ဝၼ်းတီႈ 4-5/5/2017 ၼႆႉ ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး CSSU တေၸတ်းႁဵတ်းပၢင်ၵုမ်ႁူဝ်ႁုပ်ႈပီ၊ တေမွပ်ႈတၼ်ႁဵင်းပၼ်ႁူဝ်ပဝ်ႈမႂ်ႇ တွၼ်ႈတႃႇပီ 2017 – 2018 ။ လႆႈႁူႉဝႃႈၽူႈယႂ်ႇၵူၼ်းလူင်ၵူႈမူႇၵူႈၸုမ်း တေၶဝ်ႈႁူမ်ႈၼႆလႄႈ လီႁူမ်ၸူမ်းၸွမ်းတႆးမေႃၽွမ်ႉႁူမ်ႈၵၼ်မႃးယဝ်ႉ။ ဢမ်ႇမိူၼ်ၼင်ႇၵူႈပွၵ်ႈယဝ်ႉ။ ၵူၺ်းၵႃႈ ၵမ်ႈၽွင်ႈသမ်ႉဝႃႈ ၼႆႉပဵၼ်ၸိုဝ်ႈၸၢင်ႉႁၢင်ႈမႅဝ်း ၸိုဝ်ႈလႅဝ်းႁႅဝ်းမႆႉၵူၺ်း ဝႃႈၼႆ။

ပၢင်ၵုမ် CSSU ဝဵင်းလူင်တႃႈၵုင်ႈ မိူဝ်ႈ 5-6/07/2016 လႆႈၸႂ်တူၵ်းလူင်း တေၽိုၼ်ႉၶိုၼ်း ၶေႃႈလႆႈၸႂ် ၼႂ်းလိၵ်ႈႁူမ်ႈမၢႆပၢင်လူင် 1947

ၵွပ်ႈၼၼ် ပၼ်ႁႃဢၼ်ပဵၼ်ယူႇၼႃႈပၢင်ၵုမ်၊ ၵွၼ်ႇပႆႇႁဵတ်းပၢင်ၵုမ်လူင်ၼႆႉ ပဵၼ်ပၼ်ႁႃသင်ဝႆႉ။ ပေႃးထိုင်ၼႂ်းပၢင်ၵုမ်မႃး ထုၵ်ႇလီႁႃလၢႆးၸိူင်ႉႁိုဝ်သေၵႄႈလိတ်ႈ။


ပေႃးယူႇတီႈၽူႈတႅမ်ႈလိၵ်ႈသေထတ်းႁၼ်တႄႉ ပၼ်ႁႃမီး 3 လွင်ႈ - (1) တၼ်းႁဵင်းႁူဝ်ပဝ်ႈ လွင်ႈတေမွပ်ႈဢမ်ႇမွပ်ႈပၼ်ပႃႇတီႇသိူဝ်ၽိူၵ်ႇ၊ (2) လွင်ႈသိူဝ်ၽိူၵ်ႇသူင်ႇတူဝ်တႅၼ်း၊ (3) လွင်ႈၸုမ်းၽူႈၸၢင်ႈၸွႆႈၶိုင်သၢင်ႈ Technical Team … ၸဵမ်ၸိူဝ်းၼႆႉ။


ပၼ်ႁႃ (1)


တင်ႈတႄႇႁူဝ်ပီ 2017 ၼႆႉမႃး ပႃႇတီႇသိူဝ်ၽိူၵ်ႇ ပိုတ်ႇတူဝ်လၢတ်ႈဝႃႈ တူဝ်ႈတၼ်းတႃႇႁပ်ႉတၼ်းႁဵင်းႁူဝ်ပဝ်ႈ CSSU ။ လိူဝ်ၼၼ်ႉဢမ်ႇၵႃး ႁၢင်လိူၼ်ဢေႊပရိူဝ်ႊၼႆႉၵေႃႈ ယင်းႁဵတ်းပၢင်ၵုမ်လူင်သေတႅပ်းတတ်းပိုၼ်ၽၢဝ်ႇဝႃႈ တူဝ်ႈတၼ်းတႃႇႁပ်ႉတၼ်းႁဵင်းၼႆႉ။


