ပၢင်ၵုမ်လူင် လွင်ႈငမ်းယဵၼ်မိူင်းႁူမ်ႈတုမ် ႁိုဝ် ပၢင်ၵုမ်လူင်ႁူဝ်ပၢၵ်ႇပီ 21 ပၢင်လူင် ၵမ်းထူၼ်ႈ 2 ၊ ဢၼ်ၸတ်းႁဵတ်း တီႈၼေႇပျီႇတေႃႇ ၽွင်းႁၢင်လိူၼ်မေႊ 2017 ၼၼ်ႉ လႆႈၸႂ်တူၵ်းလူင်းၵၼ်လၢႆလၢႆၶေႃႈသေတႃႉ ၵဵဝ်ႇၵပ်းလွင်ႈၵၢၼ်ႁူမ်ႇလူမ်ႈ၊ လွင်ႈသုၼ်ႇလႆႈၽၢတ်ႇဢွၵ်ႇၸိူဝ်းၼႆႉ ဢုပ်ႇဢူဝ်းၵၼ်ယၢပ်ႇ၊ လႆႈထဵင်ထွင်ၵၼ်ႁၢဝ်ႈႁႅင်း၊ ယင်းပႆႇတူၵ်းလူင်းၵၼ်လႆႈ။


ပၢင်ၵုမ်လူင်ပွၵ်ႈၵမ်းၼႆႉ မီးၵၢၼ်ဢုပ်ႇဢူဝ်းၵၼ် ဢၼ်ပဵၼ်ႁူဝ်ၶေႃႈလူင်မၼ်း တင်းမူတ်း 5 ၶေႃႈ။ ၵဵဝ်ႇၵပ်းလွင်ႈၵၢၼ်မိူင်း၊ လွင်ႈႁူမ်ႇလူမ်ႈဝၢၼ်ႈမိူင်း၊ လွင်ႈတူင်ႇဝူင်းၵူၼ်း၊ လွင်ႈၵၢၼ်ပၢႆးမၢၵ်ႈမီး၊ လွင်ႈၸတ်းၵၢၼ် တီႈလိၼ်လႄႈၶူဝ်းၶွင်သၽႃႇဝ ၸိူဝ်းၼႆႉ။ ဢုပ်ႇၵၼ်ပဵၼ်ၸုမ်းၸုမ်း၊ ဢုပ်ႇၸွမ်းႁူဝ်ၶေႃႈ။ လူင်ပွင်ၸိုင်ႈတင်း သၽႃး ႁူမ်ႈၵၼ်ပဵၼ်ၸုမ်းလဵဝ်သေဢုပ်ႇ၊ လိူဝ်ၼၼ်ႉမီးၾၢႆႇတပ်ႉသိုၵ်း၊ ၾၢႆႇၸုမ်းၸၢဝ်းၶိူဝ်း EAO ၊ ၾၢႆႇပႃႇတီႇၵၢၼ်မိူင်း ၸိူဝ်းၼႆႉ။


ၸွမ်းၼင်ႇၶပ်းမၢႆပၢင်ၵုမ်ၼၼ်ႉ ဝၼ်းတီႈ 24/05/2017 ပိုတ်ႇပၢင်ၵုမ်။ ဝၼ်းတီႈ 25 ဢုပ်ႇၵၼ်ၸွမ်းႁူဝ်ၶေႃႈလႂ် ႁူဝ်ၶေႃႈၼၼ်ႉ။ ဝၼ်းတီႈ 26 ပွတ်းၼႂ် သိုပ်ႇဢုပ်ႇၵၼ်ဢုပ်ႇၵၼ်ၸွမ်းႁူဝ်ၶေႃႈလႂ်ႁူဝ်ၶေႃႈၼၼ်ႉ ၼင်ႇၵဝ်ႇ။ တွၼ်ႈဝၢႆးဝၼ်း ၸုမ်းၶွမ်ႊမတီႊႁူမ်ႈဢုပ်ႇဢူဝ်းလွင်ႈငမ်းယဵၼ် မိူင်းႁူမ်ႈတုမ် (UPDJC) ၶဝ်ဢုပ်ႇၵုမ်ၵၼ် ထတ်းသၢင်ၵဵဝ်ႇၵပ်းလွင်ႈဢၼ် ဢုပ်ႇဢူဝ်းၵၼ်မႃးၼႂ်းပၢင်ၵုမ်လူင် ၶၢဝ်းတၢင်းဝၼ်းပၢႆႁၢင်ႈ မီးၸိူင်ႉႁိုဝ်လၢႆလၢႆ။ ဝၼ်းတီႈ 28 ၸတ်းပၢင်ၵုမ်ၶွတ်ႇယွတ်ႈ ၸိူဝ်းၼႆႉ။

