ဢိင်ၼိူဝ် ႁူင်းၸၢၵ်ႈသိုဝ်ႉၶၢႆလဵၵ်းမုင်းၵူႈၸိူဝ်းၸိူဝ်း “ငမ်းယဵၼ်” ဢၼ်ၸဝ်ႈၶွင်ပဵၼ် တပ်ႉသိုၵ်းၵူၼ်းမိူင်း သႅင်ၵႅဝ်ႉ၊ ပိုတ်ႇတီႈဝၢၼ်ႈမေႃႇၵျူဝ်ႇ ၸႄႈဝဵင်းသီႇပေႃႉသေ တိုၵ်းသူၼ်းထိုင်ၵူႈမူႇၵူႈၸုမ်းလႄႈ ပီႈၼွင်ႉၵူၼ်းမိူင်းပၼ်ႁႅင်း၊ ပိူဝ်ႈတႃႇၶိုၼ်းၵမ်ႉထႅမ်မူႇၸုမ်းလႄႈ ပူၵ်းပွင်ပိုၼ်ႉတီႈၶိုၼ်ႈယႂ်ႇ ။

ၵဵဝ်ႇၵပ်းလွင်ႈၼႆႉ ၸဝ်ႈၸူမ်းၶိူဝ်း လၢတ်ႈဝႃႈ- ႁူင်းၸၢၵ်ႈသိုဝ်ႉၶၢႆလဵၵ်းမုင်းၵူႈၸိူဝ်းၸိူဝ်း “ငမ်းယဵၼ်”ၼႆႉ ႁဵတ်းဢွၵ်ႇဝႆႉသွတ်ႈ မီးဝႆႉ 3 ပိူင် 3 ယၢင်ႇ- 1.လွၵ်းႁၢင်ႈသီႇၸဵင်ႇ။ 2.လွၵ်းႁၢင်ႈပွင်ႈမႆႉ ႁၢင်ႈလၢႆးမိုဝ်း ၵျပၼ်ႊ။ 3.လွၵ်းႁၢင်ႈၵဵတ်းမႃ။ လိူဝ်သေၼၼ်ႉ လဵၵ်းတွၵ်ႇမၼ်းၸိူဝ်းၼႆႉၵေႃႈမီး။ ႁဝ်းၶႃႈယိူင်းဢၢၼ်းဝႆႉဝႃႈ မိူဝ်းၼႃႈမႃး ႁဝ်းၶႃႈမီးယိူင်းဢၢၼ်းပိုတ်ႇၶၢႆပႃးၶူဝ်းၶွင် တႃႇၵေႃႇသၢင်ႈႁဵတ်းႁိူၼ်း မိူၼ်ၼင်ႇၶိူင်ႈၸႂ်ႉတိုဝ်း ၶူဝ်းၶွင်ၵေႃႇသၢင်ႈတင်းသဵင်ႈ ၸဵမ်လဵၵ်းၸဵမ်ယၢင် ပုၼ်-ၸိူဝ်းၼႆႉ ။


မၼ်းၸဝ်ႈသိုပ်ႇလၢတ်ႈဝႃႈ- ယိူင်းဢၢၼ်း ဢၼ်ႁဝ်းၶႃႈလႆႈႁဵတ်းသၢင်ႈမႃး ႁူင်းၸၢၵ်ႈသိုဝ်ႉၶၢႆလဵၵ်းမုင်း ၵူႈၸိူဝ်းၸိူဝ်း သွတ်ႈၵူႈၸိူဝ်းၸိူဝ်းၼႆႉ ႁႂ်ႈလႆႈပဵၼ်ပုၼ်ႈတႃႇ ၵမ်ႉၸွႆႈပၼ်လွင်ႈၵိၼ်ယႅမ်ႉ လွင်ႈၼုင်ႈဝႆ ၽူႈမီးၸၼ်ႉလႄႈ လုၵ်ႈတပ်ႉႁဝ်းၶႃႈ ၸိူဝ်းႁၢပ်ႇၵၢၼ်ပုၼ်ႈၽွၼ်းၸိူဝ်ႉၸၢတ်ႈလႄႈ ပုၼ်ႈတႃႇ တေႁဵတ်းၵၢၼ်ပူၵ်းပွင် တွၼ်ႈလိၼ်ၶိုၼ်ႈယႂ်ႇပၼ် ပေႃႈမႄႈၵူၼ်းမိူင်းႁဝ်း။ တွပ်ႇတႅၼ်းပၼ်ၵုၼ်းမုၼ်ပေႃႈမႄႈ ၵူၼ်းမိူင်းႁဝ်းၶႃႈ ၸိူဝ်းဢၼ်ယူႇသဝ်း ၸွမ်းၼွၵ်ႈၼႃးပၢင်ႇသေ ၺႃးတၢမ်ႇသိုၵ်းသိူဝ် ၼႂ်းမိူင်းႁဝ်း မႃးပီယၢဝ်းၶၢဝ်းႁိုင်ၸိူဝ်းၼၼ်ႉ ။


