မုၵ်ႉၸုမ်းယိပ်းၵွင်ႈၵၢင်ႇၸၢဝ်းၶိူဝ်းၼႆႉ ၾၢႆႇၼိုင်ႈတေလႆႈတူၺ်းၵူၼ်းမိူင်း။ ထႅင်ႈၾၢႆႇၼိုင်ႈ တေလႆႈတူၺ်း ဢဵၼ်ႁႅင်းသိုၵ်းလႄႈ ၼမ်ႉၵတ်ႉၵူၼ်းသိုၵ်း၊ ဢၼ်ႁဝ်းတေႁူမ်ႈၵၼ် တေဢုပ်ႇဢူဝ်းၵၢၼ်မိူင်းၵၼ်ၸိူဝ်းၼႆႉ 

လမ်ႇလွင်ႈသုတ်းတေလႆႈတူၺ်းသၽႃႇဝ၊ ငဝ်းလၢႆးဝၢၼ်ႈမိူင်း လႅၵ်ႈလၢႆႈမႃးၸိူင်ႉႁိုဝ်ၵေႃႈ ႁႂ်ႈၸၢဝ်းၶိူဝ်း 

ႁၢင်ႈႁႅၼ်းတူဝ်ႈတၼ်း ႁပ်ႉမၼ်းလႆႈ- ၸဝ်ႈယွတ်ႈသိုၵ်းလၢတ်ႈ။

မိူဝ်ႈဝၼ်းတီႈ 8-9/04/2017 ၶၢဝ်းတၢင်းသွင်ဝၼ်းၼၼ်ႉ ၽူႈၼမ်းၸိၵ်းၸွမ်ၸၢဝ်းၶိူဝ်း ၸိူဝ်းယိပ်းၵွင်ႈၵၢင်ႇ လုၵ်ႉၽိုၼ်ႉ ၸိူဝ်းလူင်းလၢႆးမိုဝ်းၵိုတ်းယိုဝ်းတူဝ်ႈမိူင်း (NCA) လႄႈ ၸိူဝ်းပႆႇလႆႈလူင်းလၢႆးမိုဝ်း NCA ဢၼ်ပဵၼ်လုၵ်ႈၸုမ်း ၶွင်ႊသီႊၾႅတ်ႊၻရႄႊႁူမ်ႈတုမ်ၵူႈၸၢဝ်းၶိူဝ်း (UNFC) ႁူမ်ႈတင်းမူတ်း 15 ၸုမ်း ၸတ်းႁဵတ်း

ပၢင်ၵုမ်ၵၼ် တီႈၼႂ်းဝဵင်းၵဵင်းမႆႇ ၸိုင်ႈထႆး။

ႁူဝ်ပဝ်ႈၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) ၸွမ်သိုၵ်းလူင်ယွတ်ႈသိုၵ်း 

မွၵ်ႇလၢတ်ႈၵႂၢမ်း တီႈပၢင်ၵႅဝ်ႈပိုတ်ႇပၢင်ၵုမ်ဝႃႈ- "သူၸဝ်ႈႁဝ်းၶႃႈၸိူဝ်းၼႆႉ ပဵၼ်မုၵ်ႉၸုမ်းယိပ်းၵွင်ႈၵၢင်ႇလၢႆလၢႆ။ ပိူင်ၼိုင်ႈၼႆႉ ႁဝ်းၶႃႈတေလႆႈဝူၼ်ႉ တေလႆႈတူၺ်းတီႈၵူၼ်းမိူင်းႁဝ်း၊ ၵူၼ်းမိူင်းႁဝ်းၶႂ်ႈလႆႈဢီႈသင်၊ ၵူၼ်းမိူင်းႁဝ်း ယူႇၾၢႆႇလင်ႁဝ်းတႄႉယူႇႁႃႉ၊ ႁဝ်းၶႃႈတေလႆႈႁူႉ။ ထႅင်ႈပိူင်ၼိုင်ႈ ႁဝ်းၶႃႈတေလႆႈတူၺ်းဢဵၼ်ႁႅင်းသိုၵ်းႁဝ်း၊ ၼမ်ႉၵတ်ႉသိုၵ်းႁဝ်း၊ ဢဵၼ်ႁႅင်းသိုၵ်းႁဝ်းၼႆႉ ၸွင်ႇပႃႈႁၢင်ႈႁႅၼ်းတူဝ်ႈတၼ်း။ ဢၼ်ႁဝ်းၶႃႈတေႁဵတ်းတပ်ႉ 