လွင်ႈဢုပ်ႇဢူဝ်းၵၼ် ၸွမ်းႁူဝ်ၶေႃႈၼႆႉ ယူႇတီႈၸုမ်းၾၢႆႇ UPDJC ၶဝ်ႁၢင်ႈႁႅၼ်းဝႆႉဢွၼ်တၢင်း ၸဵမ်မိူဝ်ႈပႆႇပဵၼ် ပၢင်ၵုမ်လူင် မိူဝ်ႈဝၼ်းတီႈ 7-12 လိူၼ်မေႊ။ လွင်ႈႁၢင်ႈႁႅၼ်းၼႆႉ ႁၢင်ႈႁႅၼ်းႁုပ်ႈတုမ်ဝႆႉတၢင်းႁၼ်ထိုင် ၵၢင်ၸႂ်ၵူႈၾၢႆႇၾၢႆႇ။ ဢၼ်ႁုပ်ႈဝႆႉၸိူဝ်းၼႆႉ မႃးထတ်းသၢင်ၶိုၼ်း ၶေႃႈၼႆႉႁပ်ႉလႆႈ၊ ၶေႃႈၼႆႉဢမ်ႇႁပ်ႉလႆႈ၊ ၶေႃႈၼႆႉႁၼ်ထိုင်ၸိူင်ႉႁိုဝ် ၸိူဝ်းၼႆႉ။ ၵူၺ်းၵႃႈ ဢၼ်ၶဝ်ဢုပ်ႇဢူဝ်းၵၼ်ႁၢဝ်ႈႁႅင်း၊ မီးလွင်ႈထဵင်ထွင်ၵၼ် ဢမ်ႇယဝ်ႉဢမ်ႇတူဝ်ႈလႆႈ၊ ဢမ်ႇပဵၼ်မႃးၶေႃႈလႆႈၸႂ်ၵၼ်လႆႈၼၼ်ႉ ပဵၼ်ၵဵဝ်ႇၵပ်းလူၺ်ႈလွင်ႈၽၢတ်ႇဢွၵ်ႇ။ ၵဵဝ်ႇၵပ်းလွင်ႈၼႆႉ ဝၼ်းတီႈ 25-26- ၶၢဝ်းတၢင်းသွင်ဝၼ်းၼၼ်ႉ ပႃႇတီႇႁူဝ်သိူဝ် တူၵ်ႇလၢတ်ႈႁၢဝ်ႈႁႅင်းဝႆႉ။ ထိုင်မႃးဝၼ်းတီႈ 27 ၸုမ်း UPDJC ၶဝ်ၵေႃႈမႃးဢုပ်ႇဢူဝ်းထတ်းသၢင် မီးပၼ်ႁႃၶွင်ႉၶမ်တီႈၼႆႈ။


ထိုင်တီႈ ၸုမ်းႁူမ်ႈသၢင်ႈၶၵ်ႉၵၢၼ်ငမ်းယဵၼ် (PPST) ဢၼ်ပဵၼ်တူဝ်တႅၼ်းၸုမ်းၸၢဝ်းၶိူဝ်း (EAO) လႄႈ ၽူႈၵိူဝ်းၵုမ်ၸိုင်ႈမိူင်း ၼၢင်းဢွင်ႇသၢၼ်းၸုၵျီႇ သမ်ႉပေႃးလႆႈႁူပ်ႉထူပ်းႁႃတၢင်းဢွၵ်ႇမၼ်း။ မိူဝ်ႈၼၼ်ႉ ၽူႈၸွႆႈ ၼၢင်းဢွင်ႇသၢၼ်းၸုၵျီႇလႄႈ ဢူးၸေႃႇထေး လၢတ်ႈသပ်းလႅင်းၼႄဝႃႈ- မိူဝ်ႈလဵဝ် ႁဝ်းၶႃႈမီးတၢင်းၶွင်ႉၶမ်လွင်ႈ (၈-ဂ) ၊ ဢုပ်ႇၵၼ်တင်း UPDJC ၵေႃႈဢမ်ႇယဝ်ႉ၊ ၾၢႆႇၶဝ်ၵေႃႈ ဢမ်ႇယွမ်း၊ ၾၢႆႇႁဝ်းၵေႃႈဢမ်ႇယွမ်း။ ယွၼ်ႉပိူဝ်ႈၼၼ်လႄႈ ၸင်ႇလႆႈမႃးႁူပ်ႉထူပ်းၵၼ်၊ ၶႂ်ႈတုၵ်းယွၼ်း ႁႂ်ႈၵူၼ်းလူင်ၸိၵ်းၸွမ်တင်းသွင်ၾၢႆႇ လႆႈႁူပ်ႉထူပ်းဢုပ်ႇဢူဝ်းၵၼ်- ၼႆယူႇ။


