သိုၵ်းမၢၼ်ႈပႃႈတႂ်ႈတိူင်းသိုၵ်းလႃႈသဵဝ်ႈ ၵႂႃႇယိုဝ်းတပ်ႉသိုၵ်း ၸိုင်ႈတႆး SSPP/SSA ဢၼ်ၵႂႃႇတူင်ႉၼိုင်ပွတ်း ဝၢၼ်ႈၽႅမ်း ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ။ သိုၵ်းမၢၼ်ႈၼႄးဝႃႈ ပဵၼ်သၢႆသိုၵ်းတႆး ယိုဝ်းတၢႆၵူၼ်း သူင်ႇတၢင်းၼႂ်းပၢင်တိုၵ်း။

ၵဵဝ်ႇၵပ်းလွင်ႈၼႆႉ ၵူၼ်းဝဵင်းသီႇပေႃႉဢၼ်ၸမ်ၸႂ်ၵူၼ်းထဝ်ႈၵူၼ်းၵႄႇဝၢၼ်ႈၽႅမ်းၵေႃႉၼိုင်ႈလၢတ်ႈဝႃႈ- “ၵူၼ်းဝၢၼ်ႈ 2 ၵေႃႉ၊ တႃႇၵေႃႉၼိုင်ႈၺႃးတိၺွပ်းၵႂႃႇပိူဝ်ႈတႃႇသူင်ႇတၢင်း၊ ပေႃးဝႃႈပဵၼ်ပၢင်တိုၵ်းၵေႃႈ သိုၵ်းမၢၼ်ႈၼႄးဝႃႈပဵၼ်သၢႆသိုၵ်းတႆးၼႆသေ ယိုဝ်းတၢႆထင်တီႈၵမ်းလဵဝ်။ ထႅင်ႈၵေႃႉၼိုင်ႈ ၸိုဝ်ႈဝႃႈ ၸၢႆးသေႃးၵဵင်းႁၢႆး၊ ၽွင်းမၼ်းတိုၵ်ႉထႆၼႃးယူႇႁိမ်းၼၼ်ႉ ငိၼ်းသဵင် ၵွင်ႈတႅၵ်ႇလႄႈမၼ်းလႅၼ်ႈပၢႆႈ၊ သိုၵ်းမၢၼ်ႈ ႁၼ်မႅၼ်ႈသေလမ်းတိၺွပ်း၊ ၼၼ်ႉၵေႃႈသိုၵ်းမၢၼ်ႈၼႄးဝႃႈ ပဵၼ်သၢႆသိုၵ်းတႆးၼႆသေပေႃႉ ထုပ်ႉတိမတ်ႉ ၵႂႃႇၸွမ်းၶဝ်၊ တေႃႇထိုင်မိူဝ်ႈလဵဝ်ယင်းပႆႇပွႆႇၶိုၼ်း၊ ၵမ်ႈၽွင်ႈဝႃႈၺႃးၶႃႈတၢႆယဝ်ႉ။ မိူဝ်ႈလဵဝ် ၵူၼ်းတၢင်းႁိူၼ်း ဢွၼ်ၵၼ်ပဵၼ်ၼမ်ႉႁူၼမ်ႉတႃ တင်းၵူၼ်းဝၢၼ်ႈသေ တိုၵ်ႉၸွပ်ႇႁႃၶၢဝ်ႇငၢဝ်း၊ ၸွမ်းၶႆႈ ႁႃတူဝ်တၢႆမၼ်း ယူႇၸွမ်းထိူၼ်ႇၸွမ်းပႃႇ ၸွမ်းႁွႆးသိုၵ်းမၢၼ်ႈၵႂႃႇသွၵ်ႈတဝ်ၸိူဝ်းၼၼ်ႉ- ဝႃႈၼႆ။

ဝၼ်းထိ 18/07/12 ယၢမ်းႁူဝ်ၶမ်ႈ 16:30 မူင်း၊ သိုၵ်းမၢၼ်ႈၶလယ 41 တႂ်ႈတိူင်းသိုၵ်းၸဵင်ႇႁွင်ႇဝၼ်းဢွၵ်ႇ (လႃႈသဵဝ်ႈ) ဢွၵ်ႇငႃးသိုၵ်းၵႂႃႇတူင်ႉၼိုင်တၢင်းဝၢၼ်ႈၼႃးၽႅမ်း သီႇပေႃႉ၊ ၵႂႃႇတိဢဝ်ၸၢႆးမွင်ႇ ဝၢၼ်ႈၼႃး ၽႅမ်း ႁႂ်ႈၵႂႃႇသူင်ႇတၢင်း။ ၵူၺ်းၵႃႈ ပေႃးဢွၵ်ႇၵႂႃႇၽႅဝ်ၼႂ်းထိူၼ်ႇ ၾၢႆႇဢွၵ်ႇဝၢၼ်ႈၽႅမ်းၵေႃႈ ပဵၼ်ပၢင်တိုၵ်း ၵၼ်တင်းသိုၵ်းတႆး၊ သိုၵ်းမၢၼ်ႈၸိၼႄးဝႃႈ ၸၢႆးမွင်ႇသူင်ႇတၢင်းႁႂ်ႈမႃးၽႃႇၺႃးသိုၵ်းတႆးၼႆသေ ယိုဝ်းတၢႆ ပႅတ်ႈ။ ၼွၵ်ႈသေၼၼ်ႉ သိုၵ်းမၢၼ်ႈတိပႃးၸၢႆးသေႃးၵဵင်းႁၢႆး ဢႃႇယု 38 ၵေႃႉတိုၵ်ႉထႆၼႃးယူႇႁိမ်းၼၼ်ႉ ၵႂႃႇၸွမ်းၶဝ်- ၼႆယဝ်ႉ။

