တူဝ်တႅၼ်းၵူၼ်းမိူင်း ဢၼ်ၶဝ်ႈပႃးၼႂ်း JMC ၵူႈၸၼ်ႉၸၼ်ႉ ႁူပ်ႉထူပ်းၵၼ် တီႈတႃႈၵုင်း ပဵၼ်ပွၵ်ႈၵမ်းႁႅၵ်ႈ တႃႇၶၢဝ်း တၢင်း 2 ဝၼ်း တင်းမူတ်းတူဝ်တႅၼ်းၶဝ်ႈႁူမ်ႈ ႁိမ်း 30 ၵေႃႉ။


ဝၼ်းတီႈ 20-21/07/2017 ယၢမ်းၵၢင်ၼႂ် 09:30-03:30 မူင်းဝၢႆးဝၼ်း တူဝ်တႅၼ်းၵူၼ်းမိူင်း ဢၼ်ၶဝ်ႈပႃးၼႂ်း JMC-U ၊ JMC- S လႄႈ JMC-L ႁူပ်ႉထူပ်းၵၼ်တီႈလုမ်း NRPC  ဝဵင်းတႃႈၵုင်ႈ ဢုပ်ႇဢူဝ်းလႅၵ်ႈလၢႆႈၵၼ် ၵဵဝ်ႇၵပ်းလူၺ်း ၵၢၼ်ငၢၼ်းတူဝ်တႅၼ်းၵူၼ်းမိူင်း တေလႆႈႁဵတ်းသင်လႄႈ တေသိုပ်ႇႁဵတ်းႁိုဝ် ၸဵမ်ၸိူဝ်းၼႆႉ ဝႃႈၼႆ။

 ၸၢႆးပႃႉႁၢၼ်ႇ တူဝ်တႅၼ်းၵူၼ်းမိူင်း လုမ်း JMC-L  ၸႄႈဝဵင်းလၢင်းၶိူဝ်း လၢတ်ႈဝႃႈ “ ဢၼ်ႁဝ်းၶႃႈ တူဝ်တႅၼ်း ၵူၼ်းမိူင်း လုမ်း JMC ႁူပ်ႉထူပ်းၵၼ်ၶၢဝ်းတၢင်းသွင်ဝၼ်းတႄႉ ဢမ်ႇမီးလွင်ႈသင်တႄႉတႄႉၼင်ႇၵဝ်ႇ ႁဝ်းဝႃႈ တၢင်တူဝ်ၵူၼ်းမိူင်းၼႆႉ ႁဝ်းပႆႇလႆႈႁူပ်ႉထူပ်းၵၼ်သေပွၵ်ႈၼႆလႄႈ ႁဝ်းၸင်ႇမႃးႁူပ်ႉထူပ်းၵၼ်ပဵၼ်ပွၵ်ႈ ၵမ်းဢွၼ် တင်းသုတ်း” ဝႃႈၼႆ။


JMC ၼႆႉ ယူႇတီႈလူင်ပွင်ၸိုင်ႈ၊ တပ်ႉသိုၵ်းမၢၼ်ႈ၊ ၸုမ်းယိပ်းၵွင်ႈၵၢင်ႇၸၢဝ်းၶိူဝ်းလႄႈ တူဝ်တႅၼ်းၵူၼ်းမိူင်း ႁူမ်ႈၵၼ်သေ ၶွတ်ႇၽွတ်ႈၵေႃႇတင်ႈမႃး တႃႇပိုတ်ႇလုမ်းတႃႇပၵ်းတႃပႂ်ႉတူၺ်း လွင်ႈတိုၵ်းယိုတ်း ဝႃႈၼႆ။


ၸၢႆးပႃႉႁၢၼ်ႇ သိုပ်ႇလၢတ်ႈထႅင်ႈဝႃႈ ႁဝ်းၶႃႈ တူဝ်တႅၼ်းၵူၼ်းမိူင်း ဢုပ်ႇၵၼ် ၶႆႈၼႄၵၼ် တူဝ်ထူပ်းၼႃႈၵၢၼ်၊ ဝၢင်း ၽႅၼ်တႃႇမိူဝ်းၼႃႈ ၼိုင်ႈလိူၼ်လႂ် ၼိုင်ႈပွၵ်ႈႁဝ်းတေလႆႈၵႂႃႇထူပ်းၵူၼ်းမိူင်း သပ်းလႅင်းၼႄ လွင်ႈ ငမ်းယဵၼ်ပဵၼ်ႁိုဝ်၊ NCA ပဵၼ်ႁိုဝ် ၸဵမ်ၸိူဝ်းၼႆႉ။ ထႅင်ႈဢၼ်ၼိုင်ႈသမ်ႉ ဢၼ်ႁဝ်းၶႃႈႁူပ်ႉထူပ်းၵၼ်တီႈတႃႈၵုင်ႈ ပဵၼ် တူဝ်တႅၼ်းၵူၼ်း မိူင်းလၢႆလၢႆၵူၺ်း မႃးႁူပ်ႉထူပ်းၵၼ်၊ ၾၢႆႇလူင်ပွင်ၸိုင်ႈၵေႃႈဢမ်ႇပႃး၊ ၾၢႆႇတပ်ႉသိုၵ်းမၢၼ်ႈၵေႃႈဢမ်ႇပႃး၊ ၾၢႆႇယိပ်း ၵွင်ႈၵၢင်ႇၵေႃႈဢမ်ႇပႃး ဝႃႈၼႆ။


ၵဵဝ်ႇၵပ်းလွင်ႈပၢင်ႁူပ်ႉထူပ်းၵၼ်ၼႆႉသေ တူဝ်တႅၼ်းၵူၼ်းမိူင်း JMC ဢၼ်မႃးႁူပ်ႉထူပ်းၵၼ်သမ်ႉ ၼႂ်းၸႄႈမိူင်းမွၼ်း၊ ၸႄႈမိူင်းယၢင်း၊ ၸႄႈမိူင်းတႆး၊ တိူင်းပႃႇၵိူဝ်လႄႈ တိူင်းတႃႈၼၢဝ်းသီ။ ၼႂ်းမိူင်းတႆး လုမ်း JMC-S  ပိုတ်ႇဝႆႉတီႈဝဵင်းၶူဝ် လမ်၊ JMC-L သမ်ႉ ပိုတ်ႇလုမ်းဝႆႉတီႈ ၸႄႈဝဵင်းလၢင်းၶိူဝ်း ဝႃႈၼႆ။