ပေႃးၸိူင်ႉၼၼ် ၼၢင်းဢွင်ႇသၢၼ်းၸုၵျီႇ ၵေႃႈထၢမ်ဝႃႈ- ၵဵဝ်ႇၵပ်းလွင်ႈၼႆႉ သူၸဝ်ႈၸၢင်ႈလၢတ်ႈသင်။ တၢင်းၾၢႆႇ EAO ၵေႃႈလၢတ်ႈဝႃႈ- ၵဵဝ်ႇၵပ်းလူၺ်ႈလွင်ႈၽၢတ်ႇဢွၵ်ႇၼႆႉ တိုၼ်းဢမ်ႇလႆႈၽၢတ်ႇဢွၵ်ႇဢၼ်ဝႃႈၼႆႉ ၼမ်ႉၵႂၢမ်းမၼ်းႁၢဝ်ႈႁႅင်းၼႃႇ၊ မိူၼ်ၼင်ႇပၼ်ၶေႃႈပူင်ၼၵ်း ၵႂၢမ်းသင်ႇပုတ်းၶၢတ်ႇ၊ ၵွပ်ႈပိူဝ်ႈၼၼ်လႄႈ ဢမ်ႇလီလႆႈၸႂ်ႉ။ ပေႃးၸႂ်ႉၸိူင်ႉၼႆ ပေႃးဢဝ်တၢင်းထဵၵ်ႊၼိၵ်ႊ (Technical) ဝႃႈ "ႁဝ်းတေယူႇၸွမ်းၵၼ်ၵႂႃႇ တေႃႇၸူဝ်ႈတေႃႇပၢၼ်၊ တၵ်းဢမ်ႇလႆႈပႅတ်ႈၵၼ်"ၼႆ တီႈပွင်ႇမၼ်းပဵၼ်ဢၼ်လဵဝ်ၵၼ်ၵူၺ်း။ ယွၼ်ႉပိူဝ်ႈၼၼ်လႄႈ တေလႆႈလႅၵ်ႈလၢႆႈ ၼမ်ႉၵႂၢမ်း။ ဢမ်ႇၼၼ်ၵေႃႈ ပေႃးဝႃႈဢမ်ႇလႅၵ်ႈလၢႆႈလႆႈၼမ်ႉၵႂၢမ်းၼႆၵေႃႈ ပၼ်ၶၢဝ်းယၢမ်း ႁဝ်းၶႃႈဢိတ်းၼိုင်ႈ၊ ႁႂ်ႈႁဝ်းၶႃႈပေႃးၸၢင်ႈလႆႈသပ်းလႅင်းၼႄၶိုၼ်း ၵူၼ်းမိူင်းႁဝ်း၊ သပ်းလႅင်းၼႄၵူႈမူႇၵူႈၸုမ်း ဢၼ်ပဵၼ်ဢူၺ်းလီႁဝ်း ၸိူဝ်းၼႆႉ ႁႂ်ႈၶဝ်ပေႃးပွင်ႇၸႂ်၊ ပေႃးယဝ်ႉၵွၼ်ႇႁဝ်းၶႃႈ ၸင်ႇၵွႆႈမႃးတူၵ်းလူင်းၵၼ် ပဵၼ်ၸိူင်ႉႁိုဝ်- ၼႆယဝ်ႉ။


တၢင်းၾၢႆႇလူင်ပွင်ၸိုင်ႈ ၶဝ်တွပ်ႇဝႃႈ- ၵဵဝ်ႇၵပ်းလူၺ်ႈလွင်ႈၼမ်ႉၵႂၢမ်းၼႆႉ၊ လွင်ႈဝႃႈတိုၼ်းဢမ်ႇ လႆႈၽၢတ်ႇဢွၵ်ႇၼႆႉ ႁဝ်းတိုၼ်းဝႃႈဢမ်ႇၸၢင်ႈလႅၵ်ႈလၢႆႈ။ လိူဝ်သေၼၼ်ႉ တပ်ႉသိုၵ်းၵေႃႈဝႃႈၸိူင်ႉၼႆ။ လူင်ပွင်ၸိုင်ႈတင်းတပ်ႉသိုၵ်းၼႆႉ တိုၼ်းယိုၼ်ယၼ်ၶေႃႈလဵဝ်ဝႃႈ ၼမ်ႉၵႂၢမ်းၼႆႉဢမ်ႇၸၢင်ႈလႅၵ်ႈလၢႆႈ။ ဢိင်ဢၢင်ႈဝႃႈ လွင်ႈၶၢဝ်းယၢမ်းၵေႃႈ ပိူဝ်ႈတႃႇသူၸဝ်ႈပေႃးတေလႆႈဝူၼ်ႉ ပေႃးတေလႆႈဢုပ်ႇၵၼ်ၼၼ်ႉ ႁဝ်းပၼ်သူမႃးပေႃးႁိုင်ၼႅၼ်ႇယဝ်ႉ- ဝႃႈၼႆ။ မိူဝ်ႈပၢၼ်ဢူးတဵင်းၸဵင်ႇ ပဵၼ်ၸွမ်ၸိုင်ႈၼၼ်ႉတႄႉ ၵဵဝ်ႇလူၺ်ႈလွင်ႈၽၢတ်ႇဢွၵ်ႇ ဢမ်ႇလႆႈဢုပ်ႇသင်။ မၼ်းၸဝ်ႈယၢမ်ႈလၢတ်ႈဝႃႈ- "လိူဝ်သေလွင်ႈၽၢတ်ႇဢွၵ်ႇၼႆႉ တၢင်ႇၸိူဝ်ႉတၢင်ႇလွင်ႈ ၶႂ်ႈဢုပ်ႇသင်ၵေႃႈဢုပ်ႇလႆႈ"- ၼႆၵူၺ်း။


ပေႃးဢဝ်ၸွမ်းလၢႆးတၢင်း (Technical) ဝႃႈ- "မႂ်းတၵ်းတေဢမ်ႇလႆႈၽၢတ်ႇဢွၵ်ႇသေ ႁဝ်းတေယူႇႁူမ်ႈၵၼ်ၵႂႃႇ တေႃႇၸူဝ်ႈတေႃႇပၢၼ်" ဢၼ်ဝႃႈၼႆႉ မၼ်းၵေႃႈမိူၼ်ၵၼ်ၵူၺ်း။ ၵူၺ်းၵႃႈ ပေႃးဢဝ်ၵၢၼ်မိူင်းဝႃႈ မၼ်းဢမ်ႇမိူၼ်ၵၼ်။ ၵွပ်ႈဝႃႈ မၼ်းမိူၼ်ၸိူင်ႉၼင်ႇၵႂၢမ်းသင်ႇပုတ်းၶၢတ်ႇ၊ မိူၼ်ၸိူင်ႉၼင်ႇတဵၵ်းတဵင်၊ ပေႃးႁဝ်းၵႂႃႇ ႁပ်ႉၼႆၵေႃႈ ၽႂ်ၵႂႃႇႁပ်ႉၵေႃႈ မၼ်းတိုၼ်းတေလႆႈၺႃးၸၢၵ်ႇမၼ်းၵမ်းသိုဝ်ႈ၊  ဢၼ်မၼ်းႁဵတ်းၵၢၼ်မိူင်းမႃး လၢႆသိပ်းပီမိူင်း ၸိူဝ်းၼႆႉၵေႃႈ မၼ်းတိုၼ်းတေလွင်ႈၼမ်ႉမူတ်းယဝ်ႉ။ မၢင်ၽဝ်ႇ ပေႃးဢုပ်ႇထႅင်ႈပွၵ်ႈၼိုင်ႈ ၸုမ်းၸိူဝ်းၼႆႉ ဢမ်ႇၸၢင်ႈသိုပ်ႇၶဝ်ႈပႃးၸွမ်းၵေႃႈပဵၼ်လႆႈ၊ ၸုမ်းၼႆႉၵေႃႈ မီးၵူၼ်းၽိုၼ်ႉဝၢႆႇ၊ ၸုမ်းၼၼ်ႉၵေႃႈ မီးၵူၼ်းၽိုၼ်ႉ ဝၢႆႇၼႆ တေႁဵတ်းႁိုဝ်- ၶဝ်ဝႃႈၼႆ။


