ၵူၼ်းမိူင်း ၸႄႈဝဵင်းပၢင်လူင် ဢွၼ်ၵၼ်မႆႈၸႂ် ယွၼ်ႉၵူၼ်းလၵ်ႉၼမ်လိူင်ႇမႃး ၵူႈမိုဝ်ႉၵူႈဝၼ်းလႄႈ ဢမ်ႇမီး လွင်ႈ ႁူမ်ႇလူမ်ႈ။


ဝၼ်းတီႈ 02/08/2017 ယၢမ်းဝၢႆးဝၼ်း မီးၵူၼ်းလၵ်ႉ ၶဝ်ႈလၵ်ႉဢဝ်ငိုၼ်း 30 သႅၼ်ပျႃး တီႈၼႂ်းဝတ်ႉပိတၵၢတ်ႈ ၸႄႈဝဵင်းပၢင်လူင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း။ ယွၼ်ႉၼၼ် ၵူၼ်းမိူင်းၸႄႈဝဵင်းပၢင်လူင် ဢွၼ်ၵၼ်မႆႈ ၸႂ် ဢမ်ႇမီးလွင်ႈႁူမ်ႇလူမ်ႈ ဝႃႈၼႆ။


ၽူႈၶဝ်ႈၸုမ်း ၵေႃးပၵ ဝတ်ႉပိတၵၢတ်ႈ ပၢင်လူင် လၢတ်ႈဝႃႈ “ ၵူၼ်းဢၼ်မႃးလၵ်ႉၼၼ်ႉ ၶႅၼ်ႈၵၼ် 2 ဝၼ်း ၼိုင်ႈပွၵ်ႈ။ မိူဝ်ႈဝႃး မွၵ်ႈဝၢႆးဝၼ်းၼၼ်ႉ ၶဝ်ႈလၵ်ႉၼႂ်းဝတ်ႉပိတၵၢတ်ႈ တႃႇငိုၼ်း 30 သႅၼ်ပျႃး။ ငိုၼ်းၼၼ်ႉ ပဵၼ်ငိုၼ်း ၸဝ်ႈသၢင်ႇ ဢၼ်မႃးႁဵၼ်းလိၵ်ႈၼၼ်ႉ ဢၢပ်ႈဝႆႉပၼ်တီႈၶဝ်ၸဝ်ႈဝႆႉ။ သင်ဝႃႈ  ၸဝ်ႈသၢင်ႇၶဝ် လူဝ်ႇ ၸႂ်ႉတိုဝ်း သိုဝ်ႉသင်ၼႆ ၸင်ႇတေမႃးထုၵ်ႈဢဝ်ငိုၼ်းၼၼ်ႉ။ ၵဵဝ်ႇၵပ်းလွင်ႈၼႆႉ ၵွင်ႈထၢႆႇ CCTV ၵေႃႈ တိတ်းဝႆႉယူႇ ။ ၸဝ်ႈၼႃႈတီႈၶဝ် ၶဝ်ႈမႃးတူၺ်းသေ လႆႈထၢႆႇၶႅပ်းႁၢင်ႈၵႂႃႇယဝ်ႉ။ ယွၼ်ႉဝႃႈ တေႃႈလဵဝ် ၼ်ႂ်းဝဵင်း ပၢင်လူင်ၼႆႉ မီးၵူၼ်းတၢင်ႇတီႈသီႇလႅၼ်မႃးယူႇၵေႃႈမီးတင်းၼမ်တင်းလၢႆ ၵူၼ်းလၵ်ႉပဵၼ်ၽႂ်ဢၼ်ဝႃႈၼၼ်ႉ ပႆႇလႆႈႁူႉ” ဝႃႈၼႆ။

ၵဵဝ်ႇၵပ်းလွင်ႈၼႆႉ ပူၼ်ႉမႃး ဝၼ်းတီႈ 31/07/2017 မီးၵူၼ်းၶဝ်ႈလၵ်ႉငိုၼ်းတီႈ ဝတ်ႉမူၺ်ႇတေႃႇ တႃႇငိုၼ်း 4 သႅၼ်ပျႃး။ မိူဝ်ႈဝၼ်းတီႈ 28/07/2017 သမ်ႉ ၶဝ်ႈလၵ်ႉတီႈ ၼႂ်းဝၢၼ်ႈပၢင်မူင်ႈ ၶမ်း 5 ၵျၢပ်ႈ၊ ငိုၼ်း 2 သႅၼ်ပျႃး ဝႃႈၼႆ။