ၵဵဝ်ႇၵပ်းလွင်ႈၼႆႉ ၽူႈၶၢၼ်ပၢၵ်ႇ SSPP/SSA ၸဝ်ႈႁၢၼ်ၸၢႆးလႃႉ ၵေႃႈလၢတ်ႈဝႃႈ- ဢၼ်ပဵၼ်ပၢင်တိုၵ်း ပွတ်း ဝၢၼ်ႈၼႃးၽႅမ်း ၸႄႈဝဵင်းသီႇပေႃႉၼႆႉၸႂ်ႈတႄႉ၊ ၾၢႆႇသိုၵ်းမၢၼ်ႈလႆႈငိၼ်း သိုၵ်းတႆးယူႇသဝ်းတူင်ႉ ၼိုင် ပွတ်းတွၼ်ႈၼၼ်ႉသေ တင်ႈၸႂ်ၶိုၼ်ႈ ၵႂႃႇယိုဝ်း၊ ပဵၼ်တပ်ႉၶလယ 41 ၊ ၵဵဝ်ႇၵပ်းလွင်ႈလုတၢႆတႄႉ ဢမ်ႇလႆႈႁူႉၸွမ်း- ဝႃႈၼႆ။

ဢွင်ႈတီႈပဵၼ်ပၢင်တိုၵ်းၼႆႉ သိုၵ်းမၢၼ်ႈၶိုၼ်ႈၸူးသိုၵ်းတႆးသေ ၺႃးသိုၵ်းတႆးတိုတ်ႉမၢၵ်ႇၶိူဝ်းတႅၵ်ႇသေ တၢႆ 10 ၵေႃႉ၊ ဝၢတ်ႇၸဵပ်း 15 ၵေႃႉ။ ဢၼ်တၢႆထင်တီႈပႃးၸၼ်ႉႁူဝ်သိုၵ်းၵေႃႉၼိုင်ႈ။ ဢၼ်ဝၢတ်ႇၸဵပ်းပႃး ၸၼ်ႉ ၶုၼ်သိုၵ်းလူင်ၵေႃႉၼိုင်ႈ၊ လႅပ်ႈဢမ်ႇလွတ်ႈတၢင်းတၢႆၼင်ႇၵဝ်ႇ- ၾၢႆႇယူႇလီဝဵင်းသီႇပေႃႉၶဝ် လၢတ်ႈၼင်ႇၼႆ။

ဢွၼ်ၼႃႈမိူဝ်ႈပႆႇပဵၼ်ပၢင်တိုၵ်းၼၼ်ႉ ၽူႈၼင်ႈလုမ်းသိုၵ်းတႆး SSPP/SSA တီႈလႃႈသဵဝ်ႈ ပွင်ႇၶၢဝ်ႇၸႅင်ႈ ၸူးတိူင်းသိုၵ်းလႃႈ သဵဝ်ႈဝႃႈ ပွတ်းဝၢၼ်ႈၼႃးၽႅမ်းၼၼ်ႉ သူၸဝ်ႈယႃႇၵႂႃႇတၢင်းထိူၼ်ႇ၊ မီးသိုၵ်းႁဝ်းၶႃႈယူႇ သဝ်းတူင်ႉၼိုင်။ ၾၢႆႇတိူင်းသိုၵ်းလႃႈ သဵဝ်ႈတွပ်ႇဝႃႈ ႁဝ်းတေၵႂႃႇထိုင်ဝၢၼ်ႈၽႅမ်းၵူၺ်း၊ ပေႃးထိုင်ဝၢၼ်ႈ ၽႅမ်းယဝ်ႉ တေၶိုၼ်းပွၵ်ႈမႃး။ ၵူၺ်းၵႃႈ ပေႃးဝႃႈၵႂႃႇထိုင်ဝၢၼ်ႈ ၽႅမ်းယဝ်ႉၵေႃႈ တိဢဝ်ၵူၼ်းဝၢၼ်ႈသေ ဢွၵ်ႇၵႂႃႇၸူး သိုၵ်းတႆး။ တိုၼ်းဝႃႈတင်ႈၸႂ်ၵႂႃႇယိုဝ်းသိုၵ်းတႆးလႄႈ ႁဵတ်းႁႂ်ႈသွင်ၾၢႆႇ လႆႈပဵၼ်ပၢင်တိုၵ်းၵၼ်၊ ပဵၼ်ၾၢႆႇသိုၵ်း မၢၼ်ႈပူၼ်ႉပႅၼ်ဢွၼ်တၢင်း- ၽူႈမီးၸၼ်ႉတီႈငဝ်ႈငုၼ်းဝၢၼ်ႈႁႆး ဢမ်ႇၶႂ်ႈဢွၵ်ႇၸိုဝ်ႈ ၵေႃႉၼိုင်ႈလၢတ်ႈၼင်ႇၼႆ။