ၵူၺ်းၵႃႈ ၶဝ်လၢတ်ႈၵႂႃႇၸိူင်ႉၼႆၵေႃႈ တၢင်းၾၢႆႇလူင်ပွင်ၸိုင်ႈ တင်းၾၢႆႇတပ်ႉသိုၵ်းၼႆႉ တိုၼ်းဢမ်ႇႁပ်ႉလႃးလႃး။ လွင်ႈဝႃႈ တၵ်းတေဢမ်ႇလႆႈၽၢတ်ႇဢွၵ်ႇၼႆႉ တၢင်းၾၢႆႇၸုမ်းၸၢဝ်းၶိူဝ်း EAO ၶဝ်ၵေႃႈ ဢမ်ႇယွမ်းႁပ်ႉလႆႈ ၼင်ႇၵဝ်ႇ။


ပေႃးဢမ်ႇယွမ်းၵၼ်ၼႆၵေႃႈ ၽူႈပၼ်တၢင်းၶႆႈၸႂ်ၵေႃႉၼိုင်ႈ ၼႄႉၼမ်းလၢတ်ႈဝႃႈ- လွင်ႈၽၢတ်ႇဢွၵ်ႇၼႆႉ တၢင်းၾၢႆႇလူင်ပွင်ၸိုင်ႈ လႄႈတပ်ႉသိုၵ်းၵေႃႈ ဢမ်ႇယွမ်းလႆႈလႃးလႃး။ လွင်ႈတၵ်းတေဢမ်ႇလႆႈၽၢတ်ႇဢွၵ်ႇသမ်ႉ တၢင်းၾၢႆႇၸုမ်းၸၢဝ်းၶိူဝ်း EAO ၶဝ်ၵေႃႈ တိုၼ်းဝႃႈဢမ်ႇႁပ်ႉ၊ ပေႃးၼၼ်ႁဝ်းႁႃၶေႃႈၵႂၢမ်းမႂ်ႇ ပဵၼ်ၸိူင်ႉႁိုဝ်။ ၸွင်ႇတေလီႁႃႉ။


"ၵႃႈဢၼ်တိုၵ်ႉလႆႈလွင်ႈၽဵင်ႇပဵင်းၵၼ်၊ သုၼ်ႇလႆႈတႅပ်းတတ်းတူဝ်ၵဝ်ႇ၊ ၻီႊမူဝ်ႊၶရေႊသီႊလႄႈ လွၵ်းပိူင် ၾႅတ်ႊၻရႄႊယူႇၼႆၸိုင် တၵ်းတေဢမ်ႇလႆႈၽၢတ်ႇဢွၵ်ႇလႃးလႃး" ႁဝ်းႁဵတ်းၸိူင်ႉၼႆဢမ်ႇလီႁႃႉ?။ ပွင်ႇဝႃႈ ပေႃးဝႃႈယင်းတိုၵ်ႉလႆႈ သုၼ်ႇလႆႈၸိူဝ်းၼႆႉယူႇ ၽၢတ်ႇဢွၵ်ႇဢမ်ႇလႆႈ၊ ၸိူဝ်းဢၼ်ဢမ်ႇၶႂ်ႈႁႂ်ႈၽၢတ်ႇဢွၵ်ႇၵေႃႈ တေလႆႈပၼ်သုၼ်ႇလႆႈၸိူဝ်းၼႆႉၵႂႃႇတိၵ်းတိၵ်း။ ၸၢဝ်းၶိူဝ်းၵူႈၸၢဝ်းၶိူဝ်းၵေႃႈ ၸူဝ်ႈၵႃႈတိုၵ်ႉလႆႈသုၼ်ႇလႆႈ ၸိူဝ်းၼႆႉယူႇ ၽႂ်တၵ်းတေဢမ်ႇလႆႈၽၢတ်ႇဢွၵ်ႇ။


