ၸုမ်းၵူၼ်းၼုမ်ႇတႆး ၸႄႈဝဵင်းမိူင်းမွၵ်ႇ ၸႄႈမိူင်းၶၢင် ႁူမ်ႈၵၼ်ၶွတ်ႇၽွတ်ႈၶွမ်ႊမတီႊသေ တင်ႈႁူင်းတိုတ်းယႃႈ ႁႂ်ႈၵူၼ်းတႆး ၵႆယၢၼ်ယႃႈမဝ်းၵမ်။


ဝၼ်းတီႈ 11/06/2017 ၽူႈၽွင်းငမ်းဢိူင်ႇဝၢၼ်ႈလႄႈ ၸုမ်းၵူၼ်းၼုမ်ႇဝၢၼ်ႈတႃလီ မိူင်းမွၵ်ႇ ၸတ်း ႁဵတ်း ပၢင်ပၼ်တၢင်းႁူႉ ယႃႈမဝ်းၵမ် ႁွင်ႉမွၵ်ႇဢဝ်ၽူႈမီးပိုၼ်ႉႁူႉပၢႆးႁၼ် ပၼ်တၢင်းႁူႉၽွၼ်းၸႃႉ ယႃႈမဝ်းၵမ်လႄႈ လွၵ်းလၢႆးတိုတ်းယႃႈမဝ်းၵမ်။

ၼႂ်းပၢင်ၼႆႉမီးၸၢႆးၵျေႃႇတီႇႁ ၽူႈၶဝ်ႈၶွမ်ႊမတီႇငဝ်ႈငုၼ်း SNLD ၊ ၸၢႆးဢေးမိၼ်း ၽူႈတႅၼ်းသၽႃး ၸႄႈမိူင်းၶဵတ်ႇလိူၵ်ႈတင်ႈမၢႆ2 ၸႄႈဝဵင်းမၢၼ်ႈၸႄႈ မွၵ်ႇလၢတ်ႈပၼ်တၢင်းႁူႉ လွင်ႈယႃႈမဝ်းၵမ်၊ ၽွၼ်းၸႃႉယႃႈမဝ်းၵမ်၊ လၢႆးတိုတ်းယႃႈမဝ်းၵမ်ၸိူဝ်းၼႆႉ မီးၽူႈယႂ်ႇၵူၼ်းလူင်၊ ၽူႈမီးပုၼ်ႈၽွၼ်း လႄႈၵူၼ်းတိုတ်းယႃႈ ၶဝ်ႈႁူမ်ႈ 30 ပၢႆ။



ၸၢႆးၵျေႃႇတီႇႁ လၢတ်ႈဝႃႈ - “ ယႃႈမဝ်းၵမ် ဝၼ်းမိူဝ်ႈၼႆႉ မၼ်းလိူင်ႇၼမ်ၼႃႇယဝ်ႉ မၼ်းလီမႆႈၸႂ် တႄႉတႄႉ ပွႆးပၢင်ၶႅၵ်ႇ ၊ ပွႆးသင်သေဢမ်ႇဝႃႈ ႁဵတ်းၵၢၼ်လႂ်ၸိူဝ်းၼႆႉ ၸဝ်ႈပွႆးၸဝ်ႈ ၵၢၼ်လႆႈလဵင်ႉ ယႃႈၸွမ်း၊ လိူင်ႇၵေႃႈလိူင်ႇ ပေႃးၵေႃႈပေႃး၊ ႁႃသိုဝ်ႉ ၵေႃႈငၢႆႈ ” ဝႃႈၼႆ။



ၶွမ်ႊမတီႊတိုတ်းယႃႈမဝ်းၵမ် ၼႂ်းၸႄႈဝဵင်းမိူင်းမွၵ်ႇ ၸႄႈတွၼ်ႈမၢၼ်ႈမေႃႇ ၸႄႈမိူင်းၶၢင် ၼႆႉ ယူႇတီႈၽူႈယႂ်ႇၵူၼ်းလူင် ၼႂ်းဢိူင်ႇဝၢၼ်ႈလႄႈ ၵူၼ်းၼုမ်ႇႁူမ်ႈၵၼ် ၽွတ်ႈတင်ႈမႃး မိူဝ်ႈႁူဝ်လိူၼ်မေႊ 2017 ယိူင်းဢၢၼ်းၼင်ႇႁိုဝ်တေၵႄႈလိတ်ႈလႆႈပၼ်ႁႃယႃႈမဝ်းၵမ် ႁႂ်ႈၵူၼ်းမိူင်းၵႆယၢၼ်ယႃႈမဝ်းၵမ် ႁႂ်ႈဢိူင်ႇဝၢၼ်ႈၵႆယၢၼ် ယႃႈမဝ်းၵမ် ဝႃႈၼႆ။