ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/SSA သူင်ႇတူဝ်တႅၼ်း 29 ၵေႃႉ ၵႂႃႇၶဝ်ႈႁူမ်ႈပၢင်ၵုမ်လူင် ႁူဝ်ပၢၵ်ႇပီ 21 ပၢင်လူင် ၵမ်းထူၼ်ႈ 2 ၵူၺ်းၵႃႈ တေဢမ်ႇမီးၽိုၼ်လိၵ်ႈတႃႇ တၢင်ႇလၢတ်ႈဢုပ်ႇဢူဝ်းသင် တီႈၼႂ်းပၢင်ၵုမ်လူင် ဝႃႈၼႆ။


ပၢင်ၵုမ်လူင် ႁူဝ်ပၢၵ်ႇပီ 21 ပၢင်လူင် ၵမ်ႈထူၼ်ႈ 2 ဢၼ်ၸတ်းႁဵတ်း ဝၼ်းတီႈ 24-28/05/2017 တီႈၼေႇ ပျီႇတေႃႇၼၼ်ႉ ယူႇတီႈတပ်ႉသိုၵ်းၸိုင်ႈတႆး RCSS/SSA သူင်ႇတူဝ်တႅၼ်းၶဝ်ႈႁူမ်ႈ 29 ၵေႃႉ၊ ၵူၺ်းၵႃႈ ယွၼ်ႉဝႃႈ ပႆႇလႆႈသဵင်ၵၢင်ၸႂ်ၵူၼ်းမိူင်းတႆးလႄႈ တေဢမ်ႇဢုပ်ႇဢူဝ်းတၢင်ႇလၢတ်ႈသင်  ဝႃႈၼႆ။

ၸၢႆးသႅင်မိူင်း ၽူႈၶၢၼ်ပၢၵ်ႇ ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/SSA  လၢတ်ႈတီႈၸုမ်းၶၢဝ်ႇ ၽူႈတွႆႇႁွၵ်ႈဝႃႈ “ RCSS/SSA တႄႉ တေပႆႇၸၢင်ႈတၢင်ႇလၢတ်ႈဢုပ်ႇဢူဝ်းၼႂ်းပၢင်ၵုမ်လူင် ႁူဝ်ပၢၵ်ႇပီ 21 ပွၵ်ႈၵမ်း ၼႆႉ။  ႁဝ်းၶႃႈ ယူႇတီႈၸုမ်း လူင်းလၢႆးမိုဝ်း NCA သေၵႂႃႇၶိုၼ်ႈႁွတ်ႈၵူၺ်း” ဝႃႈၼႆ။


သင်ဝႃႈ ဢိင်ၼိူဝ်ၶေႃႈတႅပ်းတတ်းလႆႈၸႂ် ဢွၵ်ႇမႃးၼႂ်းပၢင်ၵုမ်ၼၼ်ႉသေ တေမီးလွင်ႈႁူမ်ႈမၢႆတႃႇ လူင်းလၢႆးမိုဝ်းၸိုင် ယူႇတီႈ RCSS/SSA တေဢမ်ႇပႆႇတူဝ်ႈတၼ်းလူင်းလၢႆးမိုဝ်း။ ယွၼ်ႉပိူဝ်ႈ ၵၢၼ်တႃႇၵေႃႇသၢင်ႈ ၸိုင်ႈမိူင်းႁူမ်ႈတုမ် ၾႅတ်ႊၻရႄႊၼၼ်ႉ ပႆႇပႃးၵၢင်ၸႂ်ၵူၼ်းမိူင်းတႆး။ လွင်ႈၼႆႉ ႁဝ်းၶႃႈၵေႃႈ ပဵၼ်ဢၼ်မႆႈၸႂ်ဝႆႉ။ ၵူၺ်းၵႃႈ ၸွမ်းလူၺ်ႈ လၵ်းၵၢၼ်လႄႈ ႁၼ်လီၵမ်ႉထႅမ်ယူႇ။ ယွၼ်ႉၼၼ် တေၶိုၼ်ႈၸွမ်းပၢင်ၵုမ်ယူႇ ဝႃႈၼႆ။