ၾၢႆႇၼိုင်ႈ ၸုမ်းၽူႈႁပ်ႉတၼ်းႁဵင်းႁူဝ်ပဝ်ႈဝႆႉယၢမ်းလဵဝ် သမ်ႉတူၵ်ႇတွၵ်းတႅၵ်ႇလႅင်းဝႆႉ ၼႂ်းၶပ်ႉမၢႆပၢင်ၵုမ်ၼၼ်ႉဝႃႈ ယူႇတီႈႁူဝ်ပဝ်ႈလူင်ယၢမ်းလဵဝ်သေ တေမွပ်ႈတၼ်းႁဵင်းႁူဝ်ပဝ်ႈပၼ်ၶွင်ႇသီႇဢဝ်ၶိုၼ်းၸိုင်ႈတႆး RCSS/SSA ၼႆဝႆႉ။


ပေႃးတူၺ်းလွင်ႈၼႆႉ တေဝႃႈပဵၼ်ပၼ်ႁႃၼႆၵေႃႈဝႃႈ ဢမ်ႇပဵၼ်ပၼ်ႁႃၼႆၵေႃႈဝႃႈ ပေႃးမေႃဝႆႉဝၢင်းၸႂ်။ ပေႃးဢဝ်ပၵ်းပိူင်ဝႃႈၶႅၼ်းဢမ်ႇမီးပၼ်ႁႃ။
ပေႃးၸုမ်းၼိုင်ႈၶႂ်ႈၶိၼ်ႁဵတ်း၊ ၸုမ်းၼိုင်ႈသမ်ႉတင်ႈၸႂ်ၶႂ်ႈၶတ်းတႄႉ ပဵၼ်ပၼ်ႁႃယဝ်ႉ။ ပေႃးဝူၼ်ႉဝႃႈ မိူဝ်ႈၵဝ်ႁဵတ်းၼၼ်ႉ ၵဝ်ႁၢပ်ႇၵၢၼ်မႃးလူင်ႉလႅင်းပွင်ႇပိုင်ႈ ႁဵတ်းႁႂ်ႈပဵၼ်ၵၢၼ်မႃးလီတီႈသုတ်းယဝ်ႉ။ ၸုမ်းတေၶိုၼ်ႈပဵၼ်ႁူဝ်ပဝ်ႈၼၼ်ႉ တၵ်းလႆႈလီလိူဝ်ၵဝ်ႇၵူၺ်း၊ ပေႃးဢမ်ႇလီမီးတီႈယူပ်ႈယွမ်းၵေႃႈ မီးတီႈမၼ်းၵူၺ်းၼႆ မေႃဝႆႉၸႂ်ၸိူင်ႉၼႆတႄႉဢမ်ႇမီးပၼ်ႁႃယဝ်ႉ။ လွင်ႈၽွမ်ႉႁူမ်ႈၵေႃႈတေပဵၼ်။ တွၼ်းသေတေၸၢင်ႈမီးၵႂၢမ်းထတ်းသၢင်ဝႃႈ ၸုမ်း CSSU ၼႆႉ မီးပၵ်းမီးပိူင်ဢမ်ႇၼၼ်ဢမ်ႇမီးပၵ်းဢမ်ႇမီးပိူင်။


