Dr. တိၼ်ႇမဵဝ်းဝိၼ်း ႁူဝ်ပဝ်ႈၶွမ်ႊမတီႊႁၢင်ႈႁႅၼ်း တႃႇပွင်ပဵၼ်ပၢင်ၵုမ်လူင် ပီႁူဝ်ပၢၵ်ႇ 21 ဢွၼ်ႁူဝ်ၼမ်းၼႃႈၸုမ်းၸိူဝ်းသေ ႁွတ်ႈၽႅဝ်ဝဵင်းမိူင်းလႃး ၊ ႁူပ်ႉထူပ်းဢုပ်ႇဢူဝ်း ၸုမ်းမိူင်းလႃး တင်း ၸုမ်းဝႃႉ UWSA ။ လႆႈၸႂ်ၵၼ်ဝႃႈ ၸုမ်းဝႃႉတင်းၸုမ်းမိူင်းလႃး တေၶဝ်ႈႁူမ်ႈ ပၢင်ၵုမ်လူင်ပီႁူဝ်ပၢၵ်ႇ 21 ဢၼ်တေၸတ်းႁဵတ်း ။

ပၢင်ႁူပ်ႉထူပ်းၵၼ် ဢၼ်ပိုၼ်ၽႄႈတီႈၾဵတ်ႊၿုၵ်ႉ ၸွမ်သိုၵ်းၵဝ်ႇၶိၼ်ႇၸေႃႇဢူး

ပူၼ်ႉမႃးမိူဝ်ႈဝၼ်းတီႈ 17/06/2016 ) ၻွၵ်ႊတိူဝ်ႊတိၼ်ႇမဵဝ်းဝိၼ်း  ႁူဝ်ပဝ်ႈၶွမ်ႊမတီႊႁၢင်ႈႁႅၼ်း ပိူဝ်ႈတႃႇပွင်ပဵၼ်မႃး ပၢင်ၵုမ်လူင်ပီႁူဝ်ပၢၵ်ႇ 21 ႁိုဝ် ပၢင်ၵုမ်လူင်ပၢင်လူင် (ပွၵ်ႈ 2 ဢွၼ်ႁူဝ်ၸုမ်းၸိူဝ်း ဢွၵ်ႇၶၢဝ်းတၢင်းၵႂႃႇႁွတ်ႈ ၼႃႈလိၼ်ၶိုၵ်ႉတွၼ်းမၢႆ 4 ဝဵင်းမိူင်းလႃး ၸိုင်ႈတႆးပွတ်းဢွၵ်ႇ ။ ႁူပ်ႉထူပ်း ဢုပ်ႇဢူဝ်းၵၼ် တင်း ၸုမ်းမိူင်းလႃး ၸဝ်ႈၸၢႆးလိုၼ်းဢွၼ်ႁူဝ် ။ လိူဝ်သေၼၼ်ႉ ႁူပ်ႉထူပ်းပႃး ၸၢဝ်ႉၵေႃဢၢင်း တူဝ်တႅၼ်းၼႃႈလိၼ်ၶိုၵ်ႉတွၼ်းမၢႆ 2 ၸုမ်းဝႃႉ တီႈမိူင်းလႃး ။ ဢုပ်ႇဢူဝ်းလႆႈၸႂ်ၵၼ်ဝႃႈ ပၢင်ၵုမ်လူင်ပီႁူဝ်ပၢၵ်ႇ 21 ႁိုဝ် ပၢင်ၵုမ်လူင်ပၢင်လူင် ပွၵ်ႈ 2 ၼႆႉ ၸုမ်းဝႃႉ ၊ ၸုမ်းမိူင်းလႃး တေၶိုၼ်ႈႁွတ်ႈၶဝ်ႈႁူမ်ႈတင်းသွင်ၸုမ်း - ၼႆယဝ်ႉ ။


“ ၸႂ်ႈၶႃႈဢေႃႈ ။ တူဝ်တႅၼ်းတပ်ႉသိုၵ်းဝႃႉၼႆႉ ၸၢဝ်ႉၵေႃဢၢင်းဢွၼ်ႁူဝ်သေ မႃးထူပ်းၵၼ်တီႈၼႆႈ ။ ႁူပ်ႉထူပ်းၵမ်းၸုမ်းၸုမ်း ။ ၶဝ်ၶိုၼ်းပွင်ႇလၢတ်ႈဝႃႈ ပၢင်ၵုမ်လူင်ပီႁူဝ်ပၢၵ်ႇ 21 ႁိုဝ် ပၢင်ၵုမ်လူင်ပၢင်လူင် (ပွၵ်ႈ 2) ၼႆႉ ၶဝ်တေၵႂႃႇၶိုၼ်ႈယူႇ”- ၸၼ်ႉၽူႈဢွၼ်ႁူဝ်ၸဝ်ႈၼိုင်ႈ ဢၼ်ဢမ်ႇၶႂ်ႈဢွၵ်ႇၸိုဝ်ႈ လၢတ်ႈၼင်ႇၼႆ ။


