ၸဝ်ႈၼႃႈတီႈသိုၵ်းထႆး ၵွင်းၵမ်းလင်းၽႃမိူင်း ပႂ်ႉတၢင်းၵူၼ်းၵႃႉယႃႈ ပိုတ်းယိုဝ်းၵၼ်တင်းၵူၼ်းၵႃႉယႃႈ ၼိူဝ်သဵၼ်ႈတၢင်းလတ်းၵူၼ်းပႆ ႁိမ်းဝၢၼ်ႈၽႃမီ ၼႂ်းၸႄႈဝဵင်းမႄႈသၢႆ ၸႄႈတွၼ်ႈၵဵင်းႁႆး၊  ၵူၼ်းၵႃႉယႃႈလူႉတၢႆ 9 ၵေႃႉ၊ ထႆးယိုတ်းလႆႈယႃႈမႃႉ 7 သႅၼ်မဵတ်ႉ။

ပူၼ်ႉမႃးမိူဝ်ႈဝၼ်းတီႈ 13/05/2017 ၵၢင်ၶမ်ႈၶၢဝ်းယၢမ်း 8 မူင်းၶိုင်ႈၼၼ်ႉ ၸဝ်ႈၼႃႈတီႈသိုၵ်းထႆး ၵွင်းၵမ်းလင်းၽႃမိူင်း၊ လႆႈပဵၼ်ပၢင်တိုၵ်းယိုဝ်းၵၼ်တင်း ၸုမ်းၵူၼ်းၵႃႉယႃႈ ဢၼ်တေႃႉယႃႈလုၵ်ႉတၢင်း ၾင်ႇမိူင်းမၢၼ်ႈ/တႆး ၶဝ်ႈမႃးၼႂ်းလိၼ်မိူင်းထႆး  တီႈႁိမ်းဝၢၼ်ႈၽႃမီ ဢိူင်ႇဝဵင်းၽၢင်းၶမ်း ၼႂ်းၸႄႈဝဵင်းမႄႈသၢႆ ၸႄႈတွၼ်ႈၵဵင်းႁၢႆး။


ၵဵဝ်ႇၵပ်းလွင်ႈၼႆႉ ၾၢႆႇၸဝ်ႈၼႃႈတီႈထႆးလႆႈၶၢဝ်ႇသေ ၵႂႃႇပႂ်ႉတၢင်း။ ဢွင်ႈတီႈဢၼ်လႆႈယိုဝ်းၵၼ်ပွၵ်ႈၼႆႉ ပဵၼ်ၼႂ်းထိူၼ်ႇၵႄႈဝွင်ႇလွႆ ၊ ၼိူဝ်သဵၼ်ႈတၢင်းၵူၼ်းပႆ လတ်းၵႂႃႇမႃး ႁိမ်းဝၢၼ်ႈၽႃမီ၊ ယၢၼ်လႅၼ်လိၼ်ထႆး-တႆး မွၵ်ႈ 2 ၵီႊလူဝ်ႊ။ ၸုမ်းၵူၼ်းၵႃႉယႃႈၶဝ် မႃးၸွမ်းၵၼ်တင်းမူတ်းမွၵ်ႈ 15 ၵေႃႉ။ လႆႈယိုဝ်းၵၼ်ႁိုင်မွၵ်ႈ 10 မိၼိတ်ႊ။


ဝၢႆးသဵင်ၵွင်ႈယဵၼ်ယဝ်ႉ ဢိင်ၼိူဝ်ပဵၼ်ၵၢင်ၶိုၼ်းလပ်းသိင်ႇသေ ၾၢႆႇထႆးလႆႈလွမ်ႉဝႅတ်ႉဝႆႉ တေႃႇထိုင်မိူင်းလႅင်း ဝၼ်းတီႈ 14/05/2017 ၊ ၽိူဝ်ႇၵူတ်ႇထတ်းတူၺ်းပိုၼ်ႉတီႈယိုဝ်းၵၼ်ၼၼ်ႉ လႆႈႁၼ်တူဝ်တၢႆၵူၼ်းၵႃႉယႃႈ 9 ၵေႃႉ၊ ထူင်ပိူဝ်ႉသႂ်ႇယႃႈလၢႆပိူဝ်ႉ တင်းမူတ်းလႆႈယႃႈမႃႉ 700,000 မဵတ်ႉ- သိုဝ်ႇထႆး မႄႈသၢႆၼိဝ်ႊသ် ဢွၵ်ႇၶၢဝ်ႇၵႂႃႇၼင်ႇၼႆ။