ၵူၼ်းၼုမ်ႇဝဵင်းၵျွၵ်ႉမႄး 300 ပၢႆ ၶဝ်ႈႁူမ်ႈပၢင်သွၼ်ၽိူမ်ႉထႅမ်ၼမ်ႉၵတ်ႉ မေႃသွၼ် တီႈၸႄႈ ဝဵင်းၵျွၵ်ႉမႄး

Monday, April 10, 2017 Posted by Pawnli

ပၢင်ၾိုၵ်းၽွၼ်ႉ လၢႆးပူင်သွၼ်လိၵ်ႈလၢႆးတႆး ၸႄႈဝဵင်းၵျွၵ်ႉမႄး တႃႇၽိူမ်ႉထႅမ်ၼမ်ႉၵတ်ႉ မေႃသွၼ် တီႈဝတ်ႉၸေႃးတိၵႃႇရုင်ႇ ၸႄႈဝဵင်းၵျွၵ်ႉမႄး တင်းမူတ်း ၽူႈၶဝ်ႈႁူမ်ႈလဵပ်ႈႁဵၼ်း 348 ၵေႃႉ။

ပၢင်သွၼ်ၼႆႉ ၸတ်းႁဵတ်းတင်ႈတႄႇ ဝၼ်းတီႈ 29 လိူၼ်မၢတ်ႊၶျ်တေႃႇထိုင် ဝၼ်းတီႈ 11 လိူၼ် ဢေႊပရိူဝ်ႊ 2017 ၽူႈဢွၼ်ႁူဝ်ၼမ်းၼႃႈ ၸတ်းႁဵတ်းပဵၼ် သင်ၶၸဝ်ႈလႄႈ ၵေႃလိၵ်ႈလၢႆး ၾိင်ႈငႄႈတႆး ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ၼႆယဝ်ႉ။

ၸၢႆးလႃႉၽေႇ ၾၢႆႇတိတ်းတေႃႇ ပၢင်ၾိုၵ်းၾွၼ်ႉလၢႆးပူင်သွၼ်လိၵ်ႈလၢႆးတႆး လၢတ်ႈဝႃႈ “ ပၢင်ၾိုၵ်း ၽွၼ်ႉၼႆႉ လႆႈၸတ်းႁဵတ်းမႃး ပဵၼ်ပွၵ်ႈၵမ်းတီႈ 13 ယဝ်ႉ၊ ႁဝ်းၶႃႈၸတ်းႁဵတ်းမႃးၵူႈပီ၊ ယိူင်းဢၢၼ်း ၾိုၵ်းၽွၼ်ႉပၼ်တႃႇၵိူတ်ႇဢွၵ်ႇမႃးမေႃသွၼ်လိၵ်ႈလၢႆးတႆးႁဝ်းၶႃႈထႅင်ႈ။ ယဝ်ႉၵေႃႈ သင်မေႃသွၼ် ၸိူဝ်းမႃးၶိုၼ်ႈပၢင်ၾိုၵ်းၽွၼ်ႉယဝ်ႉၵႂႃႇၸိုင် ႁႂ်ႈမေႃသွၼ်ၶဝ် မိူဝ်းလူင်းပိုၼ်ႉတီႈ တီႈယူႇၽႂ်တီႈယူႇ မၼ်းသေ ၶိုၼ်းပူင်သွၼ်ပၼ်လုၵ်ႈဢွၼ်ႇၼႂ်းဝၢၼ်ႈၽႂ်မၼ်းၶိုၼ်း ဝႃႈၼႆ။

ပၢင်ၾိုၵ်းၽွၼ်ႉ လၢႆးပူင်သွၼ်လိၵ်ႈလၢႆးတႆး ပွၵ်ႈၵမ်းၼႆႉ မေႃသွၼ်လူင် လုင်းၸၢႆးၾႃႈၵေႃႈ ဢွၼ်ႁူဝ် ၼမ်းၼႃႈသေ ပူင်သွၼ်ၾိုၵ်းၽွၼ်ႉပၼ်ၵႂႃႇ ဝႃႈၼႆ။

ၵူၼ်းၼုမ်ႇဢၼ်ၶဝ်ႈႁူမ်ႈလဵပ်ႈႁဵၼ်းပွၵ်ႈၵမ်းၼႆႉ လုၵ်ႉမႃးတီႈ ၸႄႈဝဵင်းၵျွၵ်ႉမႄး၊ ၸႄႈဝဵင်းမိူင်းမိတ်ႈ၊ ၸႄႈဝဵင်းသီႇပေႃႉ၊ ၸႄႈဝဵင်းသႅၼ်ဝီလႄႈ ၸႄႈဝဵင်းမိူင်းၸီး ၸဵမ်ၸိူဝ်းၼႆႉ။