ပေႃးဢဝ်ပၵ်းပိူင်ဝႃႈတႄႉ မိူဝ်ႈၽွမ်ႉလႆႈၸႂ်ၵၼ်လိူၵ်ႈႁူဝ်ပဝ်ႈ (ၽူႈၼင်ႈၼၵ်း)ၵေႃႉႁႅၵ်ႈၼၼ်ႉ လိူၵ်ႈၸွမ်းတူဝ်ၶပ်ႉဢိင်းၵလဵတ်ႈ  A – Z  ။ ယွၼ်ႉၶွင်ႇသီႇဢဝ်ၶိုၼ်းၸိုင်ႈတႆး တႄႇတူဝ် R မႃးဢွၼ်တၢင်း ၸိူဝ်းၸိုဝ်ႈၸုမ်းတႄႇလူၺ်ႈ S လႄႈ ၸွမ်သိုၵ်းလူင်ယွတ်ႈသိုၵ်း လႆႈႁပ်ႉတၼ်းႁဵင်းဢွၼ်တၢင်းသုတ်း၊ ပွင်ႇဝႃႈၼိုင်ႈ RCSS ၊ သွင် SNDP ၊ သၢမ်ၸင်ႇၵွႆႈမႃး SSJAC ၊ ၼိုင်ႈၸုမ်းလႂ်ၼိုင်ႈၶူပ်ႇပီ။ သၢမ်ၶူပ်ႇပီၸင်ႇပဵၼ်ၼိုင်ႈႁွပ်ႈ။
ၵွပ်ႈၼၼ် ထုၵ်ႇလီတႄႇၶိုၼ်းႁွပ်ႈမႂ်ႇႁႃႉ တေယႃႉပၵ်းပိူင်သေ ၵႂႃႇၸွမ်းလူၺ်ႈလၢႆးဢဝ်ၵမ်ႉမၼ်းဝႃႈ၊ မီးတီႈၽူႈၶဝ်ႈပၢင်ၵုမ်ၶဝ်ႁူမ်ႈၵၼ်တႅပ်းတတ်း။


ပၼ်ႁႃ (2)



လွင်ႈၼႆႉ ၼႂ်းတူဝ်တႅၼ်းပႃႇတီႇသိူဝ်ၽိူၵ်ႇၼၼ်ႉ ပႃးဝႆႉလုင်းၸေႃးတၢၼ်းမိၼ်ႉ။ လုင်းၸေႃးတၢၼ်းမိၼ်ႉၼႆႉ ပဵၼ်ၵူၼ်းထွၼ်တူဝ်ဢွၵ်ႇပႃႇတီႇသိူဝ်ၽိူၵ်ႇသေ ၵႂႃႇတင်ႈပႃႇတီႇၾႅတ်ႊၻရႄႊၽွမ်ႉႁူမ်ႈ FUP ၊ ယၢမ်းလဵဝ်ႁပ်ႉတၼ်းႁဵင်းႁူဝ်ပဝ်ႈဝႆႉ။


လွင်ႈၼႆႉ ၸုမ်းၽူႈႁပ်ႉတၼ်းႁဵင်းႁူဝ်ပဝ်ႈဝႆႉယၢမ်းလဵဝ် ဢမ်ႇႁၢၼ်ႉၸႂ်သေတူၵ်ႇတၵ်ႉဝႃႈ - “ ဢမ်ႇထုၵ်ႇလီသူင်ႇမၼ်းၸၢႆး မႃးပဵၼ်တူဝ်တႅၼ်းပႃႇတီႇသိူဝ်ၽိူၵ်ႇ” ။


သုၼ်ႇတူဝ်ၽူႈတႅမ်ႈလိၵ်ႈတႄႉႁၼ်ထိုင်ဝႃႈ ၼႆႉပဵၼ်သေႇရေႇၼႃႈတႃသိူဝ်ၽိူၵ်ႇ။ ၼႂ်းပႃႇတီႇဢမ်ႇမီးၵူၼ်းလႄႈသူင်ႇမၼ်းၸၢႆးၵႂႃႇႁႃႉ၊ ၼႂ်းပႃႇတီႇ ဢမ်ႇမီးၼမ်ႉၵတ်ႉပဵင်းမၼ်းၸၢႆးလႄႈ သူင်ႇမၼ်းၸၢႆးမႃးႁႃႉ၊ ဢမ်ႇၼၼ်ၵေႃႈ ပေႃးဢမ်ႇၸႂ်ႈမၼ်းၸၢႆး ဢမ်ႇပဵၼ်ၵၢၼ်ႁႃႉ ယူႇတီႈပႃႇတီႇသိူဝ်ၽိူၵ်ႇၶဝ်ၸဝ်ႈသဵင်ႈသဵင်ႈ။
ၸဵမ်မိူဝ်ႈသွင်ပီပူၼ်ႉမႃး ယၢမ်ႈဢဝ်မၼ်းၸၢႆးသူင်ႇတႅၼ်း တၼ်းႁဵင်းႁူဝ်ပဝ်ႈပႃႇတီႇသိူဝ်ၽိူၵ်ႇ ၵႂႃႇၶဝ်ႈႁူမ်ႈပၢင်ၵုမ်တီႈၵဵင်းမႂ်ႇမႃးယဝ်ႉၵမ်းၼိုင်ႈ။ ၸိူဝ်းပဵၼ်လုၵ်ႈၸုမ်း CSSU ၵမ်ႈၽွင်ႈဢမ်ႇႁၼ်လီ။


