ၵႅမ်ၸွမ်ၸိုင်ႈ 2 ၻွၵ်းတိူဝ်ႊၸၢႆးမွၵ်ႇၶမ်းမႃးၸွႆႈၵူၼ်းထူပ်း ၽေးၼမ်ႉထူမ်ႈတီႈလႃႈသဵဝ်ႈၼၼ်ႉ ၵႂႃႇလဵၼ်ႈမၢၵ်ႇၵွပ်ႊၾ် သေ ၾၢႆႇႁူမ်ႇလူမ်ႈပိၵ်ႉဢိုတ်းသဵၼ်ႈတၢင်းၵႂႃႇမႃးလၢႆၾၢႆႇ လႄႈ ႁဵတ်းႁႂ်ႈၵူၼ်းမိူင်း ၵူၼ်းၵႃႉ ဢမ်ႇၸၢင်ႈၵႂႃႇမႃး၊ ဢွၼ်ၵၼ်ပွင်ႉၶၢင်းဢမ်ႇႁၢၼ်ႉၸႂ်။

ၵႅမ်ၸွမ်ၸိုင်ႈ 2 ၻွၵ်းတိူဝ်ႊၸၢႆးမွၵ်ႇၶမ်း

ဢိင်ၼိူဝ်ၵႅမ်ၸွမ်ၸိုင်ႈထိ 2 ၻွၵ်းတိူဝ်ႊၸၢႆးမွၵ်ႇၶမ်း မႃးတီႈလႃႈသဵဝ်ႈသေ ဝၢႆးၸွႆႈထႅမ်ၵူၼ်းထူပ်းၽေး ၼမ်ႉထူမ်ႈၶဝ်ယဝ်ႉ ဝၼ်းထိ 16/09/12 တင်ႈတႄႇၵၢင်ၼႂ်ယၢမ်း 07:00-11:00 မူင်း၊ မၼ်းၸဝ်ႈၵႂႃႇတီ/လဵၼ်ႈ မၢၵ်ႇၵွပ်ႊၾ်တီႈဝၢင်းမၢၵ်ႇ ၵွပ်ႊၾ်။ ပိူဝ်ႈတႃႇဢဝ်ႁူမ်ႇလူမ်ႈၼၼ်ႉ ၸဝ်ႈၼႃႈ တီႈမၢၼ်ႈၶဝ်ပိၵ်ႉ ဢိုတ်းပႅတ်ႈသဵၼ်ႈတၢင်း လုၵ်ႉလႃႈသဵဝ်ႈဢွၵ်ႇၵႂႃႇတၢင်း ၼမ်ႉတူႈ၊ ဢမ်ႇပၼ်ၵူၼ်းမိူင်းၵႂႃႇမႃး၊ ႁဵတ်းႁႂ်ႈၵူၼ်းဝၢၼ်ႈၵူၼ်းမိူင်းပွင်ႉၶၢင်း ဢမ်ႇႁၢၼ်ႉၸႂ်တင်းၼမ်။

ၵူၼ်းမိူင်းၵမ်ႈၽွင်ႈပွင်ႉၶၢင်းဝႃႈ- ၶုၼ်ပၢၼ်မႂ်ႇၶိုၼ်ႈမႃးၵေႃႈဢမ်ႇလၢၵ်ႇ လၢႆးသင်၊ ဢမ်ႇပႅၵ်ႇပိူင်ႈသင်ၵၼ်တင်း ပၢၼ်သိုၵ်း။ မၼ်းၸဝ်ႈပဵၼ်တႆး၊ ပဵၼ်ၶုၼ်တႆး၊ ၵူၼ်းမိူင်းတႆးၸၢင်ႈၵႂႃႇႁဵတ်းသင်တီႈမၼ်း။ ယွၼ်ႉပိူဝ်ႈၵႅမ်ၸွမ်ၸိုင်ႈမႃးလဵၼ်ႈၵွပ်ႊၾ် လႄႈ မႃးပိၵ်ႉဢိုတ်းသဵၼ်ႈတႃႈသၢႆတၢင်းၼႆႉ ငဝ်းလၢႆးမၼ်းဢမ်ႇပေႃးပိူင်ႈၵၼ် တင်းပၢၼ်ၸုမ်းသိုၵ်းမိူဝ်ႈၵူႈပွၵ်ႈ၊ ႁဵတ်းႁႂ်ႈ ၵူၼ်းမိူင်းဢမ်ႇၸၢင်ႈၵႂႃႇမႃးၵၼ်၊ တိုၵ်ႉႁဵတ်းႁႂ်ႈၵူၼ်းမိူင်းတုၵ်ႉၶယူႇ- ဝႃႈၼႆ။