တူဝ်တႅၼ်း RCSS/SSA ၵႂႃႇၶဝ်ႈႁူမ်ႈပၢင်ၵုမ် ႁူဝ်ပၢၵ်ႇပီ 21 ပၢင်လူင် ပွၵ်ႈၵမ်းၼႆႉ တင်းမူတ်း မီး 29 ၵေႃႉ။ ၼႂ်းၼၼ်ႉ တူဝ်တႅၼ်း တႃႇၶဝ်ႈႁူမ်ႈၸွမ်းႁူဝ်ၶေႃႈ ၼႂ်းပၢင်ၵုမ်ဢၼ်မီးဝႆႉၼၼ်ႉ မိူၼ်ၼင်ႇ ၾၢႆႇၵၢၼ်မိူင်း တေမီးၸဝ်ႈသိုၵ်းလူင် ၸၢႆးလႃႉ၊ၸဝ်ႈသိုၵ်းၸၢႆးငိုၼ်း၊ ၻွၵ်ႊတိူဝ်ႊၸၢႆးဢူး၊ ၸၢႆးၺီႇၺီႇမူဝ်း။ ၾၢႆႇႁူမ်ႇလူမ်ႈသမ်ႉ ၸွမ်ႁၢၼ်ပွင်ၶိူဝ်း၊ ၸဝ်ႈပိုၼ်ၶမ်း၊ ၸၢႆးမဵဝ်းတၢၼ်ႉ။ ၾၢႆႇတူင်ႇဝူင်းသမ်ႉ ၼၢင်းတၼ်ႇတႃႇဢူး ၊ ၼၢင်းယိင်းၼွင်ႉ၊ ၼၢင်းၸၢမ်ၽွင်း။ ၾၢႆႇမၢၵ်ႈမီး ၸၢႆးလႅင်း၊ ၸၢႆးၶမ်းၼုတ်း၊ ၸၢႆးယီႈတိပ်ႉ၊ ၸၢႆးလၢၼ်တႆး။ လွင်ႈတီႈလိၼ် ၶူဝ်းၶွင်သၽႃႇဝ ၸဝ်ႈသိုၵ်းလူင် သႅဝ်းႁၢၼ်၊ ၸၢႆးၵွင်း၊ ၸၢႆးသၢမ်တိပ်ႉ ၶေႇမရတ်ႉ၊ ၸၢႆးငိုၼ်း၊ ၸၢႆးသိူဝ်ႁၢၼ် ၸဵမ်ၸိူဝ်းၼႆႉ ဝႃႈၼႆ။


ပၢင်ၵုမ်လူင် ႁူဝ်ပၢၵ်ႇပီ 21 ပၢင်လူင်ၼႆႉ တေၸတ်းႁဵတ်း ၼႂ်းဝၼ်းတီႈ 24-28/05/2017 တႃႇၶၢဝ်းတၢင်း 5 ဝၼ်း။ တေႃႈလဵဝ် ယူႇတီႈတူဝ်တႅၼ်းၸုမ်းယိပ်းၵွင်ႈၵၢင်ႇ ၸၢဝ်းၶိူဝ်း၊ ပႃႇတီႇၵၢၼ်မိူင်းလႄႈ ၸုမ်းတူင်ႉၼိုင်တူင်ႇဝူင်း၊ ၾၢႆႇလူင်ပွင်ၸိုင်ႈလႄႈ ၾၢႆႇတပ်ႉသိုၵ်းမၢၼ်ႈ ၸိူဝ်းဢၼ်လႆႈမွၵ်ႇထိုင်ၼၼ်ႉ ႁွတ်ႈၽႅဝ်ၵၼ်ဝႆႉတီႈ ၼေႇပျီႇတေႃႇ ၵမ်ႈၽွင်ႈယဝ်ႉ ဝႃႈၼႆ။