ၵဵဝ်ႇၵပ်းလွင်ႈၼႆႉ တၢင်းၾၢႆႇလူင်ပွင်ၸိုင်ႈ တပ်ႉသိုၵ်းၵေႃႈဝႃႈ လွင်ႈၼႆႉၵေႃႈလီၶႆႈၸႂ်ယူႇ။ ၵူၺ်းၵႃႈ ႁဝ်းလူဝ်ႇလႆႈတၢင်ႇၼႄၽူႈဢွၼ်ႁူဝ်ၸိၵ်းၸွမ် ၼႂ်းႁဝ်းၼင်ႇၵၼ် ဝႃႈၸိူင်ႉၼႆ။ ၶဝ်ၵေႃႈၼမ်းဢဝ်ၵႂႃႇ တၢင်ႇၼႄၵၼ်။ ပိုၼ်ၽၢဝ်ႇလိူၼ်ႈပၢင်ၵုမ်ထႅင်ႈဝၼ်းၼိုင်ႈ။ ၽိူဝ်ႇထိုင်မႃး ဝၼ်းတီႈ 28 ၸုမ်း UPDJC မႃးၵုမ်ၵၼ်ၶိုၼ်းထႅင်ႈ၊ ပေႃးမႃးဢုပ်ႇၵုမ်ၵၼ်ၵေႃႈ လၢတ်ႈဝႃႈ- "ဢၼ်သူဢုပ်ႇဝႆႉမိူဝ်ႈၶမ်ႈဝႃးၼၼ်ႉ ႁဝ်းတိုၼ်းဢမ်ႇႁပ်ႉ"။


"လူင်ပွင်ၸိုင်ႈတင်းတပ်ႉသိုၵ်းၼႆႉ တိုၼ်းဝႃႈပဵၼ်ဢၼ်လဵဝ်ၵၼ်ၵႅၼ်ႇၵႅၵ်း။ ၶဝ်တိုၼ်းယိုၼ်ယၢၼ်ဝႃႈ- ႁဝ်းတိုၼ်းၸုၵ်းမၼ်ႈ ၸွမ်းၶေႃႈၵႂၢမ်းဢၼ် မီးဝႆႉၼႂ်းၶေႃႈတၢင်ႇယိုၼ်ႈ (၈-ဂ) တၵ်းတေဢမ်ႇလႆႈၽၢတ်ႇဢွၵ်ႇ ၼၼ်ႉၵူၺ်း"။  ၵမ်းလိုၼ်းသုတ်းၼႆႉ ၶဝ်ဢုပ်ႇၵၼ်သေ ပဵၼ်တူၵ်းလူင်းၵၼ်လႆႈ 12 ၶေႃႈ၊ ဢမ်ႇတူၵ်းလူင်းလႆႈမီး 9 ၶေႃႈ။ ၶဝ်ၵေႃႈဢွၼ်ၵၼ်လူင်းလၢႆးမိုဝ်းသေယဝ်ႉတူဝ်ႈၵႂႃႇ မိူဝ်ႈပွတ်းၼႂ်ဝၼ်းတီႈ 29 ။


ဝၼ်းလိုၼ်းသုတ်းပၢင်ၵုမ်လူင် မိူဝ်ႈဝၼ်းတီႈ 29/05/2017 ပွတ်းၼႂ် ယၢမ်း 11 မူင်း၊ ၽူႈၶဝ်ႈႁူမ်ႈပၢင်ၵုမ်ၶဝ် လႆႈႁူမ်ႈၵၼ်လူင်းလၢႆးမိုဝ်း ၶေႃႈလႆႈၸႂ်လိၵ်ႈႁူမ်ႈမၢႆမိူင်းႁူမ်ႈတုမ် ပွတ်းတွၼ်ႈ ဢၼ်ၽူႈၶဝ်ႈႁူမ်ႈပၢင်ၵုမ်လူင် တင်းမူတ်းတင်းသဵင်ႈ ဢုပ်ႇဢူဝ်းၵၼ်သေ ႁပ်ႉႁွင်းမၵ်းမၼ်ႈဝႆႉ 37 ၶေႃႈ။


ၼႂ်းလိၵ်ႈႁူမ်ႈမၢႆမိူင်းႁူမ်ႈတုမ် ပွတ်းတွၼ်ႈၼၼ်ႉ မီးၶေႃႈလႆႈၸႂ် ၵဵဝ်ႇၵပ်းၵၢၼ်မိူင်း 12 ၶေႃႈ၊ ပၢႆးမၢၵ်ႈမီး 11 ၶေႃႈ၊ ပၢႆးပိူင်ၵူၼ်း 4 ၶေႃႈ၊ ၵၢၼ်ၸႂ်ႉတိုဝ်းတီႈလိၼ်လႄႈၶူဝ်းႁႄႈၶူဝ်းတိုၼ်း 10 ၶေႃႈ။ တွၼ်ႈၵၼ် ၵဵဝ်ႇၵပ်းလွင်ႈ ၾၢႆႇႁူမ်ႇလူမ်ႈတႄႉ ယွၼ်ႉပိူဝ်ႈဢုပ်ႇထဵင်ၵၼ် ဢမ်ႇယဝ်ႉဢမ်ႇတူဝ်ႈလႄႈ ပႆႇမီးၶေႃႈလႆႈၸႂ်။ လႆႈၸႂ်ၵၼ်ဝႃႈ တေဢုပ်ႇဢူဝ်းၵၼ်ထႅင်ႈတၢင်းၼႃႈ။


