ၸုမ်း World Record Association (WRA) မွပ်ႈပၼ်သူးရၢင်းဝလ်း တၢင်းၵႃႈတႆး ဢၼ်ၶိုၵ်ႉ ၶႅမ်ႉလႄႈ မီးၵူၼ်းၶဝ်ႈႁူမ်ႈၼမ်လိူဝ်ပိူၼ်ႈ ၼႂ်းလုမ်ႈၾႃႉ မိူဝ်ႈဝၼ်းတီႈ 14 လိူၼ်ဢေႊပရိူဝ်ႊ ပူၼ်ႉမႃး။

ၵဵဝ်ႇၵပ်းလွင်ႈၼႆႉ ၸၢႆးသိူဝ်ဢႅၼ် ၽူႈဢွၼ်ႁူဝ်တၢင်းၵႃႈပၼ်ႇၵွင် ၼႂ်းပၢင်ပွႆးသွၼ်းၼမ်ႉ ပွၵ်ႈၵမ်းၼႆႉ လၢတ်ႈဝႃႈ “ ၼႂ်းၸိုင်ႈမိူင်းၶႄႇတႄႉ မၵ်ႉမၼ်ႈဝႃႈ လွင်ႈၾိင်ႈႁိတ်ႈႁွႆး လွင်ႈပွႆးသွၼ်းၼမ်ႉၼႆႉ တိုၼ်း ပဵၼ်ၶွင်ၾိင်ႈထုင်းတႆးႁဝ်း၊ မိူၼ်ၼင်ႇ ႁူတ်းၼမ်ႉၵၼ်၊ သွၼ်းၼမ်ႉၽြႃး ၸႃႉၵႂႃႇၸိူဝ်းၼႆႉ။ သမ်ႉ ထႅင်ႈ လွင်ႈတၢင်းၵႃႈပၼ်ႇၵွင်ၼႆႉ ၼႂ်းလုမ်ႈၾႃႉ ပႆႇယၢမ်ႈမီးမႃးသေပွၵ်ႈ ႁႂ်ႈပေႃးၵႃႈလႆႈႁူဝ်ၵူၼ်း ၼပ်ႉမိုၼ်ႇမၼ်း။ ယွၼ်ႉၼၼ် တၢင်းၵႃႈႁၢင်ႈလီ ၵႃႈပၼ်ႇၵွင်ၵေႃႈလႆႈ ထုၵ်ႇႁပ်ႉလိူၵ်ႈလႆႈသူး/ ရၢင်းဝလ်းတီႈၼိုင်ႈ ၼႂ်းလုမ်ႈၾႃႉ” ဝႃႈၼႆယဝ်ႉ။

မၼ်းၸၢႆးသိုပ်ႇလၢတ်ႈ ထႅင်ႈဝႃႈ ၼင်ႇႁိုဝ် လုမ်ႈၾႃႉ ပေႃးတေလႆႈႁူႉၸၵ်း လွင်ႈပီႈၼွင်ႉတႆး ၼႂ်းမိူင်း လႃႊၸၼ်းတႃလႄႈ ပီႈၼွင်ႉတႆးၼႂ်းမိူင်းၶႄႇ လွင်ႈဝႃႈပီႈၼွင်ႉတႆးႁၵ်ႉသႃ ပႂ်ႉပႃး (ထိင်းသိမ်း) ၾိင်ႈႁိတ်ႈႁွႆးတႆးၼႆၼၼ်ႉ ယူႇတီႈၸုမ်းတူင်ႉ ၼိုင်တူင်ႇဝူင်းတႆး လႆႈသူၼ်းတုမ်လူင်းပိုၼ်ႉတီႈသေႃႇ သူၼ်း ထိုင်ၵူႈမူႇၵူႈဝၢၼ်ႈ ၼႂ်းမိူင်းလႃႊၸၼ်း တႃ ႁႂ်ႈဢွၼ်ၵၼ်ႁၢင်ႈႁႅၼ်းၾိုၵ်းၽွၼ်ႉ တၢင်းၵႃႈ ပၼ်ႇၵွင် ႁႂ်ႈမိူၼ်ၵၼ်ၵူႈဝၢၼ်ႈၵူႈဢိူင်ႇ ၵွၼ်ႇပႆႇ ထိုင်ၶၢဝ်းသွၼ်းၼမ်ႉ ဝႃႈၼႆ။

ၵဵဝ်ႇလူၺ်ႈတၢင်းၵႃႈ ႁၢင်ႈလီလႄႈ မီးၵူၼ်းၶဝ်ႈႁူမ်ႈၼမ်ၼႆႉ မိူဝ်ႈပီ 2012 လႄႈ 2013 ၵေႃႈလႆႈ သူးဢၼ်ၼႆႉမႃးယဝ်ႉ။ ၵူၺ်ႈၵႃႈ ပီၼႆႉတေလႆႈဝႃႈ ၵူၼ်းၶဝ်ႈႁူမ်ႈၵႃႈၼမ်လိူဝ်ပိူၼ်ႈ။

ၸုမ်း World Record Association (WRA) ၼႆႉ ၵေႃႇတင်ႈမႃး မိူဝ်ႈပီ 2010 ပဵၼ်ၸုမ်း ဢၼ်မၵ်းမၼ်ႈပၼ်သူးရၢင်းဝလ်းၸုမ်းႁိုဝ် ၽႂ်သေၵေႃႉၵေႃႉ ဢၼ်မီးလွင်ႈႁဵတ်းသၢင်ႈလႆႈလီ ၼႂ်းလုမ်ႈၾႃႉ ၼႆယဝ်ႉ။

ၸုမ်းၶၢဝ်ႇၽူႈတွႆႇႁွၵ်ႈ/ ၸၢႆးယွတ်ႈၶမ်း 17/04/2017