ဝၢႆးၸၢႆးသု ၽူႈၵွၼ်းတပ်ႉၸုမ်း 468 ထုၵ်ႇလႅၵ်ႈလၢႆႈၶၢႆႉ တၼ်းႁဵင်းၵႂႃႇ ပဵၼ်ၽူႈၵွၼ်းၸႄႈဝဵင်း မိူင်းပွၵ်ႉယဝ်ႉ ၶူင်း ၵၢၼ်ၵေႃႇသၢင်ႈသဵၼ်ႈတၢင်း ပွတ်းမိူင်းပွၵ်ႉ- မိူင်းၽႅၼ် ၵိုတ်းယုတ်းၵႂႃႇ။

လႅင်ႇၶၢဝ်ႇလၢတ်ႈဝႃႈ- တင်ႈတႄႇၸၢႆးသု ထုၵ်ႇပူတ်းၶၢႆႉတၼ်းႁဵင်း မိူဝ်ႈၽွင်းႁၢင်လိူၼ်သႅပ်ႊထႅမ်ႊ ၿိူဝ်ႊ (2012) မႃးၼႆႉ ၶူင်းၵၢၼ်ၵေႃႇသၢင်ႈသဵၼ်ႈတၢင်း (ၵႂႃႇမႃး 4 သဵၼ်ႈ) တီႈမိူင်းပွၵ်ႉၵိုတ်းမူတ်း၊ မိူဝ်ႈလဵဝ် သဵၼ်ႈတၢင်းဢၼ်သိူဝ်ႇယၢင်ယဝ်ႉ တူဝ်ႈမီးမွၵ်ႈ 10 ၵီႊလူဝ်ႊ ပွတ်းမိူင်းၽႅၼ်ၵူၺ်း၊ တၢင်ႇတီႈၸိူဝ်းပႆႇသိူဝ်ႇယၢင်ယဝ်ႉၼၼ်ႉ ဢဝ်မၢၵ်ႇႁိၼ်သိူဝ်ႇဝႆႉသေႁၢင်ႈ ႁႅၼ်းဝႆႉၵူၺ်း။ မိူဝ်ႈလဵဝ် ၵူၼ်းႁဵတ်းၵၢၼ်ထႆးၶဝ်ၵေႃႈ ဢမ်ႇႁၼ်၊ ၸၢၵ်ႈထႆၶဝ်ၵေႃႈ ၵဵပ်းဝႆႉယဝ်ႉ- ဝႃႈၼႆ။

သဵၼ်ႈတၢင်းၼႂ်းၼႃႈလိၼ်ဝႃႉ လုၵ်ႉမိူင်းပွၵ်ႉၵႂႃႇမိူင်းၽႅၼ် ပဵၼ်သဵၼ်ႈတၢင်းလီ၊ လုၵ်ႉမိူင်းပွၵ်ႉၵႂႃႇမိူင်း ၽႅၼ်/ ႁူဝ်တဝ်း တေႃႇထိုင် လႅၼ်ၶႅၼ်ႈၼႃႈလိၼ်ၸုမ်းမိူင်းလႃး ၶၢဝ်းတၢင်းမွၵ်ႈ 50 ၵီႊလူဝ်ႊ၊ ႁေႃႈလူတ်ႉၵႃးမွၵ်ႈ 1 ၸူဝ်ႈမူင်းပၢႆ။ လုၵ်ႉမိူင်း ၽႅၼ်ၵႂႃႇလႅၼ်ၶႅၼ်ႈမိူင်းလႃး မွၵ်ႈ 10 မိၼိတ်ႉ။ ၵူၺ်းၵႃႈ လုၵ်ႉမိူင်းပွၵ်ႉၶိုၼ်ႈၵႂႃႇ ပၢင်သၢင်းတႄႉ ႁၢၼ်ႉတေႃႇမိူဝ်ႈလဵဝ် ၵေႃႈသဵၼ်ႈတၢင်းယင်းပႆႇလီ တႄႉတႄႉ၊  ႁေႃႈလူတ်ႉၵႃးႁိုင်ဢမ်ႇယွမ်းမွၵ်ႈ 3 ၸူဝ်ႈမူင်း။ တႄႇလႅၼ်ၶႅၼ်ႈမိူင်းလႃးၵႂႃႇထိုင် ပၢင်သၢင်း မွၵ်ႈ 5 ၸူဝ်ႈမူင်း- ၼႆယဝ်ႉ။