ၸၢႆးၼွင်ႉ ၵူၼ်းၼုမ်ႇဝဵင်းပၢင်လူင် လၢတ်ႈဝႃႈ “ ၼႂ်းဝဵင်းပၢင်လူင် ႁဝ်းၶႃႈၼႆႉ လုၵ်ႈဢွၼ်ႇၼုမ်၊ ၵူၼ်းလူင် ဢွၼ်ၵၼ် သူႇသမ်းၵိၼ်ယႃႈမဝ်းၵမ် ၵေႃႈမီးၼမ်။ လိူဝ်ၼၼ်ႉ ပၢင်တေႃႇလွင်း မိူၼ်ၼင်ႇ ၾၢႆႉၵိဝ်း၊ မၢၵ်ႇတူၵ်း ၶိုၼ်ႈလႆ/ မၢၵ်ႇ ၵိင်ႈလွႆ၊ 36 မိူင်းလူင် မီးတင်းၼမ်တင်းလၢႆ” ဝႃႈၼႆ။


မၼ်းၸၢႆးသိုပ်ႇလၢတ်ႈထႅင်ႈဝႃႈ ၵူၼ်းၼုမ်ႇ ဢွၼ်ၵၼ်တိတ်းၸပ်းယႃႈမဝ်းၵမ်ၵေႃႈၼမ် ယွၼ်ႉၼၼ်လႄႈ ၵၢၼ်လၵ်ႉ ၶူဝ်းၶွင်ၼႆႉ ၵိူတ်ႇၶိုၼ်ႈမႃးတင်းၼမ် ၶႅၼ်ႈဝၼ်း သွင်ဝၼ်းၼိုင်ႈပွၵ်ႈ။ တေႃႈလဵဝ်ၼႆႉ ႁိူၼ်းႁဝ်း ၶတ်းသေႃးသေ ဢွၵ်ႇ ၵႂႃႇတၢင်းၼွၵ်ႈၼႆႉ ဢမ်ႇၶႂ်ႈႁတ်ႉၵႂႃႇယဝ်ႉ တိုၼ်းတေလႆႈမီးၵူၼ်းပႂ်ႉႁိူၼ်းသေၵေႃႉၵေႃႉယဝ်ႉ။ ၵဵဝ်ႇၵပ်းလွင်ႈ ၾၢႆႇႁူမ်ႇလူမ်ႈတႄႉ တေလႆႈဝႃႈ ၺၢမ်ႉၶုၺ်ႈတႄႉတႄႉ။ ၽူႈဢုပ်ႉပိူင်ႇၸႄႈဝဵင်း၊ ပလိၵ်ႈ ၽူႈမီးပုၼ်ႈၽွၼ်းၶဝ် ဢမ်ႇႁဵတ်းၵၢၼ်သင်။ ၼွၵ်ႈလိူဝ်ၼၼ်ႉ ၵၢၼ်တေႃႇလွင်းၵေႃႈ ဢမ်ႇမီးၶႂၢင်ႉပိုတ်ႇၼႆၵေႃႈ ပိုတ်ႇ ဝႃႈၼႆ။


မိူဝ်ႈပူၼ်ႉမႃး ပႆႇပေႃးႁိုင်သင်ၼၼ်ႉ ႁၢၼ်ႉၶၢႆၶူဝ်း တၢင်းၾၢႆႇတူၵ်းၵၢတ်ႇပၢင်လူင်ၼၼ်ႉ မီးၼၢင်းယိင်း 3 ၵေႃႉ ၶဝ်ႈ လၵ်ႉၼႂ်းႁၢၼ်ႉသေ လၵ်ႉငိုၼ်းၵႂႃႇ 9 သႅၼ် 5 မိုၼ်ႇပၢႆ ယွၼ်ႉဝႃႈ ၸဝ်ႈၶွင်မၼ်းၺႃးယႃၸမ်ႈ/ ယႃငိူဝ်ႈ ၵူၼ်းၼႂ်း ပိုၼ်ႉတီႈၵေႃႉၼိုင်ႈလၢတ်ႈ ဝႃႈၼႆ။