ၵွပ်ႈၼၼ်လႄႈပၼ်ႁႃတီႈ 2 ၼႆႉၵေႃႈတေႃႈၼင်ႇၼၼ် ပေႃးဝူၼ်ႉလိုၵ်ႉၵေႃႈပဵၼ်ပၼ်ႁႃ ပေႃးဢမ်ႇဝူၼ်ႉလိုၵ်ႉၵေႃႈဢမ်ႇၸႂ်ႈပၼ်ႁႃ။ မီးတီႈတူဝ်ၸဝ်ႈၶွင်ၵေႃႉလိူၵ်ႈတူဝ်တႅၼ်းသူင်ႇၵႂႃႇၼၼ်ႉၵူၺ်း။


ပၼ်ႁႃ (3)


ၸုမ်းၽူႈၸၢင်ႈၸွႆႈၶိုင်သၢင်ႈ Technical Team ၼႆႉသမ်ႉ ၵူၼ်းယူႇၼႂ်းၸုမ်းၵမ်ႈပႃႈၼမ် (ဢမ်ႇဝႃႈၵူႈၵေႃႉ) ယုမ်ႇယမ်ၼိူဝ်လၢႆးႁဵတ်းသၢင်ႈ ပႃႇတီႇႁူဝ်သိူဝ်လႄႈၶဝ်ႈမႃးၶိုင်သၢင်ႈ။ သႂ်ႇႁႅင်းတူင်ႉၼိုင်ၸွႆႈသၢင်ႈႁၢဝ်ႈႁၢဝ်ႈႁႅင်းႁႅင်း ၽွင်းၸတ်းႁဵတ်းပၢင်ဢုပ်ႇၵုမ်ၾိုၵ်းလပ်ႉၼမ်ႉၵတ်ႉ workshop ႁၢင်ႈႁႅၼ်းတႃႇပဵၼ်ပၢင်ၵုမ်လူင်ၵၢၼ်မိူင်း ၸၼ်ႉၸိူဝ်ႉၸၢတ်ႈတႆး။


လွင်ႈၼႆႉဢမ်ႇမီးပၼ်ႁႃ။ ဢၼ်မီးပၼ်ႁႃၼႆႉ ယွၼ်ႉတၢင်ႇမူႇတၢင်ႇၸုမ်း တူၵ်ႇတၵ်ႉဝႃႈၶဝ်ၼႆႉ ပဵၼ်ၸုမ်းၽႂ်ၸုမ်းလႂ် ၶဝ်လုၵ်ႉလႂ်မႃးၼႆႉဢၼ်ၼိုင်ႈ။
ဢၼ်ၼိုင်ႈသမ်ႉ ယွၼ်ႉယုမ်ႇယမ်ၼိူဝ်လွၵ်းၸုၵ်းပႃႇတီႇႁူဝ်သိူဝ်သေ မႃးၵမ်ႈၼမ်လႄႈ ပေႃးဢမ်ႇၸႂ်ႈၸဝ်ႈၶုၼ်ထုၼ်းဢူး၊ လုင်းၸၢႆးၼုတ်းၶဝ်ႁပ်ႉပုၼ်ႈၽွၼ်း ၸွင်ႇၶဝ်တေသိုပ်ႇႁဵတ်းဢမ်ႇသိုပ်ႇႁဵတ်း။


