိုၵ်းမၢၼ်ႈ တင်းပလိၵ်ႈမၢၼ်ႈ ၶႂ်ႈဢဝ်ႁူမ်ႇလူမ်ႈၶဝ်ၾၢႆႇ လဵဝ်ၵူၺ်း၊ ဢမ်ႇၶႂ်ႈႁႂ်ႈ RCSS/SSA ၶဝ်ႈႁူမ်ႈပႃးၸွမ်း- ဝႃႈၼႆ။

ၼႂ်းလၢႆးငၢၼ်းႁူဝ်ႁုပ်ႈပီၶွင် RCSS/SSA ၼႂ်းပီ (2011-12) လၢတ်ႈပႃးဝႃႈ- ယူႇတီႈ RCSS/SSA လႆႈတိုတ်းပၼ်ၵူၼ်း တိတ်းယိၼ်ႉယႃႈတင်းမူတ်း 650 ၵေႃႉ၊ သၢင်ႈဝႆႉပၼ်ႁူင်းတိုတ်းယႃႈ 5 ႁူင်း၊  တိၺွပ်းၵူၼ်းၶၢႆယႃႈယွႆႈတင်းမူတ်း 69 ၵေႃႉ၊ ယႃႈမႃႉတိလႆႈတင်းမူတ်း 23,045 မဵတ်ႉ။

ၵဵဝ်ႇၵပ်းလွင်ႈယႃႈမဝ်းၵမ်ၼႆႉ တၢင်း RCSS/SSA လႆႈႁဵတ်းဝႅပ်ႊသၢႆႊမႂ်ႇၽႃသႃဢိင်းၵလဵတ်ႈ rcssanc.org (ANC- Anti-Narcotic Committee) ဢွၵ်ႇမႃးထႅင်ႈ၊ ၶၢဝ်ႇၵမ်ႈၼမ် ဝႆႉၼၵ်းလွင်ႈယႃႈ မဝ်းၵမ်။