ၶေႃႈလႆႈၸႂ်ၸိူဝ်းၼၼ်ႉ ၾၢႆႇၸုမ်းၸၢဝ်းၶိူဝ်းယိပ်းၵွင်ႈၵၢင်ႇ ပဵၼ်တူဝ်တႅၼ်းမူႇၸုမ်း ဢၼ်ၶွတ်ႇၽွတ်ႈဝႆႉ ပတူဝ်ႇၸေႃးၵွႆႇထူးဝိၼ်း၊ တူဝ်တႅၼ်းၾၢႆႇလူင်ပွင်ၸိုင်ႈ ၻွၵ်ႊတိူဝ်ႊတိၼ်ႇမဵဝ်းဝိၼ်း၊ တူဝ်တႅၼ်းၾၢႆႇပၢႆးၵၢၼ်မိူင်း ဢူးတူႉဝူၺ်ႇ၊ တူဝ်တႅၼ်းၾၢႆႇသၽႃး ဢူးထုၼ်းထုၼ်းႁဵင်ႇ၊ တူဝ်တႅၼ်းၾၢႆႇတပ်ႉသိုၵ်းသမ်ႉ ၸွမ်သိုၵ်းတိၼ်ႇမွင်ႇဝိၼ်း ၶဝ်ၸိူဝ်းၼႆႉလူင်းလၢႆးမိုဝ်း။


လူင်းလၢႆးမိုဝ်းယဝ်ႉၵႂႃႇသေတႃႉၵေႃႈ မၼ်းၸၢင်ႈမီးပၼ်ႁႃ လွင်ႈၶွင်ႉၶမ်၊ ယွၼ်ႉပိူဝ်ႈဝႃႈ 1-တၢင်းၾၢႆႇလူင်ပွင်ၸိုင်ႈ ၵေႃႈဢမ်ႇယွမ်း၊ တၢင်းၾၢႆႇၸုမ်းၸၢဝ်းၶိူဝ်း EAO ၵေႃႈဢမ်ႇယွမ်း။ 2-ဢၼ်ၶွင်ႉၶမ်ၸိူင်ႉၼႆၼႆႉ မၼ်းၼႄဝႃႈ တင်းသွင်ၾၢႆႇၼႆႉ တိုၼ်းဝႃႈဢမ်ႇယုမ်ႇယမ်ၵၼ်လႃးလႃး။ မိူၼ်ၼင်ႇၼမ်ႉၵႂၢမ်းဢၼ်လၢတ်ႈဝႃႈ "ၵႃႈဢၼ်လႆႈ လွင်ႈသုၼ်ႇလႆႈၽဵင်ႇပဵင်းၵၼ်၊ သုၼ်ႇလႆႈတႅပ်းတတ်းတူဝ်ၵဝ်ႇ၊ ၻီႊမူဝ်ႊၶရေႊသီႊလႄႈ လွၵ်းပိူင်ၾႅတ်ႊၻရႄႊ ၸိူဝ်းၼႆႉ တိုၼ်းတေဢမ်ႇလႆႈၽၢတ်ႇဢွၵ်ႇၼၼ်ႉ မၼ်းပေႃးၶိုၵ်ႉၶႅမ်ႉယူႇယဝ်ႉ။ ၵူၺ်းၵႃႈ လူင်ပွင်ၸိုင်ႈ ၽူႈၼမ်းတပ်ႉသိုၵ်းၶဝ်သမ်ႉပၢၵ်ႈတူၵ်းပႅတ်ႈ။ ၶဝ်ၵေႃႈဝႃႈ-"ပေႃးဢမ်ႇတူၵ်းလူင်းဝႃႈ ဢမ်ႇၽၢတ်ႇဢွၵ်ႇလႃးလႃးၼႆ တေဢမ်ႇပၼ် သုၼ်ႇလႆႈတႅပ်းတတ်းတူဝ်ၵဝ်ႇ"။ ၵွပ်ႈပိူဝ်ႈၼၼ်လႄႈ တေလႆႈဢုပ်ႇၵၼ်ၵႂႃႇၶၢဝ်းယၢဝ်းထႅင်ႈ"- ၸဝ်ႈၶိုၼ်းသႂ် ၽူႈၵွၼ်းလုမ်း PI ၊ ၽူႈၵိူဝ်းၵုမ် RCSS တင်း PPST ၵေႃႈပဵၼ် တူၵ်ႇလၢတ်ႈၼင်ႇၼႆ။


မိူဝ်ႈဝၼ်း ၶဝ်ႈႁူမ်ႈပၢင်ၵုမ်လူင် ႁူဝ်ပၢၵ်ႇပီ 21 ၵမ်းထူၼ်ႈ 2 ၼၼ်ႉ မီးၵူၼ်းလူင်ၸုမ်းၸၢဝ်းၶိူဝ်း ၸိူဝ်းဢၼ်ပႆႇ လူင်းလၢႆးမိုဝ်း ၵေႃႉၼိုင်ႈဝႃႈ- သူၸဝ်ႈၸိူဝ်းၵႂႃႇၶဝ်ႈႁူမ်ႈပၢင်ၵုမ်လူင်ၼႆႉ ဝႆႉသတိ၊ လိုၼ်းလၢႆးဝၢႆးၼႆႉမႃး သူၸိူဝ်းၼႆႉယဝ်ႉတေလႆႈပဵၼ်ယိူဝ်ႇသိူၵ်ႈပိုၼ်း(တြႃးၶၢမ်ႇသိူၵ်ႈပိုၼ်း) ဝႃႈၸိူင်ႉၼႆ။