ၾႅတ်ႊၻရႄႊဢၼ်ဝႃႈၼၼ်ႉ ႁဝ်းၶႃႈတူဝ်ႈတၼ်းၵၼ်ယဝ်ႉႁိုဝ်၊ လွင်ႈၼၼ်ႉၵေႃႈ ႁဝ်းၶႃႈတေလႆႈၼပ်ႉသွၼ်ႇ။ ဢမ်ႇၸႂ်ႈဝႃႈ ႁဝ်းၶႃႈတႅမ်ႈသေပိုၼ်ၽၢဝ်ႇ ဢဝ်ၸိုဝ်ႈမၼ်းလၢႆလၢႆၵူၺ်း။ လွင်ႈၼႆႉတပ်ႉမတေႃႇသမ်ႉ ႁပ်ႉလႆႈယူႇႁႃႉ၊ ၸွင်ႇၶဝ်တေႁပ်ႉလႆႈ"။

 

ၵၢၼ်မိူင်းဝၼ်းမိူဝ်ႈၼႆႉ ဢမ်ႇဝႃႈၼႂ်းမိူင်းႁူမ်ႈတုမ်မိူင်းမၢၼ်ႈ၊ ဢမ်ႇဝႃႈလုမ်ႈၾႃႉ မိူင်းႁိမ်းႁွမ်းႁဝ်းၶႃႈ 

ၶဝ်ပၼ်ႁႅင်းဢီႈသင်ဢၼ်ဝႃႈၼၼ်ႉၵေႃႈ ႁဝ်းၶႃႈတေလႆႈတူၺ်း။ ၵွပ်ႈၼၼ်လႄႈ ပိူဝ်ႈတႃႇႁဝ်းတေ

ၽွမ်ႉႁူမ်ႈၵၼ် ၵေႃႈလီ၊ ပိူဝ်ႈတႃႇဢုပ်ႇဢူဝ်းၵၢၼ်မိူင်းၵၼ်ၼၼ်ႉၵေႃႈလီ၊ ႁဝ်းၶႃႈလူဝ်ႇတူၺ်းၸွမ်းသၽႃႇဝ။ ပေႃးႁဝ်းၶတ်း သၽႃႇဝ မၼ်းတေဢမ်ႇၵႂႃႇလႆႈ။ ႁဝ်းၶႃႈတေယူႇႁူမ်ႈၵၼ်သေ ဢုပ်ႇဢူဝ်းၵၼ်ၵႂႃႇ

ၶၢဝ်းတၢင်းၼႃႈၼၼ်ႉ လမ်ႇလွင်ႈတီႈသုတ်းၼႆႉ တေလႆႈတူၺ်းသၽႃႇဝ၊ ပိုၼ်းဢၼ်ပဵၼ်မႃးလႄႈ 

ဢၼ်တေၵႂႃႇတၢင်းၼႃႈ။ ၶႃႈႁဝ်းႁၼ်ထိုင်ဝႃႈ NCA  လွင်ႈငမ်းယဵၼ်ဢၼ်ႁဝ်းႁဵတ်းယူႇၼႆႉ မၼ်းတေပႂ်ႉ

ႁဝ်းၶႃႈယူႇတႃႇသေႇၼၼ်ႉ တေဢမ်ႇပဵၼ်လႆႈ။ ၵၢၼ်လႅၵ်ႈလၢႆႈၼၼ်ႉ လႅၵ်ႈလၢႆႈမႃးၸိူင်ႉႁိုဝ်ၵေႃႈယဝ်ႉ 