ၵူၼ်းၼႂ်းပၢင်သၢင်းၵေႃႉၼိုင်ႈလၢတ်ႈဝႃႈ- ဢၼ်ၵေႃႇသၢင်ႈသဵၼ်ႈတၢင်းၼႆႉ ပဵၼ်ၶွမ်ႊပၼီႊၸၢႆးသု၊ ၸိုဝ်ႈၶွမ်ႊပၼီႊ ၵင်းသူး။ ၵူၺ်းၵႃႈ လူတ်ႉထႆၸိူဝ်းၼၼ်ႉ ပဵၼ်ၶွင်ၶွမ်ႊပၼီႊႁူင်ပင်း။ ပေႃးဝႃႈၵိုတ်း ယုတ်းၵၢၼ်ၵေႃႇသၢင်ႈသဵၼ်ႈတၢင်း ယဝ်ႉၵေႃႈ လူတ်ႉၸၢၵ်ႈထႆၸိူဝ်းၼၼ်ႉ ႁူင်ပင်းဢဝ်မိူဝ်းၶိုၼ်း သေ မိူဝ်ႈလဵဝ် ဢဝ်ၵႂႃႇဝႆႉတီႈၼႃးလွတ်ႇ ႁိမ်းပၢင်သၢင်း။ လႆႈငိၼ်းဝႃႈတေၵေႃႇသၢင်ႈသဵၼ်ႈတၢင်း ၼႃးလွတ်ႇ-မင်းသႅင် ၸွမ်းၼင်ႇမီးၽႅၼ်ၵၢၼ်ဝႆႉ- ဝႃႈၼႆ။

ၸၢႆးသုၼႆႉ ဢွၼ်တၢင်းယိပ်းတပ်ႉၸုမ်း 468 ၊ ဝၢႆးထုၵ်ႇၶၢႆႉၵႂႃႇပဵၼ်ၾၢႆႇပၢႆးမိူင်း၊ ၽူႈၵွၼ်းၸႄႈဝဵင်း မိူင်းပွၵ်ႉယဝ်ႉ မီးၶၢဝ်ႇဝႃႈ ၼႂ်းၸုမ်းဝႃႉဢုပ်ႇဢူဝ်းၵၼ် ၶႂ်ႈႁႂ်ႈတႃႉပၢၼ်း (လၢၼ်ႁူဝ်ပဝ်ႈလူင်ပဝ်း ယဵဝ်ႇသျႅင်၊ ၵေႃႉထုၵ်ႇမၢၼ်ႈတိသႂ်ႇၶွၵ်ႈယွၼ်ႉယႃႈမိူဝ်ႈပီ 2005 သေတိုၵ်ႉဢွၵ်ႇမႃး) သိုပ်ႇပုတ်ႈယိပ်း၊ ၵူၺ်းၵႃႈ ယင်းပႆႇၼႄႉၼွၼ်း၊ ၵွပ်ႈတႃႉပၢၼ်း ၸိုဝ်ႈသဵင်ၼဝ်ႈၵဵဝ်ႇၵပ်းလွင်ႈယႃႈမဝ်းၵမ်ဝႆႉ။ ဢၼ်ယိပ်းဝႆႉထႃႈၸူဝ်ႈၶၢဝ်း မိူဝ်ႈလဵဝ် ပဵၼ်ၸၢႆးသၢမ်။ လွင်ႈၽူႈၵေႃႉတေပုတ်ႈယိပ်း တပ်ႉၸုမ်း 468 ၼႆႉ ပေႃးပီၼႆႉသဵင်ႈ ၸုမ်းဝႃႉတေႁဵတ်းပၢင်ၵုမ် တႅပ်းတတ်းထႅင်ႈၵမ်းၼိုင်ႈ။ ၸၢင်ႈမီးၵၢၼ်လႅၵ်ႈလၢႆႈ ၶၢႆႉတီႈၵၼ်လၢႆ တၼ်းႁဵင်း- ၼႆယဝ်ႉ။