ၼႂ်းပပ်ႉၽိုၼ်ႁၢႆးငၢၼ်း RCSS/SSA ၶၢဝ်းတၢင်းလူင်းပိုၼ်ႉ တီႈႁူပ်ႉၵူၼ်းမိူင်း 52 ဝၼ်းၼၼ်ႉ ၽူႈၵွၼ်းသိုၵ်းမၢၼ်ႈ ဝႃႈ ၸုမ်းသိုၵ်းၸၢဝ်းၶိူဝ်းလုၵ်ႉၽိုၼ်ႉ ဢမ်ႇမီးလွင်ႈၽွမ်ႉႁူမ်ႈၵၼ်၊ ၾၢႆႇသိုၵ်း မၢၼ်ႈၵေႃႈ ႁႅင်းၸႂ်ဢမ်ႇၵုမ်ႇထူၼ်ႈ။

ၽူႈၵွၼ်းသိုၵ်းမၢၼ်ႈၸၼ်ႉသုင်ၵေႃႉၼိုင်ႈ လၢတ်ႈဝႃႈ- ၸုမ်းလုၵ်ႉၽိုၼ်ႉၶဝ်ၼႆႉ ဢမ်ႇမီးလွင်ႈၽွမ်ႉ ႁူမ်ႈၵၼ်။ ဢၼ်ၸုမ်း လၢႆးလုၵ်ႉၽိုၼ်ႉၶဝ်ၶႂ်ႈလႆႈ လိူဝ်သေႁႅင်းၵူၼ်း/ၵွင်ႈၵၢင်ႇမၢၵ်ႇမိုဝ်ႈၸိုၼ်းယၢမ်း ပဵၼ်လွင်ႈၽွမ်ႉႁူမ်ႈ။ ၾၢႆႇတပ်ႉသိုၵ်းမၢၼ်ႈ ႁဝ်းသမ်ႉ ႁႅင်းၸႂ်သိုၵ်းႁဝ်းဢမ်ႇပဵင်းပေႃး၊ သိုၵ်းမၢၼ်ႈ ႁဝ်းၼႆႉ မိူဝ်ႈလဵဝ် ယိပ်းၵုမ်းၸိသင်ႇၵၼ်ယၢပ်ႇတႄႉတႄႉ။ သင်ၸိူဝ်ႉ ဝႃႈၸုမ်းသိုၵ်းလုၵ်ႉၽိုၼ်ႉ ၶဝ်ၽွမ်ႉၵၼ်တိုၵ်းတႄႉတႄႉၸိုင် တေယၢပ်ႇၽိုတ်ႇတႃႇသိုၵ်းမၢၼ်ႈႁဝ်းတႄႉတႄႉ၊ ၵတ်ႉၵႃႈၶဝ် ၸိူဝ်းၼႆႉ ဢမ်ႇမေႃၽွမ်ႉၵၼ်- ဝႃႈၼႆ။

လွင်ႈၼႆႉ ၽူႈၵွၼ်းသိုၵ်းမၢၼ်ႈၸၼ်ႉသုင်ၵေႃႉၼိုင်ႈ လၢတ်ႈၼႄသင်ၶၸဝ်ႈတူၼ်ၼိုင်ႈ ဢၼ်ပဵၼ် တီႈၼပ်ႉထိုဝ်တူင်ႇဝူင်း ၵူၼ်းၵႂၢင်ႈၶႂၢင်၊ ၽွင်းတပ်ႉသိုၵ်းမၢၼ်ႈႁၢင်ႈသိုၵ်းလေႃႇတိုၵ်း ပႃႇတီႇမႂ်ႇသုင် ၸိုင်ႈတႆး/ တပ်ႉသိုၵ်းၸိုင်ႈတႆး (SSPP/SSA) ၸုမ်းဝၢၼ်ႈႁႆး ၼႂ်းပီ 2011 ။ မၼ်းၸဝ်ႈၶႆႈၼႄၶိုၼ်း ၽွင်း ၶွင်ႊသီႊဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး (RCSS/SSA) လူင်းပိုၼ်ႉတီႈႁူပ်ႉထူပ်းၵူၼ်း မိူင်း မိူဝ်ႈပူၼ်ႉမႃး ဢမ်ႇႁိုင်ၼႆႉ။