ၶႂ်ႈတိုၵ်းသူၼ်းထိုင်ၵူႈမူႇၵူႈၸုမ်း၊ ၸိူဝ်းပဵၼ်ၽူႈႁၢပ်ႇၵၢၼ်ၸိူဝ်ႉၸၢတ်ႈႁဝ်းၶႃႈလႄႈ ပေႃႈမႄႈၵူၼ်းမိူင်း ႁဝ်းၶႃႈ ၶႅၼ်းတေႃႈဢွၼ်ၵၼ်မႃးပၼ်ဢဵၼ်ပၼ်ႁႅင်း တီႈႁူင်းၸၢၵ်ႈဢိတ်ႇဢွၵ်ႇလဵၵ်းမုင်း ငမ်းယဵၼ်ၼႆႉ သေၵမ်း။ ၸွမ်းၼင်ႇလႆႈပိုၼ်ၽၢဝ်ႇဝႃႈ တေႁဵတ်းပၼ်ၼမ်ႉတွၼ်းၽွၼ်းလီ ပိူဝ်ႈတႃႇၸိူဝ်ႉၸၢတ်ႈဝၢၼ်ႈမိူင်း ပိူဝ်ႈတႃႇပေႃႈမႄႈၵူၼ်းမိူင်းၼၼ်ႉ သင်ဝႃႈပေႃႈမႄႈၵူၼ်းမိူင်းႁဝ်းၶႃႈ ပၼ်ဢဵၼ်ပၼ်ႁႅင်း သိုဝ်ႉၸႂ်ႉတိုဝ်း သွတ်ႈႁဝ်းၶႃႈ ဢၼ်ႁဵတ်းဢွၵ်ႇတီႈႁူင်းၵၢၼ် “ငမ်းယဵၼ်” ႁဝ်းၶႃႈၼႆႉ ပေႃးဝႃႈလႆႈမႃးၼမ်ႉတွၼ်းမၼ်းမႃး 1.တေဢဝ်ႁဵတ်းပဵၼ်လွင်ႈလဵင်ႉလူ လွင်ႈၼုင်ႈမႆ လုၵ်ႈတပ်ႉၸိူဝ်းႁၢပ်ႇၵၢၼ်ၼႂ်းမူႇၸုမ်း။ 2.တေၵမ်ႉၸွႆႈပူၵ်းပွင် တွၼ်ႈလိၼ်ၶိုၼ်ႈယႂ်ႇ။ ၸွမ်းၼင်ႇဢၼ်ပေႃႈမႄႈၵူၼ်းမိူင်း တုၵ်းယွၼ်းမႃးၼၼ်ႉ ပွင်ပဵၼ်လႆႈၸိူင်ႉႁိုဝ် လၢႆးလႂ်ၵေႃႈ တေၵမ်ႉၸွႆႈပၼ်ၵႂႃႇၸွမ်းၼင်ႇသၢင်ႇထုၵ်ႇၵိုင်ႇလီၸွႆႈ- ၸဝ်ႈၸူမ်းၶိူဝ်း လၢတ်ႈ ။


လိူဝ်သေၼၼ်ႉ ၵဵဝ်ႇၵပ်းလူၺ်ႈၶူဝ်းၶွင် ဢၼ်ႁဵတ်းဢွၵ်ႇမႃးတီႈႁူင်းၵၢၼ်ႁဝ်းၶႃႈၼႆႉ သင်ဝႃႈမၼ်းမီးတီႈ ယူပ်ႈယွမ်းၵႂႃႇၼႆ မုင်ႈႁၼ်ၸိူင်ႉႁိုဝ်ၵေႃႈယဝ်ႉ ၼင်ႇႁိုဝ်တေပဵၼ် လွင်ႈၶိုၼ်ႈယႂ်ႇမႂ်ႇသုင်ႁဝ်းၶႃႈၵႂႃႇ ဝၼ်းလိုၼ်းမိူဝ်းၼႃႈၼၼ်ႉ ၵၢၼ်ႁဝ်းၶႃႈၵေႃႈပဵၼ်ၵၢၼ်ၸိူဝ်ႉၸၢတ်ႈ၊ ၵၢၼ်ၸိူဝ်ႉၸၢတ်ႈၵေႃႈပဵၼ်ၵၢၼ်ႁဝ်းၶႃႈ။ ၵွပ်ႈၼႆ ၶႂ်ႈပၼ်ႁႅင်းဢီးၸီႉၸမ်ႈမႃးတီႈ ႁူင်းၵၢၼ်ဢိတ်ႇဢွၵ်ႇလဵၵ်းမုင်းၵူႈၸိူဝ်းၸိူဝ်း ငမ်းယဵၼ် ႁဝ်းၶႃႈၼႆႉယူႇ- ၸဝ်ႈၸူမ်းၶိူဝ်း သင်ႇလၢတ်ႈၼင်ႇၼႆ ။


မိူဝ်ႈဝၼ်းဢႃးတိတ်ႉတီႈ 06/11/2016 ယူႇတီႈတပ်ႉသိုၵ်းၵူၼ်းမိူင်း သႅင်ၵႅဝ်ႉသေ လႆႈၸတ်းႁဵတ်းပၢင်ပွႆး ပိုတ်ႇ ႁူင်းၸၢၵ်ႈသိုဝ်ႉၶၢႆလဵၵ်းမုင်း “ငမ်းယဵၼ်” တီႈႁူင်းၸၢၵ်ႈငမ်းယဵၼ် ဝၢၼ်ႈမေႃႇၵျူဝ်ႇ ဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ၊ ဢၼ်ယူႇၼိူဝ်သဵၼ်ႈတၢင်းဝဵင်းလိူဝ်ႇ-လႃႈသဵဝ်ႈ ။ ႁူင်းၸၢၵ်ႈဢိတ်ႇ သွတ်ႈ ၵူႈၸိူဝ်းၸိူဝ်းၼႆႉ မိူဝ်ႈဢွၼ်တၢင်းပဵၼ်ႁူင်းၸၢၵ်ႈၵိူဝ်ဝၢၼ် ၶွင်ပႃႇတီႇမႂ်ႇသုင်ၸိုင်ႈတႆး (SSPP) -ၼႆယဝ်ႉ ။