တပ်ႉသိုၵ်းမိူင်းဝႃႉၽွမ်ႉႁူမ်ႈ UWSA ၼႃႈလိၼ်ၶိုၵ်ႉတွၼ်းမၢႆ 2 ၊ တင်း တပ်ႉသိုၵ်းဢူၺ်းလီ ၻီႊမူဝ်ႊၶရေႊၸီႊၸိူဝ်ႉၸၢတ်ႈ (NDAA) ၸုမ်းမိူင်းလႃး ၼႃႈလိၼ်ၶိုၵ်ႉတွၼ်းမၢႆ 4 ၼႆႉသၢင်ႈ / ဢဝ်လွင်ႈငမ်းယဵၼ်ၵၼ်ဝႆႉ တင်းလူင်ပွင်ၸိုင်ႈၸုမ်းသိုၵ်းမၢၼ်ႈ ပူၼ်ႉမႃးမိူဝ်ႈပီ 1989 ။ ထိုင်မႃးပီ 2011 ပၢၼ်လူင်ပွင်ၸိုင်ႈတဵင်းၸဵင်ႇၵေႃႈ သွင်ၸုမ်းၼႆႉ လႆႈၵေႃႇသၢင်ႈလွင်ႈငမ်းယဵၼ် လူင်းလၢႆးမိုဝ်း ၸၼ်ႉၸႄႈမိူင်းလႄႈ ၸၼ်ႉၸိုင်ႈမိူင်းႁူမ်ႈတုမ်ဝႆႉ ။ ပေႃးလူင်ပွင်ၸိုင်ႈမႂ်ႇၶိုၼ်ႈမႃး ၵဵဝ်ႇၵပ်းၼႃႈၵၢၼ် ၼႃႈဝၢၼ်ႈတႃမိူင်းၼၼ်ႉ ၸင်ႇတေဢုပ်ႇဢူဝ်းၵိူဝ်းၵုမ်ၵႂႃႇ ၊ ယုမ်ႇယမ်ႁပ်ႉဝႆႉၼင်ႇၼႆလႄႈ ဢၼ်လႆႈထူပ်း ယူႇမိူဝ်ႈလဵဝ် ပဵၼ်ငဝ်းလၢႆးလီယဝ်ႉ - လၢတ်ႈၵႂႃႇၼင်ႇၼႆ ။


“ ႁဝ်းၶႃႈၼႆႉ ၸၼ်ႉၸႄႈမိူင်းလႄႈ ၸၼ်ႉၸိုင်ႈမိူင်းႁူမ်ႈတုမ်ၸိူဝ်းၼႆႉ လူင်းလၢႆးမိုဝ်းလွင်ႈငမ်းယဵၼ်ဝႆႉယဝ်ႉ ။ ၵွပ်ႈပိူဝ်ႈၼၼ် ဢမ်ႇတၢပ်ႈလူင်းလၢႆးမိုဝ်းၵိုတ်းယိုဝ်းတူဝ်ႈမိူင်း (NCA) ၊ ၶႂ်ႈၶဝ်ႈႁူမ်ႈပၢင်ၵုမ်ၵၢၼ်မိူင်းၵႂႃႇၵူၺ်း ။ လွင်ႈၼႆႉ လူင်ပွင်ၸိုင်ႈတဵင်းၸဵင်ႇ တင်းတပ်ႉသိုၵ်းတႄႉ ဢမ်ႇၽွမ်ႉၸွမ်း ၊ ဢမ်ႇယွမ်းႁပ်ႉ”- ဝႃႈၼႆ ။


ယွၼ်ႉၼၼ် ပၢင်ၵုမ်လူင်လွင်ႈငမ်းယဵၼ် ဢၼ်လူင်ပွင်ၸိုင်ႈတဵင်းၸဵင်ႇ ဢွၼ်ႁူဝ်ၼမ်းၼႃႈၸတ်းႁဵတ်း တီႈၼေႇပျီႇတေႃႇ မိူဝ်ႈၼႂ်းလိူၼ်ၵျႅၼ်ႊၼိဝ်ႊရီႊ 2016 ၼၼ်ႉၵေႃႈ တူဝ်တႅၼ်းၸုမ်းဝႃႉ တင်းၸုမ်းမိူင်းလႃးၼႆႉ ဢမ်ႇၶဝ်ႈႁူမ်ႈ ။


မူႇၸုမ်းဢၼ် Dr. တိၼ်ႇမဵဝ်းဝိၼ်းဢွၼ်ႁူဝ်ၼမ်းၼႃႈၼႆႉ မိူဝ်ႈႁူဝ်လိူၼ်ၵျုၼ်ႊၼႆႉၵေႃႈ ႁူပ်ႉထူပ်းၵၼ်တင်း ၸုမ်းလူင်းလၢႆးမိုဝ်း NCA လႄႈ တင်းၸုမ်းၸိူဝ်းပႆႇလူင်းလၢႆးမိုဝ်း ဢၼ်ပဵၼ်ၶွင်ႊသီႊႁူမ်ႈတုမ်ၵူႈၸၢဝ်းၶိူဝ်း (UNFC) ။ ဝၢႆးလင်ႁူပ်ႉထူပ်းၸုမ်းဝႃႉတင်းၸုမ်းမိူင်းလႃးယဝ်ႉ တေသိုပ်ႇႁူပ်ႉထူပ်းၸုမ်းၸၢဝ်းၶိူဝ်း ယိပ်းၵွင်ႈၵၢင်ႇ ၸိူဝ်းပႆႇၵိုတ်းတိုၵ်း၊ မိူၼ်ၼင်ႇၸုမ်းၵူဝ်းၵၢင်ႉ (MNDAA) ၊ ၸုမ်းတဢၢင်း / ပလွင်ႈ (TNLA) ၊ ၸုမ်းရၶႅင်ႇ (AA) ၸိူဝ်းၼႆႉ ဢၼ်ၽူႈၵွၼ်းသိုၵ်းသုင်သုတ်း မီးၶေႃႈသင်ႇဝႆႉဝႃႈ တေလႆႈဝၢင်းၶိူင်ႈ ပိူင်လဵဝ်ၵူၺ်း ၼႆၼၼ်ႉ ။