လွင်ႈၼႆႉ ပႃးၼႂ်းၽိုၼ်ပပ်ႉႁၢႆးငၢၼ်း ၶၢဝ်းတၢင်းႁူပ်ႉထူပ်းၵူၼ်းမိူင်း လႄႈၸဝ်ႈၼႃႈတီႈ ၸုပ်ႈၵမ်း 2 ၊ တင်ႈတႄႇဝၼ်းထိ 25/10/12-15/12/12 (ၶၢဝ်းတၢင်းႁိမ်း 2 လိူၼ်) ၶွင် RCSS/SSA ဢၼ်ၸဝ်ႈပွင် ၶိူဝ်း ဢွၼ်ႁူဝ်၊ တင်းမူတ်းမီး 278 ၼႃႈ၊ သပ်းလႅင်းၼႄလွင်ႈၵၢၼ်မိူင်း/ၵၢၼ်သိုၵ်း၊ ပႃးၸဵမ်လွင်ႈယႃႈ မဝ်းၵမ် ၼႂ်းၸိုင်ႈတႆး။ လႆႈလူင်းပိုၼ်ႉတီႈႁူပ်ႉထူပ်းၵူၼ်းမိူင်း 17 ၸႄႈဝဵင်း၊ ဢိင်ၼိူဝ်လွင်ႈငၢႆႈလူမ် သေ ဢၼ်လႆႈမွၵ်ႇၵူၼ်းမိူင်း မႃးႁူပ်ႉထူပ်းမီး 10 ၸႄႈဝဵင်း၊ ႁူမ်ႈ 27 ၸႄႈဝဵင်း။

တင်ႈတႄႇဝၼ်းထိ 13/03/11 တေႃႇထိုင် ဝၼ်းထိ 31/08/11 (ၶၢဝ်းတၢင်းႁိမ်း 6 လိူၼ်) တပ်ႉသိုၵ်း မၢၼ်ႈ ႁၢင်ႈသိုၵ်း (ၸွႆးမၢၼ်ႇႁဵင်း) လေႃႇတိုၵ်းတပ်ႉတႆး (SSPP/SSA)ဢွၼ်တၢင်းသေ သွင်ၾၢႆႇလႆႈ ပဵၼ်ပၢင်တိုၵ်းၵၼ် 308 ပွၵ်ႈ။ ၾၢႆႇတပ်ႉတႆး တူၵ်းသုမ်း 33 ၵေႃႉ၊ ဝၢတ်ႇ 44 ၵေႃႉ။ ၾၢႆႇတပ်ႉမၢၼ်ႈ တၢႆ 500 ပၢႆလႄႈ ဝၢတ်ႇၸဵပ်း 500 ပၢႆ။ ပိုၼ်ႉတီႈ ၸိူဝ်းပဵၼ်ပၢင်တိုၵ်း ပဵၼ်ၼႂ်း 9 ၸႄႈဝဵင်း မိူၼ်ၼင်ႇ မိူင်းသူႈ၊ မိူင်းယႆ၊ ၵေးသီး၊ တၢင်ႉယၢၼ်း၊ သီႇပေႃႉ၊ ၵျွၵ်ႉမႄး၊ လႃႈသဵဝ်ႈ၊ ၼမ်ႉသၼ်ႇ၊ ၼမ်ႉၶမ်း ၸိူဝ်းၼႆႉ။

