ပၢင်ၵုမ်လူင်ငဝ်ႈငုၼ်းၵေႃလိၵ်ႈလၢႆးလႄႈၾိင်ႈငႄႈတႆး ပွၵ်ႈၵမ်း13 ဢုပ်ႇဢူဝ်းတူၵ်းလူင်းၵၼ်တေ ႁူမ်ႈမိုဝ်းၶပ်းၶိုင်ႁႂ်ႈလိၵ်ႈလၢႆးၾိင်ႈႁိတ်ႈႁွႆးတႆးၶိုၼ်ႈယႂ်ႇ။


ဝၼ်းတီႈ 05-06/08/2017 ၵေႃလိၵ်ႈလၢႆးလႄႈၾိင်ႈငႄႈတႆး ၸတ်းႁဵတ်းပၢင်ၵုမ်လူင်ငဝ်ႈငုၼ်း တီႈႁူင်းႁေႃၵေႃလိၵ်ႈလၢႆးလႄႈၾိင်ႈငႄႈတႆး ဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ။ မီးၵေႃလိၵ်ႈလၢႆး ၵူႈၸႄႈဝဵင်းၼႂ်းၸိုင်ႈတႆး၊ ထုင်ႉလိၼ်ပဵင်းလႄႈၸႄႈမိူင်းၶၢင် ၸိူဝ်းၼႆႉတင်းမူတ်း 80 ၸုမ်းၵူၼ်းၶဝ်ႈ ႁူမ်ႈတင်းမူတ်းမီး 100 ပၢႆ။

ၼႂ်းပၢင်ၵုမ်ၼၼ်ႉ ၵေႃလိၵ်ႈလၢႆးၸႄႈဝဵင်းလႂ်ဝဵင်းၼၼ်ႉ တၢင်ႇလၢတ်ႈငဝ်းလၢႆးလႄႈလွင်ႈ တူင်ႉၼိုင် ၸုမ်းၽႂ်မၼ်း ဢုပ်ႇဢူဝ်းလိူၵ်ႈတၢင်ႇႁူဝ်ပဝ်ႈလႄႈ ၽူႈပွင်ၵၢၼ်ငဝ်ႈငုၼ်း ဢိၵ်ႇႁူမ်ႈၵၼ်ဝၢင်းၽႅၼ် ၵၢၼ်တႃႇမိူဝ်းၼႃႈ။


Dr.ၸၢႆးၼေႃႇၶိူဝ်း လၢတ်ႈဝႃႈ - “ ၼင်ႇႁိုဝ်လိၵ်ႈလၢႆး၊ ၾိင်ႈႁိတ်ႈႁွႆးႁဝ်းပေႃးတေၶိုၼ်ႈယႂ်ႇ ႁႂ်ႈပပ်ႉ ႁဵၼ်းလိၵ်ႈတႆး ပေႃးတေပဵၼ်ဢၼ်လဵဝ်ၼၼ်ႉ ၸုမ်းပွင်ၵၢၼ်ငဝ်ႈငုၼ်းလႄႈ ၵူႈၸႄႈဝဵင်းတေႁူမ်ႈ မိုဝ်းၵၼ်သေ ၶပ်းၶိုင်ၵႂႃႇ ယူႇဝႃႈၼႆ။


ၸုမ်းပွင်ၵၢၼ်ငဝ်ႈငုၼ်းတႃႇ ပီ 2017 -2021 ၶၢဝ်းတၢင်း 4 ပီၼႆႉ ႁူဝ်ပဝ်ႈပဵၼ် ၸၢႆးမွင်ႇတိၼ်ႇ ၽူႈ ၼမ်းၼႃႈ 11 ၵေႃႉ၊ ၸုမ်းႁူဝ်ပဝ်ႈ 6 ၵေႃႉ၊ ၸုမ်းၽူႈၼမ်းၼႂ်း 6 ၵေႃႉ ၊ ငဝ်ႈၸုမ်းၽူႈပွင်ၵၢၼ် 19 ၵေႃႉ။ ၽူႈၵိူဝ်းၵုမ်လူင်သွင်ၸဝ်ႈ 1. ၸဝ်ႈတူၼ်ၶူးလူင် Dr. ၶမ်းမၢႆ ထမ်မသႃမိ (ၸၼ်ႉၸွမ်ပုတ်ႉထ မိူင်းတႆး) ၸဝ်ႈၶူးလူင် ပၺ်ၺႃၼၼ်ႇတႃႉ လွႆလႅမ် ၸိူဝ်းၼႆႉ ။


တီႈပၢင်ၵုမ်ၼၼ်ႉ တူၵ်းလူင်းလႆႈၸႂ်ၵၼ်ဝႃႈ ပၢင်ၵုမ်ငဝ်ႈငုၼ်းၼိုင်ႈပီႁႂ်ႈမီးၼိုင်ႈပွၵ်ႈ၊ ။ ၵေႃလိၵ်ႈလၢႆး Group A ၸႄႈဝဵင်းလူင် တေလႆႈၸွႆႈငိုၼ်းၵွင်ၵၢင် 30,000 ၵျၢတ်ႉ ၊ Group B ၸႄႈဝဵင်းၵၢင် 20,0 00 ၵျၢတ်ႉ။ Group C ၸႄႈဝဵင်းႁၢတ်ႈ 10,000 ၵျၢတ်ႉ။ တေႁဵတ်းဢွၵ်ႇ Logo/Facebook Page သေလွင်ႈတူင်ႉၼိုင်ၼၼ်ႉ ႁႂ်ႈလုမ်ႈၾႃႉႁူႉႁၼ်၊ တေၶိုၼ်းမႄးပိူင်ၽွတ်ႈႁဵၼ်းငဝ်ႈငုၼ်းၵေႃလိၵ်ႈ လၢႆးလႄႈၾိင်ႈငႄႈတႆးယဝ်ႉသေ ပိုၼ်ဢွၵ်ႇဢဝ်ၵၢင်ၸႂ်ၵူႈတူင်ႇဝဵင်းၵႂႃႇ။ ႁဵတ်းသၢင်ႈပၢင်ၵုမ်ၶွၼ်ႊ ၾရႅၼ်ႊ(Conference ) တႆးယူၼ်း။ ပၢင်ၵုမ်ငဝ်ႈငုၼ်းပွၵ်ႈၵမ်း 14 တေႁဵတ်းတီႈဝဵင်းတူၼ်ႈတီး။