ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး CSSU ဢွၵ်ႇလိၵ်ႈပိုၼ်ၽၢဝ်ႇ မၢႆတွင်း ဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈၶူပ်ႇတဵမ် 70 ပီ သူင်ႇယိုၼ်ႈထိုင် ပတ်းပိုၼ်ႉၸိုင်ႈတႆး ။

ၸၢႆးလဵၵ်ႉ ၽူႈၶၢၼ်ပၢၵ်ႇ CSSU လၢတ်ႈဝႃႈ “ ဝၼ်းတီႈ 7 လိူၼ်ၾႅပ်ႇၿိဝ်ႊရီႊၼႆႉ ပဵၼ်ဝၼ်းဢၼ် ၸဝ်ႈၾႃႉတႆးလႄႈ ၵူၼ်းမိူင်းတႆး ႁူမ်ႈလႆႈၸႂ်ၵၼ် တႃႇႁွမ်းမိုဝ်းပွင်သၢင်ႈၼႃႈၵၢၼ်ဝၢၼ်ႈမိူင်းတႆး။ ဝၼ်းၸိူဝ်ႉၸၢတ်ႈၸိုင်ႈတႆး ပဵၼ်ဝၼ်း ဢၼ်လမ်ႇလွင်ႈ တွၼ်ႈတႃႇ ၵူၼ်းၶိူဝ်းတႆး တင်းမူတ်း တင်းသဵင်ႈတႄႉတႄႉ။ တႄႇဢဝ် လွတ်ႈလႅဝ်းၵွၼ်းၶေႃမႃး မိူဝ်ႈပီ 1947 ထိုင်ယၢမ်းလဵဝ် ၶွပ်ႈၶူပ်ႇတဵမ်မႃး 70 ပီ။ သုၼ်ႇၸတ်းသၢင်ႈႁၢင်ႈပွင်တူဝ်ၵဝ်ႇ သုၼ်ႇၸၼ်ႉထၢၼ်ႈၽဵင်ႇပဵင်းၵၼ် ယင်းပႆႇမီးသင်။ တိုၵ်ႉလႆႈမုင်ႈမွင်းၼွၼ်းၾၼ်ယူႇ” ဝႃႈၼႆ ။


ၽိုၼ်လိၵ်ႈယိုၼ်ႈထိုင်- CSSU ၼၼ်ႉ သူင်ႇထိုင်ၸူးၵူႈဝဵင်းၼႂ်းမိူင်းတႆး မၢႆတွင်းဝၼ်းၸိူဝ်ႉၸၢတ်ႈ ၸိုင်ႈတႆး ၶွပ်ႈၶူပ်ႇတဵမ် 70 ပီ။ ဝဵင်းဢၼ်ၸတ်းႁဵတ်းဝၼ်းၸိူဝ်ႉၸၢတ်ႈၸိုင်ႈတႆးၼၼ်ႉ လႆႈဢဝ် ၽိုၼ်လိၵ်ႈ - CSSU လူဢၢၼ်ႇၼႂ်းပၢင်ၵႅဝ်ႈၵႂႃႇ ဝႃႈၼႆ ။


ၼႂ်းၽိုၼ်လိၵ်ႈၼၼ်ႉပႃးဝႆႉဝႃႈ ထိုင်မႃးဝၼ်းမိူဝ်ႈၼႆႉ လွင်ႈၽွမ်ႉႁူမ်ႈၸိူဝ်ႉၸၢတ်ႈ/ လွင်ႈႁူမ်ႈမိုဝ်းၵၼ် ယင်းပႆႇလႆႈႁၼ်။ တေႃႈလဵဝ် CSSU လႆႈႁူမ်ႈမိုဝ်းသေ ႁဵတ်းသၢင်ႈၼႄၼမ်ႉၼႄတူဝ်ယဝ်ႉၼႆလႄႈ ယူႇတီႈၵူၼ်းမိူင်းၵမ်ႉပႃႈၼမ်တႄႉ ႁၼ်ထိုင်ဝႃႈ လွင်ႈၽွမ်ႉႁူမ်ႈၼႆႉ ႁၼ်ၼမ်ႉႁၼ်တူဝ်မႃး။ ၵွပ်ႈ ၼၼ် ႁႂ်ႈပေႃးၵေႃႇသၢင်ႈလႆႈ မိူင်းႁူမ်ႈတုမ်ၾႅတ်ႊတရႄႊၼၼ်ႉ တၵ်းလႆႈႁူမ်ႈမိုဝ်းၵၼ် ၶွတ်ႇၽွတ်ႈ ပဵၼ်ဢဵၼ်ပဵၼ်ႁႅင်းၼႆသေ ၸင်ႇလႆႈသူင်ႇၽိုၼ်လိၵ်ႈၸူး ၼႂ်းဝၼ်းၸိူဝ်ႉၸၢတ်ႈ ၸိုင်ႈတႆး ၶွပ်ႈၶူပ်ႇ တဵမ် 70 ပီ ဝႃႈၼႆ။