ပႃႇတီႇႁူဝ်သိူဝ် ၸတ်းႁဵတ်းပၢင်ၵုမ်ဢုပ်ႇဢူဝ်း တီႈဝဵင်းလူင်တူၼ်ႈတီး ၸိုင်ႈတႆးပွတ်းၸၢၼ်း ။ ၸႂ်ႉၸိုဝ်ႈ ပၢင်ဢုပ်ႇဢူဝ်းဝႃႈ တမ်းပိူင် လွင်ႈႁႅင်းထၢတ်ႈသီၶဵဝ်၊ မီးၽူႈယႂ်ႇၵူၼ်းလူင် ၼႂ်းပႃႇတီႇလႄႈၽွင်းတႅၼ်း ၶဝ်ႈႁူမ်ႈတင်းၼမ် ၊ ပိူဝ်ႈတႃႇ ႁဵတ်းသၢင်ႈၼႃႈၵၢၼ်ၵႂႃႇ ၼႂ်းသၽႃး ။

ငဝ်ႈငုၼ်းတီႇမူဝ်ႇၶရေႇၸီႇ ၸိူဝ်ႉၶိူဝ်းတႆး (SNLD) ႁိုဝ် ပႃႇတီႇႁူဝ်သိူဝ် ၸတ်းႁဵတ်းပၢင်ၵုမ်ဢုပ်ႇဢူဝ်း (Workshop) တမ်းပိူင် လွင်ႈႁႅင်းထၢတ်ႈသီၶဵဝ် ၊ တီႈႁူင်းႁႅမ်း (Cherry Queen Hotel) တီႈဝဵင်းလူင် တူၼ်ႈတီး ၊ ၸတ်းဝၼ်းတီႈ 09-10/07/2016 (ၶၢဝ်းတၢင်း 2 ဝၼ်း) ။ သႂ်ႇၸိုဝ်ႈပၢင်ဢုပ်ႇဢူဝ်းၵုမ်ၵၼ်ဝႃႈ တမ်းမူႇပိူင်ႁႅင်းထၢတ်ႈသီၶဵဝ် ။ မီးလုၵ်ႈၸုမ်းပႃႇတီႇႁူဝ်သိူဝ် ၸိူဝ်းပဵၼ်ၽွင်းတႅၼ်းၵမ်ႈၼမ် မႃးၶဝ်ႈႁူမ်ႈ ။ ဢၼ်မႃးဢွၼ်ႁူဝ်ၼမ်းၼႃႈသေ သပ်းလႅင်းပူင်သွၼ်ပၼ် ပဵၼ်ၸုမ်း Mekong Energy and Ecology Network (MEE Net) - ၼႆယဝ်ႉ ။


ၽွင်းတႅၼ်းသၽႃးၸိူဝ်ႉၶိူဝ်း ပႃႇတီႇႁူဝ်သိူဝ် ၸႄႈဝဵင်းလႃႈသဵဝ်ႈ ၸၢႆးဝၼ်းလႅင်းၶမ်း လၢတ်ႈဝႃႈ - ပေႃးၵဵဝ်ႇၵပ်းလွင်ႈ ႁႅင်းၾႆးၾႃႉၼႆ ၼႂ်းၸိုင်ႈမိူင်းႁူမ်ႈတုမ်မၢၼ်ႈၼႆႉ ဢမ်ႇပႆႇမီးပၵ်းပိူင်လီလီ ။ ၵွပ်ႈၼႆ တီႈပၢင်ၵုမ်ၼႆႉ တေႁႃတၢင်းသေတမ်းပိူင်ၵႂႃႇ ႁႂ်ႈမီးပၵ်းမီးပိူင် ပိူဝ်ႈတႃႇပဵၼ်ပၢၵ်ႇပဵၼ်သဵင်သေ ဢဝ်ၼမ်းဢုပ်ႇဢူဝ်းၼႂ်းသၽႃး - ဝႃႈၼႆ ။


ၼိူဝ်မႄႈၼမ်ႉၶူင်းၵေႃႈ ပိူဝ်ႈတႃႇတေဢဝ်ႁႅင်းၼမ်ႉသေ ႁဵတ်းဢွၵ်ႇႁႅင်းၾႆးၾႃႉၼႆႉ ႁဵတ်းသၢင်ႈၶူင်းၵၢၼ် တဵင်ၾၢႆမီးပဵၼ်လၢႆလၢႆတီႈ ။ လွင်ႈၸိူဝ်းၼႆႉ ဢၼ်ၵူၼ်းမိူင်းတေလႆႈတေႁူပ်ႉထူပ်းၼႆႉ ၽွၼ်းၸႃႉမၼ်း တေၼမ်လိူဝ်ၽွၼ်းလီ ။ သင်ၸိူဝ်ႉဝႃႈၽွင်းတႅၼ်းၶဝ် ႁူႉလွင်ႈတၢင်းမၼ်းလီလီၸိုင် မီးၸိူင်ႉႁိုဝ်မႃးၵေႃႈ တေၸၢင်ႈၼမ်းဢဝ်ဢုပ်ႇလၢတ်ႈ ၊ တေၸၢင်ႈၶပ်းၶိုင်ၵႂႃႇ ၼႂ်းသၽႃး ။


ဝၢၼ်ႈမိူင်းႁဝ်းၶႃႈၼႆႉ ၾႆးၾႃႉၼႆႉ တိုၼ်းလူဝ်ႇယူႇယဝ်ႉ ။ ၵူၺ်းၵႃႈ ၼႂ်းၵၢၼ်ၸႂ်ႉၾႆးၾႃႉၼႆႉ ၼင်ႇႁိုဝ်ပေႃး တေလႆႈ ၽွၼ်းလီလိူဝ်ၽွၼ်းႁၢႆႉၼၼ်ႉ ဢိင်ၼိူဝ်ပၢင်သွၼ်ၼႆႉသေ ႁဝ်းၶႃႈၵေႃႈလႆႈပၢႆးပၺ်ၺႃ တီႈၽူႈလူင်ႉလႅၼ်ႇၶဝ် ဢၼ်လႆႈၶူၼ်ႉၶႂႃႉဝႆႉလွင်ႈၸိူဝ်းၼႆႉသေ မႃးပူင်သွၼ်ပၼ် ။ ပိူင်လူင်တႄႉ ႁႂ်ႈမေႃဝူၼ်ႉမေႃသၢင်ႈသေ ႁႂ်ႈၽွင်းတႅၼ်းၶဝ်ၸတ်းသၢင်ႈႁၢင်ႈပွင် ၼႃႈၵၢၼ်ၵႂႃႇ - ၸၢႆးဝၼ်းလႅင်းၶမ်း လၢတ်ႈ ။


တီႈပၢင်ၵုမ်ဢုပ်ႇဢူဝ်း (Workshop) ၼႆႉ ၼႂ်းၽွင်းတႅၼ်းပႃႇတီႇႁူဝ်သိူဝ် 40 ၵေႃႉၼၼ်ႉ ဢၼ်ၶၢတ်ႇၵႂႃႇ မီးၸၢႆးထုၼ်းၺၢၼ်ႇ ၵျွၵ်ႉမႄးလႄႈ ၸၢႆးဢွင်ႇၵျေႃႇဢူး ၵုၼ်ႁဵင် ၶဝ်သွင်ၵေႃႉၼႆႉၵူၺ်း ၊ လိူဝ်သေၼၼ်ႉ မႃးၶဝ်ႈႁူမ်ႈတင်းမူတ်း - ၼႆယဝ်ႉ ။  (ၵၢၼ်မိူင်း)