ၵပ်းၵၢႆႇလွင်ႈပိၵ်ႉဢိုတ်းသဵၼ်ႈတၢင်းၼႆႉ ႁဵတ်းႁႂ်ႈၵူၼ်းဝၢၼ်ႈပွတ်းဝၢၼ်ႈၼွၵ်ႈတေၶဝ်ႈၵႃႉၶၢႆၼႂ်းဝဵင်းလႃႈသဵဝ်ႈၵေႃႈဢမ်ႇ ၸၢင်ႈၶဝ်ႈ။ ၵူၼ်းၵႃႉၸိူဝ်းတေဢဝ်ၶူဝ်းၵုၼ်ႇသိၼ်ၵႃႉၼႂ်းဝဵင်းလႃႈသဵဝ်ႈမိူဝ်းၶၢႆ တၢင်းၼမ်ႉတူႈၼႆႉ ဢမ်ႇၸၢင်ႈမိူဝ်း။ ၵူၼ်း ပွတ်းဝၢၼ်ႈၼွၵ်ႈၵမ်ႈၽွင်ႈမႃးၵၢတ်ႇၸဵမ်မိူဝ်ႈၵၢင်ၼႂ်ၸဝ်ႉ 2 မူင်း ဢမ်ႇၸၢင်ႈပွၵ်ႈၶိုၼ်း၊ ၵမ်ႈၽွင်ႈလုၵ်ႉဝၢၼ်ႈၼွၵ်ႈမႃးၼွၼ်း တီႈလႃႈသဵဝ်ႈသေ ဢၢၼ်းတေႃႉၶူဝ်းၵုၼ်ႇသိၼ်ၵႃႉမိူဝ်းၸဵမ်ၸဝ်ႉၵေႃႈ ဢမ်ႇၸၢင်ႈမိူဝ်း။ ၼွၵ်ႈသေၼၼ်ႉ လူတ်ႉၿၢသ်ႊ(လူတ်ႉတၢင်ႇၵူၼ်းၵႂႃႇမႃးႁွပ်ႈဝဵင်း) ၵေႃႈလႅၼ်ႈဢမ်ႇႁွပ်ႈ ဝဵင်းလႆႈ- ၵူၼ်းလႃႈသဵဝ်ႈၵေႃႉၼိုင်ႈ လၢတ်ႈၼႄၼင်ႇၼႆ။

ဢွၼ်ၼႃႈၼႆႉ မိူဝ်ႈဝၼ်းထိ 14/09/12 ၻွၵ်ႊတိူဝ်ႊၸၢႆးမွၵ်ႇၶမ်းမႃးတီႈလႃႈသဵဝ်ႈသေ မႃးၸတ်းပၢင်ၵႅဝ်ႈမွပ်ႈငိုၼ်းပၼ် ၵူၼ်းထူပ်းၽေးၼမ်ႉထူမ်ႈ တီႈႁူင်း/ငဝ်ႈငုၼ်းၵေႃလိၵ်ႈလၢႆးပတ်းပိုၼ်ႉ ၸႄႈတွၼ်ႈလႃႈသဵဝ်ႈ တီႈၶူဝ်လွင်း။ ၵူၼ်းထူပ်း ၽေးၼမ်ႉထူမ်ႈပွၵ်ႈၼႆႉ မီးမွၵ်ႈ 600 လင်ႁိူၼ်း၊ မီးပၢင်သဝ်းၵူၼ်းပၢႆႈၽေး 2 တီႈ၊ ဝၢႆးႁွင်ႉၶွၼ်ႈတုမ်ၵၼ်သေၸွႆႈပၼ်တီႈ (ၶူဝ်လွင်း)ယဝ်ႉ ၵႂႃႇၸွႆႈပၼ်ထႅင်ႈတီႈပွၵ်ႉ 9 (ၶၢႆးႁဵဝ်း)ၼိုင်ႈၼႃႈႁိူၼ်းလႂ် 30,000 ပျႃး။ ၸွႆႈပၼ်ၶဝ်ႈသၢၼ် 500 ထူင်- ၼႆယဝ်ႉ။

ၵၢၼ်ၸွႆႈထႅမ်ငိုၼ်းတွင်းလႄႈသင်၊ ၶဝ်ႈသၢၼ်လႄႈသင်၊ ဢမ်ႇၸႂ်ႈသုၼ်ႇတူဝ်ၸၢႆးမွၵ်ႇၶမ်း၊ ဢမ်ႇၸႂ်ႈလူင်ပွင်ၸိုင်ႈတဵင်းၸဵင်ႇ ၸွႆႈထႅမ်၊ ပဵၼ်ၵူၼ်းၶွမ်ႊပၼီႊၸိူဝ်းမႃးၸွမ်းမၼ်းၸဝ်ႈ၊ ဢဝ်ၼႃႈဢဝ်တႃၸွမ်း မၼ်းၸဝ်ႈၸိူဝ်းၼၼ်ႉ ဢဝ်ငိုၼ်းၶွမ်ႊ ပၼီႊၶဝ်ၸွႆႈပၼ်။ ၼွၵ်ႈသေၼၼ်ႉ ၸွႆႈပႃးၸဵမ်ၶူဝ်းၼုင်ႈတၢင်းဝႆလႄႈ ၶိူင်ႈၵိၼ်တၢင်းယႅမ်ႉၸိူဝ်းၼႆႉ- ၵူၼ်းလႃႈသဵဝ်ႈ သိုပ်ႇလၢတ်ႈၼင်ႇၼႆ။