ၽူႈတႅမ်ႈလိၵ်ႈၵပ်းသိုပ်ႇတူၺ်းလၢႆလၢႆၵေႃႉ ၵမ်ႈၽွင်ႈယင်းလၢတ်ႈဝႃႈ ၸုမ်းၽူႈၼမ်းၼႂ်း၊ ၸုမ်းၵၢၼ်လုမ်း၊ ၸုမ်းၽူႈၸၢင်ႈၸွႆႈၶိုင်သၢင်ႈ Technical Team သၢမ်ၸုမ်းၼႆႉ ၽူႈႁပ်ႉတၼ်းႁဵင်းႁူဝ်ပဝ်ႈ ၸုမ်းလႂ်ၽူႈလႂ်ႁပ်ႉၵေႃႈ ဢမ်ႇထုၵ်ႇလီလႅၵ်ႈလၢႆႈ။ Technical Team ၼႆႉ ယင်းဢမ်ႇထုၵ်ႇလီလိူၵ်ႈမူႇလိူၵ်ႈၸုမ်း လီဢဝ်ၽူႈမီးၼမ်ႉၵတ်ႉလူင်ႉလႅၼ်ႇ လူၺ်ႈႁူဝ်ၶေႃႈလႂ်ႁူဝ်ၶေႃႈၼၼ်ႉ ၶဝ်ႈမႃးထႅင်ႈလူးၵွၼ်ႇ ဝႃႈၼႆ။


ပၼ်ႁႃၵူႈလွင်ႈလွင်ႈ


ၼႂ်းၶၵ်ႉတွၼ်ႈပၼ်ႁႃၵူႈလွင်ႈလွင်ႈၼၼ်ႉ ပေႃးပဵၼ်မူႇပဵၼ်ၸုမ်း ပၼ်ႁႃတိုၼ်းမီးၼမ်။ ၼႆႉတႄႉၽူႈယႂ်ႇၵူၼ်းလူင်ၶဝ်ၸဝ်ႈႁူႉလိူဝ်ပိူၼ်ႈ။ ပၼ်ႁႃသင်ၵေႃႈယဝ်ႉ ဢိင်ၼိူဝ်ပၵ်းပိူင်မူႇၸုမ်း CSSU တမ်းဝႆႉတႅတ်ႈၼႅတ်ႈတႅတ်ႈတေႃး တွၼ်ႈတႃႇလုၵ်ႈၸုမ်း။


မိူၼ်ၼင်ႇပေႃးဢမ်ႇသႂ်ႇငိုၼ်းၵွင်ၵၢင် တေႁဵတ်းႁိုဝ်၊ ပေႃးသႅၼ်းၽူႈၼမ်း ပေႃးဢမ်ႇသူင်ႇတူဝ်တႅၼ်းၶဝ်ႈပၢင်ၵုမ်လူင်ႁူဝ်ႁုပ်ႈပီ တေႁဵတ်းႁိုဝ် ၸဵမ်ၸိူဝ်းၼႆႉ။
မူႇၸုမ်းသင်၊ မူႇၸုမ်းလႂ်ၵေႃႈယဝ်ႉ တၵ်းလႆႈမီးပၵ်းပိူင်ၵႅၼ်ႇၶႅင်ၼႅၼ်ႈၼႃ၊ ဢုပ်ႇဢူဝ်းတႅပ်းတတ်း ဢွၼ်ၵၼ်ႁဵတ်းၸွမ်းၵွၼ်ႇ ၸင်ႇတေပဵၼ်မူႇၸုမ်းၶိုပ်ႈၼႃႈၶိုၼ်ႈသင်ႉ။


ပိူဝ်ႈတႃႇၸိူဝ်ႉၸၢတ်ႈတႆး တေဢမ်ႇၼႃႈလဵၵ်ႉၼၼ်ႉ ႁႂ်ႈၸွႆႈၵၼ်ၵမ်ႉယၼ်ပၼ်ႁႅင်း CSSU ပဵၼ်မူႇၸုမ်း ဢၼ်မီးၼႃႈမီးတႃ တႃႇၸိူဝ်ႉၸၢတ်ႈတႆးသေၵမ်း။

ၶုၼ်သၢင်ႇမူး
ဝၼ်းတီႈ 3 မေႊ 2017