ႁႂ်ႈႁဝ်းၶႃႈလႆႈႁၢင်ႈႁႅၼ်းတူဝ်ႈတၼ်း ႁပ်ႉမၼ်းလႆႈ- ၸဝ်ႈယွတ်ႈသိုၵ်း မွၵ်ႇလၢတ်ႈၵႂႃႇၼင်ႇၼႆ။

ပၢင်ၵုမ်ၼႂ်းၶၢဝ်းတၢင်း 2 ဝၼ်းၼၼ်ႉ ဢုပ်ႇဢူဝ်းၵၼ် ႁႃတႅပ်းတတ်းလွင်ႈၽိုၼ်လိၵ်ႈလၢႆး ဢၼ်တႅမ်ႈဝႆႉမိူဝ်ႈ 

ပၢင်ၵုမ်လူင်မၢႆႇၵျႃႇယၢၼ်ႇ၊ လွင်ႈပပ်ႉၵူႈမိုဝ်း ၵဵဝ်ႇၵပ်းလွင်ႈလိၵ်ႈႁူမ်ႈမၢႆပၢင်လူင်၊ ၼမ်ႉၸႂ်ပၢင်လူင်၊ တီႈပွင်ႇ

ၵႂၢမ်းမၢႆ လိၵ်ႈႁူမ်ႈမၢႆပၢင်လူင်၊ လွင်ႈပိုၼ်ႉထၢၼ်ၵၢၼ်ၵေႃႇတင်ႈမိူင်းႁူမ်ႈတုမ် ၾႅတ်ႊၻရႄႊ 

ၻီႊမူဝ်ႊၶရေႊၸီႊ (လၵ်းၵၢၼ်ၸိုင်ႈမိူင်းႁူမ်ႈတုမ်)၊ ပိုၼ်ႉထၢၼ်လွင်ႈႁူမ်ႇလူမ်ႈၸိူဝ်ႉၸၢတ်ႈ၊ 

ထတ်းသၢင်ၶိုၼ်းယူင်ႉၶၢပ်ႈၵၢၼ်မိူင်း၊ ထတ်းသၢင်ၶိုၼ်းလွင်ႈၵၢၼ်ပႂ်ႉတူၺ်းလွင်ႈငမ်းယဵၼ်၊ ပၢင်ၵုမ်လူင်ႁူဝ်ပၢၵ်ႇပီ 21 ပၢင်လူင် (ပွၵ်ႈၵမ်း 2) ဢၼ်တေၸတ်းႁဵတ်းၶၢဝ်းတၢင်းၼႃႈ ၸိူဝ်းၼႆႉ။

ပၢင်ၵုမ်လူင်ၽူႈၼမ်းၸိၵ်းၸွမ် ၸုမ်းယိပ်းၵွင်ႈၵၢင်ႇၸၢဝ်းၶိူဝ်းလုၵ်ႉၽိုၼ်ႉၼႆႉ ၵႃႈပူၼ်ႉမႃး ယၢမ်ႈၸတ်းႁဵတ်းတီႈ မၢႆႇၵျႃႇယၢၼ်ႇ ၸႄႈမိူင်းၶၢင်၊ ၼႃႈလိၼ်ၵုမ်းၵမ်တပ်ႉသိုၵ်းၶၢင် (KIA) ၼႂ်းပီ 2016 ပွၵ်ႈၼိုင်ႈလႄႈ တီႈလေႃႇၶီးလႃႇ ၸႄႈမိူင်းယၢင်းၽိူၵ်ႇ၊ ၼႂ်းၼႃႈလိၼ်ၵုမ်းၵမ် ႁူမ်ႈတုမ်ၸိူဝ်ႉၸၢတ်ႈယၢင်းၽိူၵ်ႇ (KNU) ၼႂ်းပီ 2015 ပွၵ်ႈၼိုင်ႈ။

ၸုမ်းၶၢဝ်ႇၽူႈတွႆႇႁွၵ်ႈ (10/04/2017)