ၵူၼ်းဝၢၼ်ႈပွတ်းၼမ်ႉတူႈ ထုၵ်ႇသိုၵ်းမၢၼ်ႈၸိၼႄးဝႃႈ ၵေႃႉပဵၼ်လုၵ်ႈၸၢႆး ပႃးၵႂႃႇၼႂ်းသိုၵ်းတႆးၵဵပ်းသိုၵ်း ၼႆသေ ၺႃးပေႃႉထုပ်ႉလိူဝ်ႁႅင်း၊ ဝၢႆးမႃးဢႆဢွၵ်ႇလိူတ်ႈ။

ပူၼ်ႉမႃးမိူဝ်ႈဝၼ်းထိ 08/06/12 သိုၵ်းမၢၼ်ႈတပ်ႉၶလယ 41 ဢၼ်ငဝ်ႈငုၼ်းပၵ်းတီႈလႃႈသဵဝ်ႈ ၵႂႃႇတိဢဝ် လုင်းသၢင်ႇဢေး၊ ဢႃႇယု 62 ၊ ယူႇဝၢၼ်ႈၵွင်းတပ်ႉ ဢိူင်ႇမိူင်းယဵၼ် ၸႄႈဝဵင်းၼမ်ႉတူႈ၊ ၸိၼႄးဝႃႈ- လုၵ်ႈၸၢႆးလုင်းသၢင်ႇဢေး ပႃးၵႂႃႇၸွမ်းၼႂ်း သိုၵ်း တႆး SSA ၵဵပ်းသိုၵ်း (လုၵ်ႈၸၢႆးလုင်းသၢင်ႇဢေး ၵႂႃႇႁဵတ်းသိုၵ်း)ၼႆသေပေႃႉထုပ်ႉႁၢဝ်ႈႁႅင်း၊ ထိုင်တီႈလႆႈၶဝ်ႈႁူင်းယႃ။

ၵူၼ်းၼႂ်းပိုၼ်ႉတီႈၵေႃႉၼိုင်ႈလၢတ်ႈဝႃႈ- တီႈတႄႉမၼ်း လုၵ်ႈၸၢႆးလုင်းသၢင်ႇဢေးၵေႃႈ ဢမ်ႇလႆႈပႃးၵႂႃႇ ၼႂ်းသိုၵ်းတႆးၵဵပ်း သိုၵ်းၼင်ႇၵဝ်ႇ၊ ၵူၺ်းၵႃႈ သိုၵ်းမၢၼ်ႈၸိၼႄးဝႃႈၼၼ်သေပေႃႉထုပ်ႉပေႃးဢွၵ်ႇလိူတ်ႈ ဢွၵ်ႇယၢင်၊ မိူဝ်ႈလဵဝ်ၸပ်းတၢင်းပဵၼ်ဢႆ ဢွၵ်ႇလိူတ်ႈဝႆႉ၊ ၸွမ်းတူဝ်ၶိင်းၵေႃႈမီးႁွႆးၸဵပ်းဝႆႉ။ သိုၵ်းမၢၼ်ႈပေႃႉ ထုပ်ႉသေပွႆႇဝႆႉၼႂ်းထိူၼ်ႇ၊ ၵူၼ်းဝၢၼ်ႈၶဝ်ၵႂႃႇႁၼ်သေၸင်ႇ ၸွႆႈၵၼ်ဢဝ်မႃးယူတ်းယႃတီႈ ႁူင်းယႃႈၼမ်ႉ တူႈ၊ မိူဝ်ႈလဵဝ်တႄႉ လူင်းႁူင်းယႃယဝ်ႉ- ဝႃႈၼႆ။