ဢွၼ်ၼႃႈၼၼ်ႉ မိူဝ်ႈၸတ်းပၢင်ပွႆးၶုၵ်းထူပ်းဢဝ်မုၼ် ဝၼ်းလုၵ်ႉၽိုၼ်ႉ ၵႅတ်ႇၶႄဢဝ်ၶိုၼ်းမိူင်းၸိုင်ႈတႆး ၶွပ်ႈၶူပ်ႇ 59 ပီ၊ တီႈငဝ်ႈၸိုင်ႈလွႆတႆးလႅင်းၼၼ်ႉ ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) ဢၼ်ဢွၵ်ႇၶေႃႈပိုၼ်ၽၢဝ်ႇဝႃႈ- ယွၼ်ႉပိူဝ်ႈဝႃႈပၢင်ဢုပ်ႇၵုမ်ၵၢၼ်မိူင်း ၸၼ်ႉၸိူဝ်ႉၸၢတ်ႈတႆး ပႆႇလႆႈၸတ်းႁဵတ်းလႄႈ တီႈပၢင်ၵုမ်လူင်ႁူဝ်ပၢၵ်ႇပီ 21 ပၢင်လူင် ၵမ်းထူၼ်ႈ 2 ၼၼ်ႉ တေဢမ်ႇမီးၶေႃႈတၢင်ႇလၢတ်ႈသင် လႄႈ တေဢမ်ႇလူင်းလၢႆးမိုဝ်း ၶေႃႈလႆႈၸႂ်သင်သေၸိူဝ်ႉသေပိူင်။ ၵူၺ်းၵႃႈ ဢိင်ၼိူဝ်ပဵၼ်ၸုမ်းလူင်းလၢႆးမိုဝ်း ၵိုတ်းယိုဝ်းတူဝ်ႈမိူင်း (NCA) သေ တေၵႂႃႇၶဝ်ႈႁူမ်ႈယူႇ။ ဝႃႈၸိူင်ႉၼႆသေ ၵႂႃႇၶဝ်ႈႁူမ်ႈ။


ၵူၺ်းၵႃႈ တီႈပၢင်ၵုမ်လူင်ၼၼ်ႉ ယူႇတီႈၸုမ်းၸၢဝ်းၶိူဝ်း မီးၵၢၼ်ၼပ်ႉသွၼ်ႇဝႃႈ- ၶေႃႈဢၼ်လမ်ႇလွင်ႈ ၵဵဝ်ႇၵပ်းလွင်ႈႁူမ်ႇလူမ်ႈၸိူဝ်းၼႆႉ ႁဝ်းၵေႃႈဢမ်ႇလႆႈတူၵ်းလူင်းၵၼ်။ လိူဝ်သေၼၼ်ႉ မိူၼ်ၼင်ႇလွင်ႈၽၢတ်ႇဢွၵ်ႇ ၼႆၵေႃႈ ႁဝ်းဝႆႉဢုပ်ႇဢူဝ်းၵၼ်ထႅင်ႈတၢင်းၼႃႈ၊ ၵွပ်ႈပိူဝ်ႈဝႃႈ လူင်ပွင်ၸိုင်ႈ တင်းတပ်ႉသိုၵ်းၵေႃႈဢမ်ႇယွမ်း၊ ၾၢႆႇၸၢဝ်းၶိူဝ်း EAO ၵေႃႈဢမ်ႇယွမ်း။ ဢိင်ၼိူဝ်လွင်ႈတၢင်းၸိူင်ႉၼႆသေ ယူႇတီႈတူဝ်တႅၼ်းၾၢႆႇၸုမ်းၸၢဝ်းၶိူဝ်း ၵွႆႇထူးဝိၼ်း လႆႈလူင်းလၢႆးမိုဝ်းၵႂႃႇ။


"တင်ႈတႄႇဢဝ်လူင်ပွင်ၸိုင်ႈၸုမ်းမႂ်ႇ ၶိုၼ်ႈမႃးၼႆႉ မၼ်းယင်းပႆႇလႆႈၶၢႆၶူဝ်း လႆႈႁူဝ်မၢၼ်မၼ်း။ ၸုမ်းၸၢဝ်းၶိူဝ်း 5 ၸုမ်း ဢၼ်ဝႃႈတေလူင်းလၢႆးမိုဝ်းၵေႃႈ ဢမ်ႇမႃးလူင်းလၢႆးမိုဝ်း၊ ၸုမ်းၸိူဝ်းယူႇပွတ်းႁွင်ႇၶဝ် မႃးဢုပ်ႇၵေႃႈ ၶဝ်ဢမ်ႇလူင်းလၢႆးမိုဝ်း။ ၼင်ႇႁိုဝ်သမ်ႉပေႃးတေမီးၶေႃႈတူၵ်းလူင်း လူင်းလၢႆးမိုဝ်းၵၼ်ဝႆႉသေသမ်ႇသေပိူင်ၼၼ်ႉ မီးဢၼ်ၼႆႉၵူၺ်း။ ပေႃးၸိူင်ႉၼၼ် ၶဝ်ၸင်ႇမီးၼႃႈမီးတႃ"- ၸဝ်ႈၶိုၼ်းသႂ်လၢတ်ႈ။


ၵွပ်ႈပိူဝ်ႈၼႆ ၸဝ်ႈပၢႆးမေႃၶဝ်ထတ်းသၢင်ငဝ်းလၢႆးဝႃႈ- တၢင်းၼႃႈၼႆႉ ဢၼ်တေဢုပ်ႇဢူဝ်းၸွမ်း တင်းလူင်ပွင်ၸိုင်ႈ ၵႂႃႇၼႆႉ မၼ်းတေၸၢင်ႈယၢပ်ႇလိူဝ်ၵဝ်ႇၵဝ်ႇ။ ၵွပ်ႈဝႃႈၵူႈပွၵ်ႈၼႆႉ လူင်ပွင်ၸိုင်ႈတင်းတပ်ႉသိုၵ်း ဢမ်ႇၽွမ်ႉၵၼ်၊ ပဵၼ်သွင်ႁူဝ် သွင်ၶူဝ်ႈသွင်ၽၢၵ်ႇဝႆႉ။ မိူဝ်ႈလဵဝ်ၼႆႉ လူင်ပွင်ၸိုင်ႈတင်းတပ်ႉသိုၵ်း ၶဝ်ၽွမ်ႉၵၼ်ယဝ်ႉ၊ ပေႃးပဵၼ်ၸိူင်ႉၼၼ် ၶေးတေဢုပ်ႇဢူဝ်းယၢပ်ႇယဝ်ႉ- ဝႃႈၸိူင်ႉၼႆ။


