ႁႂ်ႈလိုမ်းပႅတ်ႈလိူင်ႈၵဝ်ႇ၊ ႁႂ်ႈၶႅင်ႇၵၼ်ပူၵ်းပွင်ႈလွင်ႈၶိုၼ်ႈယႂ်ႇၵႂႃႇ ၸွမ်းၼင်ႇဢွင်ႇသၢၼ်းၸုၵျီႇလၢတ်ႈၼၼ်ႉ ၽူႈၵွၼ်းလုမ်း PI ၸဝ်ႈၶိုၼ်းသႂ်၊ ဢၼ်ႁဵတ်းၵၢၼ်ၵမ်ႉထႅမ်လွင်ႈငမ်းယဵၼ် ၼႂ်းမိူင်း လၢတ်ႈဝႃႈ- မၼ်းလိုမ်းဢမ်ႇလႆႈ၊ ၵူၺ်းၵႃႈ ပွႆႇဝၢင်းၶႂၢင်းပၼ်ၵၼ်လႆႈ။ ပေႃးလိုမ်းၵေႃႈ တေၶိုၼ်းႁဵတ်းၽိတ်းထႅင်ႈ ၵမ်းၼိုင်ႈၵူၺ်း။ လွင်ႈၼႆႉ ၸုမ်းၶၢဝ်ႇၽူႈတွႆႇႁွၵ်ႈ တွင်ႈထၢမ်ဝႆႉၼင်ႇၼႆ ။

(တွၼ်ႈ 6 ၊ သိုပ်ႇမႃးတွၼ်ႈ 5)


ထၢမ်-ၼၢင်းဢွင်ႇသၢၼ်းၸုၵျီႇၵေႃႈ တူၵ်ႇလၢတ်ႈဝႃႈ- ႁဝ်းထုၵ်ႇလႆႈလိုမ်းပႅတ်ႈလိူင်ႈၵဝ်ႇ၊ ႁဝ်းတေလႆႈၶႅင်ႇၵၼ်ဝႃႈ ၽႂ်တေပူၵ်းပွင်ၵႂႃႇတၢင်းၼႃႈလီလိူဝ်ၽႂ်။ ပေႃးတူၺ်းငဝ်းလၢႆးဢၼ်ၼႆႉ တၢင်းၼႃႈၼႆႉ ၸွင်ႇတေလႅပ်ႈၵႂႃႇၸွမ်းၵၼ်လႆႈငၢႆႈယူႇၶႃႈႁႃႉ? ။


တွပ်ႇ-ၶေႃႈၵႂၢမ်းမၼ်းၼၢင်းဝႃႈ ႁႂ်ႈလိုမ်းပႅတ်ႈလိူင်ႈၵဝ်ႇၼႆတႄႉ ဝႃႈဢမ်ႇဝႃႈႁဝ်းၵေႃႈဢမ်ႇတွင်း။ ၵူၺ်းၵႃႈ သင်ၸိူဝ်ႉလၢတ်ႈဝႃႈႁႂ်ႈလိုမ်းပႅတ်ႈၼႆ ဢၼ်လိုမ်းၼႆႉမၼ်းႁဵတ်းဢမ်ႇလႆႈ။ ၵူၺ်းၵႃႈ ပွႆႇဝၢင်းၶႂၢင်ႉပၼ်ၼႆႉ မၼ်းႁဵတ်းလႆႈ။ လိုမ်းဢၼ်ဝႃႈၼႆႉ မၼ်းဢမ်ႇလီလူင်လိုမ်း၊ ပေႃးဝႃႈမေႃလူမ်လိုမ်းၼႆ ဝၢႆးၼႆႉမႃးတေႁဵတ်း ၶိုၼ်းထႅင်ႈၵူၺ်း၊ ၵူၺ်းၵႃႈ ပိူင်လူင်မၼ်း လူဝ်ႇမေႃပွႆႇဝၢင်းပၼ်ၵၼ်ၵူၺ်း။ ပေႃႈဝႃႈဢမ်ႇမီးတၢင်းလူင်လိုမ်း သမ်ႉမေႃပွႆႇဝၢင်းၶႂၢင်ႉပၼ်ၵၼ်ၼႆ လွင်ႈငမ်းယဵၼ်ၵေႃႈတေလႆႈယူႇ။ ပေႃးဝႃႈလူင်လိုမ်းယူႇၼႆတႄႉ ႁဵတ်းႁိုဝ်ၵေႃႈ တေလႆႈႁဵတ်းၽိတ်းထႅင်ႈၵမ်းၼိုင်ႈၵူၺ်း၊ ပေႃးၸိူင်ႉၼၼ် တေသုၵ်ႉထႅင်ႈၵမ်းၼိုင်ႈ ။


