ၸုမ်းပႃႇတီႇတႆး၊ ၸုမ်းတူင်ႇဝူင်းတႆး ၼႂ်းၸႄႈဝဵင်းၵဵင်းတုင် ႁူပ်ႉထူပ်း မိုတ်ႈၵိုဝ်းလဵပ်ႈႁဵၼ်း တင်း ၸုမ်းတူင်ႇဝူင်းၸိူဝ်ႉ ၶိူဝ်းတႆးႁူမ်ႈ တီႈႁူင်းႁေႃသမူဝ်းသွၼ်တႆးလိုဝ်ႉ ဝဵင်းၵဵင်းတုင်။


ဝၼ်းတီႈ 16/05/2017 ယၢမ်းၵၢင်ၼႂ် 09:00-15:00 မူင်း ၸုမ်းတူင်ႉၼိုင်တူင်ႇဝူင်းတႆး ၼႂ်းဝဵင်းၵဵင်းတုင် ႁူပ်ႉ ထူပ်းၵၼ်ဢုပ်ႇဢူဝ်းလႅၵ်ႈလၢႆႈၵၼ် တင်းၸုမ်းတူင်ႇဝူင်းၸိူဝ်ႉၶိူဝ်းတႆးႁူမ်ႈ၊ ဢုပ်ႇဢူဝ်းၼႃႈၵၢၼ်တႃငၢၼ်းမူႇၸုမ်း၊ လွင်ႈၵၢၼ်ၽွမ်ႉႁူမ်ႈလႄႈ လွင်ႈဝၢင်းၽႅၼ်ၵၢၼ်ငၢၼ်း တႃႇႁူမ်ႈသၢင်ႈၵၢၼ် ငၢၼ်း ၵႂႃႇၸွမ်းၵၼ် ၸဵမ်ၸိူဝ်းၼႆႉ။ ပၢင်ႁူပ်ႉထူပ်းၼႆႉ ၸတ်းႁဵတ်းတီႈ ႁူင်းႁေႃတႆးလိုဝ်ႉ ၸႄႈဝဵင်းၵဵင်းတုင် ၸိုင်ႈတႆး ပွတ်းဢွၵ်ႇၶူင်း။

ၼၢင်းဝူဝ်းၽတ်း ၽူႈၵပ်းသၢၼ်တိတ်းတေႃႇ ၼႂ်းၸုမ်းတူင်ႇဝူင်းၸိူဝ်ႉၶိူဝ်းတႆးႁူမ်ႈ တၢင်းပွတ်းဢွၵ်ႇၶူင်း လၢတ်ႈဝႃႈ “ ယူႇတီႈၸုမ်းတူင်ႇဝူင်းၸိူဝ်ႉၶိူဝ်းတႆးႁူမ်ႈ လုၵ်ႉတီႈလႃႈသဵဝ်ႈသေ လူင်းမႃးႁူပ်ႉထူပ်းမိုတ်ႈၵိုဝ်း ၸုမ်းတူင်ႉၼိုင်တူင်ႇ ဝူင်းတႆး တီႈၵဵင်းတုင်၊ ယဝ်ႉၵေႃႈ သပ်းလႅင်းၼႄ ယိူင်းမၢႆၸုမ်းမီးၸိူင်ႉႁိုဝ် လၵ်းၼမ်းမီးၸိူင်ႉႁိုဝ် တေႁဵတ်း ၵႂႃႇၸိူင်ႉႁိုဝ်၊ တေႁူမ်ႈႁွမ်းၸွမ်းၽႂ်ၵႂႃႇၵူၺ်းၵူၺ်း ၸဵမ်ၸိူဝ်းၼႆႉ” ဝႃႈၼႆ။


သိုပ်ႇလၢတ်ႈထႅင်ႈဝႃႈ ယူႇတီႈၸုမ်းတူင်ႉၼိုင်တူင်ႇဝူင်းတႆး တၢင်းပွတ်းဢွၵ်ႇသမ်ႉ တူင်ႉၼိုင်ၸိူင်ႉႁိုဝ်လၢႆလၢႆ၊ မီးလွင်ႈၶွင်ႉၶမ်ၸိူင်ႉႁိုဝ်၊ တေသိုပ်ႇ ႁဵတ်းသၢင်ႈၵႂႃႇၸိူင်ႉႁိုဝ် ၸဵမ်ၸိူဝ်းၼႆႉ ၸင်ႇမႃးဢုပ်ႇဢူဝ်းပိၼ်ႇ ပႆႇလႅၵ်ႈ လၢႆႈၵၼ် ဝႃႈၼႆ။


