ပူၼ်ႉမႃးမိူဝ်ႈဝၼ်းတီႈ 12/08/2014 ၽွင်းလူင် ၵိုၵ်းလုမ်းၸွမ်ၸိုင်ႈမိူင်းမၢၼ်ႈ ၼေႇပျီႇတေႃႇ ဢူးဢွင်ႇမိၼ်း ၵေႃႉပဵၼ်ၵႅမ်ႁူဝ်ပဝ်ႈ (မၢႆ2) ၸုမ်းၶိုင်ပွင် လွင်ႈငမ်းယဵၼ် ၸၼ်ႉၸိုင်ႈမိူင်းႁူမ်ႈတုမ် (UPWC) ႁွင်ႉဢဝ်ပႃႇတီႇၵၢၼ်မိူင်း 66 ပႃႇတီႇသေ ဢုပ်ႇဢူဝ်းၵၼ်။ ပၢင်ဢုပ်ႇဢူဝ်းၵၼ်ၼၼ်ႉ မီးတူဝ်တႅၼ်း 66 ပႃႇတီႇ ၶဝ်ႈႁူမ်ႈၵူၼ်းပၢၵ်ႇပၢႆ။ ဝၢႆးဢုပ်ႇဢူဝ်းၵၼ်ယဝ်ႉ ဢွၵ်ႇၶေႃႈပိုၼ်ၽၢဝ်ႇ သူၼ်းဢီး ပိူဝ်ႈတႃႇႁႂ်ႈပဵၼ်မႃး ပၢင်ၵိုတ်းယိုဝ်းပတ်းပိုၼ်ႉၸိုင်ႈမိူင်းဝႆးဝႆးၼႆႉ- ၼႆယဝ်ႉ။

ၵဵဝ်ႇၵပ်းၶေႃႈပိုၼ်ၽၢဝ်ႇၼႆႉ ၸၢႆးၼုတ်း ၽူႈၼမ်းၼႂ်းၵူႈလွင်ႈလွင်ႈ ပႃႇတီႇႁူဝ်သိူဝ် (SNLD) လၢတ်ႈဝႃႈ- ပိူင်လူင်မၼ်း လၢတ်ႈပႃႇတီႇ 66 ပႃႇတီႇၸိူဝ်းၼႆႉ ႁႂ်ႈလူင်းလၢႆးမိုဝ်း၊ ပိူဝ်ႈတႃႇ ႁႂ်ႈမီးၵၢၼ်ၵိုတ်းယိုဝ်း ပတ်းပိုၼ်ႉၸိုင်ႈမိူင်းဝႆးဝႆး၊ ပေႃးပၢင်ၵုမ်ယဝ်ႉၵေႃႈ ဢွၵ်ႇၶေႃႈပိုၼ်ၽၢဝ်ႇ။ လၢႆးႁဵတ်းၸိူင်ႉၼႆ မၼ်းဢွၵ်ႇ ၾၢင်ႁၢင်ႈ သူၼ်းဢီးႁႂ်ႈမီးၵၢၼ်ၵိုတ်းတိုၵ်းပတ်းပိုၼ်ႉ ဝၢၼ်ႈမိူင်း၊ တေသၢၼ်ၶတ်းၵေႃႈ ပဵၼ်လွင်ႈ ယၢပ်ႇၽိုတ်ႇဝႆႉ။ ၵူၺ်းၵႃႈ မၼ်းမိူၼ်ၼင်ႇ ၵႂႃႇမိပ်ႇဢီးတၢင်ႇမူႇတၢင်ႇၸုမ်း ႁႂ်ႈၵိုတ်းတိုၵ်းၵၼ်ဝႆးဝႆးလႄႈ လွင်ႈၼႆႉ မၼ်းဢမ်ႇပေႃးၶႂ်ႈတူၵ်းထုၵ်ႇ- ဝႃႈၼႆ။

လိၵ်ႈပိုၼ်ၽၢဝ်ႇ တိုၵ်းသူၼ်းပႃးဝႃႈ ပေႃးဝႃႈၵိုတ်းယိုဝ်းၵၼ် ပတ်းပိုၼ်ႉၸိုင်ႈမိူင်းယဝ်ႉ ယႃႇႁႂ်ႈမီးၵၢၼ် ၸိူင်ႉၵၢတ်ႈသေ ႁႂ်ႈသိုပ်ႇမီးပၢင်ဢုပ်ႇဢူဝ်းၵၢၼ်မိူင်းဝႆးဝႆး- ၼႆယူႇ။