သုၼ်လဵပ်ႈႁဵၼ်းလွင်ႈၸၢဝ်းၶိူဝ်း BCES လူင်းပိုၼ်ႉတီႈၼႂ်း ၸိုင်ႈတႆးပွတ်းၸၢၼ်း ပၼ်ပၢင်သွၼ် လွင်ႈၾႅတ်ႊတရႄႊ၊ သုၼ်ႇလႆႈသုၼ်ႇပဵၼ်ၵူၼ်း  လႄႈ ၶၵ်ႉတွၼ်ႈလွင်ႈ ငမ်းယဵၼ်တီႈဝဵင်းၼမ်ႉၸၢင် ၶၢဝ်းတၢင်းသၢမ်ဝၼ်း။

ပၢင်သွၼ် ၵၢၼ်မိူင်း လႄႈလွင်ႈငမ်းယဵၼ်

ဝၼ်းတီႈ 25-27/3 /2015 BCES Burma Center for Ethnics Study ဢွၼ်ႁူဝ်  ၸတ်းႁဵတ်းပၢင်သွၼ် တီႈဝဵင်းၼမ်ႉၸၢင်ၼၼ်ႉ မီးၵူၼ်းၶဝ်ႈႁူမ်ႈ 78 ၵေႃႉ။ ၶူးပူင်သွၼ် ၸၢႆးမွၼ်း၊ ၸၢႆးသၢႆလႅင်း၊ ၸၢႆးပီး၊ ယိင်းၼုမ်ႇၽွင် တင်းမူတ်းႁူမ်ႈ 8 ၵေႃႉ။ ပၢင်သွၼ်ၸတ်းႁဵတ်းတီႈ ဝိႁၢရ်ဝႃႇသူဝ်ႇ (ၵျွင်းဝႃႇသူဝ်ႇ) ဝဵင်းၼမ်ႉၸၢင်။ တႃႇပဵၼ်ပၢင်သွၼ် ၵေႃလိၵ်ႈလၢႆး လႄႈ ပႃႇတီႇၵၢၼ်မိူင်းၼႂ်းပိုၼ်ႉတီႈ ၸွႆႈၶပ်းၶိုင်။

ယိင်းၼုမ်ႇၽွင်လၢတ်ႈဝႃႈ - “ယိူင်းဢၢၼ်းပၢင်သွၼ် ဢၼ်လႆႈႁဵတ်းၵႂႃႇၼႆႉ ပိူဝ်ႈတႃႇၵူၼ်းမိူင်းၸိူဝ်း ဢၼ်ပႆႇႁူႉ  လွင်ႈတီႇမူဝ်ႇၶရႄႇၸီႇ လႄႈ ပိူင်ၾႅတ်ႇတရႄႇ လွင်ႈသုၼ်ႇလႆႈသုၼ်ႇပဵၼ် ၵူၼ်း ၸိူဝ်းၼၼ်ႉ  ႁႂ်ႈၶဝ်ပေႃးပွင်ႇၸႂ်ၼိူဝ် လွင်ႈသုၼ်ႇလႆႈသုၼ်ႇပဵၼ်ၵူၼ်း လႄႈ လၢႆးၵေႃႇတင်ႈမိူင်း ပိူင် ၾႅတ်ႊတရႄႊ လွင်ႈတီႊမွၵ်ႊၶရႄႊသီႊ ၸႅင်ႈၸႅင်ႈ လႄႈ ၶတ်းၸႂ် ပိုတ်ႇပၢင်သွၼ်ၵႂႃႇယူႇယဝ်ႉ ၊၊ပေႃးဝႃႈပၢင်သွၼ်တီႈၸႄႈဝဵင်း ၼမ်ႉၸၢင်ယဝ်ႉ တူဝ်ႈၵႂႃႇယဝ်ႉၸိုင် တေၶိုၼ်းသိုပ်ႇၵႂႃႇပိုတ်ႇပၢင်သွၼ်ပၼ်တီႈ ဝဵင်း ၽၢႆၶုၼ်” - ဝႃႈၼႆ။

ပၢင်သွၼ်ဢၼ်ၸတ်းႁဵတ်းမႃး ၼႂ်းၸိုင်ႈတႆးပွတ်းၸၢၼ်းလၢႆလၢႆတီႈၼၼ်ႉ မီးလုၵ်ႈၸုမ်း NLD ပႃႇတီႇၼူၵ်ႉယုင်း၊ SNLD ပႃႇတီႇႁူဝ်သိူဝ်၊ PNO ပႃႇတီႇပဢူဝ်း ၊ TYN ၵေႃႁူမ်ႈသၢင်ႈၵူၼ်းၼုမ်ႇ လႄႈ ၵူၼ်းၼုမ်ႇၼႂ်းၵေႃလိၵ်ႈလၢႆး လႄႈၾိင်ႈငႄႈ ၶဝ်ႈႁူမ်ႈၸွမ်း။

ပၢင်သွၼ်ၸိူင်ႉၼႆၼႆႉ ၸတ်းမႃးတီႈဝဵင်းပၢင်လူင် ဝၼ်းတီႈ 21-23/3/2015   ၵူၼ်းၶဝ်ႈႁူမ်ႈမီး 53 ၵေႃႉ။ ဝၼ်းတီႈ 17-19/3/2015 ၸတ်းႁဵတ်းတီႈဝဵင်းၵၢတ်ႇလေႃႉ(ၵလေႃး) ၵူၼ်းၶဝ်ႈႁူမ်ႈ 60။

ပၢင်သွၼ် ၵၢၼ်မိူင်း လႄႈလွင်ႈငမ်းယဵၼ်

BCES ၼႆႉၽွတ်ႈႁႅၼ်းမႃးမိူဝ်ႈ 2012 ၽွတ်ႈႁႅၼ်းတီႈၵဵင်းမႂ်ႇ ယိူင်းဢၢၼ်းတႄႉ ၵပ်းၵၢႆႇလူၺ်ႈလွင်ႈ ငဝ်ႈပိုၼ်ႉ ပိူင်တီႊမွၵ်ႊၶရႄႊသီႊ လႄႈ လၢႆးၵေႃႇတင်ႈမိူင်းလူၺ်ႈလွၵ်းပိူင်ၾႅတ်ႇတရႄႇ။