ၼႂ်းဝဵင်းလႃႈသဵဝ်ႈၼႆႉ တင်းမူတ်းမီး 12 ပွၵ်ႉ။ ဢၼ်ၵူၼ်းႁူႉၼမ်တႄႉ လႃႈသဵဝ်ႈလူင် တင်းလွႆယဵဝ်ႈ ဢၼ်မီးပွၵ်ႉ 1 ထိုင် ပွၵ်ႉ 7 ။ လႃႈသဵဝ်ႈလူင်ၼႆႉ ပဵၼ်ပိုၼ်ႉတီႈၵႂၢင်ႈၶႂၢင် မီးမိူၼ်ၼင်ႇ တင်ႈတႄႇဝၢၼ်ႈသူႈ၊ ၶူဝ်လွင်း၊ ပၢင်ႇၵျွင်း၊ ပွၵ်ႉၵၢတ်ႇ၊ ၵွင်းလူမ်း၊ ၵွင်းၶႃး၊ ပွၵ်ႉၸၢင်ႈလဵၵ်း၊ ၵွင်းသႃႇ (တိတ်းတိူင်းသိုၵ်း) ။ တွၼ်ႈၾၢႆႇတူၵ်း ပွၵ်ႉ 10 ၶၢႆးႁဵဝ်း၊ ပွၵ်ႉ 11 ၼမ်ႉပႃၶီး၊ ဝၢင်းၵွပ်ႊၾ် ၶဝ်ႈပႃးၼႂ်းပွၵ်ႉ 11 ။ ၼွၵ်ႈသေၼၼ်ႉ မီးဝၢၼ်ႈၵူၼ်းတႆးၸိူဝ်း ယူႇသဝ်းႁွပ်ႈႁွပ်ႈဝဵင်းတင်းၼမ် မိူၼ်ၼင်ႇ တွၼ်ႈၾၢႆႇဢွၵ်ႇဝဵင်း မီးႁၢတ်ႇၵႃ၊ ဝၢၼ်ႈၼႃး၊ ႁူးမူၼ်ႈ ၸဵမ်ၸိူဝ်းၼႆႉၵႂႃႇ။

ဝၢၼ်ႈၵူၼ်းၸိူဝ်းယူႇသၢပ်ႇၼမ်ႉယၢဝ် (ဢၼ်လႆၾၢႆႇႁွင်ႇဝဵင်း) ၺႃးၽေးၼမ်ႉတင်းၼမ်။ ၼမ်ႉၼွင်လူင် ဢၼ်ၶင်ႇ/ပွႆႇ ၼမ်ႉဢွၵ်ႇၵေႃႈ လႆလူင်းၵႂႃႇတၢင်းၵျွၵ်ႉၵူႇသေ တွင်ႈသႂ်ႇထူမ်ႈလုပ်ႇသူၼ်ၼႃး တၢင်းၶၢႆးႁဵဝ်း၊ ၼမ်ႉပႃၶီး ပွၵ်ႉ 9 တင်းပွၵ်ႉ 10 ။ ၼမ်ႉသဵဝ်ႈ ဢၼ်လႆၾၢႆႇဢွၵ်ႇဝဵင်းၵေႃႈလူၼ်ႉၼွင်း လုပ်ႇထူမ်ႈပွတ်းတွၼ်ႈ ၾၢႆႇဢွၵ်ႇဝဵင်း၊ ၵမ်ႈၼမ်ပဵၼ်ပိုၼ်ႉတီႈၼႃး။ ၼမ်ႉသဵဝ်ႈ (တၢင်းႁူဝ်မၼ်းႁွင်ႉဝႃႈၼမ်ႉႁူးမူၼ်ႈ)၊ ၼမ်ႉသူႈ ၼမ်ႉႁွင်ႈဢွၼ်ႇလႆၼႂ်းၵၢင်ဝဵင်း၊ ၼမ်ႉတွၼ် ဢၼ်လႆလတ်း ၼႂ်းဝဵင်းလႃႈသဵဝ်ႈ ၵႂႃႇတၢင်းၶူင်ႇႁိူဝ်းဝိၼ်၊ သိုပ်ႇၵႂႃႇၶဝ်ႈၼွင်ၸဝ်ႈၾႃႉသေ ၵႂႃႇၶဝ်ႈၼမ်ႉယၢဝ် ၼႃႈတၢင်းႁွင်ႇၸိူဝ်းၼႆႉၼွင်း ၼင်ႇၵၼ်မူတ်း၊ မီးႁိူၼ်းယေးၶူဝ်းၶွင်ၵူၼ်းဝၢၼ်ႈ ၵူၼ်းမိူင်းလုသုမ်းၸွမ်းတင်းၼမ်။