ၵႃးၵူၼ်းမိူင်းၶႄႇ 4 လမ်း၊ လုၵ်ႉတၢင်းပၢင်သၢင်း လူင်းမႃး ထုၵ်ႇၸဝ်ႈၼႃႈတီႈမၢၼ်ႈ တီႉၺွပ်းတီႈမိူင်းယၢင်း ၸိုင်ႈတႆးပွတ်းဢွၵ်ႇ။

ၵႃးမိူင်းၶႄႇ

ပူၼ်ႉမႃးမိူဝ်ႈဝၼ်းတီႈ 20/03/2015 ၵႃးမိူင်းၶႄႇ 4 လမ်း၊ လုၵ်ႉတၢင်းပၢင်သၢင်း (ၼႃႈလိၼ်ၽွင်းငမ်း တူဝ်ၵဝ်ႇဝႃႉ) လူင်းမႃးတၢင်းမိူင်းပွၵ်ႉ မိူင်းၽႅၼ် ႁူဝ်တဝ်းသေ ၽႅဝ်မႃးတီႈမိူင်းယၢင်း၊ လႆႈထုၵ်ႇၸဝ်ႈၼႃႈတီႈမၢၼ်ႈတီႉၺွပ်း တီႈမိူင်းယၢင်း ၸႄႈတွၼ်ႈၵဵင်းတုင် ၸိုင်ႈတႆးပွတ်းဢွၵ်ႇ။

ၵူၼ်းယူႇမိူင်းပွၵ်ႉၵေႃႉၼိုင်ႈလၢတ်ႈဝႃႈ- ရူတ်ႉၵႃးၸိူဝ်းၼႆႉ မၢၼ်ႈၶဝ်ထၢင်ႇဝႃႈပဵၼ်ၵႃး ဢၼ်တေၵႂႃႇ တေႃႉၶိူင်ႈၵွင်ႈၵၢင်ႇ မၢၵ်ႇမိုဝ်ႈၸိုၼ်းယၢမ်း တွၼ်ႈတၢင်းၸၢၼ်းမႃးတၢင်းၼိူဝ်၊ သမ်ႉၽိတ်းတၢင်းသေ မႃးတၢင်းမိူင်းယၢင်း။ ၵူၼ်းႁေႃႈၵႃးၵေႃႈ ၵႂၢမ်းဝႃႉ ၵႂၢမ်းတႆး ၵႂၢမ်းမၢၼ်ႈဢမ်ႇမေႃ၊ ၵႃးၶဝ်ၵေႃႈပဵၼ်ပၢႆႉမိူင်းၶႄႇ၊ ၵူၺ်းၵႃႈ လုၵ်ႉတၢင်းပၢင်သၢင်းသေလူင်းမႃး၊ ၶဝ်လႅပ်ႈတေၵႂႃႇတၢင်းမိူင်းလႃး- ဝႃႈၼႆ။

“ၸိူဝ်းၶဝ်ပဵၼ်ၵူၼ်းဢၼ်မႃးႁဵတ်းၵၢၼ်ပၼ်ဝႃႉ၊ ပဵၼ်ၵႃးသႅၼ်း 6 လေႃႉ 2 လမ်း၊ ၵႃး 10 လေႃႉ 2 လမ်း၊ ဢမ်ႇၸႂ်ႈၵႃးသိုၵ်း၊ ပဵၼ်ၵႃးၵူၼ်းမိူင်းၵူၺ်း၊ ၵႃးၼႆႉ ပဵၼ်သီမၢၵ်ႇၸွၵ်း။ မၢၼ်ႈၶဝ်တီႉဝႆႉမိူဝ်ႈဝၼ်းတီႈ 20/03/2015 သေ ပွႆႇပၼ်မိူဝ်းၶိုၼ်း ယၢမ်း 10 မူင်းမိူဝ်ႈဝႃး (ဝၼ်းတီႈ 23/03/2015)။ မၢၼ်ႈၶဝ်သင်ႇလၢတ်ႈဝႃႈ မႃးတၢင်းလႂ်ၵေႃႈ ႁႂ်ႈဢွၵ်ႇမိူဝ်းၶိုၼ်းတၢင်းၼၼ်ႉ-      ၵူၼ်းယူႇမိူင်းပွၵ်ႉ လၢတ်ႈထႅင်ႈၼင်ႇၼႆ။