ယွၼ်ႉပိူဝ်ႈၼၼ်လႄႈ ႁဝ်းၶႂ်ႈလၢတ်ႈၼႆႉ ၼႂ်းပပ်ႉၵဵဝ်ႇၵပ်းလူၺ်ႈလွင်ႈ ၸၢတ်ႈၵွၼ်ႇၸဝ်ႈပုတ်ႉထၼႆႉလၢတ်ႈဝႃႈ ၵူၼ်းၼႆႉ မေႃပွႆႇဝၢင်းၶႂၢင်းၽႃႈပၼ် ၵေႃႉဢၼ်ႁဵတ်းႁၢႆႉတေႃႇမၼ်း။ ၵူၺ်းၵႃႈ ဢမ်ႇမေႃပွႆႇဝၢင်းၶႂၢင်းၽႃႈပၼ် ၵေႃႉဢၼ်မၼ်းႁဵတ်းႁၢႆႉတေႃႇ။ ပေႃးႁဝ်းတူၺ်းၼႂ်းမိူင်းႁဝ်း ဢၼ်ပဵၼ်ယူႇၼႆႉၵေႃႈ လႆႈႁၼ်ပဵၼ်ၸိူင်ႉၼႆ ။


ပီႈၼွင်ႉတႆးၼႆႉ မၢၼ်ႈမႃးပေႉၵိၼ်ၼႆၵေႃႈ ၶဝ်ၸၢင်ႈမေႃပွႆႇဝၢင်းၶႂၢင်းၽႃႈပၼ်ယူႇ၊ ၵူၺ်းၵႃႈ သိုၵ်းမၢၼ်ႈ ၸိူဝ်းဢၼ်မႃးပေႉၵိၼ်ႁဝ်းယူႇၼႆႉတႄႉ ၶဝ်တိုၼ်းဝႃႈ ဢမ်ႇမေႃပွႆႇဝၢင်းၶႂၢင်းၽႃႈပၼ်ႁဝ်းသေဢိတ်း၊ လႅပ်ႈပဵၼ်ယူႇၸိူင်ႉၼႆ ။


မိူၼ်ၼင်ႇၽူႈမီးပၺ်ၺႃၶဝ်ဝႃႈဝႆႉ- လွင်ႈဝႃႈၶႃႈႁႅမ်ၵူၼ်းတၢႆၼႆႉ မၼ်းၽိတ်းသိလ်ၽိတ်းထမ်း၊ မၼ်းဢမ်ႇၸႂ်ႈ လွင်ႈၽိတ်းသိလ်ၽိတ်းထမ်း ပိူင်လဵဝ်ၵူၺ်း။ ဢၼ်ႁၢဝ်ႈႁႅင်းလိူဝ်သေၼၼ်ႉ ပေႃးဝႃႈလႆႈၶႃႈႁႅမ်ၵူၼ်းတၢႆပွၵ်ႈ ၼိုင်ႈယဝ်ႉ မၼ်းတိုၼ်းတေလႆႈၶႃႈႁႅမ်ၵႂႃႇထႅင်ႈတိၵ်းတိၵ်း ၼၼ်ႉယဝ်ႉ။ မိူၼ်ၼင်ႇ ပေႃးၶႃႈႁႅမ်ၵေႃႉၼႆႉယဝ်ႉ ယွၼ်ႉပိူဝ်ႈၵေႃႉၼႆႉတၢႆၵႂႃႇယဝ်ႉလႄႈ ၵေႃႉၼၼ်ႉၵေႃႈဢမ်ႇပေႃးၸႂ်ယဝ်ႉ၊ လူဝ်ႇလႆႈၶႃႈႁႅမ်မၼ်းထႅင်ႈ၊  မၼ်းပဵၼ်ယူႇၸိူင်ႉၼႆတိၵ်းတိၵ်း ။


ၼင်ႇႁိုဝ်မၼ်းပေႃးတေၵိုတ်းလႆႈၼႆႉ မၼ်းမီးတီႈႁဝ်းႁဵတ်းလွင်ႈငမ်းယဵၼ်၊ ႁဵတ်းလွင်ႈဢုပ်ႇဢူဝ်းၵၼ်။ ပေႃးႁဝ်းႁဵတ်းလႆႈလွင်ႈၸိူဝ်းၼႆႉ မၼ်းတေၵိုတ်းၵႂႃႇ၊ ပေႃးႁဝ်းဢမ်ႇႁဵတ်းလႆႈ ႁဝ်းၵေႃႈတေသိုပ်ႇၶႃႈႁႅမ်ၵၼ် ၵႂႃႇတိၵ်းတိၵ်းတေႃႇၵမ်ႇၽႃႇ (လုမ်ႈၾႃႉ) ပေႃးသုတ်းသဵင်ႈယဝ်ႉ ႁဝ်းၶႂ်ႈလၢတ်ႈၸိူင်ႉၼႆ ။


(ၶႅၼ်းတေႃႈပႂ်ႉသိုပ်ႇဢၢၼ်ႇ တွၼ်ႈ 7)