တပ်ႉသိုၵ်းမၢၼ်ႈႁၢင်ႈသိုၵ်းလေႃႇတိုၵ်း တပ်ႉတႆး (SSPP/SSA) ဝၢၼ်ႈႁႆးၼႆႉ ပဵၼ်မႃးဝၢႆးသေတပ်ႉ သိုၵ်းမၢၼ်ႈမိပ်ႇဢီး ႁႂ်ႈၸုမ်းၸၢဝ်းၶိူဝ်းလုၵ်ႉၽိုၼ်ႉယိပ်းၵွင်ႈၵၢင်ႇ လႅၵ်ႈလၢႆႈႁဵတ်းတပ်ႉပႂ်ႉလႅၼ်လိၼ် (BGF) လႄႈ တပ်ႉပႂ်ႉပိုၼ်ႉတီႈ (HGF) ၸွမ်းၽႅၼ်ၵၢၼ်မၢၼ်ႈ မိူဝ်ႈၼႂ်းပီ 2009 ။ ယွၼ်ႉ SSPP/SSA ဢၼ်ၸဝ်ႈပၢင်ႇၾႃႉဢွၼ်ႁူဝ် ဢမ်ႇယွမ်းလႅၵ်ႈလၢႆႈႁဵတ်း ၸွမ်းၼင်ႇၽႅၼ်ၵၢၼ်မၢၼ်ႈသေ ထုၵ်ႇသိုၵ်းမၢၼ်ႈ ၽိုတ်ႉၶဝ်ႈပူၼ်ႉပႅၼ်ပိုၼ်ႉတီႈ တိုၵ်းယိုဝ်းၵၼ်။

ဢၼ်တပ်ႉသိုၵ်းမၢၼ်ႈႁၢင်ႈသိုၵ်းလေႃႇတိုၵ်းယိုဝ်းသိုၵ်းၶၢင် (KIA) ၵမ်းၼႆႉၵေႃႈ သိုၵ်းမၢၼ်ႈလုယႂ်ႇ သုမ်းလူင်တၢႆ/ဝၢတ်ႇ ၼပ်ႉႁူဝ်ႁဵင်။ ၸဝ်ႈၼႃႈတီႈၶၢင် ၸွမ်ႁၢၼ်ၵုၼ်ႇမေႃႇ လၢတ်ႈဝႃႈႁဝ်းယိုဝ်းၵၼ် ၼႂ်းလိူၼ်ၼႆႉၵူၺ်း ၾၢႆႇသိုၵ်းမၢၼ်ႈတၢႆ 100 ပၢႆ၊ ဝၢတ်ႇၸဵပ်း 200 ပၢႆ၊ လၵ်ႉပၢႆႈတပ်ႉ 200 ပၢႆ- ဝႃႈၼႆ။

ၵဵဝ်ႇၵပ်းလွင်ႈၸုမ်းၸၢဝ်းၶိူဝ်းယိပ်းၵွင်ႈၵၢင်ႇၼႆႉ ဢွၼ်ၼႃႈၼႆႉ ၶွင်ႊသီႊႁူမ်ႈတုမ်ၵူႈၸၢဝ်းၶိူဝ်း (UNFC) ဢၼ်မီးလုၵ်ႈၸုမ်း 11 ၸုမ်းၵေႃႈ ၵေႃႇတင်ႈဝႆႉတပ်ႉသိုၵ်းၸိုင်ႈမိူင်းႁူမ်ႈတုမ် (FUA) ။ ၵူၺ်းၵႃႈ တေႃႇထိုင်မိူဝ်ႈလဵဝ် ယင်းပႆႇမီးလွင်ႈတူင်ႉၼိုင် ၵၢၼ်သိုၵ်းသင်။ ၼွၵ်ႈသေမီး ၸုမ်းပလွင်ႈ PSLF (PNLA) တင်းၸုမ်း SSPP/SSA ၶဝ် ႁဵတ်းသိုၵ်းမုတ်းတေႃႇသိုၵ်းမၢၼ်ႈ တႅဝ်းလင်ယူႇ၊ ၽွင်းတပ်ႉသိုၵ်းမၢၼ်ႈ ႁၢင်ႈသိုၵ်းတေႃႇၶၢင် (KIA) ၼႂ်းမိူင်းၶၢင်။ ၼွၵ်ႈသေၼၼ်ႉ ၼႂ်းလုၵ်ႈၸုမ်း UNFC 11 ၸုမ်းၵေႃႈ တႃႇ 6 ၸုမ်း လႆႈလူင်းလၢႆးမိုဝ်းၵိုတ်းယိုဝ်း ဢဝ်လွင်ႈငမ်းယဵၼ် တင်းလူင်ပွင်ၸိုင်ႈတဵင်းၸဵင်ႇဝႆႉ။