ၸဝ်ႈၼႃႈတီႈၾၢႆႇထႆးလႄႈ ၸဝ်ႈၼႃႈတီႈၼႂ်းမိူင်းႁဝ်း တူၵ်းလူင်းလႆႈၸႂ်ၵၼ်ဝႃႈ တေႁူမ်ႇလူႇႁူမ်ႈတၢၼ်း ၸွမ်းၵၼ်သေ သၢင်ႈမိုတ်ႈၵိုဝ်းၸမ်ၸႂ်ၵၼ် ၶဝ်ႈဢွၵ်ႇၵၼ်။ တေမႃးႁူမ်ႈၵၼ်လူႇတၢၼ်း ယၢတ်ႇၼမ်ႉၶႂမ်ႈတဝ်ႈ တီႈဝတ်ႉၼွင်ဢုၵ်း၊ ဝၼ်းတီႈ 14 ၼႆႉ ပိုတ်ႇလၢၼ်ႇလႅၼ်လိၼ် တင်ႈတႄႇၵၢင်ၼႂ် 6 မူင်းတေႃႇထိုင်ၵၢင်ၶမ်ႈ 6 မူင်း။ ဝၢႆးလူႇတၢၼ်းယၢတ်ႇၼမ်ႉယဝ်ႉ ၸဝ်ႈၼႃႈတီႈသွင်ၾၢႆႇတေႁူမ်ႈၵၼ် ဢႅဝ်ႇၵၢတ်ႇဢႅဝ်ႇသႃးၸွမ်းၵၼ်၊ တီႈပၢင်ပိုတ်ႇၵၢတ်ႇၼၼ်ႉ တေမီးပႃးမေႃၵႂၢမ်းၵမ်ႈၽွင်ႈ မႃးႁွင်ႉၵႂၢမ်း- ၵူၼ်းပွတ်းၼွင်ဢုၵ်းၵေႃႉၼိုင်ႈ လၢတ်ႈၼႄၼင်ႇၼႆ။

ၸိူင်ႉႁိုဝ်ၵေႃႈယဝ်ႉ ၵၢၼ်ပိုတ်ႇလၢၼ်ႇပွၵ်ႈၼႆႉ ဢမ်ႇလႆႈမွၵ်ႇထိုင်ၸဝ်ႈၼႃႈတီႈမၢၼ်ႈ ၾၢႆႇၽွင်းငမ်းၸႄႈဝဵင်း (မိူင်းတူၼ်) ၸိူဝ်းၼႆႉ မႃးၶဝ်ႈႁူမ်ႈပဵၼ်တၢင်းၵၢၼ်။ ပဵၼ်ၽူႈယႂ်ႇၵူၼ်းလူင်ၼႂ်းပိုၼ်ႉတီႈ တင်းၸဝ်ႈၼႃႈတီႈထႆး မႃးႁူမ်ႈၵၼ်သေ ႁႅၼ်းတၢၼ်း ႁဵတ်းတၢင်းလီ ႁူမ်ႈၵၼ်တီႈဝတ်ႉၵူၺ်း။ သင်ၶၼၼ်ႉ ၼိမၼ်တၼ တင်းမူတ်း 9 တူၼ်၊ ၾင်ႇမိူင်းထႆး 5 တူၼ်၊ တၢင်းၾင်ႇမိူင်းတႆး 4 တူၼ်- ၼႆယဝ်ႉ။

ပေႃႈၵႃႉမႄႈၵႃႉ ၵူၼ်းၵႃႉၵူၼ်းၶၢႆၶူဝ်းၶွင်ၶဝ်တႄႉ ၵမ်ႈၼမ်တေပဵၼ်ၵူၼ်း တၢင်းမိူင်းထႆး၊ ၵူၼ်းၸိူဝ်းမႃး ဢႅဝ်ႇၵၢတ်ႇ ၸၢႆႇၵၢတ်ႇ တေပဵၼ်ၵူၼ်းတၢင်းမိူင်းတႆးႁဝ်း၊ တေပၼ်ၶဝ်ႈလွတ်ႈလႅဝ်းထၢင်ႇႁၢင်ႈ။ ပၢင်ပွႆး ဢၼ်ၸတ်းၸွမ်းလႅၼ်လိၼ်ၸိူင်ႉၼႆၼႆႉ ၸတ်းပွၵ်ႈတီႈ 2 ပႃးၵမ်းၼႆႉယဝ်ႉ၊ ပွၵ်ႈဢွၼ်တၢင်း ၸတ်းမိူဝ်ႈႁူဝ်ပီ 2014 ၊ မိူဝ်ႈၽွင်းၼၼ်ႉ မီးၵူၼ်းလုၵ်ႉတၢင်းမိူင်းတႆး မႃးၶဝ်ႈပွႆးႁဵင်ပၢႆ။ ၵမ်းၼႆႉၵေႃႈ ယုမ်ႇယမ်ဝႃႈ တေမႃးၶဝ်ႈၼမ်ယူႇ- ၸၢႆးသျႆး ၵေႃႉၵပ်းသၢၼ်ဝူင်ႈၵၢင်သွင်ၾၢႆႇသွင်မိူင်း လၢတ်ႈၼႄၼင်ႇ။