ၽူႈလူင်ႉလႅၼ်ႇၵၢၼ်မိူင်းၸဝ်ႈၼိုင်ႈ ၵေႃႈလၢတ်ႈဝႃႈ လူင်ပွင်ၸိုင်ႈတင်း တပ်ႉသိုၵ်းမၢၼ်ႈၼႆႉ မိူဝ်ႈဢွၼ်တၢင်း ၶဝ်ၶဵင်ႇၸီႉၼႄးၵၼ်၊ ၶဝ်ႁိမ်ဢႃႇၼႃႇၵၼ် ၵဵဝ်ႇၵပ်းလွင်ႈၻီႊမူဝ်ႊၶရေႊသီႊ၊ လွင်ႈၵၢၼ်မိူင်းၼႆႉ ၶဝ်ဢမ်ႇၽွမ်ႉၵၼ်။ ၵူၺ်းၵႃႈ ပေႃးၵဵဝ်ႇၵပ်းလွင်ႈၸၢဝ်းၶိူဝ်းမႃး ၶဝ်သမ်ႉပဵၼ်ဢၼ်လဵဝ်ၵၼ်- ဝႃႈၼႆ။


ၸိူင်ႉႁိုဝ်ၵေႃႈယႃႇ ၼႂ်းႁူဝ်လိူၼ်ၵျုၼ်ႊၼႆႉ ၵူႈမူႇၵူႈၸုမ်း ၾၢႆႇၸုမ်းလူင်ပွင်ၸိုင်ႈ၊ ၾၢႆႇတပ်ႉသိုၵ်းတပ်ႉမတေႃႇ၊ ပႃႇတီႇၵၢၼ်မိူင်းၸိူဝ်းၼႆႉ တေမီးပၢင်ဢုပ်ႇဢူဝ်း၊ ၵၢၼ်ထတ်းသၢင်ၶိုၼ်း လွင်ႈဢၼ်ၸတ်းႁဵတ်းမႃးပၢင်ၵုမ်လူင် ႁူဝ်ပၢၵ်ႇပီ 21 ၊ လွင်ႈလီလွင်ႈၸႃႉမီးၸိူင်ႉႁိုဝ်ၸိူဝ်းၼႆႉ။ တေဢုပ်ႇဢူဝ်းထတ်းသၢင်ပႃးလွင်ႈ ႁဝ်းတေသိုပ်ႇယၢင်ႈ ၶိုၼ်ႈၼႃႈၵႂႃႇၸိူင်ႉႁိုဝ်၊ ဢၼ်ပႆႇတူၵ်းလူင်းၵၼ်လႆႈၸိူဝ်းၼႆႉ တေၸၢင်ႈမီးလၢႆးတူၵ်းလူင်းၵၼ်လႆႈ ၸိူင်ႉႁိုဝ်၊ ဢၼ်တူၵ်းလူင်းၵၼ်လႆႈယဝ်ႉၼၼ်ႉ ႁဝ်းသမ်ႉတေၸၢင်ႈႁဵတ်းဢွၵ်ႇၼမ်ႉဢွၵ်ႇလႆႈၸိူင်ႉႁိုဝ် ၸိူဝ်းၼႆႉယူႇ။


လွင်ႈၾၢႆႇႁူမ်ႇလူမ်ႈဝၢၼ်ႈမိူင်းၼႆႉ ၾၢႆႇလူင်ပွင်ၸိုင်ႈတင်း တပ်ႉသိုၵ်း ၶႂ်ႈႁႂ်ႈပဵၼ်ပိူင် ၸိုင်ႈမိူင်းလဵဝ်-တပ်ႉသိုၵ်းလဵဝ်။ ၵူၺ်းၵႃႈ ၾၢႆႇၸၢဝ်းၶိူဝ်း ၶႂ်ႈပဵၼ်တပ်ႉသိုၵ်းမိူင်းႁူမ်ႈတုမ် ႁိုဝ် တပ်ႉသိုၵ်းၾႅတ်ႊၻရႄႊ။ ဢၼ်ဝႃႈၸိုင်ႈမိူင်းလဵဝ် ႁႂ်ႈမီးတပ်ႉသိုၵ်းဢၼ်လဵဝ်ၼၼ်ႉတႄႉ တူၵ်းလူင်းၵၼ်ၸွမ်းပိူင်မၼ်းယူႇသေတႃႉ ၼင်ႇႁိုဝ်တေပဵၼ်မႃး တပ်ႉသိုၵ်းဢၼ်လဵဝ်ၼၼ်ႉ တေႁဵတ်းၸိူင်ႉႁိုဝ်၊ တေၶိုင်လၢႆးလႂ်၊ ယင်းပႆႇမုင်ႈႁၼ်တႃႈယိူင်းမၢႆ ဢၼ်တေတူၵ်းလူင်းၵၼ်လႆႈ။


ၸၢႆးၽွၼ်းလီ 01/06/2017