ၵဵဝ်ႇၵပ်းလွင်ႈႁူပ်ႉထူပ်း ပိၼ်ႇပႆႇလႅၵ်ႈလၢႆႈၵၼ် ပွၵ်ႈၵမ်းၼႆႉ မွၵ်ႇဢဝ်တူဝ်တႅၼ်း ၸုမ်းတူင်ႉၼိုင်တူင်ႇဝူင်းတႆး တၢင်းပွတ်းဢွၵ်ႇၶူင်း မိူၼ်ၼင်ႇ ၸႄႈဝဵင်းတႃႈၶီႈလဵၵ်း ၊ တႃႈလိူဝ်ႇ၊ မိူင်းၽျၢၵ်ႈ၊ မိူင်းယွင်း၊ ၵဵင်းတုင်လႄႈ မိူင်းပဵင်း ၸိူဝ်းၼႆႉ။


ယူႇတီႈတူဝ်တႅၼ်းၸုမ်းတူင်ႉၼိုင်တူင်ႇဝူင်းၵူၼ်း ၼႂ်းၸႄႈဝဵင်းၵဵင်းတုင် ဢၼ်မႃးၶဝ်ႈႁူမ်ႈသမ်ႉ ၸုမ်း ပႃႇတီႇတႆး 3 ပႃႇတီႇ၊ ႁူဝ်သိူဝ်၊ သိူဝ်ၽိူၵ်ႇ၊ ၵွင်ၸႆး၊ ၵေႃလိၵ်ႈလၢႆး ၊ ၸုမ်းၵူၼ်းၼုမ်ႇတႆး၊ ႁူင်းႁဵၼ်းၸိူဝ်ႉၸၢတ်ႈလႄႈ ၸုမ်းမွၵ်ႇ ၵွၼ် ၸဵမ်ၸိူဝ်းၼႆႉ။ ၼွၵ်ႈလိူဝ်ၼၼ်ႉ တူဝ်တႅၼ်းတၢင်းပွတ်းဝဵင်း တႃႈၶီႈလဵၵ်း၊ တႃႈလိူဝ်ႇ၊မိူင်းယွင်း ၸဵမ်ၸိူဝ်းၼႆႉ မႃးၶဝ်ႈႁူမ်ႈၸွမ်း ဝႃႈၼႆ။


ယူႇတီႈၸုမ်းတူင်ႇဝူင်းၸိူဝ်ႉၶိူဝ်းတႆးႁူမ်ႈၼႆႉ လူင်းပိုၼ်ႉတီႈႁူပ်ႉထူပ်းၸုမ်းပႃႇတီႇတႆး၊ ၸုမ်းၵူၼ်းၼုမ်ႇ၊ ၸုမ်းတူင်ႉ ၼိုင်တူင်ႇဝူင်းတႆး ၼႂ်းမိူင်းတႆးပတ်းပိုၼ်ႉ တႄႇဢဝ် ႁူဝ်လိူၼ်မေႊၼႆႉမႃး လႆႈလူင်းႁူပ်ႉထူပ်း မိူၼ်ၼင်ႇ ၸႄႈဝဵင်း သႅၼ်ဝီ၊ ၼမ်ႉတူႈ၊ ၵျွၵ်ႉမႄး၊ ၼွင်ၶဵဝ်၊ မိူင်းၵုတ်ႈ၊ မိူင်းမိတ်ႈ၊ သီႇပေႃႉ၊ ၼမ်ႉလၼ်ႈ၊ ပၢင်လူင်၊ ထုင်ႉပူင်း၊ ပၢင်လွင်း၊ မွၵ်ႇမႆႇ၊ ၼမ်ႉၸၢင်၊ ၵုၼ်ႁဵင်လႄႈ ၵဵင်းတုင်။ ၼွၵ်ႈလိူဝ်ၼၼ်ႉ တေသိုပ်ႇလူင်းထႅင်ႈ တၢင်းပွတ်းမိူင်းသၢတ်ႇ မိူင်းတူၼ် ဝႃႈၼႆ။