ၼႂ်းၸႄႈဝဵင်းၼမ်ႉတူႈ (ၸႄႈတွၼ်ႈၵျွၵ်ႉမႄး) ၸိုင်ႈတႆးပွတ်းႁွင်ႇၼႆႉ ပဵၵ်ႉသမ်ႉဢုပ်ႇဢူဝ်းတူၵ်းလူင်း ၵိုတ်းယိုဝ်းၵၼ်ယဝ်ႉ သေတႃႉ မၢင်ပွၵ်ႈယင်းတိုၵ်ႉမီးပၢင်တိုၵ်းသိုၵ်းသိူဝ်ၵၼ် ဝူင်ႈၵၢင်သိုၵ်းမၢၼ်ႈတင်း တပ်ႉသိုၵ်းၸိုင်ႈတႆး SSA ယူႇ။ ၵပ်းၵၢႆႇ လွင်ႈၼႆႉ ၾၢႆႇ SSA လၢတ်ႈဝႃႈ သိုၵ်းမၢၼ်ႈယိုဝ်းႁဝ်းဢွၼ် တၢင်းလႄႈ ႁဝ်းၵေႃႈၵႃႈလႆႈ ယိုဝ်းၵႅတ်ႇၶႄတူဝ်ၵဝ်ႇ။

တင်ႈတႄႇႁူပ်ႉထူပ်းဢုပ်ႇဢူဝ်းၵၼ်တီႈတူၼ်ႈတီး မိူဝ်ႈဝၼ်းထိ 28/01/12 မႃးၼႆႉ တေႃႇထိုင်ယၢမ်းလဵဝ် ဝူင်ႈၵၢင် SSPP/SSA တင်းသိုၵ်းမၢၼ်ႈပဵၼ်ပၢင်တိုၵ်းၵၼ်ဢမ်ႇယွမ်း 18 ပွၵ်ႈ။ ၼႂ်းၸႄႈဝဵင်းၼမ်ႉတူႈ ပဵၼ်ၼႂ်းဢိူင်ႇမိူင်းယဵၼ်ထႅင်ႈ မိူဝ်ႈဝၼ်းထိ 06/06/12 ၾၢႆႇသိုၵ်းမၢၼ်ႈ တၢႆ 3 ၵေႃႉ ပႃးၸၼ်ႉၶုၼ်သိုၵ်း လူင်ၵေႃႉၼိုင်ႈ။ ပၢင်တိုၵ်းၵမ်ႈၼမ်ပဵၼ်ၾၢႆႇ သိုၵ်းမၢၼ်ႈယိုဝ်းဢွၼ်တၢင်း၊ ၾၢႆႇ SSA ယိုဝ်းၵႅတ်ႇၶႄတူဝ် ၵဝ်ႇ။ ၼႂ်းၸႄႈဝဵင်းမိူင်းမိတ်ႈၵေႃႈ ပဵၼ်ပၢင်တိုၵ်းၵၼ်လၢႆပွၵ်ႈ။ လိုၼ်းသုတ်းသွင်ၾၢႆႇပဵၼ်ပၢင်တိုၵ်း ၵၼ်တီႈ လွႆၽႃၽိုင်ႈ ပွတ်းမိူင်းဢွတ်ႇ ၼႂ်းၸႄႈဝဵင်းမိူင်းသူႈ။

ၵပ်းၵၢႆႇလွင်ႈတိုၵ်းမီးပၢင်တိုၵ်းသိုၵ်းသိူဝ်ၸိူဝ်းၼႆႉသေ ႁဵတ်းႁႂ်ႈပွတ်းၼမ်ႉတူႈတိုၵ်ႉမီးၵၢၼ်ပူၼ်ႉပႅၼ် သုၼ်ႇလႆႈၵူၼ်းယူႇၶိူဝ်းယႂ်း။ ၵူၼ်းဝၢၼ်ႈတိုၵ်ႉလႆႈတုၵ်ႉၶယွၼ်ႉသိုၵ်းမၢၼ်ႈၸိၼႄးၵဵဝ်ႇၶွင်ႈသိုၵ်းတႆးယူႇ။